Лидерот на руската опозиција Алексеј Навални денеска е осуден на девет години затвор „за измама од особено големи размери“, јави ДПА.

Навални (45) беше прогласен за виновен за проневера на средства за неговата антикорупциска фондација – која сега е забранета во Русија – и за навреда на судија во претходно судење.

Претходно денеска судијката Маргарита Котова во пресудата наведе дека Навални „извршил измама, односно кражба на туѓ имот со измама и повреда на довербата“. Според пресудата, судот ја утврдил вината на Навални за сите четири точки од обвинението за „измама од особено големи размери“.

Навални е најистакнатиот противник на долгогодишниот руски претседател Владимир Путин. Повеќекратните правни постапки против него беа критикувани на меѓународно ниво како политички мотивирани.

Тој веќе издржува казна од неколку години во затворски логор во Покров, на околу 100 километри источно од Москва.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.