Светската здравствена организација (СЗО) денеска објави дека ја одобрила првата вакцина против мајмунски сипаници произведена од Баварски Нордик.

Првата претквалификација на вакцината против мајмунски сипаници е важен чекор во нашата борба против оваа болест, како во контекст на моменталната појава на болеста во Африка, така и во иднина, изјави генералниот директор на СЗО, Тедрос Аданом Гебрејесус.

Мајмунските сипаници се вирусно заболување предизвикано од вирус кој е сличен на вирусот на сипаници, но не се шири меѓу луѓето толку ефикасно и има помала стапка на смртност од малите сипаници.

Минатиот месец, СЗО ги прогласи мајмунските сипаници за глобална јавно-здравствена криза по втор пат во две години откако болеста се прошири од ДР Конго во соседните земји.

Прогласувањето на јавна здравствена криза од меѓународен интерес, највисокото ниво на тревога на СЗО, може да го забрза истражувањето, финансирањето и мерките за јавно здравје и меѓународната соработка за контрола на болеста.

Болеста почна да се шири во ДР Конго во форма на ендемичен вид познат како „клад I“. Изгледа дека новата варијанта „клад Iб“ полесно се шири преку близок контакт, вклучително и сексуален контакт. Болеста се прошири од Конго во соседните земји, вклучувајќи ги Бурунди, Кенија, Руанда и Уганда, што предизвика одговор на СЗО.

Повеќе од 17.000 сомнителни случаи на мајмунски сипаници и 517 смртни случаи се пријавени во Африка од почетокот на оваа година, што е зголемување од 160 отсто во споредба со истиот период минатата година, соопшти Африканскиот центар за контрола и превенција на болести. Инфекцијата ја пријавија 13 земји.

Друга варијанта на вирусот, „клад IIб“, се рашири низ светот во 2022 година, главно преку сексуален контакт меѓу мажи, што предизвика СЗО потоа да прогласи јавно здравствена криза која траеше 10 месеци.

The post СЗО ја одобри првата вакцина против мајмунски сипаници appeared first on Република.

Лекарите од седум земји почнаа со тестирање на првата мРНА-вакцина против рак на белите дробови на пациенти.

Клиничкото испитување на луѓе во првата фаза се спроведува на 34 истражувачки места во Велика Британија, САД, Германија, Унгарија, Полска, Шпанија и Турција.

Вакцината позната како „БНТ-116“ (BNT116) е произведена во лабораториите на компанијата „Бионтек“ (BioNTech), а работи на принцип на пронаоѓање на канцерогени клетки, коишто потоа ги уништува и спречува да се вратат, пишува „Гардијан“.

Целта на вакцината е да се зајакне имунолошкиот одговор на болните лица од рак, а здравите клетки да останат непроменети.

The post Почна тестирањето на првата вакцина против рак на белите дробови appeared first on Република.

Британско-шведската фармацевтска компанија „АстраЗенека“ објави дека ја повлекува вакцината против Ковид-19 неколку месеци откако пред судот во Лондон призна дека вакцината може да предизвика ретки и опасни несакани ефекти.

Вакцината повеќе не може да се користи во Европската унија, откако компанијата доброволно го повлече одобрението за ставање во промет. Барањето за повлекување на вакцината беше поднесено на 5 март и стапи на сила во вторник. Слични пријави ќе бидат направени во наредните месеци во Велика Британија и други земји кои ја одобриле вакцината, позната како „Ваксеврија“.

„АстраЗенека“ соопшти дека вакцината е отстранета од пазарот од комерцијални причини и дека повеќе не се произведува или испорачува, бидејќи е заменета со ажурирани вакцини кои се ефикасни против новите соеви на Ковид-19, пренесува британски „Телеграф“.

„Ваксеврија“ е под интензивна контрола во последниве месеци поради многу редок несакан ефект, кој предизвикува згрутчување на крвта и низок број на тромбоцити во крвта.

The post „АстраЗенека“ ја повлекува од пазарот во ЕУ својата вакцина против Ковид-19 appeared first on Република.

Фармацевтската компанија Астра Зенека во судски документ призна дека нејзината вакцина против Ковид-19 може да предизвика ретки несакани ефекти, вклучувајќи згрутчување на крвта и низок број на црвени крвни зрнца.

Во Велика Британија против „АстраЗенека“ е покрената колективна тужба во која се тврди дека употребата на вакцината „КовиШилд“ довела до смрт и сериозна штета, а се бара отштета до 100 милиони фунти за 50 жртви, објави „Индипендент“.

