Директорката на Танец, Весна Митевска и деканката на Факултетот за музичка уметност во Скопје, м-р Дарија Андовска, потпишаа меморандум за соработка со цел заеднички придонес кон одржувањето, развојот и претставувањето на македонското фолклорно богатство.

Иако, овие две државни институции припаѓаат на две различни сфери на делување – културата и образованието, тие сите овие години се упатени една на друга и имаат заедничка цел, да ги чуваат културните темели на македонската државност.

Ќе работиме за заеднички да придонесеме кон одржувањето, развојот и пласманот на нашето национално, културно и историско богатство – фолклорот, се вели во објавата од ФМУ.

The post Факултетот за музичка уметност – Скопје потпиша Меморандум за соработка со Танец appeared first on Република.

Националниот ансамбл за народни игри и песни „Танец’’ објави повик за пријавување за бесплатни едукативни часови за изведба на народни игри и песни, наменети за млади на возраст од 18 до 23 години.

Како што информира „Танец“, часовите ќе бидат под менторство на нивни врвни уметници. Повикот е наменет за млади од 18 до 23 години коишто учат или имаат завршено средно музичко/балетско училиште на насоката за традиционална музика и игра или се на академски студии во чиишто програми се изучува музичко-сценскиот фолклор, како и сите млади ентузијасти кои имаат солидни знаења од областа, преку членување во културно-уметничките друштва.

Пријавувањето на заинтересираните почнува денеска и ќе трае до 7 ноември, а наредниот ден (8 ноември) од 10 часот во просториите на ансамблот ќе се одржи проверка на музичко-сценските способности на пријавените кандидати и нивната селекција.

Најдобрите од нив, избрани од стручната комисија, ќе ја имаат можноста да посетуваат специјални едукативни часови во ансамблот „Танец“ и ќе можат да учат од најдобрите во музичко-сценската дејност во Македонија и пошироко. Кои од пријавените ќе го освојат правото на посета на едукативните часови, ќе зависи од одлуката на стручната комисија, која ќе спроведе проверка на знаењата и умеењата на секој пријавен кандидат, соопшти ансамблот.

Меѓу критериумите за избор е играчите да изведат еден играчки образец по личен избор и еден од репертоарот на „Танец“, предложен од комисијата, а тие што ќе се пријават за вокални исполнители треба да изведат една народна песна по личен избор и една од репертоарот на „Танец“, предложена од комисијата.

Сите кандидати на приемниот ден треба со себе да понесат патики за вежбање во сала или опинци, заради непречено презентирање на своите изведувачки способности. Сите примени кандидати коишто ја поминале претселекцијата и целосно ги завршиле едукативните часови, ќе добијат сертификати за успешно помината обука за ансамблов изведувач на народни игри, односно песни на Националниот ансамбл за народни игри и песни „Танец“, се наведува во објавениот повик.

За да се пријават, кандидатите треба на мејлот sekretar@tanec.com.mk да пратат податоци за себе: име и презиме, датумот на раѓање, бројот на личната карта (што ќе ја покажат на увид на стручната комисија) и видот на часови кои сакаат да ги посетуваат (часови за играч или часови за пејач).

НУ Танец свесно и одговорно го поддржува фолклорниот аматеризам, училишното и академското образование од сферата на фолклорот, како и идните професионални изведувачи, обезбедувајќи континуитет на културните традиции и создавајќи платформа за раст, креативност и уметничка извонредност во изведбата на музичко-сценскиот фолклор. Овој менторски пристап, не само што го поттикнува развојот на вештините, туку го засилува и чувството за културен идентитет кај младите, наведува „Танец“. 

The post Ансамблот „Танец“ нуди бесплатни едукативни часови за млади од 18 до 23 години appeared first on Република.

Националниот ансамбл за народни игри и песни „Танец“, во петокот, на 20 септември, го одржа првиот концерт од балканската турнеја. На сцената на Културно информативниот центар „Будо Томовиќ, Танец со својот музичко-сценски колаж, на исклучителен начин ги пренесе духот и убавината на традиционалната македонска култура, создавајќи посебно доживување за бројната публика, која го исполни аудиториумот до последното место.

Во рамките на концертот беше изведена богата музичко-сценска програма, која започна со церемонијата на интонирање на македонската и црногорската химна, интерпретирани од првенката на Танец, Сузана Спасовка и Марина Цуца Франовиќ.

Добредојде на ансамблот Танец, на директорката Весна Митевска и сите присутни видни гости им посака актуелниот амбасадор на Македонија во Црна Гора, Зеќир Рамчиловиќ, а концертната вечер во чест на Танец ја отвори домашниот фолклорен ансамбл „Будо Томовиќ“. Потоа се нижеа Тешкото, Женско чамче, Копачка, Мариовска тресеница, Радовишки собор, Жетварка, Малешевка, како и низа прекрасни вокални и инструментални сплетови од ризницата на Танец.

The post „Танец“ во Подгорица го прикажа сиот раскош на традиционалната македонска култура appeared first on Република.

Националниот ансамбл за народни игри и песни „Танец“ во четврток заминува на балканска турнеја чие мото е „ТАНЕЦ - 75 години македонски код“! Во рамки на турнејата „Танец“ ќе има концерти во Подгорица, Љубљана, Загреб и Бања Лука.

Публиката во регионот, секогаш знаела да ја цени извонредноста на Танец и со сигурност нестрпливо ги очекува овие уникатни музичко-сценски спектакли, што секогаш ги премостуваат културните разлики и сведочат за обединувачката моќ на раскошниот македонски музички фолклор. На претстојните концерти во Подгорица (20.9.2024), Љубљана (22.9.2024), Загреб (24.9.2024) и Бања Лука (27.9.2024), на големите сцени на КИЦ „Будо Томовиќ“, „Цанкарјев дом“, „Ватрослав Лисински“ и салата „Борик“, ќе биде изведена раскошна музичко-сценска програма од различни периоди на ансамблот, во која ќе бидат одиграни изворните ора „Тешкото“, „Женско Чамче“ и „Копачка“, како и дел од богатиот кореографски опус на Танец – спектакуларните кореографии „Жетварка“, „Мариовска тресеница“, „Малешевка“ и „Радовишки собор“, се вели во денешното соопштение од „Танец“.

