Кандидатот за претседателска номинација на Републиканската партија и поранешен американски претседател, Доналд Трамп, изјави дека би ја „охрабрил“ Русија да ја нападне секоја членка на НАТО што нема да ги исплати своите обврски кон Северноатлантската алијанса.

Коментарот на поранешниот шеф на државата, веднаш наиде на остри критики од Белата куќа, која изјавата на Трамп ја нарече „застрашувачка и несоодветна“.

Трамп изјави дека за време на состанок на НАТО, му рекол на шеф на „голема земја“ дека под негово водство САД не би ги штителе државите „деликвенти“, односно тие што не си ги исполнуваат обврските.

Еден од претседателите на една голема земја стана и праша: Господине, ако не плаќаме и Русија не нападне, дали ќе не заштитите?“, изјавиТрамп.

На тоа, тој одговорил дека сите треба да си ги исполнуваат обврските.

Не плаќате, криминалци сте? Не, не би ве заштитил, би ги охрабрил да прават што сакаат. Треба да платиш. Треба да си ги платиш сметките, му одговорил Трамп.

Трамп ова го изјави за време на кампањата за претседателска номинација во Конвеј, Јужна Каролина, пред внатрепартиските републикански избори во таа американска држава на 24 февруари.

Прашан да ја коментира изјавата на Трамп, портпаролот на Белата куќа Ендрју Бејтс рече дека „охрабрувањето на убиствените режими да ги напаѓаат нашите (американски) најблиски сојузници е ужасно и несоодветно и ја загрозува националната безбедност на САД, глобалната стабилност и американската економија“.

Договорот за НАТО содржи одредба која гарантира заедничка одбрана на земјите-членки во случај на напад врз која било членка, потсети Бејтс.

Трамп беше жесток критичар на Организацијата на Северноатлантскиот договор за време на неговото претседателствување и постојано се закануваше дека ќе ја повлече земјата од НАТО, доколку другите членки не ги исполнуваат своите обврски. Тој често се жалеше дека САД плаќаат повеќе за функционирањето на Алијансата од другите членки.

Бејтс истакна дека сегашниот американски претседател Џо Бајден ги обновил американските воени сојузи по преземањето на функцијата во 2021 година и се погрижил Алијансата сега да биде посилна и повитално од кога било порано.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.