Една од тужителите тврди дека вакцината предизвикала трајно оштетување на мозокот и дека згрутчувањето ја оставило неспособна да работи.

CoviShield е развиен од британско-шведската компанија „АстраЗенека““ во соработка со Универзитетот во Оксфорд и Велика Британија, а го произведува индиската компанија Serum Institute of India, еден од најголемите производители на лекови во светот.

Вакцината се користи во повеќе од 150 земји, вклучувајќи ги Велика Британија и Индија.

Некои истражувања спроведени за време на пандемијата покажаа дека вакцината е 60 до 80 проценти ефикасна во заштитата од новиот коронавирус.

Сепак, истражувањата покажаа дека вакцината CoviShield може да предизвика згрутчување на крвта кај некои луѓе, што може да биде опасно по живот.

Додека „АстраЗенека“ секогаш ги оспоруваше овие тврдења, во еден од судските документи за прв пат призна дека вакцината „во многу ретки случаи може да предизвика ТТС“, односно синдром на тромбоцитопенија, кој се карактеризира со згрутчување на крвта и ниска број на тромбоцити кај луѓето.

И Светската здравствена организација потврди дека CoviShield може да предизвика несакани ефекти опасни по живот.

The post „АстраЗенека“ призна дека нејзината вакцина против Ковид-19 може да предизвика несакани ефекти appeared first on Република.

Деветовалентанта вакцина против ХПВ ќе пристигне следниот месец, во мај и на вакциналните пункотиви во Македонија, освен девојчиња, ќе може да ја примаат и момчиња, соопштија денеска министерот за здравство, Илир Демири и националната координаторка за имунизација, проф. д-р Александра Грозданова.

Тие заедно со специјалната претставничка на СЗО во земјава, Ане Јохансен, претставничката на УНИЦЕФ во Македонија, Патриција ДиЏовани и претставникот од УНФПА, денеска одржаа заедничка прес-конференција на која информираа за осовременување на календарот за имунизација со деветвалентна вакцина против ХПВ.

Демири потенцираше дека покрај преминувањето од четиривалентна на деветвалентна, ХПВ вакцината ќе биде достапна и за момчињата.

Со ова, го следиме примерот на високоразвиените европските здравствени системи и обезбедуваме поголема заштита на младата популација од ХПВ вирусите. Деветвалентната ХПВ вакцина е од светски реномиран производител, МСД од Холандија и ги исполнува највисоките критериуми за квалитет, безбедност и ефикасност - ХПВ вакцината обезбедува долготрајна повеќегодишна заштита. Оваа вакцина штити од инфекции предизвикани од хуман папилома вирус и од развој на преканцерозни лезии, рече Демири.

Вакцината, според Календарот за имунизација, може да ја примат и момчиња и девојчиња на возраст од 12 до 15 години, а ако се задоцни, може најдоцна да се прими до 18 години, т. е. до крајот на средното образование. Ако се прими на возраст од 12 до 15 години, се дава во две дози, а после 15 години во три дози.

Грозданова истакна дека целта за вакцинирање на момчињата е двојна и дека со тоа се спречува момчињата да бидат трансмитери, односно да ја пренесуваат ХПВ инфекцијата, но и самите да бидат заштитени бидејќи и кај нив се развиваат ХПВ асоцирани болести.

Најчестите ХПВ асоцирани болести кај жените се цервикалниот карцином на грло на матка, кацином на вагина, вулва и анус, додека кај мажите тоа е ларциномот на пенисот, карцином на анусот и кај двата пола забележан е пораст на ортофаријангијалниот карцином. Со вакцинирање на возраст помеѓу 12 и 15 години се постигнува најдобар имунолошки одговор на организмот. Се вакцинираат и девојчиња и момчиња пред да бидат изложени на вирусот, истакна проф. Грозданова.

Се проценува дека ХПВ-вакцината може да спречи 70% од случаите на цервикален карцином, 80% од анален карцином, 60% од вагинален карцином, 40% од вулварен карцином, и покажуваат повеќе од 90% успешност во спречувањето на ХПВ-позитивните орофарингеални карциноми. Во однос на заштитата веќе се достапни податоци за потврдена ефикасност од повеќе од 10 години на оваа деветвалентма вакцина.

Според извештајот од Институтот за јавно здравје (ИЈЗ), вкупниот опфат со две дози вакцина против заболувања од ХПВ во земјата изнесува 52, 5 отсто. Покриеност од 100 отсто има само во шест општини: Демир Хисар, Свети Николе, Кочани, Делчево, Кратово и Валандово.