Во него се додава дека нема да изостане и богатата вокално-инструментална програма на оркестарот и хорот на „Танец“, заедно со првенката Сузана Спасовска, кои за публиката ќе исполнат повеќе антологиски песни од богатата ризница на македонскиот народ, како безвременските „Да сум бистра вода“, „Девојче, девојче“, „Седна баба да вечера“, „Лено, ле, Лено“, „Кирјана вино продава“, „Море сокол пие вода на Вардарот“ и многу други.

Турнејата е во рамките на јубилејната година на ансамблот, кога се прославува 75-годишнината од основањето.

Ансамблот „Танец“ е основан во март 1949 година во Скопје и претставува еден од најважните столбови на македонската култура и традиција. Формиран е со цел да ги собира и негува македонските традиционални песни и ора, народните инструменти и носии, и преку соодветен уметнички израз да ги прикаже највредните форми од богатата ризница на македонскиот народ. Благодарение на сите генерации кои ја градеа и спроведуваа јасно дефинираната програмска активност на основачите, ансамблот се развиваше и низ годините прерасна во една од најугледите и најрепрезентативните институциии од областа на културата во регионот и во светот.

Во текот на овие 75 години, ансамблот Танец, велат оттаму, има настапувано на најпрестижните сцени на целата земјина топка, со повеќе од 5.000 незаборавни концерти. На неговиот репертоар се наоѓаат над 90 кореографии и неколку стотици вокални и инструментални дела, преку кои ансамблот презентира различни музички и кореографски традиции од сите краишта во кои егзистирал богатиот македонски фолклор. Ансамблот поседува и извонредна колекција од 3.000 автентични носии со исклучителна вредност и убавина, што секој негов настап го претвораат во посебно аудио-визуелно доживување.

The post „Танец“ во четврток заминува на балканска турнеја чие мото е „Танец- 75 години македонски код“! appeared first on Република.

Националниот ансамбл за народни игри и песни „Танец“ има тргнува низ поранешна Југославија. ќе настапи во Црна Гора, Словенија, Хрватска и Босна и Херцеговина.

Првиот концерт е во Подгорица на 20 септември во Културно-информативниот центар „Будо Томовиќ“. Два дена подоцна „Танец“ настапува во Љубљана во „Цанкарјев дом“. Во Загреб ќе одржи концерт во салата „Ватрослав Лисински“ на 24 септември. Турнејата завршува со настап во Бања Лука на 27 септември, во салата „Борик“.

The post „Танец“ на турнеја во Подгорица, Љубљана, Загреб и Бања Лука appeared first on Република.

The post „Танец“ ја доби првата жена директор во својата 75-годишна историја appeared first on Република.

Викендов Танец ќе биде дел од традиционаланта Галичка свадба.

На 13 и 14 јули, играорките и играорците на Танец, придружувани од познатата зурлаџиска тајфа Мајовци, ќе ги изведат антологиските ора „Невестинско”, „Тешкото” и „Манукот”, ора без кои е незамислива оваа најпрочуена традиционална свадбена манифестација во регионот“ најавуваат од Танец.

Институционален покровител на „Галичка свадба“ е претседателката на државата Гордана Сиљановска Давкова. Еден од традиционалните поддржувачи на манифестацијата и годинава е Министерството за култура и туризам.

Галичката свадба за прв пат е одржана во далечната 1963 година, а досега настанот имал вкупно 50 изданија.

The post Танец викендов ќе биде дел од Галичка свадба appeared first on Република.

На сцената „Долни Сарај“ во Охрид вечерва ќе концерт ќе одржи ансамблот „Танец“, со што свечено ќе биде отворен 63. Балкански фестивал на народни песни и игри. Два дена потоа, на 5 јули, на летната сцена на Заводот и музеј во Прилеп, „Танец“ ќе има целовечерен концерт со изворен вокално-инструментален репертоар, по повод свеченото отворање на јубилејниот 50. Фестивал на народни инструменти и песни „Пеце Атанасовски - Долнени.

Секако, и овогодинешната културно-сценската манифестација „Галичка свадба“ нема да да помине без Танец, каде ансамблот на 13 и 14 јули ексклузивно ќе ги изведе ората „Тешкото“, „Невестинско“ и „Манукот“, а на 2 август, како и досега, Танец и оваа полусезона ќе ја заврши со традиционалните концертни настапи во Крушево и Пелинце, по повод големиот македонски празник Илинден, најавуваат од „Танец“.

На 25 јули традиционално „Танец“ ќе има голем концерт спроти Меѓународниот фолклорен фестивал „Илинденски денови“ каде ќе настапи целиот ансамбл со богата кореографска и вокално-инструментална програма.

Јубилејната концертна сезона на Танец продолжува веќе во септември, со балканската турнеја на проектот „Фолклорно-класична симбиоза„ (грандиозниот заеднички концерт на Танец со оркестарот и хорот на Националната опера и балет), после која ќе следува ноемврискиот гала концерт по повод централно одбележување на 75-годишнината на НУ Танец и секако, традиционалниот новогодишен концерт кон крајот на декември. Во меѓувреме Танец нема да ги запостави и настапите низ татковината и ќе одржи уште неколку концерти во Велес, Струмица и Свети Николе, соопштија од ансамблот.

The post Со концерт на „Танец“ на сцената „Долни Сарај“ се отвора 63. издание на Балканскиот фестивал на народни песни и игри appeared first on Република.

