На сцената на Националната опера и балет вечер во 20:00 часот ќе биде изведена „Норма“, ремек-делото на Винченцо Белини, која се смета за една од водечките белканто опери во светската оперска литература.

„Норма“ е трагична опера во два чина, која најмногу се поврзува со магичната арија-молитва на Норма „Casta Diva“. Трогателна приказна за друидската свештеничка и нејзината саможртва во име на љубовта.

Операта е под диригенство на Иван Еминовиќ, режијата е на Ренато Бонајуто (Италија), сценограф и костимограф е Флавио Арбети (Италија), коавтор на костимите Марија Пупучевска, концерт-мајстор е Јане Бакевски, а хор-мајстор Ѓурѓица Дашиќ.

Во насловната улога ќе настапи Весна Ѓиновска-Илкова, во улогата на Полионе Зоран Сотиров, Адалџиза ќе ја донесе на сцената Сандра Митровска, во улогата на Оровезо е Владимир Саздовски, во улогата на Клотилде ќе настапи Соња Пендовска Мадевска, а како Флавио Дејан Стоев, Деца: Василиј и Стефан Дашиќ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.