Набавени се 70 илјади дози на деветвалентната ХПВ вакцина за следните три години.

https://republika.mk/zivot/zdravje/od-slednata-godina-i-momchinata-da-vaktsiniraat-protiv-hpv-virusot-predlaga-komisijata-za-imunizatsija-koja-odobri-i-19-godishni-devojki-da-se-vaktsiniraat/

The post Од следниот месец во Македонија ќе пристигне деветовалентната вакцина против ХПВ, ќе може да се вакцинираат и момчиња над 12 години appeared first on Република.

Децата кои примиле три дози на ДиТеПер вакцината ќе може да посетуваат градинка, но под услов да се ревакцинираат за шест месеци, препорача вчера Комисијата за заразни болести. Состојбата со голема кашлица во земјава не е добра и можно е Комисијата да излезе со построги епидемиолошки мерки.

Во следните денови може да се очекува Министерството за здравство да достави известување до градинките во врска со оваа препорака.

– Деца кои примиле три вакцини во последните шест месеци и сега им следи ревакцина, која во стандардниот календар беше препорачано да се прима на една година, сега го кратиме тој период на шест месеци. Овие деца кои ја завршиле примовакциналната серија во овие шест месеци треба да им биде дозволено да влезат со напомена дека оваа вакцина треба да ја примат после шест месеци најрано од примањето на третата доза, истакна вчера претседателот на Комисијата за заразни болести д-р Александар Петличковски.

The post Децата со три дози ДиТеПер вакцина да може да се вратат во градинка appeared first on Република.

Од состанокот на Комисијата за заразни болести утре треба да биде појасно за родителите и за вработените во градинките во Скопје дали забраната за прием на невакцинирани деца со ДиТеПер важи за тие што не се вакцинирани или и за тие што не ја примиле ревакцината.

Поради забуната во јавноста и различното толкување на „целосно неимунизирани“ не е јасно дали се работи за вакцина, која се прима во три дози – на двомесечна, тримесечна и на шестмесечна возраст, или ја опфаќа и ревакцината, која според календарот за имунизација треба да се прими на 18-месечна возраст односно една година по последната од трите дози на вакцината.

Од понеделникот, кога поради прогласената епидемија на голема кашлица (пертусис) во Скопје стапи во сила забраната за прием на целосно невакцинирани деца, родители се соочуваат со проблем да ги остават своите деца во градинка иако ја примиле вакцината, но не и ревакцината. Некои ги носат децата на предвремена ревакцинација, во некои пунктови одбиваат да ги ревакцинираат пред возраста утврдена со календарот. Има случаи и кога од здравствени или од други причини детето не може да ја прими ревакцината на една и пол година и таа е одложена за подоцна.

Министерот за здравство Илир Демири денеска на прес-конференција рече дека за вакцинирано се смета детето што ги примило трите дози од вакцината и очекува дека Комисијата по утрешниот состанок ќе го прецизира толкувањето на одлуката. Нагласи дека најважно е јавноста да биде сензибилизирана за важноста од вакцинацијата бидејќи, рече, во Скопје е подигнато портокалово знаме на опасност.

-Вакцина подразбира ако детето има примено три дози и се смета за вакцинирано, а некомплетно вакцинирано е ако примило втора и не примило трета доза. Дали е ревакцинирано тоа е друго прашање... Се спроведува во вториот, четвртиот и шестиот месец и ако е завршена вакцинацијата значи тука се работи за пациент кој е вакциниран... тогаш не гледам зошто да биде попречен да присуствува. Потоа следува ревакцинација на 18 месеци и на седумгодишна возраст. Значи, забраната треба да важи за пациенти кои не се вакцинирани. Но, фокусот треба да биде кон сензибилизација зашто сега сме пред епидемија што може да порасне, рече Демири.

Додаде дека на утрешниот состанок надлежната Комисија ќе даде коментар на донесената одлука кој, рече, ќе го почитуваат сите граѓани и тој како министер.

Овие формалности на толкување на забраната ќе се решат утре по состанокот на Комисијата. Ова првпат се случува и затоа сакам да бидам концизен и да не излегуваме со различни ставови. Ќе има унифициран официјален став како треба да се постапува, рече министерот Демири кој не смета дека е направен хаос во градинките, туку поголем хаос е, рече, ако децата не се вакцинираат.

