По еднодневен прекин на сообраќајот на возовите во земјава поради штрајкот на машиновозачите, попладнево во 14:30 часот со повторно пуштање во сообраќај на возот Скопје - Битола преку Велес и Прилеп повторно е воспоставен железничкиот сообраќај во земјава, информираат за МИА  од Железничката станица Велес.

Следен воз е возот кој од Скопје за Гевгелија поаѓа попладнево во 16,55 часот.

Според информациите прекинот на железникиот сообраќај бил поради неисплатени додатоци на плата на машиновозачите и кондуктерите за поминати километри и минат труд, кои по еднодневен штрајк им биле одобрени од раководниот тим на ЈП Македонски Железници транспорт.

Инаку, поради штрајкот на машиновозачите и вчера и утрово голем број патници од Велес и другите попатни станици најмногу од нив работници, ученици и студенти кои секојдневно патуваат за Скопје и имаат купени месечни билети од Железница мораа да си дадат дополнителни средства и до Скопје наместо со воз да патуваат со автобус. Голем дел од нив реагираат дека утрово дале дополнително средства и задоцниле на работа или на училиште.

Како што информираат од Железничката станица во Велес, попладнево и утре сабајле сите возови од Скопје и од Велес за Скопје и останатите дестинации ќе сообраќаат според возниот ред.

The post По еден ден прекин, попаднево повторно воспоставен железничкиот сообраќај во земјава appeared first on Република.

Српскиот премиер Милош Вучевиќ синоќа во Белград ја прими и водеше разговори со македонската делегација предводена од заменик претседателот и министер за односи меѓу заедниците Иван Стоилковиќ, заменик претседателот на Владата и министер за транспорт Александар Николоски и министерот за надворешни работи и надворешна трговија Тимчо Муцунски.

На средбата е разговарано за политичката и економската соработка меѓу двете држави, а теми биле и Отворен Балкан и железничкото поврзување на Белград со Скопје со брз воз.

-Ми претставува огромно задоволство што денешната работна посета на претседателот на Владата на Република Србија Милош Вучевиќ освен што го отслика нивото на одличните билатерални односи меѓу македонската и српската држава беше и одлична прилика за дефинирање на следните заеднички чекори  и активности. Во фокус на разговорите беше можноста за претставување и учество на македонското стопанство при реализацијата на ЕКСПО 2027 година, како и иницијативата за одржување меѓувладини седници меѓу македонската и српската Влада, кои би требало да трасираат нови можности за подобрување на билатералната соработка, како и можности за заедничка соработка со трети пазари. Со премиерот Вучевиќ зборувавме и за интензивирање и унапредување на активностите поврзани со процесот Опен Балкан.  Согласни сме дека со интензивирање на економската соработка придонесуваме за регионален мир и стабилност. Во рамки на оваа работна средба која воедно е и подготовка за посетата на претседателот на Владата на Република Србија Вучевиќ на покана од претседателот на македонската Влада Христијан Мицкоски, планирана за крајот на септември, предвидени се уште неколку работни состаноци кои верувам дека ќе бидат исто толку продуктивни колку и денешнате средби и, пред сѐ, ќе придонесат за продлабочување на пријателските односи меѓу двете земји, изјави вицепремиерот Стоилковиќ на прес-конференцијата.

Тој се осврна и на темата за изграда на Коридорот 10 меѓу Белград и Скопје.

-Бидејќи тендерот во македонските железници се завршува во текот на оваа недела, ќе можеме да го реализираме она што го ветивме, а тоа е конечно локомотивите да почнат да сообраќаат и да може Коридорот 10 да функционира. Овој коридор во македонски железници подолго врме е во лоша состојба, но новата влада и министерот Николовски посветуваат повеќе внимание за овој коридор од останатите коридори и Мaкeдонија има намера да се приклучи кон изградба на брзата пруга, период кој ќе трае наредните 5- 6 години, да се поврзе Солун преку Скопје и Ниш, Белград, Будимпешта и Австрија, рече Стоилковиќ.