Во вторник, на 11 јуни 2024 година, во Македонскиот народен театар, со почеток во 20:00 часот, ќе може да го проследите концертот „Седенка се збира“, концерт на Танец посветен на 100-годишнината од раѓањето на Ѓорѓи Димчевски, еден од легендарните македонски музичари од сферата на народната музика, кој остави неизбришлива трага во историјата на ансамблот „Танец“ и во македонската музичка култура, воопшто.

Во „Танец“ се вработил во 1954 година и на тоа место останал до крајот на својот работен век, до 1978 година, кога се пензионирал. Цели 25 години бил раководител на оркестарот, солист на виолина и тамбура, аранжер на песни и инструментални мелодии, но и автор на музички обработки на цели кореографии. Исто така, бил и одличен свирач на зурла, меѓу другото и на антологиското оро „Тешкото“. Со „Танец“ патувал насекаде низ светот, ширејќи го автентичниот македонски фолклор, а како инструменталист и автор на бројни музички обработки, тој е недвосмислено еден од значајните културни дејци, кои зад себе оставиле препознатлив печат во македонската музичка историја. Во архивата на „Танец“ е забележано дека меѓу авторите на музички обработки за сите 75 години, Ѓорѓи Димчевски е на водечкото место, со 25 регистрирани кореографии. Неговото име стои зад антологиските постановки: Мариовска тресеница, Осоговка, Жетварка, Водарки, Тропнало оро, Цвеќеберачки, Солунка, Русалии и др. Исто така, за време на својот богат творечки век, запишал и мелографирал неколку стотици македонски народни мелодии и објавил неколку книги со народни песни и ора, „Вие се оро македонско“, „Седенка се збира“, „Македонски ора“, „Ајде да пееме заедно“. Ваквиот богат творечки опус, за ансамблот Танец, но и надвор од него, не обврзува да му приредиме музичко-сценски настан во чест на 100 годишнината од неговото раѓање, што ќе биде достоен за неговата големина. Програмскиот фокус е ставен на кореографското творештво, но и на неколку вокални, инструментални и вокално-инструментални сплетови, составени од прекрасни народни мелодии, коишто биле предмет на неговите музички обработки. На концертниот дел од програмата ќе ù претходи документарен видео осврт кон неговиот за живот и дело, за што се користени на архивски материјали од Танец, МРТ и приватната колекција на семејството Димчевски.

Програма:

НАРОДНАТА МУЗИКА – ПРВА ЉУБОВ, ТАНЕЦ – ГОЛЕМО УЧИЛИШТЕ
Документарен осврт кон животот и делото на Ѓорѓи Димчевски
Автор на текстот: М-р Бранка Костиќ-Марковиќ
Во видеото се користени материјали од Танец, МРТ и од приватната архива на семејството Димчевски.

ВОДАРКИ (1965)
Кореографската постановка „Водарки“ доминантно му припаѓа на источното играорно подрачје, со претежно вклучени игри и песни од беровско-кочанскиот крај, но и црпи инспирација и од други региони во Македонија. Преку оваа целосно женска постановка, инспирирана од секојдневниот македонски селски живот, се прикажува обичајот на одењето по вода. Имено, дејствието се одвива навечер, кога младите девојки одат пред селската чешма, после напорната полска работа. Додека се полнат стомните со вода, девојките си даваат оддушка од макотрпната работа, преку убавата игра и песна. Во оваа кореографијата се вклучени повеќе ора, меѓу кои и познатите „Ратевка“ и „Беровка“, како и неколку прекрасни песни поврзани со кореографската тематика.
Кореографија: Димитар Митко Алексов и Блаже Велевски Палчевски
Музичка обработка: Ѓорѓи Димчевски

ИЗБОР ПЕСНИ ОД ВОКАЛНИТЕ ЦИКЛУСИ НА ЃОРЃИ ДИМЧЕВСКИ
– Не се бели Маре, мори
– Елено, ќерко
– Промени се Суте
– Јас ти реков добровечер
– Јас ќе ти купам свилено фустанче
Исполнува: Машката вокална група на Танец

ОСОГОВКА (1962)
Кореографската постановка „Осоговка“ („Арнаутка“), се смета за една од најубавите типично машки игри во репертоарот на Танец, а по атрактивноста се смета за своевиден сценски спектакл на народната уметност. Во драмското дејствие, лоцирано од авторите во подножјето на Осоговските планини, се нижат повеќе машки игри од источното играорно подрачје, базирани на основиот играчки образец на орото „Арнаутско“. Всушност, оваа кореграфска постановка, преку надигрувањето на машките групи, ја прикажува машката иницијација.
Кореографија: Димитар Митко Алексов
Музичка обработка: Ѓорѓи Димчевски

ОРКЕСТАРСКА ПЛЕТЕНКА
Инструментален сплет од мелодии од кореографскиот опус на Ѓорѓи Димчевски
Избор и музичка адаптација: Дарко Илиевски
Исполнува: Оркестарот на Танец

МАРИОВСКА ТРЕСЕНИЦА (1966)
Кореографската постановка „Мариовска тресеница“ е една од постарите кореографии во репертоарот на Танец. Станува збор за женска обредна пролетна поворка од Мариово, поврзана со денот Чист Понеделник, понеделникот по Прочка, кога започнуваат долгите Велигденски пости и кога домаќинките ги чистат своите домови и ги обезмастуваат садовите за храна за големиот пост. Играорките во оваа постановка се облечени во богати автентични носии од мариовскиот крај, што остава дополнителен импресивен сценски впечаток. Музиката има посебен печат со својот чалгиски звук, а целокупната постановка претставува една мајсторски создадена монолитна творба, која е една од најатрактивните во богатиот репертоар на Танец.
Кореографија: Јонче Христовски
Музичка обработка: Ѓорѓи Димчевски

