Министерството за образование и наука известува за повик за стипендии за додипломски, магистерски, интегрирани магистерски студии и докторски студии на државните универзитети во Унгарија за академската 2025/2026 година.

Како што објави МОН, Програмата Стипендиум Хунгарикум (Stpendium Hungaricum) за академската 2025/2026 година за кандидати од Република Македонија доделува вкупно 20 стипендии.

Седум се за целосни додипломски студии, во областите: земјоделски науки, општествени, економски, технички, природни науки, политички науки и јавно управување; седум стипендии се за целосни магистерски студии за истите области, две стипендии се  за интегрирани магистерски студии (one-tier master - OTM) во областа на медицински и здравствени науки, четири стипендии за целосни докторски студии во која било област, како и делумни студии за сите нивоа и области на студии од наведените.

-Доколку студиите се изведуваат на некој странски јазик, потребно е кандидатите да го познаваат тој јазик на ниво кое го бара институцијата домаќин (универзитетот). Доколку студиите се изведуваат на унгарски јазик, прифатените студенти за време на првата година на студии треба задолжително да посетуваат курс за унгарски јазик, кој го нуди универзитетот каде што ќе студираат и мора да го положат испитот на крајот на вториот семестар, се наведува во повикот.

Информации за начинот, критериумите и потребните документи за аплицирање, како и листата на студиски програми на државните унгарски универзитети и текстот на повикот за аплицирање (Call for application 2025-2026) се достапни на веб-страницата: https://stipendiumhungaricum.hu/  а е-адресата за контакт е: stipendiumhugaricum@tpf.hu Аплицирањето е само по електронски пат веб-страницата https://apply.stipendiumhungaricum.hu/

Во повикот што го објави МОН се наведени критериумите и е објаснет начинот на аплицирање. Рокот е 15 јануари 2025.

The post Повик за стипендии за студии на државните универзитети во Унгарија за 2025/2026 appeared first on Република.

Главниот ревизор Максим Ацевски на денешната презентација на Конечниот ревизорски извештај за студентскиот стандард и условите во студентските домови повика „да се преиспита политиката на финансирање студии надвор од нашата држава“.

Дали ние сме толку богати за да ги финансираме другите држави, да ни се одлеваат нашите стручни високообразовани кадри во другите држави, рече Ацевски откако соопштувајќи ги наодите од извештајот за 2022 година рече дека 44,4 отсто од парите за стипендии се наменети за 111 студенти запишани на првите сто рангирани универзитети според Шангајската листа.

Посочи дека од околу 3100 барања од студенти на нашите универзитети, одобрени се 2509 и дека  соодносот на одобрени и неодобрени стипендии „укажува дека нешто недостига во системот на градење на политиките, на рангирање на барателите и бројот на прифатени барања“.

Но, да биде иронијата поголема, ако се изземат овие 2509 студенти коишто се одобрени во текот на 2022/2023 година и ако споредите колкав процент на средства се издвојува за овој број на студенти со бројот на студенти што државата ги финансира за студии во странство за првите сто универзитети во светот, ќе констатираме дека дури 44,4 отсто отпаѓаат на овие 111 студенти. Може да видите дискрапанца дека 111 студенти го земаат колачот на стипендии 44,4 отсто од 2509 студенти кои се финансираат во државата. И што имаме на крај – во суштина нашата држава е толку богата што нашите деца и нашите таленти ги финансираме со сопствени средства на нашите даночни обврзници, а воопшто не водиме грижа тие таленти и високообразовани кадри да ги вратиме во нашата држава и дадат придонес во нашето општество, рече Ацевски.

Ревизијата утврдила дека постои можност за подобрување на износот на стипендиите што ги добиваат студентите на нашите универзитети. Во социјално ранливата категорија и групата на студенти кои треба да добиваат одредена стипендија, рече ревизорот, има висок број на студенти коишто не доставиле конечни документи „што укажува можеби на бирократски пристап во однос на брзината и леснотијата на обезбедување на потребните документи“.

Според Извештајот на ДЗР, джавата во 2022 година потрошила приближно 22 милиона 690 илјади евра за сместување, исхрана и стипендирање во високото образование. Од тие 22,6 милиони евра, 50 отсто се исплатени за студентки оброк, 40 отсто за стипендии, 17 отсто за сместување и исхрана, а 3 отсто за останати расходи.