Српскиот премиер Милош Вучевиќ посочи дека двете држави имаат многу заеднички нешта, дека нема отворени прашања меѓу двете земји и дека наше е да ги подобриме овие односи, да работиме на зајакнување на Западен Балкан и влез во ЕУ, за да не останеме „слепо црево“ и заборавени во оваа геополитичка поделба.

Вучевиќ смета дека мора да бидеме вреднувани согласно сите реформи и потсети дека Македонија имала тешки реформи, што е нешто што треба да се вреднува.

-Треба да формираме мешовита комисија за економска соработка. Разговарав со министерот Момировиќ тоа да се забрза, не чека потпишување на меморандум за интерконекторот за снабдување со гас, Србија сака да има диверзификација на енергентите. Треба да работиме и на единствен софтвер за луѓето да не се задржуваат на граничните премини, да нема метеж. Заинтересирани сме за соработка за она што е Отврен Балкан, ќе имаме новости за ЦЕФТА, а најважно е да се зачува мирот на Западен Балкан, тоа ни треба на сите, рече Вучевиќ.

Српскиот премиер уште еднаш упати честитки до новата влада на Македонија, истакнувајќи дека таа ќе биде достојна за одговорност пред граѓаните. Посочи дека не памети Србин да бил член на македонската влада.

-Затоа сме му благодарни на македонскиот премиер Мицкоски и го чекаме во Белград. Среќен сум поради продолжувањето на соработката меѓу двете земји, рече Вучевиќ.

The post Железничкиот Коридор 10 меѓу Белград и Скопје приоритет во односите меѓу Србија и Македонија appeared first on Република.

Српскиот вицепремиер и министер за внатрешни работи, Ивица Дачиќ, изјави дека Министерството за внатрешни работи во согласност со законите на Република Србија и нејзините законски овластувања овозможило непречен развој на железничкиот сообраќај.

По повод протестите и блокадите во Белград, за денеска обраќање пред јавноста најави претседателот Александар Вучиќ, јави дописникот на МИА од Белград.

Со интервенција на полицијата во 5:30 часот, со строго почитување на полициските овластувања, овозможено е непречено одвивање на железничкиот сообраќај, со што се создадоа услови за нормално функционирање на општествениот живот во интерес на сите граѓани. Полицијата ќе поднесе кривични пријави против сите сторители на кривични дела за прекин на меѓународниот јавен сообраќај и загрозување на безбедноста на граѓаните, се наведува во писмената изјава на Дачиќ.

Според опозициската пратеничка од ССП Мариника Тепиќ, во раните утрински часови, околу 5.30 полицијата ги опколила граѓаните што ја блокираа главната железничка станица „Прокоп“ и ги „исфрлила“, притоа апсејќи најмалку тројца активисти кои не сакале да ја напуштат станицата.

Учесниците на протестот против најавата за ископ на литиум синоќа ги блокираа железничките станици „Прокоп“ и Нов Белград, и останаа таму во текот на ноќта.

Организаторите претходно најавија дека нивно барање е да се донесе закон за трајна забрана за ископ на литиум и бор во Србија, а еден од нив, претседателот на здружението „Не го даваме Јадар“, Златко Кокановиќ, во саботата навечер изјави дека блокадите ќе траат додека не се исполни тоа барање.

Во Претседателството на Србија синоќа беше одржан состанок, по што беше најавено дека во 11 часот на граѓаните ќе им се обрати претседателот на Србија Александар Вучиќ во врска со протестот и преземањето понатамошни чекори.

Синоќа на „Теразије“ во Белград околу 40.000 луѓе протестираа под слоганот „Нема да има рудници“.

The post Дачиќ: Српската полиција овозможи непречено одвивање на железничкиот сообраќај appeared first on Република.

