Министерот за транспорт и врски Александар Николоски денеска порача дека целта на најавите за промени во телекомуникацискиот пазар со можност за влез на трет мрежен мобилен оператор е граѓаните да добијат поквалитетни услуги за помалку пари бидејќи според него, „со сегашниот дуопол цените не само што не се намалуваат туку се зголемуваат“.

На новинарско прашање за писмото со намери што до Владата го достави операторот 4iG групација од Унгарија Николоски рече дека во наредниот период ќе се донесе стратешка одлука дали ќе се воведе трет мобилен оператор или ќе се работи на намалување на цените на постојните два оператори. Но, нагласи, факт е дека во моментов има дуопол помеѓу постојните два оператори и пазарот е идеално поделен 51:49 помеѓу првиот и вториот оператор.

Цените на услугите не само што не се намалуваат туку се зголемуваат. Нема никаков натпревар ниту во делот на нудење на подобри услуги, ниту во делот на поевтини цени за граѓаните. Се соочуваме секој ден со проблеми затоа што постои овој дуопол – дали се работи за начин на којшто се поставуваат базни станици, дали се работи за услуги коишто се испорачуваат кон граѓаните, квалитетот не е на соодветно ниво - изјави Николовски, при посетата на Кавадарци.

Праша „дали има друга држава во Европа каде што граѓаните плаќаат за кабелска телевизија, а дел од надоместот што граѓаните го плаќаат не се исплаќа на телевизиите коишто се емитуваат преку кабелска телевизија?

Тоа го има само во Македонија, како што само во Македонија има телевизиите да плаќаат за т.н. дигитализација на еден од овие два оператори, а вториот оператор воопшто да не нуди таква услуга што мислам дека е најдобар доказ за договорите што ги прават помеѓу себе. На крај страдаат граѓаните и затоа ние мора ова да го решиме на начин што граѓаните ќе добијат поквалитетни услуги за помалку пари - рече Николоски.

Министерот рече и дека „се подготвени за напад од двата оператора, но и дека се неколку чекори пред нив и се добро информирани“.

Кога влеговме во оваа операција бевме свесни дека ќе има голем напад од овие два оператора затоа што не им одговара да се разбие пазарот и да се воведе конкуренција, спремни сме за тој напад, ама да им кажам дека сме барем неколку чекори пред нив затоа што сме многу подобро од нив информирани и сме свесни дека тие никогаш нема јавно да излезат да го нападнат ова, туку преку одредени медиуми во коишто имаат сериозно спонзорство и издвојуваат дел од својот буџет преку реклами, ќе отвораат измислени теми од тип на не знам стратешки позиционирања. Очекувам сега нешто друго да отворат. Но, како што кажав, секогаш сме чекор пред нив од причина што тие „ги газат“ и „ги цицаат“ граѓаните, а ние сакаме граѓаните да имаат подобар квалитет за помалку пари - изјави Николоски.

На прашањето зошто унгарска компанија за која се знае дека е блиска до претседателот Орбан, Николоски одговори со прашање „Па зошто да не?. Ако сега граѓаните плаќаат 5.100 денари за одредена услуга, а утре плаќаат 3.100, според него, „што е важно кој ја дава услугата?.

Зошто граѓаните да плаќаат 5.100 за некоја услуга а да не плаќаат 3.100, а реално и со 3.100 ќе заработуваат операторите. Многу е едноставно. Стравот кај овие два оператори е дека цените драстично ќе се намалат и нема да можат да прават десетици милиони евра профит секоја година, тие пари ќе останат кај граѓаните. Во јавноста да се поставува прашање дали ќе се почитува законот, па нормално ќе се почитува. Никој не е луд да направи нешто што е надвор од законот, тоа е основна работа, тоа е основно правило. Но, суштината е многу подлабока - рече Николоски.

Министерот Николоски на 6. месецов ја информираше Владата на седница дека е пристигнато писмо со намери од унгарскиот оператор 4iG групација, откако тој претходно во Будимпешта оствари средба со претседателот на групацијата Гелерт Жасзаи.

На пазарот на мобилни комуникации во државава активни се два мобилни мрежни оператори, три виртуелни мобилни оператори и еден оператор препродавач. Нивото на пенетрација на малопродажниот пазар на мобилни комуникациски услуги изнесуваше 89,68 проценти во четвртиот квартaл на 2020 година, 93,83 проценти во четвртиот квартал од 2021 година, 105,23 проценти во четвртиот квартал од 2022 година, односно 104,53 проценти во првиот квартал од 2023 година.

Заклучно со третиот квартал од 2023 година на пазарот на моbилна телефонија се регистрирани 2.074.021 активни претплатници, во кои мрежните оператори А1 Македонија и Македонски Телеком имаат удел од по 47,62 односно 47,24 проценти.