The post Комисијата за заразни болести утре треба да ја појасни одлуката за забрана за прием на деца во градинките appeared first on Република.

Рускиот претседател Владимир Путин на технолошки форум во Москва вчера изјави дека научници од Русија се блиску до создавање вакцина против рак што наскоро би можела да биде достапна за пациентите.

Руските научници се многу блиску до создавање вакцини за рак и имуномодулаторни лекови од новата генерација. Се надевам дека наскоро делотворно ќе се користат како методи за индивидуална терапија, изјави Путин.

Тој не појасни на кои видови рак ќе делува вакцината и на кој начин.

За време на пандемијата на Ковид-19, Русија разви и своја сопствена вакцина „Спутник V“ против коронавирусот.

The post Руски научници се блиску до создавање вакцина против рак, соопшти Путин appeared first on Република.

Русија е се поблиску до создавање вакцини против рак, изјави претседателот Владимир Путин и додаде дека може да се смета на нивна рана примена во индивидуалната терапија.

„Го доближивме создавањето на таканаречените онковакцини - вакцини против ракот - и новата генерација на имуномодулаторни лекови. Очекувам дека наскоро тие ефективно ќе се користат како методи на индивидуална терапија“, рече Путин за време на пленарната сесија на Форумот. на идните технологии.

Тој рече дека новите откритија во областа на медицината треба да бидат достапни за луѓето и широко да се применуваат во примарната здравствена заштита

The post Русија е сѐ поблиску до наоѓање на вакцина против рак appeared first on Република.

Порастот на заболените деца од голема кашлица и апелите на лекарите поттикнаа многу родители кои беа сомничави кон вакцинацијата да навалат во вакциналните пунктови за да ги имунизираат нивните деца. Препораката на Комисијата за заразни болести во градинките да не се примаат невакцинирани деца исто така одигра улога.

Според податоците, тројно е зголемен интересот за вакцинација со ДТПР на вакциналните пунктови. Дел од родителите беа на редовна вакцинација на своите деца, но најголемиот број се деца од 2 до 6 години за пропуштена ревакцинација, која според вакциналниот календар задолжително се прима на 18 месеци.

Поради турбуленциите во техничката влада сѐ уште нема одлука за прогласување на епидемија во Скопје и забрана за невакцинираните да одат во градинките. Досега се потврдени 26 случаи на заразени со пертусис од кои најголем број се во Скопје, Куманово и Гостивар.

The post Тројно зголемена вакцинацијата на деца против голема кашлица appeared first on Република.

Министерот за труд и социјална политика во техничката Влада, Ѓоко Велковски денеска изјави дека инспекциски служби ќе проверуваат во градинките каде нема вакцинирани деца со ДиТеПер вакцината и ќе интервенираат, за да се спречи епидемија на голема кашлица.

Од Комисијата за заразни болести има заклучоци и истите треба да бидат одобрени на владина седница. И во закон стои дека секое дете кое што нема примено одредена вакцина не ќе може да биде дел од системот на детска заштита. Ќе ги провериме градинките и нашите инспекциски служби ќе видат каде треба да интервенираме за тоа да биде пракса и за да го спречиме ширењето на оваа епидемија, барем во Скопје како жариште во овој момент, рече Велковски.

По 18 потврдени случаи на голема кашлица, Комисијата за заразни болести вчера препорача прогласување епидемија во Скопје. Во изминатите денови бројот расте, особено на територија на град Скопје, каде се потврдени 14 случаи.

Се предлага вакциналните пунктови да работат во две смени, а дополнително да се работи и во сабота. Препорака е и да се забрани прием на невакцинирани деца за пертусис во градинките.

Комисијата очекува овие мерки да го поттикнат интересот за вакцинација, бидејќи фокусот е заштита на најмалите.

Претседателот на Комисијата за заразни болести, Александар Петличковски вчера на прес-конференција рече дека прогласувањето на епидемија звучи малку страшно, но, дека реално треба да се олесни справувањето со ризикот што доаѓа со оваа болест.

The post Инспектори ќе проверуваат за невакцинирани деца во градинките appeared first on Република.

Фармацевтската компанија Модерна создаде експериментална вакцина која може да помогне во борбата против ракот, пишува Сан.

81-годишен старец со неизлечив карцином на кожа е првиот човек кој прими експериментална вакцина уште во октомври.

Неговиот идентитет не е објавен, но тој рече дека „се чувствува како да придонесува на нешто што може да им помогне на многу луѓе“.