Наместо со 20 километри на час, која беше максималната дозволена брзина на движење на возовите на пругата Велес-Скопје, отсега возовите на оваа делница ќе сообраќаат со „неверојатни“ 50 километри на час.

Како што соопштија од МЖ Инфраструктура, ваквата промена доаѓа поради тоа што е завршена санацијата на пругата.

Сектор ЗОП Скопје во изминатиот период работеше на замена на дрвени колосечни прагови и шини на делот меѓу станиците Рајко Жинзифов и Велес. Замената е завршена и брзината од 20 км/час е зголемена на 50 км/час“, соопштија од МЖ Инфраструктура.

Исто така, во изминатиот период се работело на замена на дрвени прагови во станицата Кадина Река на втор колосек, кој досега беше затворен за сообраќај.

Колосекот е пуштен за сообраќај, со што се овозможува вкрстување на возови и зголемување на протокот на железничкиот сообраќај.

The post Наместо со 20 возот Скопје-Велес сега ќе може да се движи со максимална брзина од 50 километри на час appeared first on Република.

Активно се работи на двете делници за пругата кон Бугарија. Проектот е со најголема инвестициска вредност од независноста на државата до денес, 200 милиони евра, рече денеска министерот за транспорт и врски Благој Бочварски. Како што истакна, одговорајќи на новинарски прашања, тендерот за третата и најтешка делница се очекува да биде распишан до крајот на оваа година.

За брзата пруга Скопје - Ниш, пак, информира, во рок од 30 дена ќе се направи акциски план.

Склучивме договор пред две години со една, па потоа и со втора компанија за втората делница за пругата кон Бугарија. Активно се работи на двете делници. Градбата на првата делница очекуваме да заврши некаде на крајот на наредна година, а да продолжи да се работи на втората и секако, очекувам да биде распишан тендерот и за третата и најтешка делница до крајот на оваа година бидејќи таа се работи согласно ИПА-процедурите на ЕУ и во финална фаза сме пред распишување на тендерот за избор на изведувач и на третата фаза. Тоа се големи проекти што имаат вредност на чинење по 500, 600 милиони евра и за нивна реализација е потребно време. Но, зошто 30 години досега тие проекти не биле реализирани, е прашање што треба да се постави на оние кои во минатото ги управувале институциите, рече Бочварски по увидот во реконструкцијата на улицата „Леце Котески” во Прилеп.

За брзата пруга Скопје - Ниш, информира, во рок од 30 дена ќе се направи акциски план од страна на работни групи од двете страни кои ќе ги прецизираат чекорите и постапките.

Она што ние денеска го правиме е комплетно отворање на сите процеси, и на пругата кон Бугарија, и на пругата што ја завршивме Битола – Меџитлија, и на автопатот Прилеп – Битола и на експресниот пат кон Прилеп кој исто така 20 години се ветува на секоја изборна кампања. Граѓаните го слушаат тоа ветување, но денеска сето ова се работи. Така што, во однос на брзата пруга можам да истакнам дека во рок од 30 дена ќе се направи акциски план од страна на две работни групи од двете страни кои ќе ги прецизираат чекорите, постапките, делумно и начините на проектирање и синхронизација на целиот проект. Дополнително, ние веќе го одобривме Законот за задолжување за изградбата на заедничкиот железнички граничен премин Табановце што ќе се гради од македонска страна, а ќе биде заеднички за двете страни. Ова се проекти кои навистина даваат друга слика и убеден сум дека во наредните години ќе гледаме и нивна реализација и пуштање во употреба, потенцира министерот кој во посета на Прилеп беше заедно со премиерот Димитар Ковачевски.

Во меѓувреме, возот од Скопје кон Битола не вози веќе 10тина дена, возот кон Меџитлија е празен, зошто нема каде понатаму, а не се започнати никакви градежни активности за ветениот автопат.

The post Додека едвај возат постоечките возови, активно се гради пругата вредна 200 милиони евра кон Бугарија appeared first on Република.