ИЗБОР ПЕСНИ ОД ВОКАЛНО-ИНСТРУМЕНТАЛНИТЕ ЦИКЛУСИ НА ЃОРЃИ ДИМЧЕВСКИ
– О, Јано, Јано
Исполнува: Машката вокална група на Танец
– Марика, мома убава
Исполнува: Машката вокална група на Танец
– Да ми дојдеш, калеш, море, Димчо
Исполнува: Женската вокална група на Танец
– Не стој Доне, Донке
Исполнува: Хорот на Танец

ЖЕТВАРКА (1968)
Во оваа, карактерно обредна, раскошна сценска постановка, низ песните и игрите од кочанскиот крај, драматуршки се прикажани моментите околу жетвата. Богатата жетва, за нашиот народ, секогаш била повод за радост и веселба, а убавата македонска песна, ја олеснувала макотрпната физичка работа околу собирањето на богатиот род. Во оваа антологиска кореографија на Танец, низ карактеристичната драматургија на жнеење и автентичните овчеполски носии, на извонреден начин се нижат убавите мелодии на песните „Узреала бела пченица“, „Зажни Јано“, „Повеј, повеј ветре“, „Што ми е мерак полјак да бидам“ и овчеполските ора “Полјачко“ и Потрчулка“, кои сите заедно на крајот кулминираат во заедничко масовно оро, кое е проткаено со сета радост која се случува на крајот на плодната жетва.
Кореографија: Димитар Митко Алексов
Музичка обработка: Ѓорѓи Димчевски

НУ ТАНЕЦ
м-р Мартин Вучиќ, директор
м-р Бранка Костиќ – Марковиќ, уметнички раководител на сценско-уметничка дејност
м-р Дарко Илиевски, уметнички раководител на оркестар
Кирил Спасеновски, уметнички раководител на хор
Јовица Блажевски, уметнички раководител на играорен кор
Весна Митоска, асистент на играорен кор:
Светлана Ќириќ, стручен соработник во сценско-уметничка дејност

ТАНЕЦ – 75 ГОДИНИ МАКЕДОНСКИ КОД

Основан во март 1949 година во Скопје, ансамблот Танец веќе 75 години е еден од најстамените столбови на македонската традиција и култура, и недвосмислено, еден од главните темели на македонската државност. Формиран со цел да ги собира и негува македонските традиционални песни и игри, народните инструменти и носии носии, и преку соодветен уметнички израз, сценски да ги претстави највредните форми од богатата ризница на македонскиот народ, тој е денес една од најблескавите страници на македонската културна историја. Благодарение на сите генерации што ја градеа и реализираа јасно поставената програмската активност на основачите, ансамблот низ годините се развиваше и прерасна во институција за почит, издигнувајќи се на нивото на уметничка извонредност и симбол на културна раскош пред публиката ширум светот. Како подвижен музеј на нашето културно богатство, ансамблот во текот на овие 75 години остави белег на најпрестижните сцени во сите светски метрополи, на сите континенти и остварувајќи над 5000 незаборавни концерти. Репертоарот на Танец има над 90 кореографии и неколку стотици вокални и инструментални творби, преку кои ансамблот ги претставува разновидните музички и кореографски традиции од сите региони каде што се создавал богатиот македонски фолклор. Во фундусот на Танец се наоѓа уникатна збирка од 3000 автентични носии со исклучителна вредност и убавина, па оттука, секој настап на Ансамблот е посебно аудио-визуелно доживување. Денес, НУ Ансамбл за народни игри и песни Танец е модерна институција со приближно 100 вработени. Оваа година славиме голем јубилеј и додека ја одбележуваме оваа значајна отсечка во времето, ја имаме на ум целокупната седумиполдецениска посветеност и страст на сите генерации извонредни играорци, песнопојци, свирачи кои оставиле драгоцен дел од својот живот во Танец. Нивната непоколеблива заложба за зачувување и промовирање на македонските народни традиции, не само што го збогати македонскиот културен пејсаж, туку послужи и како транскултурен и сеопшт катализатор за дијалог и единство во глобални рамки. Нема да е претерано ако кажеме дека недвосмислената убавина на нашиот фолклор е вистински бисер во герданот на светското културно наследство, а Танец важна негова алка. Танец е наша и светска гордост, Танец е македонскиот идентитетски код (што е и слогант под кој ја прославуваме 75-годишнината), Танец е длабок печат во светската културна меморија!

The post „Седенка се збира“ – концерт на Танец посветен на 100-годишнината од раѓањето на Ѓорѓи Димчевски appeared first on Република.

The post „Танец“  одржа концерт во Домот на културата „Иван Мазов-Климе“ во Кавадарци appeared first on Република.

Вечерва со почеток во 20часот во Националната Опера и Балет, ќе се одржи голем Велигденски концерт на ансамблот Танец, насловен „Велигден е, Ѓурѓовден е“.

Голем Велигденски концерт на ансамблот Танец, во неговата јубилејната година кога ја чествува 75-годишнината од своето основање. На концертот ќе настапи целиот ансамбл – хорот, орестарот, солистите и играорниот кор, а ќе биде изведена раскошна програма, во која централниот дел е посветен на доаѓањето на најубавиот период на годината – пролетта. Таа оваа година ексклузивно, во исто време, ни носи два големи празника – Ѓурѓовден и Велигден.

Оваа вечер, публиката ќе ужива во многу вокални и вокално-инструментални точки, меѓу кои традиционалните напеви „Утре е Света Недела“, „Ѓурѓово лето, пролето“, „Моме оди низ ливада“, во „Старото Велигденско оро“, но и во живописните кореографски постановки „Ѓурѓовден“, прилепските „Мечкарски игри“, „Тресеница“, „Свадба“, како и во премиерата на новата кореографија „У Ливаду“, на авторите Јовица Блажевски и Сашко Митев. Целиот концерт ќе биде мултимедијално вообличен, така што на публиката ќе и овозможи незаборавно аудио-визуелно уживање.

The post Голем Велигденски концерт на ансамблот Танец appeared first on Република.