Министерката Весна Јаневска посочи дека со закон е дефинирана процентуална распределба на стипендии по области при што некои не се искористуваат. Според неа, тоа не мора да биде дефинирано со закон, туку со подзаконски акт, кој, како што рече, може полесно да се менува според потребите за стимулирање на упис во одредени области кои се дефицитарни.

Точно, големи се средствата што се издвојуваат за студентите што ги испраќаме на универзитети на Шангајската листа. Јас и натаму сметам дека идејата била добра, но реализацијата е лоша. Лично не гледам вина во тие студенти, гледам вина во однесувањето на државата, не само на МОН. Иако околу 40 проценти се вратени во земјата и работат во приватните компании, факт е дека државата на тие студенти треба да им обезбеди услови за тие што ќе се вратат за да работат. Дел од нив се уште се на постдипломски и на докторски студии. Значи, имаме реални шанси да ја подобриме оваа ситуација, истакна Јаневска.

Соопшти дека во моментов МОН прави дигитален регистар за сите стипендирани студенти во странство, ги контактира и со двајца се склучени договори про боно ќе работат за потребите на МОН.

На седницата на која беше презентиран Извештајот на ДЗР, организирана од Собранискиот Клуб за младински прашања и политики, министерот за дигитална трансформација Стефан Андоновски рече дека е „голем поборник“ за „шангајската“ стипендија, нејзин корисник што што се вратил во државава.

Според него, оваа стипендија е „одлично смислено решение и  една од најголемите  иновации“  во стипендирањето на високото образование во светот. Рече дека тој самиот ја исполнил обврската од договорот да се врати во државата, но многу од другите студенти во странство  не се вратиле или не биле ангажирани од државата и од самите универзитети.

За жал, државата не ги почувствува резултатите, а можеше. Јас се вратив во 2015 и во 2016 аплицирав на Економскиот факултет. Тогаш направивме анализа дека по тогашниот Закон за високо образование ниту еден од тие студенти имаше можност за олеснето вработување, ниту еден студент не бил вработен по тој член на законот. Потоа, со промената на владата, се укина тој член. Во тој момент бевме 400 што се вративме од универзитетите, а пресметката тогаш беше дека само 50 студенти ако се врателе, рангот на УКИМ би скокнал за илјада места само по тоа што тие работат  бидејќи ги носат референците од факултетите каде што имаат завршено. Само по тој основ, УКИМ или кој било друг државен универзитет би скокнал илјада места на Шангајската ранг-листа. За жал, до денеска, по моите информации, се уште ниту еден студент од оваа Шангајска листа не  е вработен на некој од нашите државни универзитети, што зборува многу за ангажманот и желбата на македонските универзитети за едноставен и бесплатен начин да стигнат до таков успех, додаде Андоновски.

The post „Шангајските“ стипендии за 111 студенти чинат колку за останатите 2400 appeared first on Република.

Министерството за образование и наука (МОН) информира дека e објавен конкурсот за доделување на 3.000 студентски стипендии за академската 2024/2025 година. Аплицирањето е исклучиво електронски преку порталот e-uslugi.mon.gov.mk, а рокот е заклучно со 15.11.2024 година.

Вкупно 1.470 стипендии се наменети за редовни студенти од социјалните категории. За студентите од научните подрачја на техничко-технолошките науки, биотехничките, општествените и хуманистичките науки, кои постигнале висок успех во текот на студиите, предвидени се 770 стипендии, додека 85 стипендии се обезбедени за студенти запишани на студиски програми по информатика.

По 15 стипендии се наменети за студентите запишани на студиски програми по македонски јазик, македонска книжевност и јужнословенски книжевности; студиски програми по историја на уметност, археологија, ликовна уметност и етнологија и антропологија; студиски програми за преведување и толкување од македонски на албански јазик и обратно.

Предвидени се 500 стипендии за студентите запишани на студиски програми од научните подрачја на природно-математичките, техничко-технолошките, биотехничките и/или медицинските науки и кои постигнале просечен успех од I-та до тековно запишаната студиска година најмалку 7,65.