Претпријатието „Македонски железници - Транспорт“ не ја врши работата што ја очекуваат граѓаните од него. Поради тоа, во Собранието е законот за либерализација на превозот, на железничкиот сообраќај и очекувам по неговото изгласување, веќе од почетокот на наредната година да ги отвориме вратите на други оператори од регионот кои сакаат да оперираат по македонските железнички пруги. Со тоа ќе ја подобриме и конкурентноста и конкуренцијата, а и граѓаните и компаниите ќе видат бенефит, бидејќи со вакво темпо, убеден сум дека бавно се движи реализацијата на сите процеси кои ги земало ова претпријатие, рече денеска министерот за транспорт и врски Благој Бочварски.

Одговорајќи на новинарски прашања по увидот во реконструкцијата на улицата „Леце Котески” во Прилеп, Бочварски истакна дека години и децении наназад „Македонски железници - Транспорт“ работи тешко, во тешки услови, со финансиска поддршка од Владата, за да може да реализира одреден број линии од оперативниот план.

Факт е дека до пред две години Владата како субвенции за оваа претпријатието исплаќаше шест - седум милиони евра годишно за одреден број линии за патничкиот сообраќај. Минатата година финансиски помогнавме 15 милиони евра, а ова година очекувам поддршката да стигне некаде до 25 милиони евра. Сега ќе го поставам прашањето – дали граѓаните се задоволни од тоа што го прави „МЖ – Транспорт“ и дали ние како Влада сме задоволни? Апсолутно и граѓаните и Владата, сите заеднички ќе констатираме дека тоа претпријатие не ја врши работата што ја очекуваат граѓаните од него, напомена министерот.

Според него, либерализацијата значи дека ќе се овозможи да влезат и други оператори доколку има заинтересирани да оперираат на македонските железнички пруги.

Ние сме една од двете земји во регионот која што се уште нема либерализација и сите држави коишто вовеле либерализација после неколку години веќе сообраќајот бил подигнат на едно повисоко ниво и за потребите на економијата и за потребите на граѓаните, така што либерализацијата не значи продажба. Либерализацијата значи отворање на пазарот за повеќе оператори да можат да оперираат по македонските железнички пруги, нагласи Бочварски, додавајќи дека денеска се гласа законот за либерализација.

Тој дополни и дека ќе продолжи изградбата на железничките пруги кон Бугарија.

Со потпишувањето на Меморандумот со Република Србија преку изработка на акциски план, работни групи ќе почнат проектирање и реализација на проекти што ќе значат раст и развој на железничкиот сообраќај, бидејќи тоа е сообраќајот што во иднината треба да биде доминантен и што граѓаните треба да го користат многу повеќе отколку што денес имаат услови тоа да го прават, рече тој.

Бочварски во увид на реконструкцијата на улицата „Леце Котески” беше заедно со премиерот Димитар Ковачевски.

The post Нов закон за „оператори од регионот“ да ги работат македонските железнички пруги, зошто МЖ Транспорт „не си ја врши работата“ appeared first on Република.

Министерот за транспорт и врски Благој Бочварски денеска рече дека очекува железничкиот мост на Црна Река да биде саниран за 60 дена, но не ја исклучи и можноста од изгардба на нов, траен мост.

Увидот покажал, нагласи Бочварски, дека темелот е во многу лоша состојба.

Она што го добив како информација по увидот, е дека темелот е во многу очајна и лоша состојба и таму ќе биде потребна поголема и потемелна санација што ќе ја утврди проектантот и секако, Градежниот факултет, со цел да влеземе веднаш во постапка и очекувам дека во наредните 60 дена ќе се изврши санација, а доколку има можност и реализација на комплетно нов мост што ќе биде траен, за да не ни се случуваат вакви пункнатин во една од главните транзитни точки на Коридорот 10, истакна министерот, одговорајќи на новинарски прашања по увидот во реконструкцијата на улицата „Леце Котески”.