Во Националната опера и балет во петок, 19 април, ќе се одржи Велигденски концерт на ансамблот „Танец“.

Како што најавија оттаму, на програмата ќе бидат повеќе дела меѓу кои „Ѓурѓовденка“, во кореографија на Дојчин Матевски која всушност е сплет од игри и песни од Скопска Блатија и Скопска Црна Гора, поврзани со истоимениот пролетен празник. Музичка обработка е на Ѓорѓи Димчевски.

На програмата е и „Мечкари“, што е фрагмент од кореографската постановка „Прилепски игри“, инспирирана од традицијата за верскиот празник Прочка. Кореографијата е на Стојче Каранфилов, а музичката обработка на Милан Завков.

На концертот ќе биде прикажана и „Мариовска тресница“, една од постарите игри во репертоарот на „Танец“, во кореографија на Јонче Христовски и музичка обработка на Ѓорѓи Димчевски.

Публиката ќе може да ја види и најновата кореографска постановка на Танец, „У ливаду“, којашто ќе биде премиерно изведена. Преку обработка на изворни ора, песни и соодветни кореографски решенија, се прикажуваат сцени од една селска ливада. Кореографијата е на Јовица Блажевски, а музичката обработка на Сашо Митев.

Дел од програмата е и „Свадба“, во кореографија на Благоја Филиповски и музичка обработка на Ратко Гелевски и Томе Цветковски.

Ансамблот „Танец“ е основан во март 1949 година во Скопје. Веќе 75 години е еден од најстамените столбови на македонската традиција и култура и еден од главните темели на македонската државност.

The post Велигденски концерт на „Танец“ во петок во НОБ appeared first on Република.

Во четврток на 11 април 2024 година во Кинотека на Македонија, со почеток во 19:00 часот, ќе се одржи мултимедиајлен настан на НУ Танец во соработка со Кинотека на РСМ, организиран во рамките на чествувањето на 75-годишнината од основањето на Танец. Во него се предвидени повеќе содржи – проекции, осврти, …

Во него се предвидени повеќе содржи – проекции, осврти, презентации, дебата, ревијални и музички перформанси, кои во својот фокус го имаат Танец, како еден од највлијателните и најинспиративните ансамбли во целокупната култура кај нас и во светот. Сите учесници, низ сопствена перспектива ќе го опсервираат Танец, како жив чувар на македонското културно наследство и како нивна лична инспирација. Влезот за настанот е слободен.

Програма:

ТАНЕЦ ВО ФОКУСОТ на м-р Бранка Костиќ-Марковиќ, етномузиколог и уметнички раководител на сценско-уметничката дејност во НУ Танец
– Тема: „Танец – 75 години македонски код“

ТАНЕЦ ВО ФОКУСОТ на режисерот Трајче Попов

-Тема: „Орските содржини во филмот „Ритам и звук“ и неговото значење во етноореологијата“ на доцент д-р Стојанче Костов, истражувач на народните ора и научен соработник од Институтот за фолклор „Марко Цепенков“ – Скопје при УКИМ.

-Киноприкажување на антологискиот филм „Ритам и звук“ на Трајче Попов од 1955 година, каде во главната улога е ансамблот Танец. Продуцент на филмот е Вардар филм, а филмот е дигитализиран од Кинотека на Македонија. (Времетраење: 21 минута)

ТАНЕЦ ВО ФОКУСОТ на проф. д-р Митко Хаџи-Пуља од Архитектонски факултет – Скопје при УКИМ

-Тема: „Тан(е)ц на животот“

ТАНЕЦ ВО ФОКУСОТ на Ласко Џуровски, визуелен уметник и типограф

-Тема: „Ние сме Македонци, зборуваме на македонски јазик, пишуваме со македонска кирилица, пееме македонски песни, играме македонски ора, ја промовираме нашата Македонија ширум светот. Опа, иха!“

ТАНЕЦ ВО ФОКУСОТ на идните генерации

-Музички настап на студентите од Одделот за етнологија и антропологија при ПМФ на УКИМ

-„Бела Денице, мори невесто“ во изведба на студентите Матеј Тушевски, Дамјан Ристовски и Тоше Илчевски.

-Тема: „Сценско-уметничкиот и културолошкиот статус на улогата невестата низ призмата на кореографијата ’Невестинско’” – м-р Благица Илиќ – етнолог и професор по народни игри и песни од Насоката за традиционална музика и игра во ДМБУЦ „Илија Николовски – Луј“.

-Музичко-сценски настап на учениците од Насоката за традиционална музика и игра од ДМБУЦ „Илија Николовски – Луј“ – Скопје

-„Не радуј се невесто, за ситна коса плетена“ – фрагмент од кореографија „Свадба“
-„Китен ми китен, девере“ – машка песна од вокалниот легат на Танец
-„Ајде ој Вардаре“ – ороводна песна од репертоарот на Танец

ТАНЕЦ ВО ФОКУСОТ на жената и ЖЕНАТА ВО ФОКУСОТ на Танец

Теми:

– „Мисијата на Танец за зачувување на својот легат на непроценливо културно наследство и носијата како негов значаен експонент“ – Светлана Ќириќ, етнолог и стручен соработник за сценско-уметничка дејност во НУ Танец
– „Ревијален приказ на женската традиционална носија во Танец“ – Катерина Кузманоска, етнокореолог и истакнат играч од прв ред – солист во НУ Танец
* Ревија на шест автентични женски носии од фундусот на НУ Танец
Учествуваат играорките на Танец – Стефанија Маневска, Христина Пецовска, Марија Саздовска, Христина Ристеска, Весна Митевска и Емилија Богдановска, во кастинг и координација на Весна Митоска, асистент на играорниот кор на Танец.
* Музички сплет од фрагменти од кореографски постановки на Танец во кои се вклучени соодветните носии од ревијата, во изведба на инструменталистите на Танец, Александар Јовевски и Даниел Маневски.