The post Николоски: Подготвени сме за напад од мобилните оператори, но сме неколку чекори пред нив appeared first on Република.

Бројот на претплатници во мобилната телефонија во државава достигнал 2.030.386 заклучно со третиот квартал лани, што е за 8,71 процент повеќе во однос на претходниот квартал, како и за 10,73 проценти споредено со третиот квартал од претходната година, покажува Извештајот за развој на пазарот за електронски комуникации за третиот квартал 2021 година.

Според податоците од Извештајот што го објавува Агенцијата за електронски комуникации (АЕК), заклучно со третиот квартал годинава во државава се регистрирани 422.967 корисници во фиксната телефонија, што е за 3,51 процент повеќе во однос на истиот период лани.

Вкупниот број на претплатници на пристап до интернет со широк опсег (не се вклучени претплатници преку мобилни уреди) достигнал 490.084, за 1,62 проценти повеќе на квартално, а за 5,97 на годишно ниво.

Истовремено АЕК регистрира 1.568.813 претплатници на пристап до интернет со широк и тесен опсег преку мобилни мрежи (2Г/3Г/4Г), за 12,4 проценти повеќе во однос на претходниот квартал.

Раст се бележи и кај претплатниците на ТВ пакети, чиј вкупен број на крајот на третиот квартал лани е 423.915, за 0,5 проценти повеќе во однос на вториот квартал, а за 1,64 проценти во однос на третиот квартал лани.

Телефонски услуги на фиксна локација во третиот квартал од 2021 година обезбедувале 14 нотифицирани субјекти, а пет на јавна мобилна комуникациска мрежа. Услуги за пренос на податоци имало од 82 субјекта, додека 40 биле активни во пренос на радио и ТВ сервиси

The post Мобилен интернет користат 1.568.813 претплатници во Македонија, во пораст и фиксните линии appeared first on Република.

До Агенцијата за електронски комуникации (АЕК) лани се поднесени вкупно 515 приговори кои се однесуваат на незадоволство на корисниците од квалитетот на услугата за говор и интернет во мобилна телефонија, преносливост на број, фиксна телефонија, кабелски интернет, говор и интернет во роаминг, кабелска телевизија.

Од вкупниот број поднесени приговори до АЕК, кај 41 процент постапката е запрена заради постапување на операторот во текот на решавање на предметот, 22 проценти се позитивно решени од страна на АЕК, 27 проценти се негативно решени, а кај еден процент од предметите се спровело посредување и двете страни се спогодиле. За девет проценти регулаторното тело не било надлежно за проблемот за кој се приговара, поднесувањето на приговорот било ненавремено или документацијата била некомплетна.

Од регулаторното тело за годинава најавуваат дека ќе се намали дигиталниот јаз помеѓу корисниците што имаа можност да пристапат до интернет и оние што досега немаа таква можност, во согласност со новите договори со давателите на универзалната услуга. Во новата година за граѓаните треба да станат достапни и 5Г-услуги за што е во тек тендер, а се најавува и влез на нов мрежен мобилен оператор.

На крајот на 2021 година АЕК склучи нови договори за универзалната услуга, кои ќе бидат во важност пет години. По спроведена анализа и оцена на поднесените понуди за даватели на услугите опфатени со универзалната услуга, АЕК донесе одлука дека за давател на услугата „Обезбедување пристап на фиксна локација“ и „Обезбедување телефонски услуги“ се определува „Македонски телеком“, за „Обезбедување целосен телефонски именик и целосна телефонска служба за информации“ –  „Р3 Инфомедиа“, а за „Јавни телефонски говорници или други јавни пристапни точки за обезбедување на говорни телефонски услуги“ – „А1 Македонија“.

Во рамки на овие договори, давателот на универзална услуга за поврзување на краен корисник на фиксна локација со јавна комуникациска мрежа треба да обезбеди пристап до интернет со брзина од 12 Mbps по прифатливи цени за сите домаќинства што досега немаа можност да се поврзат на интернет со некоја од достапните технологии. Станува збор за домаќинства во оддалечени локации за кои операторите немаа комерцијален интерес да инвестираат и да обезбедат пристап и пренос на податоци за да се обезбеди ефикасен пристап до интернет. Овие домаќинства имаат можност да се поврзат на интернет преку некоја фиксна или мобилна технологија во зависност од пристапноста и конфигурацијата на теренот. Овој оператор обезбедува пристап и терминална опрема за пренос на податоци со брзина доволна да се обезбеди ефикасен пристап на интернет од 12 Mbps и за учениците со посебни образовни потреби во редовните и посебните основни и средни училишта, во согласност со законите за основното и средното образование - велат од АЕК.

