Политичкиот дискурс околу уставните измени треба да се одвива за тргнување на одредницата 20 отсто за употребата на албанскиот јазик, но не и за промени околу употребата на Бадентеровото мнозинство и балансерот за вработувања, изјави денеска на прес-конференција претседателот на Движење Беса, Биљал Касами и градоначалник на Тетово.

Според него, не се работи за две исти работи, 20 отсто, вели тој, е дефиниција за јазикот за тие кои се над 20 отсто.

– И со последниот попис се докажа дека повеќе од 20 посто се Албанците во Македонија и нема некој друг народ кој е блиску до 19, па да чекаме дали ќе исполни тој услов. Што се однесува до другите механизами за поддршка на немнозинските заедници, мислам дека тоа е во делот на регулирањето на државата. Така да мислам дека не е време за отворање на такви теми кои сигурно доколку би се отвориле, би биле во правец на подобрување на позицијата на немнозинските заедници. Меѓународното и европското право не познава можност со демократски механизми да се уназада правата на немнозинските заедници. Сме подготвени да разговараме и за таа тема, но во правец на подобрување на правата на сите етничките заедници во Македонија, освен македонската етничка заедница која ја има државотворноста и сите права, истакна Биљал Касами.

Тој вели дека како Движење Беса имаат редовни консултации со меѓународните партнери, а партијата ги поддржува сите активности за уставните измени и забрзување на интеграцискиот пат на Македонија.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.