ТАНЕЦ ВО ФОКУСОТ на научно-образовниот дискурс

-Дебата посветена на жената и женската традиционална носија во Македонија и нејзиното влијание врз македонската облековна практика во минатото и денес. Во дебатата учествуваат проф. д-р Јасминка Ристовска Пиличкова од Институтот за фолклор „Марко Цепенков“ во Скопје, проф. д-р Илина Јакимовска од Институтот за етнологија и антропологија при ПМФ во Скопје, проф. д-р Јана Манева – Чупоска од Факултетот за арт и дизајн при ЕУРМ и костимографката Зорка Тодорова – Младеновиќ, поранешна професорка на Факултетот за ликовни уметности во Скопје и Технолошко-металуршкиот факултет – Скопје, при УКИМ.

The post Мултимедиајлен настан во рамките на чествувањето на 75-годишнината од основањето на Танец вечерва во Кинотека appeared first on Република.

Основан во 1949 година во Скопје, како единствена установа од таков вид, ансамблот Танец веќе 75 години е еден од најстамените столбови на македонската традиција и култура, и недвосмислено, еден од главните темели на македонската државност. Формиран со цел да ги собира и негува македонските традиционални песни и игри, народните носии и инструменти, и преку соодветен уметнички израз, сценски да ги презентира највредните форми од богатата ризница на македонскиот народ, тој денес претставува едно од најблескавите лица на македонската културна историја.

Танец е беспоговорно најрепрезентативниот амбасадор на македонската народна уметност и култура во светот. Како подвижен музеј на македонското културно богатство, ансамблот 75 години ја шири убавината на македонските ора и песни, на најголемите сцени во Азија, Америка, Австралија, Африка и насекаде низ Европа, но никогаш не го заборава и сопствениот народ, кому му ја должи својата суштина. Со Танец и богатиот македонски фолклор, Македонија отсекогаш била и секогаш ќе биде светла точка на светската културна мапа.

Благодарение на сите генерации што ја градеа и реализираа јасно поставената програмската визија на основачите, ансамблот низ годините растеше, се развиваше и прерасна во модерна институција за почит. Секогаш цврсто поддржувајќи ги своите основни вредности, од своите скромните почетоци до денес, ансамблот постојано еволуираше и се издигна на нивото на симбол на уметничка извонредност, прикажувајќи го уникатниот живописен мозаик на нашата културна раскош пред светот. Додека ја одбележуваме оваа значајна отсечка во времето, ние пред нас ја имаме на ум целокупната седумиполдецениска посветеност и страст на сите генерации извонредни играорци, песнопојци, свирачи кои оставиле драгоцен дел од својот живот во Танец.

Нивната непоколеблива заложба за зачувување и промовирање на македонските народни традиции, не само што го збогати македонскиот културен пејсаж, туку послужи и како транскултурен и сеопшт катализатор за дијалог и единство во глобални рамки. Сите ја знаат македонската песна, сите се неми пред македонскиот чекор, на сите им е познат македонскиот бит. И нема да е претерано ако кажеме дека недвосмислената убавина на нашиот фолклор е еден од најблескавите бисери во герданот на светското културно наследство. Танец е наша и светска гордост, Танец е македонскиот идентитетски код, длабоко втиснат во светската културна меморија!

Сите ние во денешниот Танец сме горди и возбудени што овие денови зачекоривме во новата јубилејна концертна сезона, која е посебна за нас. Танец е 75 години светилник на македонското културно наследство, а ние ја имаме одговорноста тој да засветли уште посилно, во име на сите минати генерации, кои ги удирале темелите и ги крепеле бедемите на оваа институција, но уште повеќе за сите идни генерации кои ќе треба да ја чуваат како свој најголем аманет во годините што претстојат.

Оваа јубилејна сезона не е само прослава на Танец, туку и ваша. Прослава на секој еден кој го поддржал Танец на неговиот величествен пат, којшто ја разбрал неговата голема и значајна мисија. Вашата безрезервна љубов и поддршка отсекогаш биле движечката сила на нашиот успех, и за тоа сме ви вечно благодарни. Да ја направиме заедно и оваа славеничка година, година за паметење! Да се здружиме, да чествуваме и да создадеме спомени кои ќе одекнуваат милениуми по нас. Танец изникнал од народот и ја пишувал својата приказна со народот. Затоа, ајде здружено да почнеме да го пишуваме и следното поглавје на Танец! Така за навек!

Нека ни е честит роденденот!

Длабок поклон за сите од нашиот и ваш Танец!- стои во Фејсбук објавата на Култирно-уметничкото друштво.

The post „Танец“, едно од најблескавите лица на македонската културна историја, одбележува 75 години постоење appeared first on Република.

Ансамблот за народни игри и песни „Танец“ - Скопје одржа два концерта во Бугарија, во општините Гоце Делчев и во Белица. Како што информира денеска „Танец“, на покана на градоначалникот на бугарската општина Гоце Делчев Владимир Москов и неговата соработка со градоначалникот на општина Белица Радослав Ревански, ансамблот „Танец“ одржа концерти на 21 и 22 декември. „Танец“, како што се наведува, уште еднаш потврди дека е трајна вредност која на свој единствен начин, преку своето уникатно презентирање на македонската култура ги премостува сите бариери кои не можат да ги решат ниту бројните самити и политички договори.

Концертот во Белица се одржа по 60 години од последното гостувањето на ансамблот во ова место во далечната 1964 година, а концертот во Гоце Делчев уште еднаш покажа дека оваа публика особено го цени македонското фолклорно наследство и музичко-сценското богатство кое веќе 75 години го негува „Танец“.

Гостувањето на „Танец“ во Бугарија, во тамошните медиуми, како што се наведува, се коментира како незаборавен спектакл.