Вкупно 130 стипендии ќе користат студенти запишани на студиски програми по хемија, физика, математика, земјоделските, ветеринарните и шумарските науки, а 30 стипендии се наменети за студенти кои се запишат во прва година на студиски програми на високообразовни установи за образование на наставен кадар во предучилишното воспитание, основното и средното образование.

Сите категории на стипендии се доделуваат за девет месеци во текот на студиската година и во износ од 6050 денари, со исклучок на стипендиите за студиските програми по хемија, физика и математика, како и за земјоделските, ветеринарните и шумарските науки кои изнесуваат 18.000 денари месечно.

Министерството за образование и наука ги повикува сите студенти да ги разгледаат условите и критериумите наведени во конкурсот и доколку ги исполнуваат за одредена категорија на стипендии, да ги поднесат потребните документи. Дозволено е аплицирање само за една категорија на стипендии.

The post МОН го објави конкурсот за доделување на 3.000 студентски стипендии за академската 2024/2025 година appeared first on Република.

Министерството за образование и наука информира дека објавени се конкурсите за доделување на стипендии за средношколци за учебната 2024-2025 година и истите можат да се погледнат на следниот линк. Крајниот рок за аплицирање е 15 октомври 2024 година.

Станува збор за вкупно 9 различни категории на стипендии, а условите за стекнување на правото на користење, како и потребните документи се наведени во секој од конкурсите.

МОН обезбедува поддршка за апликантите преку Секторот за ученички и студентски стандард. Личните контакти на сите вработени, вклучително и на вработените во овој сектор, се наведени на следниот линк. Исто така, за дополнителни прашања активна е електронската адреса ucenicki.stipendii@mon.gov.mk

Министерство за образование и наука

The post МОН ги објави конкурсите за ученички стипендии, електронското аплицирање трае до 15 октомври appeared first on Република.

Министерството за образование и наука информира дека објавени се конкурсите за доделување на стипендии за средношколци за учебната 2024-2025 година и истите можат да се погледнат на следниот линк. Крајниот рок за аплицирање е 15 октомври 2024 година.

Како што посочуваат од МОН, станува збор за вкупно девет различни категории на стипендии, а условите за стекнување на правото на користење, како и потребните документи се наведени во секој од конкурсите.

МОН обезбедува поддршка за апликантите преку Секторот за ученички и студентски стандард. Личните контакти на сите вработени, вклучително и на вработените во овој сектор, се наведени на следниот линк. Исто така, за дополнителни прашања активна е електронската адреса ucenicki.stipendii@mon.gov.mk ,се наведува во соопштението од Министерството.

The post Објавени се конкурсите за ученички стипендии, електронското аплицирање трае до 15 октомври appeared first on Република.

Сите корисници кои го оствариле правото на студентска стипендија во некоја од изминатите академски години и ги исполнуваат условите за продолжување, можат да аплицираат од денеска па се до 30 октомври годинава.

На порталот Е-услуги, корисникот на стипендија треба да прикачи потврда за запишан нареден семестар, односно година на студирање; уверение со положени испити; уверение за предвидени и положени испити (УППИ образец) со успех од претходните години и индекс од прв запишан семестар до последен заверен семестар, како доказ дека има положено 80% односно 90% (зависно од типот на стипендија кој го користи) од предвидените испити, односно дека го одржал просечниот успех на студирањето, согласно договорот – информира Министерството за образование и наука.

Дополнителни прашања и информации може да се добијат на електронската адреса – studentski.stipendii@mon.gov.mk .

The post Рокот за продолжување на правото на студентска стипендија е до 30 октомври appeared first on Република.

Министерството за образование и наука (МОН) ги објави конкурсите за стипендии за студии од втор и трет циклус на високообразовните установи во државата за академската 2024-2025 година.

Месечниот износ на стипендијата за постдипломски студии е 9.000 денари за девет месеци во годината. За докторски студии ќе се исплаќаат 18.000 денари месечно, во текот на целата година. Рокот за аплицирање е 1 ноември годинава.