Вметнатиот генетски материјал (гласник РНК) ги имитира маркерите пронајдени на површината на клетките на ракот и го „учи“ телото да се бори со нив“ – исто како што е случајот со пандемиските вакцини.

Д-р Дејвид Пинато и неговиот тим од Империал колеџ во Лондон тестираат сè за да видат дали вакцината е доволно безбедна за тригодишно глобално тестирање.

Тој се надева дека вакцината ќе може да ги лекува пред се ракот на кожата и белите дробови, а потоа и другите цврсти тумори како што се цревните тумори и туморите на дојката.

-Истражувањето е во рана фаза. Но, се доближуваме до терапии кои се потенцијално помалку токсични и попрецизни – изјави Пинато.

Д-р Кајл Холен од Модерна рече дека сите се возбудени поради првите резултати и дека се надева дека ова ќе воведе нова ера во лекувањето на ракот.

The post Прв пациент примил експериментална вакцина против рак на кожа appeared first on Република.

Во нашата држава има висока инциденца од 20 нови случаи со карцином на грло на матка на 100 илјади жени, споредено со она кон кое треба да се стремиме, два до четири нови случаи на 100 илјади жени. Ова беше кажано на прес-конференцијата на Македонското здружение за цервикална патологија и колпоскопија, во соработка со Здружението на патолози и Македонското здружение за радиологија и онкологија, по повод недела за превенција од канцер на грлото на матката - од 22 до 28 јануари.

Претседателката на Македонската асоцијација за радиологија и онкологија, Виолета Клисаровска рече дека карциномот на грлото на матката е еден сериозен здравствен проблем од повеќе аспекти.

Првиот аспект би биле статистичките податоци. Околу 600 илјади жени на европско глобално ниво заболуваат. Половина од нив, ја губат борбата со болеста. Инциденцата, за жал, покажува една нехомогена дистрибуција, што во најголем дел ги афектира земјите во развој, меѓу кои и нашата земја. Дистрибуцијата е нехомогена и во однос на морталитетот, повторно со највисок морталитет во земјите во развој. Во Македонија, инциденцата се движи некаде на 20 нови случаи на 100 илјади жени што е прилично висока инциденца, ако споредиме со она кон што треба да се стремиме, два до четири случаи нови, на 100 илјади жени, појасни Клисаровска.

Таа додаде дека вториот аспект што ја прави оваа болест прилично сериозна, е возрасното засегање.

Оваа болест ги погодува младите жени во репродуктивната фаза од нивниот живот, со најголемо возрасно засегање, во популацијата од 45 до 50-годишна возраст. Но, клиничката пракса покажува дека има сѐ повеќе случаи, се зголемува процентот и на жени кои се помлади и од 35 години, нагласи Клисаровска.

Таа се осврна и на третиот аспект на сериозност, третманот, очекувањата од третманот, зборувајќи за стадиумите на болеста и нагласувајќи дека е многу важен скринингот, а доколку нема утврдување преку скрининг, барем да се открие болеста во раната фаза, кога е можно и квалитетно стопроцентно излекување.

На новинарско прашање, претседателот на Македонското лекарско друштво и Македонското здружение за цервикална патологија и колпоскопија, Горан Димитров рече дека уште од 2017 година работна група има изготвено протокол, околу тоа како полека треба да се оди кон тоа, ХПВ да биде како примарен скрининг. Тој додаде дека се работи во тој дел и изрази надеж дека тоа ќе се реализира.

Претседателот на Здружението на патолози, Рубенс Јовановиќ се осврна на состојбата изминатите години.

Како патолог, морам да обрнам внимание на тенденцијата последниве години, особено по Ковид-19, за дијагностика добиваме многу напреднати случаи оперативни примероци со многу напреднати карциноми во многу напреднат стадиум. Тоа прво ни троши и персонални и лабораториски дијагностички ресурси. Кога дел од тие средства, само дел од тие средства, би биле соодветно пренаменети во адекватен скрининг, мислам дека тоа многукратно би се исплатило. Не смееме да го гледаме скринингот како трошок, туку повеќе како сигурна инвестиција, што секако се исплаќа на рок од пет до 10 години, додаде тој.

Националниот координатор за имунизација, Александра Грозданова рече дека карциномот на грлото на матката во однос на нивните податоци, што се повеќе или помалку релевантни и во европскиот регион, е втор по својата бројка кај женската популација помеѓу 15 и 45 години, веднаш по карциномот на гради.