„Полна сала, прекрасни изведби, возбудена и задоволна публика и многу расположение за претстојните празници, создадоа пејачите, играорците и инструменталистите на најголемиот македонски ансамбл „Танец“. Концертот во спортската сала „Неврокоп Арена“ беше божиќно-новогодишен подарок за народот. Националниот ансамбл „Танец“ е најголемиот фолклорен ансамбл основан во 1949 година со цел зачувување, негување и презентирање на богатото културно наследство на Македонија. Од тогаш до денес, ансамблот „Танец“ ги проучува, обработува и сценски ги презентира народните ора, песни, иснтрументални мелодии и носии. Високо професионалното претставување на автентичниот фолклор ја плени публиката ширум светот. Директор на ансамблот е Мартин Вучиќ, а во ансамблот работат 80 професионални играорци, инструменталисти, пејачи, автори на музика и кореографи“, стои во објавата на официјалната страница на општината Гоце Делчев, со која раководи градоначалникот Владимир Москов, чија содржина беше преземена и од бугарските портали.

„Танец“, како што се наведува, е познат по својата совршена игра, пеење и ненадмината колоритност на своите изведби.

„Токму во таквиот уникатен спектакл - екстраваганца од песни, ора, музика, народни носии, насмевки и многу талент, беше потопена публиката во Гоце Делчев за време на настапувањето на ансамблот“, се вели во соопштението.

На концертот присуствувале градоначалникот на општина Гоце Делчев Владимир Москов, Неврокопскиот митрополит Серафим, народниот пратеник Богдан Боцев, претседателот на Советот на општината Иван Геров, заменик-градоначалникот Саид Иброш, над 1000 луѓе од градот Гоце Делчев кои го сакаат фолклорот и го ценат богатството на народната музика.

По успешното гостување, анасамблот „Танец“ имал прием кај Невропскиот митрополит Серафим, кој им посакал добро здравје, среќа и уште многу концерти.

The post Два концерта на „Танец“ во Бугарија, во Гоце Делчев и во Белица appeared first on Република.

Музичко-сценскиот спектакл „Фолклорно-класична симбиоза“ на Националните установи Националната опера и балет и ансмблот за народни игри и ора „Танец“ ќе се одржи вечер од 21 часот на сцената на НОБ.

Од Националната опера и балет информираат дека на сцената ќе има повеќе од 130 учесници во заедничка изведба на симфонизираните антологиски кореографии „Осоговка“, „Малешевка“, „Жетварка“, „Пиринско пролетно цвеќе“, „Водарки“, како и многу други македонски орски и вокални мелодии од богатиот репертоар на Танец.

Концертот ќе се одвива под диригентската палка на маестра Бисера Чадловска, концерт-мајстор е Верица Ламбевска, а хор-мајстор Ѓурѓица Дашиќ. Настапува оркестарот, хорот и играорниот кор на НУ „Танец“, заедно со оркестарот и хорот на НУ Национална опера и балет.

– Фолклорно-класична симбиоза е замислен како музичка фузија на две различни традиции – класиката и фолклорот, вешто преточена во новите аранжмански партитури на Дарко Илиевски, истакнат инструменталист, автор и раководител на оркестарот на Танец, велат од НОБ.

The post „Фолклорно-класична симбиоза“ на Националната опера и балет и „Танец“ appeared first on Република.

Сто години од раѓањето на Васка Илиева (1923 - 2001), доајенка на македонската народна песна и една од најпознатите македонски изведувачки на народна музика, ќе бидат одбележани со концерт на Државниот ансамбл за народни игри и песни „Танец“, вечер од 20 часот во Дом на АРМ.

НУ „Танец“, каде што Васка Илиева ја почнала својата музичка кариера во 1950 година, соопшти дека концертот, насловен „Песната, судбината“, е замислен како ексклузивна гала вечер, на која солистите и ансамблите ќе изведат петнаесетина антологиски песни од нејзиниот богат изворен, но и авторски репертоар. Ќе бидат прикажани и вредни архивски материјали поврзани со животот и делото на Илиева.

Со својот уникатен стил на изведба и неповторливиот глас, оваа знаменита скопјанка многу брзо станува популарна и настапува на безброј концерти, не само во татковинатa, туку и во светот. И денеска, нејзините изведби на песните: „Земјо македонска“, „Имала мајка“, „Излегол Невен Пејо“, „Аир да не сториш мајко“, „Сестра кани брата на вечера“ се македонски песнопоен белег со трајни вредности за македонската културна историја. Оттука, заслужени се сите епитети со кои Илиева се здоби за време на својата долга музичка кариера, меѓу кои и „Кралица на македонската народна песна“, соопшти НУ Танец.

На концертот ќе настапат: Сузана Спасовска, Елена Андоновска, Драган Николовски, Ивана Серафимовска, Гоце Цоневски, Габриела Новевска и Кирил Митоски. Музичките адаптации, аранжмани и оркестрации за НУ Танец се на Дарко Илиевски.

Ќе биде изведен и фрагмент од кореографијата „Драчевка“, поставена во 1959 година, во која Васка Илиева премиерно ја извела песната „Засвирил Стојан, посвирил“. Кореографијата е на Атанас Коларовски, музичката обработка на Трајко Прокопиев и Кочо Петровски и оркестрацијата на Дарко Илиевски.

Во рамки на концертот ќе бидат прикажани документарни огледи за ликот и делото на Васка Илиева, на авторката Бранка Костиќ-Марковиќ.

The post Концерт на „Танец“ во чест на 100 години од раѓањето на Васка Илиева appeared first on Република.

По кратко боледување денеска почина познатиот пејач на народна музика и солист во Танец – Далибор Ѓошиќ. Веста на својата фејсбук страна ја објави ансамблот. Колегите и пријатели на ансамблот и на Далибор упатуваат пораки со сочувство.

„Со длабока тага ја примивме веста дека денеска, по кусо и тешко боледување, на 41-годишна возраст не напушти нашиот колега Далибор Ѓошиќ, кој ќе остане запаметен по неговите врвни вокални интерпретации со ансамблот Танец, насекаде низ светот.“, напишаа во соопштението.

