Европските фудбалски клубови, кои се чувствуваат маргинализирани од богатите клубови од Лигата на шампиони, Европската фудбалска федерација (УЕФА) и Здружението на европски клубови (ЕЦА), формираа во Брисел своја Унија на европски клубови (УЕЦ).

Новата Унија има за цел да биде „гласникот‘ за околу 1.400 клубови, кои не се застапени во актуелното управување со европскиот фудбал, бидејќи не настапуваат во ниту едно од трите европски клупски натпреварувања, објасни еден од претставниците на УЕЦ и експерт за спортски маркетинг Вилијам Мартучи.

Оваа нова структура со нејасни контури, која засега нема ниту раководен тим, ниту статут, за време на презентацијата одржана во понеделникот вечер во Брисел, обзнани регистрација на четириесетина клубови од 25 држави, вклучувајќи ги англиските клубови Астон Вила и Брајтон, шпанските Севиља и Валенсија, како и бундеслигашот Борусија Менхенгладбах.

„Не станува збор за замена на ЕЦА, туку за рамнотежа на влијанието кое големите клубови преку ЕЦА го имаат во раководењето и финансиите во европскиот фудбал. Новата група има за цел да добие место во органите за одлучување на УЕФА“, рече Катарина Пијетловиќ од новоформираната Унија на европски клубови.

УЕФА и ЕЦА, засега, не го коментираат доаѓањето на овој нов „играч“ во европскиот фудбал

The post Се формираше здружение на „сиромашни“ фудбалски клубови-УЕЦ appeared first on Република.