Ги чекаме анализите од експертите и стручните лица за потоа, појасни Бочварски, Владата, а секако и Министерството и Јавното претпријатие да донесат заедничка одлука во кој правец ќе одиме, која реконструкција ќе ја почнеме за да се операционализира овој проект и да се врати сообраќајот во нормала и во движење.

Бочварски во Прилеп беше заедно со премиерот Димитар Ковачевски.

The post Mостoт на Црна Река е во многу лоша состојба, министерот ветува санација во наредните 60 дена или градење нов appeared first on Република.

Центарот за управување со кризи, повикувајќи се на информации од Македонски железници, утринава информира дека покрај експертите од Градежен факултет, ангажирани биле и нуркачи со цел и под вода да се утврди состојбата на столбовите на мостот на реката Црна кај Стоби каде има напукнат столб.

Поради тоа веќе два дена не се одвива товарниот железнички сообраќај до Гевгелија, а патничкиот сообраќај се одвива бавно со пренесување на патниците со автобуси кај Градско односно Криволак.

The post Нуркачи утрврдуваат каква е состојбата на столбовите на мостот на Црна Река appeared first on Република.

По четири дена целосен прекин на железничкиот сообраќај во земјава од вчера доцна попладне повторно сообраќаат патничките и транспортни возови.

Поради расипана локомотива, вчера во 14:30 часот од Скопје за Битола не замина единствениот воз на оваа релација. Поради тоа и утрово немаше воз на релација Битола - Скопје преку Прилеп и Велес. Неизвесно е до попладнево дали ќе се поправи локомотивата и дали попладнево од 14:30 од Скопје, односно од 15:25 од Велес ќе сообраќа возот од Скопје за Битола преку Велес и Прилеп, велат за МИА од МЖ Транспорт.

Поради несообраќање на овој воз Битола - Скопје преку Велес утрово реагираа жителете од селата на Азот, како Богомила, Теово и Согле, кои утрово со возот не можеа да заминат на работа во Велес и во Скопје. Реагираа и велешани, кои со овој воз според возен ред во 5.46 часот од Велес одат на работа или на училиште за Скопје.

На Железничката станица во Велес за Скопје утрово на време во 5.03 часот тргна локаниот воз, кој синоќа од Скопје за Велес пристигна на полноќ. Утрово од Велес на време тргна и возот кој пристигна од Гевгелија преку Велес за Скопје, а кој според возен ред од Железничката станица во Велес е во 6.27 часот.

Тому овој воз на реација Скопје-Гевгелија, кој поаѓа од Скопје во 16.55 часот, а беше првиот воз што беше запрен во петокот,а вчера попладне во 16,55 часот прв повторно беше пуштен во сообраќај.

Машинскиот и извршен персонал при Железници на РСМ Транспорт во петокот попладне во 16 часот стапи во бојкот со целосен прекин на железничкиот собраќај поради неисплатени патни трошоци за минатиот месец. Бојкотот го прекина вчера попладне по исполнување на нивните барања, по што попладнето во 16.55 часот од Скопје за Гевгелија го пушти истиот воз кој прв го сопре во петокот.

The post Возовите повторно тргнаа, но не и оној за Битола appeared first on Република.

Сообраќајот на пругата Скопје - Битола - Скопје е во прекин поради тоа што се уништени околу 1000 прагови на повеќе локации од пожарите во битолско-прилепскиот регион.

Од Железници информираат дека интензивно се работи на отстранување на дефектот и оспособување на сообраќајот.

Поради овие причини, сообраќајот на релацијата Скопје-Битола-Скопје ќе биде во прекин од денеска па сè до оспособување на пругата за одвивање на безбеден сообраќај, се наведува во денешното соопштение.

The post Од денеска до не се знае кога во прекин железничкиот сообраќај Скопје-Битола-Скопје appeared first on Република.