Вкупно 50 стипендии за постдипломски и 20 стипендии за докторски студии ќе бидат доделени на македонски граѓани кои ќе се запишат на некоја од домашните високообразовни установи на програми од повеќе научни подрачја. Тоа се хуманистичките и општествените науки, а од природно-математичките науки - биологија, физика, гео-физика, геологија и минералогија, хемија, биохемија, математика и информатика. Од инженерство и технолошки науки - електротехника, електро-машинство, електроника и автоматика, енергетика, геодезија, градежништво и водостопанство, хемиско инженерство, хемиска технологија, компјутерска техника и информатика, машинство, материјали, металургија, применета геологија и геофизика, рударство, сообраќај и транспорт, технологија на прехранбени производи, текстилна технологија и телекомуникациско инженерство, инженерство за заштита на животна средина, инженерство за заштита на работна средина и индустриско инженерство и менаџмент.

Од оваа година за стипендиите за постдипломски студии ќе може да аплицираат и студенти кои имаат завршено прв циклус на студии во траење од три години, односно 180 ЕКТС.

Новото раководство на Министерството за образование и наука го прифати барањето на студентските организации за отстранување на ова ограничување од изминатите години, се вели во соопштението.

МОН ги повика заинтересираните кандидати да аплицираат доколку ги исполнуваат условите. Потребните документи може да се достават на адреса или во писарницата на Министерството за образование и наука, ул. „Св. Кирил и Методиј“ бр. 54, 1000 Скопје (со назнака стипендии за академски студии од втор циклус во земјата) или електронски на: https://e-uslugi.mon.gov.mk.

The post Објавени конкурси за стипендии за постдипломски и докторски студии во државата appeared first on Република.

Универзитетот „Св. Кирил и Методиј“ во Скопје, со цел унапредување на образованието на младите во земјава и отворање на нови можности за нив, обезбеди над 290 стипендии за сите Факултети за новите студенти на прв циклус студии, како и 720 половични стипендии за студенти од секоја студиска програма и од секоја студиска година, за кои родителското право го врши само еден родител.

„УКИМ ќе додели 240 стипендии, кои се распоредени по 10 стипендии за секој Факултет. На овој начин сакаме да ги мотивираме идните студенти да се посветат на студиите, како и да ги олесниме финансиските трошоци за образование на нивните семејства“, истакнаа од Универзитетот.

Имено, и оваа година, како и претходните четири учебни години, единиците на УКИМ стипендираат најмалку по еден студент од секоја студиска програма и од секоја студиска година за кој родителското право го врши само еден родител. На тој начин УКИМ овозможува најмалку 720 студенти  да платат половина од износот на уписнината за прв циклус студии, секоја година.

„Дополнително, над 40 редовни студенти кои ќе се запишат во прв циклус на студии оваа учебна година ќе имаат можност да добијат стипендии од Фондацијата „Атанас Близнакоф“ од САД, како и над 10 стипендии од Фондацијата „Константин Стојанов““, наведоа од УКИМ.

Уписите за учебната 2024/2025 година за прв уписен рок се на 29.8.2024 и на 30.8.2024 година, на 17.9.2024 и 18.9.2024 во вториот уписен рок и на 27.9.2024 година во третиот уписен рок.

Оваа година, вкупно 9921 студент ќе имаат можност да се запишат, од кои 4761 редовни студенти во државна квота, 4210 редовни студенти со кофинансирање, и 950 вонредни студенти. Покрај домашните студенти, Универзитетот нуди и повеќе од 1000 места за странски државјани на над 180 студиски програми.

The post УКИМ доделува над 290 целосни стипендии за новозапишаните студенти за учебната 2024/2025 година, како и 720 половични стипендии appeared first on Република.

Саранда Мехмеди и м-р Иван Антоновски се првите добитници на стипендијата „Ацо Шопов“, што фондацијата „Ацо Шопов – Поезија“ одлучи ја доделува на студенти од втор и трет циклус, по минатогодишното одбележување на 100 години од раѓањето на македонскиот класик. Кандидатите се избрани едногласно од страна на стручното жири на фондацијата, чии членови се: проф. д-р Лидија Капушевска-Дракулевска (УКИМ), проф. д-р Луси Караниколова-Чочоровска (УГД Штип), проф. д-р Намита Субиото (Универзитет во Љубљана) и Јасмина Шоповa, потпретседател на фондацијата.

