Домаќинките беа повикани да замесат леб, но не гледам проблем и мажот да замеси леб, особено не, во ваква глобална транзиција каде што жената и економски придонесува колку и мажот, можеби и повеќе во некои семејства, каде што и таа паралелно одговара на сите современи општествени текови, рече пратеничката и претседателка на ЛДП, Моника Зајкова во “Аргумент плус” на ТВ 24.

Немаме едукација од најрана возраст и родовата еднаквост сеуште ја третираме како некаков феномен за којшто треба да зборуваме, за жал живееме во време на патријахалните родови и имаме  општество полно со стереотипи коишто треба да ги надминуваме, едукацијата од најрана возраст за тоа што значи родова еднаквост и човекови права треба итно да се внесе во училишните програми. Не треба да живееме како во некој минат век, каде што на жените не им давале ни да се образуваат. Како  општество само низ едукација може да работиме на промена на свеста, а не чека уште долга работа и нас политичарите, и граѓанскиот сектор и на секој еден којшто придонесува во општество, вели таа.

Според Зајкова треба да се работи на медиумската писменост, затоа што не може да допуштиме да произлегуваат наслови како: “жените треба да ги засукаат ракавите”.

Се согласувам дека секоја жена е важна и секоја жена треба да биде заштитена. И како општество мора многу да работиме на тоа. Пред се, тргнувајќи можеби лично од себе. Да, точно е дека ние како политичари треба да имаме повисок праг на толеранција, меѓутоа не знам до каде треба да оди тој праг. Секогаш жената ќе биде најголем предмет на напади, на онлајн вербален напад, па и најчесто тие вербални напади после преминуваат и во дело на напад. Се трудиме да преземеме низа на законски решенија, стратегии меѓутоа, гледаме дека и покрај тие низа на закони, стратегии, решенија, се уште жената се соочува со насилство, додава таа.

Во однос на неказнивоста Зајкова вели дека, голем дел од жените, особено во руралните средини, од страв од стигмата не се осмелуваат да пријават кога се жртва на вербален или физички напад.

Ние сведочиме на секаков тип на насилство. Кога ќе видите, тргнувајќи од социјалните мрежи, коишто се еден нерегулиран простор, па се до секојдневното општествено живеење. Покрај жените тука ќе потенцирам и за ЛГБТ заедницата, за тоа што тие категории на граѓани, никој како да не ги третира и дури и се случува и често, а и внатре во институциите а и во законодавниот дом да се заборави дека имаме и други ранливи категории на граѓани, како Ромите, лицата со попреченост и др.- вели Зајкова.

Истрагите ги води јавното обвинителство, процесите ги води судот. Сепак неказнивоста е  поврзана сo она горливо прашање коешто го мачи целото општество, а тоа е функционалноста на правосудниот систем и ниската доверба на граѓаните во него, коешто токму произлегува баш од ваквите работи, затоа што сите говорат дека пријавиле или алармирале, а завршница на постапките нема, додава Зајкова.

Според неа постојат многу голем број на механизми коишто можат да се искористат за почетна реформа во правосудниот систем.

Треба да се научиме да пријавуваме. Во поглед на застареност на кривичните дела имаме модел од Хрватска којшто многу успешно го решава застарувањето каде што стриктно наведува, кои кривични дела, каде што се вклучително делата од корупција како злоупотреба на службена положба на овластување, на којшто најчесто подлежат носителите на јавни функции, Не застаруваат или бараат поголем број на години за апсолутна  застареност во однос на останатите кривични дела. Има низа на механизми но, треба политичка волја и консензус, бидејќи работите, сами нема да се менуваат и не е целта некој да ја започне реформата, другиот да ја блокира, па после обратно и така да се вртиме во круг, заклучува Зајкова.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.