Министерството за надворешни работи нема добиено допис од Европската Унија (ЕУ) дека ќе дозволи движење на македноските државјани со пасоши со старото уставно име, возврати денеска министерот за надворешни работи Бујар Османи како одговор на неговиот колега за вантрешни работи Панче Тошковски.

Министерот за внатрешни работи во техничката влада Тошковски изјави дека денеска добил допис од Брисел дека Европската Унија нема да прави проблем доколку граѓани на Република Македонија треба да патуваат со пасоши со старото уставно име. На ова Османи реплицираше со појаснување дека одлуката за ова прашање ја носи секоја земја одделно, како нејзино суверено право.

Ние сме во постојана комуникација и со институциите на Европската комисија, амбасадорот е во секојдневна комуникација, јас директно и со земјите членки. Значи, земјите членки сами одлучуваат во однос на тоа како ќе се однесуваат во однос на валидноста на пасошите, рече Османи одговарајќи на новинарски прашања.

Засега Швајцарија има доставен известување со нота, дека ќе дозволува влез на македонските државјани со старите пасоши, а Босна и Херцеговина пак се изјаснила дека ќе постапува спротивно.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.