Производната цена на електричната енергија во нашиот најголем капацитет РЕК Битола, во моментов изнесува 136 евра, додека на ниво на ЕСМ таа цена е нешто повеќе од 118 евра, за мегават-час. Сепак, не можеме само така грубо да ги гледаме податоците, туку одиме чекор понатаму и размислуваме, анализираме и се подготвуваме за тоа што следи, а тука мислам на планските активности на компанијата за наредната година - рече Зоран Коњановски, директорот на производство во ЕСМ, во интервјуто за ТВ Магазинот 360 во контекст на претстојното поднесување на понудата до Универзалниот снабдувач ЕВН Хоум за потребите на домаќинствата и загубите на електродистрибуција, која до крајот на месецов ЕСМ треба да ја достави за периодот јануари-јуни 2025 година“.

Еден од приоритетите и поставените предизвици на Управниот одбор за наредниот период е намалување на производната цена на АД ЕСМ. Со стручен и професионален пристап кон обврските и домаќинско работење, наредната година ќе се обидеме да ја намалиме производната цена за 35-40 проценти, а тој тренд на опаѓање, одлучни сме да продолжи и во наредните години.Со оглед дека затекнавме лоша состојба во рудниците во РЕК Битола, ќе ни биде потребно одредено време да ги стабилизираме и во согласност со рударските проекти во наредните две години да обезбедиме откривки на јаглен кои веруваме дека драстично ќе ја намалат или целосно ќе ја анулираат потребата од дополнителна набавка на лигнит, вели Коњановски.

Двата капацитети за производство на примарна енергија – јаглен Суводол и Брод Гнеотино, имаат можност да продуцираат по 5 милиони тони годишно, што е доволно за работа на трите термоблокови во РЕК Битола, но таа количина во овој момент не сме во можност да ја постигнеме. Според нашите проекции, ископот од 5 милиони тони би го реализирале во 2027 година, со што или ќе нема потреба за дополнителен увоз на овој ресурс, или ќе бидат потребни далеку помали количини за да ги оствариме производните планови за електрична енергија – изјави директорот за производство Коњановски.

Тој навести дека во тек е период на финансиска консолидација на АД ЕСМ, кој се очекува да заврши кон крајот на наредната година, по што се очекува Друштвото во целост да излезе од кризата во која беше затекната при смената на раководствата.

The post Граѓаните не ги очекува финансиски шок од новата цена на струјата, тврди Коњановски appeared first on Република.

Констатирана е состојба на хаос во рудниците за јаглен во Битола, затоа што воопшто не се водело сметка отстранувањето на јаловинските маси да се врши согласно главниот и дополнителниот проект, а како последица на тоа, нема откривки на јаглен од кои може да се обезбеди континуиран и безбеден ископ за потребите на термоблоковите, истакна Зоран Коњановски, директор за производство и член на УО на АД ЕСМ.

Коњановски нагласи дека во претстојната грејна сезона, новите раководства на АД ЕСМ и на РЕК Битола влегуваат со извршена сеопфатна анализа на актуелните состојби во рударско енергетските комбинати.

Претходните раководства на АД ЕСМ, на РЕК Битола не ги подготвувале капацитетите во пресрет на грејната сезона. Утврдено е дека нема доволно количини на јаглен, а затекнатиот јаглен на депониите е со исклучително лош квалитет. Веднаш консултиравме професори од Рударскиот факултет при Универзитетот „Гоце Делчев“ во Штип кои наскоро ќе излезат со констатирани забелешки за работата на рудниците во комбинатот со насоки во однос на понатамошната експлоатација на јаловината и на јагленот. При увид на теренот, од реномираните експерти се споделени впечатоци дека ископите во постојните рудници при РЕК Битола се вршени спротивно на проектната документација, посочи Коњановски.

Во изјава за медиумите, Коњановски истакна дека во моментов, користејќи ги сите ресурси што комбинатите ги имаат на располагање, направена е реорганизација во однос на капацитетите во рудниците, со цел во најкус можен рок да се обезбеди фронт за ископ на квалитетен јаглен.

Обезбедивме многу поповолни финансиски услови за набавка на квалитетен јаглен од веќе постоечки договор за набавка на овој енергент од увоз, со што  овозможивме одлични предуслови за реализација на планираните производни количини на електрична енергија за оваа грејна сезона.  Сакам  да истакнам, рече Коњановски, дека за разлика од претходните набавки на јаглен, за сите идни набавки на овој енергент, тогаш кога ќе има потреба, особен акцент ќе се даде на квалитетот.

Од АД ЕСМ информираа дека имаат докази дека изминативе неколку години се увезувал јаглен со катастрофален квалитет, со специфики кои се во спротивност со пропишаните за работа на термоелектраните. Тоа предизвикало хаварии на блоковите поради кои ЕСМ издвојувале милионски суми за санација.

Ние имаме одговорност за заштита на животната средина и здравјето на граѓаните, но истовремено и одговорност да ги сочуваме  термоелектраните - како материјално и национално добро. За сите неправилности кои продуцирале недомаќинско и неодговорно однесување, АД ЕСМ ги разгледува можностите од покренување на кривична и дисциплинска постапка кон раководни лица што директно влијаеле на затекнатите состојби во битолскиот рударско енергетски комбинат, најави Коњановски за време на денешната посета на РЕК Битола.

Во моментов, ремонтните активности во блок 2 во РЕК Битола се завршени и тој е веќе на мрежа, додека ремонтот на ТЕ Битола 3 е завршен во согласност со планот. Зафатот на ТЕ Битола 1 се уште не е ни започнат.

The post Коњановски: Се купувал исклучително лош јаглен за РЕК, начекавме хаос во рудниците appeared first on Република.