Русија го презеде претседавањето со Советот за безбедност на ОН и покрај апелот на Украина до членките да го блокираат руското преземање, пренесе денеска Би-би-си.

Украинскиот министер за надворешни работи Дмитро Кулеба оцени дека рускиот трансфер е „најлошата првоаприлска шега досега“ и „силен потсетник дека нешто не е во ред со начинот на функционирање на меѓународната безбедносна архитектура“.

Секоја од 15-те членки на Советот за безбедност на ОН на еден месец го презема претседавањето со телото и тоа врз ротирачка основа. Последен пат Русија претседаваше со Советот за безбедност, во февруари 2022 година, месецот кога ја почна инвазијата врз Украина.

Тоа значи дека Советот за безбедност е предводен од земја чиј претседател е под меѓународна потерница за наводни воени злосторства, откако Меѓународниот кривичен суд минатиот месец издаде налог за апсење на Владимир Путин.

И покрај приговорите на Украина, САД соопштија дека нема да ја блокираат Русија, постојана членка на Советот за безбедност, да го преземе претседателството.

Постојани членки на Советот за безбедност се САД, Велика Британија, Франција, Кина и Русија.

Функцијата е главно процедурална, но рускиот амбасадор во ОН, Васил Небензија, за Тасс изјави дека планира да организира неколку дискусии, вклучително и една за контрола на оружјето.

Тој додаде и дека ќе се разговара и за „новиот светски поредок“ што ќе го „замени униполарниот“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.