Претседателот на ВМРО-ДПМНЕ Христијан Мицкоски денеска изјави дека доколку законот за амнестија се носи по скатена постапка и со злоупотреба на европско знаменце, ќе побара од највисоките тела на партијата поддршка за одлуката пратениците на ВМРО-ДПМНЕ и коалицијата да ја напуштат работата на Парламентот.

ВМРО-ДПМНЕ нема да го поддржи Законот за амнестија и за него бидејќи нема европско знаменце ќе мора да се дисктутира по стандардна процедура и тогаш отворено кажуваме дека ќе го блокираме. А, ако решат да ги злоупотребат своите овластувања, како што тоа го направиле многу пати досега и повторно злоупотребат скратена процедура и европско знаменце, тогаш ќе побарам од ИК и ЦК на партијата поддршка за одлуката пратениците на ВМРО ДПМНЕ и коалицијата да ја напуштат работата на Парламентот, порача денеска од Струмица Мицкоски.

Во обраќањето на Втората годишна конференција на Унија на ветерани на партијата насловена „Традиција која обврзува за иднина која доаѓа“ тој рече дека сега пред избори власта со Законот за амнестија прави сценарио за слобода на голем број криминалци кои ќе им помогнеле во изборната кампања.

Ковачевски плаќа висока цена за својата коалиција и силно го деградира нашето општество каде принципот на неказнивост стапува на сила. Криминалците не се плашат од одговорност, затоа што самата Влада продуцира неодговорност. Од друга страна, со мирна совест излегуваат и си велат дека следеле европски практики. Никаде во Европа нема терористи да ви убијат пет луѓе, од кои четири деца како што е случајот со Смилковското Езеро и сега нивните џелати ќе ги пуштат на слобода со законот за амнестија, рече Мицкоски.

Оддавајќи им почит на секој член на Унијата на ветерани на ВМРО - ДПМНЕ, рече дека партијата има бурна историја полна со емоции, различни гледишта и дека произлегувале партии и фракции во минатото, но сите подоцна се враќале и повика на обединување.

Луѓето од власта се свесни дека ќе им се случи народ и ќе им се случи тежок пораз и единствено им преостанаа византиските игри. Па, така пред некој ден се состанале Ковачевски, Зечевиќ, Заев и Спасовски. Се состанале за да прикажат дека се единствени и сплотени. Од тоа што се прави ја покажува, всушност, спротивната теза дека се длабоко поделени и раскарани. И добро е што се сретнале затоа што така пропадна уште една теза на одредени кругови на власта, па и на оние нивни лакеи во опозицијата дека имало каква било тајна коалиција меѓу ВМРО - ДПМНЕ и Заев, посочи Мицкоски.

Додаде дека упатува порака до Меѓународната заедница за да види што прави оваа Влада, бидејќи државата не постои само за едно прашање-уставните измени, додека многу други теми и прашања важни за народот поминуваат без коментар од нејзината страна.

Многу е ова важно затоа што многумина во македонското општество ова го потценуваат и многумина денеска се обидуваат да ни кажат дека ако не го прифатите диктатот во кој не сме ни биле учесници, тогаш за нас нема Европа. Навистина жалам што повторно по којзнае кој пат Европа е доведена во заблуда од страна на криминални политичари во Македонија и на Балканот исполнувајќи ги бугарските интереси за жал е заложник на руската политика на Балканот. Македонија и ВМРО-ДПМНЕ отсекогаш во историјата биле и се стремеле и имале прозападна ориентација. Немало дилема од самото формирање до ден денешен, потенцираше Мицкоски.

Според него, ВМРО-ДПМНЕ, која е наследник на историското ВМРО, е пред прагот повторно да го обедини македонскиот народ и граѓаните во Македонија на следните парламентарни избори за историска рекордна победа.

Имајќи го сето ова предвид мојата порака денеска од овде е не за диктати кои се носат помеѓу корумпирани политичари и тесна група на луѓе. ВМРО-ДПМНЕ било, е и ќе остане прозападна политичка партија. ВМРО-ДПМНЕ не е ниту пробугарско, просрпско, прогрчко, ВМРО-ДПМНЕ е демократска партија за македонско национално единство и е промакедонско, било и ќе биде. А мојата порака до меѓународната заедница е да не дозволите уште еднаш да бидете заложници на руските интереси удоволувајќи и на Бугарија за повторно да се обиде да го асимилира Македонецот. ВМРО-ДПМНЕ додека јас сум претседател и додека сум, жив нема никогаш да поддржи ваков бугарски диктат како што сега е ставен во парламентот, подвлече лидерот на ВМРО ДПМНЕ.