Зборуваме за карцином, имаме вакцина. ХПВ вакцината е несомнено едно од откритијата на 21. век. Македонија беше прва земја во регионот во 2008 година што ја воведе оваа вакцина и во континуитет се работи за да се подобри опфатот на истата. Многу ми е драго што морам да истакнам дека се приклучуваме од оваа година на користењето на деветвалентната вакцина. Значи, ќе ја имаме ХПВ деветвалентната вакцина. Дополнително, го проширивме опфатот, односно се надеваме дека ќе го прошириме, со тоа што направивме неколку експертски препораки, што беа прифатени, а тоа е првенствено вакцинацијата на момчињата, што е и тек како многу битен сегмент, имајќи предвид дека тие се всушност трансмитери, но, од друга страна и неретко заболуваат од ХПВ асоцирани други видови карциноми, подвлече Грозданова.

Шефицата на канцеларијата на УНФПА, Афродита Шаља изрази надеж оти покрај оваа недела, иако таа е посебно посветена на превенција на ракот на грлото на матката, дека секој ден, 365 дена во годината, ќе се успее да се влијае.

Специјалната претставничка на СЗО за Македонија, Ане Јохансен истакна дека многу е важно свеста да се подига и да се шири.

Навистина е тажно што ги имаме сите алатки на располагање, а сепак таа останува една од најчестите болести што ги засегаат жените, порача Јохансен.

The post Сè поголем број жени помлади од 35 години заболуваат од карцином на грлото на матка, на 100 илјади жени – 20 се болни appeared first on Република.

Научникот на штипскиот Универзитет „Гоце Делчев“, Рубин Гулабоски, кој е меѓу топ два проценти на највлијателни научници во светот според Стендфорд листата, во видео интервју за МИА вели дека доколку нема државни, политички и фармацевтски опструкции, вакцината против сите типови на канцер ќе биде достапна на пазарот за една до две години.

Тоа е резултат на истражувања на „Бионтек“ компанијата којашто беше вклучена во дизајнирањето на „Фајзер бионтек“ вакцината мРНА за која можеме што сакаме да кажуваме, меѓутоа таа го спаси човештвото. Веќе ги имаат објавено првите резултати пред неколку недели, каде што на животни имаат покажано повеќе од 80 проценти ефикасност на сите типови на канцер, вели Гулабоски во интервјуто снимено во прес-центарот на МИА во Штип.

Според Гулабоски, преку науката однапред можат да се предвидат проблемите, што ќе се јават во светот. Сајбер безбедноста, криптовалутите и енергетските проблеми ќе бидат главните проблеми.

The post Гулабоски: Вакцината против сите видови на канцер ќе биде достапна за една до две години appeared first on Република.

Доколку нема државни, политички и фармацевтски опструкции, вакцината против сите типови на канцер ќе биде достапна на пазарот за една до две години, вели во видео интервју за МИА, Рубин Гулабоски, научник на штипскиот Универзитет „Гоце Делчев“, кој е меѓу топ два проценти на највлијателни научници во светот според Стендфорд листата.

– Тоа е резултат на истражувања на „Бионтек“ компанијата којашто беше вклучена во дизајнирањето на „Фајзер бионтек“ вакцината mRNA за која можеме што сакаме да кажуваме, меѓутоа таа го спаси човештвото. Веќе ги имаат објавено првите резултати пред неколку недели, каде што на животни имаат покажано повеќе од 80 проценти ефикасност на сите типови на канцер, вели Гулабоски во интервјуто снимено во прес-центарот на МИА во Штип.

Според Гулабоски, преку науката однапред можат да се предвидат проблемите, што ќе се јават во светот. Сајбер безбедноста, криптовалутите и енергетските проблеми ќе бидат главните проблеми.

Во интервјуто што во целост ќе биде објавено утре, Гулабоски зборува и за одливот на научници и за малата сума на средства што се одвојува за развој на науката.

The post Гулабоски: Вакцината против сите видови на канцер ќе биде достапна за една до две години, доколку нема опструкции appeared first on Република.

Над 10 илјади граѓани се вакцинирале против сезонски грип за една кога почна имунизацијата на населението, кажа денеска министерот за здравство Фатмир Меџити, кој беше во посета на вакционалниот пункт во Поликлиниката „Бит пазар“ во Скопје.

Само за една недела во вакциналниот пункт во Поликлиника „Бит-пазар“ вакцина против сезонски грип примиле 824 лица, а термин за вакцинација закажале 3.957 граѓани. Податоците на ниво на целата земја го потврдуваат високиот интерес на граѓаните за оваа вакцина, досега се евидентирани 51.649 пријавени и над 10.000 имунизирани граѓани, рече Меџити.