Втор циклус

„Ацо Шопов: Антрополошките структури на поетската имагинација“ е темата на магистерскиот труд на поетесата и препејувачка Саранда Мехмеди, студент на Филолошкиот факултет „Блаже Конески“ при УКИМ. Трудот има за цел да го истражи творештвото, т.е поетската имагинација на Ацо Шопов од антрополошка гледна точка преку теоријата на францускиот антрополог Жилбер Диран.

Според мислењето на менторката, д-р Маја Бојаџиевска, редовен професор при Kатедрата за општа и компаративна книжевност, со оглед на докажаните квалитети, кандидатката „ќе успее да ги заокружи своите познавања од теоријата на книжевноста и книжевната херменевтика, од една страна, а од друга страна, ќе ги примени тие познавања во анализа на поезијата на Шопов, која минуциозно ја познава, како врз основа на поетската блискост со нашиот голем автор, така и врз основа на нејзината персонална креативност во доменот на поезијата, но и во доменот на поетскиот превод кој претпоставува совршено познавање на албанскиот и на македонскиот јазик“.

Трет циклус

Тезата на м-р Иван Антоновски, докторант на Филолошкиот факултет „Блаже Конески“ при УКИМ, каде што работи како асистент на Катедрата за македонска книжевност и култура, гласи: Современата македонска поезија во генолошки, мотивски и стилски дијалог со средновековната култура.

Во целост посветен на современата македонска поезија, трудот се базира на компаративно проучување на две огромни стилски епохи од македонската книжевност, а притоа „поезијата на Шопов зазема место што е во согласност со Конкурсот за стипендијата“, изјавува менторката д-р Весна Мојсова-Чепишевска, редовен професор при Катедрата за македонска книжевност и култура.

– Темата, со својот опфат има речиси енциклопедиски карактер, вели понатаму менторката, упатувајќи на заклучоците на рецензентската комисија избрана од Наставно-научниот совет на Факлултетот, која, познавајќи ги можностите на кандидатот, гледа одлична можност за исклучителен научен труд. Дотолку повеќе што досега „посеопфатни генолошки, а уште помалку проучувања на стилските доминанти и аналогии не се правени. Трудот се базира на обемен корпус, над 500 библиографски единици стручна литература, јасно дефинирана методологија и систем од хипотези, при што за последната хипотеза уште однапред може да се тврди дека е теза: сиот тој интертекстуален дијалог резултира ш појавата на современи македонски канонски поети, такви кои зад себе оставиле ако не цели ‘школи’, тогаш барем следбеници/епигони во смисла на руските формалисти: оние кои ја доработуваат воспоставената канонска форма. Меѓу нив и школата на Шопов“, посочува Мојсова-Чепишевска.

Проф. д-р Весна Мојсова-Чепишевска смета дека „преку овој докторски труд може да се очекува исчитување и растајнување на досега малку анализирани сегменти од опусот на Шопов“, а следствено, како резултат од ова истражување, „може да се очекува и одделна монографска публикација за дијалогот на современата македонска книжевност со средновековието преку примерот на Шопов“.

Исплата на стипендиите

Согласно условите на конкурсот, стипендистите наскоро ќе потпишат договор со фондацијата „Ацо Шопов – Поезија“ со кој детално се уредуваат правата и должностите на двете страни. Магистерска стипендија, во износ од 1500 евра, ќе биде исплатена двократно, во текот на една година по доделувањето на стипендијата. Докторската стипендија, во износ од 3000 евра, ќе биде исплатена трикратно, во текот на две години по доделувањето на стипендијата. Одбиените кандидати имаат право да се пријават следните години, и тоа најмногу до трипати.

The post Избрани првите добитници на стипендијата „Ацо Шопов“ appeared first on Република.

До 15 септември 2024 е рокот за аплицирање на Конкурсот на Министерството за образование и наука за доделување стипендии за додипломски студии од прв циклус во странство од областите на ликовната уметност, кинематографија, и филмска продукција, драмската уметност и музиката за академската 2024/2025 година.