Роден е во 1982 година и целиот својот животен и професионален пат го поминува во својот роден град. Музиката е негова љубов и определба уште од најрана возраст, а неговото музичко образование се протега од нижото и средното музичко училиште, сѐ до Факултетот за музичка уметност во Скопје.

Во Националниот ансамбл Танец се вработува во 2007 година, каде за време на 16-те активни години, како вокален солист и како дел од различни камерни состави, остварува 363 настапи на концерти, дома и надвор. За само четврт век, со Танец настапил во 23 држави во Европа, САД, Азија, Африка. А статистиката вели и дека има исполнето над 300 песни пред вкупен аудиториум од речиси 100 илјади посетители. Незаборавни се неговите изведби на песните „Дејгиди, луди, млади години“, „Учи ме мајко, карај ме“, „Кирјана вино продава“, „Јовано, Јованке“ и многу други.

Покрај успешната кариера со ансамблот Танец, Далибор Ѓошиќ беше присутен и на фестивалската сцена. За време на својот краток, но плодотворен живот, остави голем број на безвременски интерпретации на изворни и новосоздадени песни во народен дух, кои трајно ќе останат во аналите на македонската народна музика. Ѓошиќ со право важеше за еден од најдобрите гласови во Македонија.

Вработените во НУ Танец преку фејсбук статус изразија длабоко сочуство до неговиот син Стефан и до неговото семејството, а познаниците и пријателите преку коментари упатуваат пораки со сочувство.

The post Почина познатиот македонски пејач и солист во Танец – Далибор Ѓошиќ appeared first on Република.

Во рамки на прославата на 75-годишнината од своето основање, српскиот ансамбл „Коло“ вечерва во Центарот за култура во Битола ќе одржи концерт со ансамблот „Танец“, како дел од регионалната турнеја наречена „Колодром“.

Ансамблот „Коло“ е основан во 1948-та, една година пред основањето на Танец. Двата ансамбли имаат долгогодишна успешна соработка, а последен пат настапија заедно на Новогодишниот концерт на Танец во 2019 година, во рамките на чествувањето на јубилејната 70-та година од постоењето на македонскиот национален ансамбл. Тогаш на сцената на Македонскиот народен театар заиграа заедно над 120 учесници, спектакл во кој уживаа сите љубители на врвниот македонски и српски музичко-сценски фолклор.

Македонската јавност на концертот во Битола, како што известуваат организаторите, ќе има можност да ужива во раскошните кореографии и сценски адаптации како Радовишки собор, Водарки, Копачка, На Мегдан, Врањска свита, Игри од Шумадија, Влашки игри, Игри од Биначка Морава, Тројно, како и во прекрасните вокално-инструментални сплетови на народни мелодии од богатиот репертоар на двата ансамбли.

The post Заеднички концерт на „Танец“ и „Коло“ во Битола appeared first on Република.

Националниот ансамбл за народни игри и песни „Танец“ вечер во Националната опера и балет со почеток во 20 часот, ја започнува својата 74. сезона, традиционално, со голем Велигденски концерт.

Оваа година, како што наведуваат од ансамблот, концертот е со посебен предзнак - програмата е посветена на музиката која првенецот Милан Завков ја твореше за својата матична институција, ансамблот „Танец“.

На репертоарот се неговите познати кореографии „Беломорски бисер“, „На мегдан“ и „Охридски игри“, кои тој ги создаде заедно со својот долгогодишен колега, играорецот и кореограф Симеон Чулев, како и кореографијата „Копачија“, која е производ на соработката на Завков со кореографот Стојче Каранфилов. На концертот се застапени и повеќе вокално-инструментални точки и од неколку други кореографски постановки, на кои стои потписот на големиот музички автор, композитор и аранжер, инструменталист, првенец и долгогодишен раководител на оркестарот на Танец, Милан Завков.

Милан Завков (1 јули 1962 – 6 февруари 2023) е вљубен во музиката од најраното детство. Свири на хармоника од осумгодишна возраст, а веќе на 14 години станува член на оркестарот на тогашниот "Млад Танец". Младинските денови ги поминува свирејќи во КУД „Мирче Ацев“, а својата музичка наобразба ја добива на Факултетот за музичка уметност во Скопје, каде успешно дипломира на инструментот контрабас, заради немањето студии по хармоника. Тоа сепак не го колеба својата професионална кариера да продолжи да ја гради на својот прв и единствен избор – хармониката и со неа ќе оствари неверојатно богата изведувачка и творечка кариера.

Со голема популарност се здобива уште после издавањето на првито албум со "Октет Македонија“, а потоа таа само расте низ делувањето со групата "Македонски мерак". Така Завков во својот богат творечки пат, како композитор, аранжер и изведувач ќе ни остави над 150 авторски творби, многу трајни снимки и десетици дискографски изданија, со цела низа на безвременски народни хит-мелодии.

Секако, низ годините се истакнuva и како солист-инструменталист на многу ора и чочеци и заслужено се здобиva со статусот на еден од најдобрите хармоникаши во Македонија, но и на просторите на поранешна Југославија.

-Сепак, неотуѓив и многу важен дел од неговиот музички корпус е делувањето во Националниот ансамбл за народни игри и песни "Танец”, каде што уште како младинец, потоа и како надворешен соработник, а од 2000-та година и како редовно вработен музичар-инструметалист првенец и долгогодишен раководител на оркестарот, остварува бројни концерти и турнеи во земјата и светот, создава вредни музички партитури и каде со својата неприкосновеност, трајно се втиснува во аналите на музичко-сценскиот фолклор, но и во целокупната македонска музичка историја, се посочува во соопштението од „Танец“. 

The post Велигденски концерт на „Танец“ во чест на Милан Завков appeared first on Република.