Меџити изрази задоволство од досегашниот одзив на граѓаните, потенцирајќи дека тоа покажува дека тие се одговорни за своето здравје и информирани дека вакцинација против сезонски грип е најефикасна мерка за превенција на грип, која спречува појава на потешки компликации, особено кај ризичните групи.

Тој посочи дека сезонските вакцини се безбедни и ефикасни и играат значајна улога во намалувањето на ширењето на заразните болести, потенцирајќи дека одлуката за имунизација значи посветена грижа за сопственото здравје, но и за благосостојбата на целото наше општество.

Од витално значење е да се подигне свесноста за придобивките од вакцинацијата и сите заедно да бидеме посветени на нашите заложби да се заштитиме себеси и тие околу нас. Важно е нашата заедница да биде добро информирана и да ги охрабриме сите граѓани, а особено тие кои припаѓаат на ранливите групи да ја искористат можноста за имунизација која може да значи и спас на животи, истакна Меџити.

Министерството за здравство, годинава, обезбеди 60 илјади вакцини наменети за имунизација на ризичните категории граѓани и здравствените работници кои се бесплатни, додека центрите за јавно здравје обезбедуваат вакцини и за комерцијална употреба.

Граѓаните за вакцинација може да се пријават преку веб-страницата: vakcinacija.mk каде ќе добијат СМС-порака со информација каде можат да дојдат и да се вакцинираат против сезонски грип.

Министерството за здравство информираше дека вчера почна кампањата за имунизација од врата на врата, во која постарите лица над 65 години ќе имаат можност на лице место да примат поливалентна вакцина против Ковид-19 како бустер доза, како и вакцина против сезонски грип, а дечињата да ги примат пропуштените дози од календарот за задолжителна имунизација.

30 тимови од медицински лица од тимовите за имунизација во Здравствените домови во државата, ќе одат „од врата до врата“, односно ќе ги посетуваат семејствата каде има невакцинирани лица или лица заинтересирани за вакцинација.

https://republika.mk/zivot/zdravje/od-deneska-litsata-nad-65-godini-mozhe-doma-da-se-vaktsiniraat-protiv-grip-i-kovid-19-timovite-ke-vaktsiniraat-i-detsa-koi-propushtile-da-se-imuniziraat/

The post Над 10 илјади граѓани се вакцинирале против сезонски грип за една недела appeared first on Република.

Министерот за здравство Фатмир Меџити утрово прими вакцина против сезонски грип на вакциналниот пункт за здравствени работници, кој е отворен во Институтот за јавно здравје.

Вакцинацијата против сезонски грип се спроведува на територија на цела држава во центрите за јавно здравје и дел од здравствените домови во Скопје. Секој граѓанин може да се пријави на сајтот vakcinacija.mk и ќе добие СМС порака со ден, време и точно место каде може да дојде да се вакцинира против сезонски грип.

Ги повикуваме заинтересираните граѓани да се пријават за вакцинација, вакцините се безбедни и ефикасни. Годинава Министерството за здравство обезбеди 60.000 вакцини наменети за имунизација на ризичните категории на граѓани и здравствените работници. Вакцините за нив се бесплатни. Дополнително центрите за јавно здравје обезбедуваат вакцини за комерцијална употреба, велат од Министерството за здравство.

The post Министерот Меџити прими вакцина против сезонски грип appeared first on Република.

Ова е најдобриот период, крајот на октомври - почетокот на ноември за почеток на вакцинација против сезонски грип. Во зимскиот период се очекува поголем број заболени, ние сме точно на време затоа што треба две до четири недели да реагира вакцината, односно да се разбуди имуниот одговор за организмот да биде заштитен, изјави денеска д-р Бесим Зеќири, директор на Центарот за јавно здравје Скопје каде што утринава почна вакцинацијата против сезонски грип.

Граѓаните може да се вакцинираат бесплатно преку „Мој термин“ и тоа важи за хронично болните, возрасните над 65 години, здравствените работници, бремени жени и деца од до пет години но и приватно, на свој трошок, за 700 денари.

Ние имаме вакцини на залиха од производителот „Пастер“ од Франција по цена од 700 денари, имаме и вакцини обезбедени преку Министерството за здравство, кои одат преку „Мој термин“. Приватни вакцини имаме 1.500 дози. Од Министерството за здравство, вакцини аплицираме толку дози, колку што има термини преку „Мој термин“, појасни Зеќири.