Железничкиот сообраќај  во државава ќе се нормализира вечер во 20 часот откако претставниците на машинскиот извршен персонал и на раководството во ЖРМ Транспорт доцна попладнето постигнаа договор за исплата на вториот дел од платата за јуни и за старт на преговори за измени во актот за систематизација, потврди за МИА Тони Димовски, претставник на машинскиот персонал.

Сообраќајот, што е во прекин од 13 часот денеска кога  вработените стапија во бојкот, според најавите од Димовски, ќе се нормализира со возот за Битола 645 во 20.05 часот.

Постигнат е договор со менаџерскиот на ЖРМ Транспорт за исплата на вториот дел од платата за јуни во петок како и да почнат преговори за доставените барања за изменување и дополнување на систематизацијата со што ќе се зголеми коефицинетот на сложеност за машинскиот извршен персонал, а можно е и за сите вработени, изјави Димовски.

Во тек на неколку часовниот прекин на  железничкиот собраќај, не се реализираше сообраќањето на два патнички воза од Скопје за Битола и за Гевгелија, додека од товарните немаше откажување.

The post Постигнат договор за платата на машиновозачите, железничкиот сообраќај ќе се нормализира од 20 часот appeared first on Република.

Машинскиот и извршниот персонал на МЖ „Транспорт“ денеска од 13 часот ќе стапи во бојкот, со целосно блокирање на железничкиот сообраќај низ земјава. Како што изјави за МИА претставникот на машинскиот и извршниот персонал и претседател на Синдикатот на машиновозачи, Тони Димовски, бојкотот е поради неисплатен втор дел од платата за јуни, но и за покачување на коефициентите.

Бојкотот е и за почнување преговори или одговор за измена и дополнување на систематизацијата, зашто имаме сознанија дека се поделени 230 решенија со покачување на коефициенти на одредени работни места, истакна Димовски.

Според него, на 2 ноември 2021 година е донесена Одлука согласно која, ако до 25-ти во месецот не биде исплатена во целост платата за претходниот месец, на 26-ти машинскиот и извршниот персонал почнува со бојкот и блокада на железничкиот сообраќај.

Минатата недела имавме средба со генералниот директор на која ни беше кажано денеска во 10 часот да бидеме во канцелараијата кај него. Но, директорот денеска не беше дојден на работното место зашто бил на некаков состанок, дали во Влада или на друго место. Не прими неговиот советник кој не замоли да се стрпиме за плата до 4 август, петок. Ние неколку пати даваме шанса, еве и овој пат помина 26-ти. Им дадовме простор до крајот на месецот, но и до тогаш тие не можат во целост да ја исплатат платата за претходниот месец. Дополнително, и за првиот дел од платата, одбитоците за кредити кои некои колеги ги имаат земено, не се исплатени, објасни Димовски.

Тој потенцира дека железничкиот сообраќај ќе биде прекинат до исплаќање на вториот дел од платата и додека не се задоволат барањата на машинскиот и извршниот персонал доставени на 3 јули 2023 година.

Барањата се за покачување на коефициентите и за наредбата од генералниот директор која требаше да важи од 1 јуни. Во периодот со енормно високи температури, наместо да бидеме наградени, ние сме казнети со 10 отсто на квалитет, а ниту еден друг во фирмата не е казнет, дури некои се и наградени. Сите од администрација и од работилница од одржување работат до 13 часот, а некои и воопшто не доаѓаат на своите работни места, нагласи Димовски.

The post Од 13 часот блокада на железничкиот сообраќај, бојкот на машинскиот и извршниот персонал appeared first on Република.

Потпретседателот на ВМРО-ДПМНЕ Александар Николоски, кој учествува на серија настани во Брисел посветени на состојбата во Европа од Европската Унија побара да финансира изградба на брза пруга од Скопје до Солун.

Во своето обраќање на една сесија во организација на Европската Унија и познатата тинк тенк организација „Пријатели на Европа“ кои го избраа Николоски за дел од т.н. програма „40 под 40“, Николоски предложи да се размислува за повторно поврзување на Париз и Багдад по железнички пат.