Според Конкурсот што го распиша МОН, ќе бидат доделени стипендии за кандидати примени на додипломски студии на реномираните универзитети во светот, согласно листата на реномирани универзитети во светот од областа на ликовната уметност, кинематографијата и филмската продукција, драмската уметност и музиката објавенa во прилог на Конкурсот.

Како што е наведено во него, на корисникот на стипендија му се надоместуваат трошоците за уписнина во висина од најмногу 40.000 американски долари годишно, исплатени во соодветна валута, според средниот курс на Народна банка на Република Македонија на денот на објавувањето на конкурсот, еден авионски билет на почетокот на студиите, еден авионски билет по завршување на студиите или еден повратен авионски билет, а месечната стипендија се исплаќа согласно Решението за утврдување на начинот на пресметка на трошоците за месечна стипендија на студенти кои студираат во странство за академската 2024/2025 година на прв циклус на студии (врз основа на Листата на индекси на малопродажни цени за животни трошоци, која е објавена од надлежните органи на Обединетите нации).

Секој износ над горенаведената сума за уписнина ќе биде на товар на студентот. Избраните кандидати кои ќе добијат стипендија ќе имаат обврски кои се наведени во Конкурсот.

Содржани се и информации за условите кои кандидатот треба да ги исполни, начинот на пријавување и потребните документи, меѓу кои и електронската пријава која е достапна за преземање во објавениот конкурс.

The post Конкурс за стипендии за додипломски студии во странство од областа на уметностите за 2024/2025 appeared first on Република.

Фондацијата МК2025 го објавува повикот за прием на апликации за стипендии во склоп на Фондот за поддршка на талентирани средношколци „Таленти денес - лидери утре“ за тековната 2024/2025 година.

По успешноста на пилот-проектот за стипендии во 2019/2020 година, Фондацијата МК2025 обезбедува средства за финансиска поддршка на талентирани млади од Македонија. Преку овој фонд, и оваа година ќе стипендираме 10 млади таленти.

Поддршката за секој/а стипендист/ка изнесува 60.000 (шеесет илјади) МКД, исплатени во 10 (десет) еднакви месечни износи на годишно ниво. Стипендиите ќе се доделуваат само за месеците во кои се одвива настава (почнувајќи од септември 2024 до јуни 2025г.).

Критериуми за аплицирање

● Средношколци (од прва до трета година) на редовни студии во државни средни училишта;
● Средношколци со успех над 4.70;
● Добитници на награди или учесници на државни и/или меѓународни натпревари во областа на природни и општествени науки, компјутерско програмирање и останати области; и
● Кандидати-ученици кои доаѓаат од социјално ранливи семејства со вкупен (бруто) финансиски приход во семејството до 800.000 МКД годишно.

Повеќе за програмата, начинот на аплицирање и потребна документација тука.

Апликациите се поднесуваат на Платформата тука. 

Осознајте ги импресиите на нашите поранешни и сегашни стипендисти тука.

Покрај редовната стипендија, Фондот обезбедува менторство и обуки за личен и професионален развој на кандидатите, пракси во истакнати македонски компании, и слични активности/поддршка кои ќе бидат во интерес на професионалениот развој на корисниците. Стипендистите ќе бидат поканети на годишните настани и активности во организација на Фондацијата МК2025.

Фондот за поддршка на талентирани средношколци „Таленти денес - лидери утре“ досега има обезбедено 40 стипендии.

Крајниот рок за испраќање на документите е 25.07.2024 год.

Не ја пропуштајте оваа прилика! Аплицирајте сега и станете дел од нашето семејство на идни лидери!

The post Поддршка за млади таленти: Пријавете се за стипендија од Фондацијата МК2025! appeared first on Република.

Министерството за образование и наука информира дека Владата на Романија почна програма за стипендирање државјани на Република Македонија за академската 2024/2025 година.

Владата на Романија доделува пет стипендии за магистерски студии, пет стипендии за докторски студии и пет стипендии за учество на летни курсеви за романски јазик, култура и цивилизација. Апликациите за овие стипендии треба да се достават до архивата на Министерството за образование и наука, најдоцна до 5 јули 2024, наведува МОН во објавата.

Потребните информации за овие стипендии и формуларот за апицирање за заинтересираните кандидати се достапни на веб-страницата на МОН.