На годинашната конференција на Унија на ветерани на партијата се обратија и претседавачот Мане Јаковлевски и генералниот секретар Сашо Дранго, кои ја искажаа поддршката на претседателот Мицкоски и раководството на партијата.

The post Mицкоски: Ако се обидат да го донесат Законот за амнестија со европско знаменце, пратениците ќе го напуштат Парламентот appeared first on Република.

Мане Јаковлевски, претседавач на Унија на ветерани на ВМРО-ДПМНЕ од втората годишна конференција на унијата насловена „Традиција која обврзува, за иднината која доаѓа“ во воведниот говор се заблагодари на претседателот, Христијан Мицкоски што пред повеќе од две години донесе историска одлука да се формира Унија на ветерани.

На 21 септември, пред десет дена, по предлог на Извршниот Комитет, Централниот Комитет донесе одлука за промена на правилникот за работа на ВМРО-ДПМНЕ, со која промена УВ се изедначи со правата и обврските со УМС и УЖ. Ја добивме довербата и затоа што ние сме чувари на аманетот и идеалите на Илинденците и партизаните, запишани во документите на Крушевската Република и АСНОМ, кои денес се испоганети од челниците на СДС. Мораме да ја оправдаме оваа доверба што ни е дадена! Браќа и сестри, секој почеток е тежок, така и нашиот почеток како УВ не беше едноставен, беше тежок но сепак многу се сработи. За ова релативно кратко време Формиравме: 72 општински УВ, 1116 УВ во Месните Комитети, регистрирани се 34.200 членови од редовите на УВ низ цела Македонија, рече Јаковлевски.

Додаде дека Унија на Ветерани заедно со сите партиски структури активно учествуваше на последните локални избори, на кои убедливо победивме во 42 Општини, следејќи ги упатствата на партиското раководство се направија повеќе 100-тици средби низ целата држава.

Јаковлевски ја искористи оваа прилика, во името на Извршниот комитет на Унија на Ветерани изрази длабока почит кон Општинските Унии на Ветерани, за се што направиле и се што понатака ќе прават за ВМРО-ДПМНЕ и Македонија.

Благодарение на посветеноста и одговорноста кон предизвикот пред кој македонскиот народ е исправен во најтешкиот период од своето постоење успеавме да го извлечеме најдоброто од нас. Сето тоа зачинето со грижа на совест, дали сме направиле се за својот народ и за татковината Македонија, како основачи на ВМРО-ДПМНЕ и втемелувачи на самостојна Република Македонија, истакна Јаковлевски.

Во својот говор, Јаковлевски се осврна и на состојбите во Македонија, при што потенцираше дека ситуацијата е многу сериозна и дека партиите на власт СДСМ и ДУИ се занимаваат само со лоповлук и распродажба на македонските национални интереси.

Додаде дека за неколку месеци ќе има избори на кои ќе им се стави крај на нивното владеење, но повика и на масовна излезеност затоа што секој глас ќе биде важен за рушење на актуелната власт.

Браќа и сестри ветерани, Состојбата во Македонија е многу сериозна, СДС и ДУИ освен лоповлук и распродажба на национални интереси ништо корисно не направија. Сменија име, идентитет, менуваат историја, местат тендери, трошат државни пари за незапочнати и без проекти- патишта, ги полнат сопствените џебови, крадат лекарства од пациенти со најтешки болести, а наши граѓани умираат. Им се ближи крајот. За неколку месеци ќе има избори. Не чека голема работа, а ќе успееме ако сме сплотени и обединети. На наредните избори, потребна ќе биде масовна излезеност. Да не се залажуваме и да кажеме и без мојот глас ќе победиме. Секој оној кој што така мисли, прави корист за СДС и ДУИ. На наредните избори потребен ќе е секој еден глас, рече Јаковлевски, додавајќи дека треба ги засукаме ракавите и на наредните избори да обезбедиме над 61 пратеник.

The post Јаковлевски: За неколку месеци ќе има избори на кои ќе му се стави крај на лоповското владеење на СДС-ДУИ appeared first on Република.

Следете ја втората годишна конференција на Унијата на ветерани на ВМРО-ДПМНЕ со тема „Традиција која обврзува за иднината која доаѓа!“:

The post Видео од втората годишна конференција на Унија на ветерани на ВМРО-ДПМНЕ appeared first on Република.