Би сакал малку да зборуваме за железницата. Мислам дека тоа е одлична, одлична тема и мислам дека не треба да зборуваме само за ЕУ, туку не треба да ги заборавиме и соседните земји, Западен Балкан. Ориент-експрес сите го знаете од историјата. Барем една од двете големи светски војни беа водени за тој регион. Во овој момент не постои. Теоретски постои затоа што има железница. Но, ако вие, на пример, се обидете да земете воз од Виена или од Будимпешта до Солун, тоа е невозможно. Порано одеа со возови од Париз и одеа директно во Багдад.

За жал, во железницата, сега сме далеку зад она што бевме во 19 век и затоа го покренувам ова прашање, затоа што може да биде спротивно со брза железница, можеш да седнеш во воз во Виена или Будимпешта и за 5 часа да бидеш на море за одмор, тоа е опција А или опција Б, тоа е најдобриот начин да го намалите притисокот на пристаништата во Северна Европа. Мислам, во Антверпен овде или во Хамбург, бидејќи има две големи пристаништа, тоа се Пиреја и Солун кои не се користат добро, бидејќи нема соодветна инфраструктура. Како може да се направи ова? Веќе има проект за брза пруга меѓу Белград и Будимпешта, како и проект за брза пруга меѓу Будимпешта и Виена. Меѓу Атина и Солун има две брзи пруги, а она што во овој момент недостасува е брзата пруга меѓу Белград, Скопје и Солун, рече Николоски.

Според него, изградбата на оваа инфраструктура многу ќе ѝ помогне на Европа, главно стратешки, бидејќи ова беше првиот проект што Кина го објави кога ја објави својата иницијатива „Појас и пат“ пред шест години.

Рекоа дека ќе ги купат пристаништата, што значи Пиреја, каде што успеаја да влезат и потоа ќе изградиме брза железница меѓу Атина, Будимпешта и Виена. Дел од оваа пруга се финансира од кинески пари. Но, мислам дека ова е моментот Европа да преземе иницијатива за овој проект. На пример мојот личен сон, мислам дека Скопје и Солун треба да се поврзат со брза железница и за еден и пол час се оди од Скопје до Солун, од едната до другата страна на географска Македонија или од Скопје до Виена каде што ќе одиш за 3 часа или како што кажав од Виена до море ќе одиш за 5 часа. Тоа ќе го намали загадување значително бидејќи нема потреба да се возите со авиони без разлика дали има поевтини или нормални авиокомпании за да одите на одмор. Но, исто така, трговијата, која ќе помогне да се зајакне економијата на целиот овој регион. Затоа мислам дека ова треба да биде фокус на ЕУ за да дозволи грант за трите земји за Грција, за Македонија и за Србија да ја завршат оваа брза железница, и да ја поврзат Европа со нејзиниот југ и да ја поврзат ЕУ со ЕУ затоа што вие имате ЕУ земја која не е поврзана со останатите земји од ЕУ и треба да помине во земји кандидати како што во овој момент е мојата земја Македонија и Србија, за кои се надевам дека еден ден ќе бидеме членки, рече Николоски.

The post Николоски побара ЕУ да финансира изградба на брза пруга од Скопје до Солун appeared first on Република.

Машинскиот и извршниот персонал на „Железници транспорт" најавува дека од утре во седум часот ќе го прекине железничкиот сообраќај.

Причина за бојкотот на работата, како што вели претставникот на машинскиот персонал Душко Чакаровски, е неисплатениот надомест за материјални трошоци што требале да го добијат заклучно со денеска.

Според Чакаровски, бојкотот е согласно Одлуката од ноември лани која предвидува најдоцна до 25 во месецот да им биде во целост исплатена платата за претходниот месец, а најдоцна до 10-ти во месецот да ги добијат и материјалните трошоци.

The post Чакаровски: Железничкиот сообраќај од утре во прекин appeared first on Република.