Доколку лицето има настинка, температура или слично, тој советуваше да се одложи вакцинирањето. Тој апелираше и до здравствените работници, но и до останатите граѓани, сите да се вакцинираат затоа што инфлуенцата, или грипот, како што посочи, претставува најголем проблем за јавното здравство и во однос на морбидитетот и во однос на морталитетот, значи и во однос на бројот на заболувања и во однос на смртни исходи, особено во зимскиот период. Најдобар начин за справување со овие предизвици, како што додаде, е вакцинацијата.

Претседателот на Комисијата за заразни болести, Александар Петличковски информираше дека со вакцинацијата против сезонски грип, сѐ оди во најдобар ред.

Ги следиме препораките на Светската здравствена организација за обезбедување вакцини во октомври, тоа е навистина еден многу добар момент. Тоа што не го следиме, а препорачано е од Светската здравствена организација, е опфатот на популацијата. Би било убаво кога годинава би забележале уште малку пораст на вакцинираните луѓе, со што би се приближиле до препораките од 75 отсто опфат на населението, подвлече Петличковски.

Годинава, како што додаде, Светската здравствена организација некаде околу февруари препорача четиривалентна вакцина против грип и таа е и обезбедена.

[caption id="attachment_694931" align="alignnone" width="683"] Во моментов доминира тип А од инфлуенца, рече д-р Александар Петличковски фото: МИА[/caption]

Вкупно се 60.000 бесплатни дози, плус обезбедени се некои за комерцијална употреба. Во моментов доминира тип А од инфлуенца, појасни Петличковски, одговарајќи на новинарско прашање.

Тој кажа и оти засега има добар одѕив, над 30.000 луѓе пројавиле интерес за вакцинација. Но, Петличковски изрази надеж оти со стартот на сезоната на грип тој број ќе се зголемува.

The post Крајот на октомври, почетокот на ноември е најдобро време за вакцина против сезонски грип, граѓаните се вакцинираат бесплатно преку „Мој термин“ и приватно за 700 денари appeared first on Република.

За два дена над 10.000 граѓани се пријавиле за бесплатна вакцинација против сезонски грип на страницата vakcinacija.mk, соопштија од Министерството за здравство.

Со бесплатна вакцинација ќе бидат опфатени следните ризични групи:

- Стари лица (над 65 години)

- Лица со хронични заболувања

- Здравствени работници

- Бремени жени

- Децата на возраст од 6 месеци до 5 години

- Лица сместени во установи за социјална заштита на стари лица и лицата вработени во установи за социјална заштита на стари лица

Вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход особено кај ризичните групи.

Со пополнување на апликацијата се регистрирате за вакцинација директно во системот Мој Термин. Согласно распоредот предвиден во планот за вакцинација, преку смс ќе добиете повратна информација за точниот датум, час и место кога треба да се вакцинирате, велат од Министерството за здравство.

Граѓаните, кои спаѓаат во ризичните групи може да го искажат својот интерес преку пополнување на апликацијата на следниот линк: https://vakcinacija.mk/mk/registration-flu?fbclid=IwAR06BSDGCR0NaKR8bJrWJ-mw1sDpmHFpJ5mOPTmZPSqzyiG8CNDddsSMmeM.

https://republika.mk/zivot/zdravje/ima-60-iljadi-dozi-od-chetiritipni-vaktsini-pochna-prijavuvaneto-za-besplatna-vaktsinatsija-protiv-sezonski-grip-za-rizichni-grupi/

The post За два дена над 10 илјади граѓани се пријавиле за бесплатна вакцинација против сезонски грип appeared first on Република.

Американскиот претседател Џозеф Бајден (80) примил уште една доза од вакцината против корона вирусот, како и годишната вакцина против сезонскиот грип.

Како што влегуваме во сезоната на настинки и грип, претседателот ги охрабрува сите Американци да го следат неговиот пример“, изјави личниот лекар на Бајден, Кевин О'Конор.

Во САД минатата недела беа одобрени ажурирани верзии на вакцините од „Фајзер“ и „Модерна“, кои се подобро прилагодени на варијантите на вирусот што моментално се во оптек.

Бројот на хоспитализации поврзани со корона вирусот во САД се зголеми во последните недели.

The post Ги охрабрува сите Американци да го следат неговиот пример: Бајден прими нова доза од вакцината против корона вирусот appeared first on Република.