Одлуката за уставни измени е одлука за членство на државата во ЕУ, а сите политички партии имаат одговорност да обезбедиме европска иднина на граѓаните. Иако опозицијата реши да не учествува во работната група за подготовка на уставните измени, групата останува отворена за нивните сугестии и претставници.

Ова го изјави премиерот Димитар Ковачевски, во интервју за дневникот на ТВ Сител дадено во Виена Австрија, каде тој се наоѓа во работна посета.

-Процесот на уставни измени е структуриран процес. Предлагач на измените ќе биде Владата и затоа е формирана работна група во рамки на Министерството за правда, во која членуваат експерти по уставно право, од академската заедница, експерти коишто имаат големо практично искуство во уставното право, како поранешен претседател на Уставен суд, поранешни уставни судии, професори од областа на уставното и сродните права, како и претставници на политичките партии. За жал, опозицијата, како и во многу други наврати и други процеси реши да не учествува во работната група. Меѓутоа, таа останува секогаш отворена за нивни сугестии, за вклучување на нивни претставници, со оглед на тоа дека овој процес не е процес на еден човек, не е процес на една политичка партија, не е процес на една Влада, туку е процес на целата држава бидејќи ние имаме одговорност пред граѓаните, сите политички партии да обезбедиме европска иднина на граѓаните, рече Ковачевски. Тој посочи дека процесот на уставни измени е една од одлуките коишто ќе треба да ги донесеме до полноправното зачленување во Европската унија. -По овие уставни измени, следуваат и други одлуки за коишто, исто така, има потреба од двотретинско мнозинство во Собранието, а тоа се реформи на јавна администрација, реформи на правосудство, обвинителството, децентрализација. Тоа се закони, коишто, според нашето уредување, се носат со двотретинско мнозинство. Затоа велам дека оваа одлука е одлука за зачленување на државата во Европската унија и така ја третираме од страна на Владата со оглед на тоа дека е значајна за иднината на државата, да стане земја членка на Европската унија, истакна премиерот.

Тој оцени дека политичарите треба да носат одлуки со коишто обезбедуваат подобра иднина на сегашните и на идните генерации.
-Европска иднина практично значи поголеми плати, подобар систем, пофункционални институции, подобри услуги за граѓаните и сето тоа да го имаат во нашата држава, во Македонија бидејќи тоа граѓаните го потврдиле дека го сакаат. Нашите граѓани сакаат да живеат во Европската унија, меѓутоа да живеат во ЕУ во Македонија, во својата земја, а не да живеат во ЕУ во туѓина, рече премиерот Ковачевски.


Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.