Коста К., малолетникот кој на 3 мај 2023 го изврши масовното убиство во основното училиште Владислав Рибникар во Белград убивајќи девет врсници и чувар, доби статус на оштетен во судската постапка против своите родители, пренесуваат српските медиуми.

Како што изјави Ирина Боровиќ, бранителката на родителите на Коста К., обвинети се за кривично дело занемарување и злоставување малолетно лице.

Тој доби статус на оштетен бидејќи делата за кои се товарат неговите родители се однесуваат на него и штетата која со тоа му е нанесена“, објасни Боровиќ.

Владимир К., таткото на момчето убиец, ги негираше обвинувањата за злоставување и занемарување дете поради кои тој и сопругата се обвинети од Високото јавно обвинителство во Белград. Покрај тоа, тој одбил да одговара на прашања на обвинителот и адвокатот, пренесува Танјуг. Следното рочиште е закажано за 9 декември.

Обвинителството, според српските медиуми, го проширило обвинението, со кое Владимир К. се обвинува за тешко кривично дело против општата безбедност, додека Милијана К., мајката на малолетниот Коста К., е обвинета за кривично дело недозволено чување и носење оружје.

Таа се брани од слобода, додека нејзиниот сопруг е во притвор од апсењето на 3 мај минатата година. Проширеното обвинение следеше по испрашувањето на малолетниот Коста К.

Како што јавуваат српските медиуми, во овој процес им се суди на родителите на момчето, како и на инструкторот на стрелиште Немања М., кој е обвинет за кривично дело давање лажен исказ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.