Според АЕК, со ваквите обврски, кои ги обезбедува давателот на универзална услуга, ќе се намали дигиталниот јаз помеѓу корисниците што имаа можност да пристапат до интернет и оние што досега немаа таква можност. Со договорот за давател на универзална услуга склучен во 2016 година, чија  важност заврши на крајот на 2021 година, минималната брзина на пристап до интернет беше 2 Mbps. Сега веќе е усвоено интернет-брзина за секој краен корисник што е дел од универзалната услуга да изнесува 12 Mbps.

Тоа значи пристап до интернет со задоволителна брзина и во најоддалечените рурални подрачја на државата каде што сите граѓани, вклучително и учениците, ќе добијат стабилен интернет-пристап и останати телефонски услуги. Се очекува ова да им биде од помош најмногу на учениците со учење од далечина, како и на стопанствениците во тие подрачја. Минимална брзина од 12 Mbps во Европа, во моментов има само во државава. Само две земји членки на ЕУ, Словенија и Шведска, имаат дефинирана минимална брзина од 10 Mbps, a останатите земји членки на ЕУ имаат помала брзина и од 10 Mbps.

Во согласност со Законот за електронски комуникации, универзална услуга е минимален пакет од услуги со определен квалитет, достапен по прифатлива цена за сите крајни корисници во државава без оглед на нивната географска локација. Тоа значи дека давателот што е избран да обезбедува универзална услуга треба да им ја обезбеди на корисниците со пропишаниот минимален квалитет дури и на оние места каде што операторот нема комерцијален интерес за обезбедување услуги, а притоа цените на услугите да бидат еквивалентни на оние што ги имаат другите крајни корисници на комерцијална основа.

По брзина на интернет сме петти во регионот, а 29. во Европа

Брзината на кабелскиот интернет во државата, а во однос на останатите држави од регионот и членките на ЕУ, е на многу задоволително ниво, велат од АЕК за МИА.

Во зависност од начинот на пресметување и приказ, појаснуваат, самата анализа е различна од причина што различни резултати се добиваат доколку пресметките се прават по корисник, по можност за пристап од страна на операторите и по вкупен број жители во државата, како и по целокупна покриеност со интернет во државава.

Имајќи предвид дека покриеноста на државава со широкопојасен интернет, брз интернет и супербрз интернет е различна, како и дека населеноста е на пониско ниво во руралните средини, па оттука и покриеноста во таквите средини е на ниско ниво. Севкупно може да се каже дека и да се пресметува по четири различни начини, Македонија во регионот е на петто место од десетте држави на Балканот и на 29. место од 52 држави во Европа. Според податоците од септември 2021 година, можност за пристап до брз интернет (брзина од над 30 Mbps) во државава имаат 82,54 проценти од населението, а во ЕУ е над 86 проценти. Можност за пристап до супербрз интернет (брзина од над 100 Mbps) имаат 63,1 проценти, а во ЕУ е над 60 проценти -  информираат од АЕК.

Kако што посочуваат од агенцијата, во однос на безжичниот интернет, може да се каже дека операторите во државава обезбедуваат мрежи/услуги со значително висок квалитет. Потврда за ова е објавеното рангирање за квалитетот на мрежите во Европа на ниво на држави од страна на порталот www.connect.dе во рубриката Топ тема на 5 мај 2020, каде што Македонија е позиционирана на високото второ место со 193 поени веднаш зад Холандија со 914 поени, а пред Австрија со 902 поени и Швајцарија со 899 поени.

Тоа е само потврда за правилните политики што ги спроведува АЕК во делот на стимулирање на операторите да инвестираат во најнови технологии и секако во спроведување на законската регулатива. Секоја година АЕК спроведува кампања за мерење на параметрите за квалитет на услугите што ги обезбедуваат операторите преку јавни радиокомуникациски мрежи и ги објавува на веб-страницата www.komuniciraj.mk, каде што на едноставен, разбирлив, компаративен и транспарентен начин корисниците можат да се информираат за квалитетот на услугите - велат од АЕК.

Алатката на АЕК со која корисниците можат самостојно да измерат брзина на интернет-услуга што се обезбедува преку кабелска мрежа е објавена на https://speedtest.aek.mk. Во последните два месеца, поради технички проблеми, не е во функција, но како што велат од АЕК, се работи на отстранување на проблемот. Во текот на 2021 година до АЕК се поднесени вкупно 107 приговори по оваа основа, a во 2020 година имало 67 такви приговори.

The post Лани имало 515 приговори за услугите во интернет и телефонијата appeared first on Република.