The post Стипендии за студии во Романија за академската 2024/2025 година appeared first on Република.

Министерството за образование и наука информира дека сите ученички и студентски стипендии на постојните корисници за учебната, односно академска 2023-2024 година се исплатени заклучно со месец јануари. За новите корисници, пак, исплатата ќе се реализира во текот на неделата.

Наскоро ќе започне и етапната реконструкција на државните студентски домови. Потпишан е договор за изведба на градежните работи и подготвителните активности се во тек. Исто така, годинава предвидени се и реконструктивни активности во ученичките домови.

Остануваме во комуникација со организациите кои ги застапуваат учениците и студентите и заедно и во иднина ќе ги носиме одлуките кои ги засегаат, велат од МОН.

The post МОН: Учениците и студентите денеска ги добија средствата за стипендии appeared first on Република.

Министерството за образование и наука информира дека објавени се резултатите од конкурсите за доделување на стипендии за средношколци за учебната 2023-2024 и истите може да се погледнат на следниот линк.

Учениците кои се стекнаа со правото на користење стипендија треба да испечатат и пополнат ТРИ примероци од договорот за соодветната стипендија (договорите се објавени заедно со резултатите од конкурсите) и заедно со копија од лична трансакциска сметка, најдоцна до 29.12.2023 да ги достават до Министерството за образование и наука (директно во писарницата на МОН или по пошта – препорачана пратка со повратница на адреса ул. „Св. Кирил и Методиј“ бр. 54, 1000 Скопје).

Одбиените кандидати пак, ќе имаат можност за поднесување жалба од денот на добивање на решението од МОН во кое ќе биде наведена причината поради која апликацијата не е прифатена.

Решенијата и за прифатените и за одбиените апликации се изработуваат во моментов и ќе бидат испорачани во следниот период.

За било какви дополнителни информации и поддршка, контактите на вработените во Секторот за ученички и студентски стандард, како и на сите останати вработени во МОН се објавени на овој линк, a прашања може да се поставуваат и на електронската адреса ucenicki.stipendii@mon.gov.mk.

The post Објавени се резултатите од конкурсите за доделување ученички стипендии за учебната 2023-2024 appeared first on Република.

Голем број од студентите кои добиле скапа стипендија од државниот буџет за студии на еден од првите сто рангирани универзитети на Шангајската листа не се вратиле во земјава. МОН нема анализа за нивната кариера по дипломирањето, ниту, пак, тие што останале во странство ја вратиле стипендијата во десеткратен износ како што е пропишано во конкурсот.

Овие стипендии, кои за додипломски студии се во годишен износ од 40.000 евра, а за магистерски 36.000 евра, се доделуваат без прецизно и соодветно дефинирани критериуми за рангирање и избор на студентите и без анализа кои области за студирање се од интерес на нашата земја или му се потребни на стопанството. Притоа, министерот за образование и наука има дискрециско право во одлучувањето.

Ова го заклучува анализата на Независниот академски синдикат (НАкС) насловена „Исплатливоста од стипендирањето студенти на прв, втор и трет циклус студии на еден од првите 100 универзитети од Шангајската листа“.

Кариерите на корисниците на стипендиите за студии во странство НАкС самиот ги откривал следејќи ги профилите на платформи како Линкдин, при што е утврдено дека од 61 кои добиле стипендија за прв циклус, во земјава се вратиле само 11, во странство останале 41, а за девет немаат податоци. Ова се однесува на периодот од академската 2013/2014 до 2016/2017, но за последните шест академски години НАкС не добил податоци од МОН.

Од 165 стипендии доделени за магистерски студии, пак, во земјава се вратиле 59 корисници. Податоците за втор циклус (магистерски студии) се за периодот од 2010/2011 до 2021/2022 година. Синдикатот не добил податоци за корисници на оваа стипендија за трет циклус (докторски) студии.

Поради недостапност до сите податоци, НАкС неофицијално проценува дека над 300 лица добиле ваква стипендија за студии на некој универзитет од првите 100 рангирани на Шангајската листа и дека за нив е потрошен огромен буџет, кој се движи од 10 милиони евра до дури 24,4 милиони евра – податок што бил објавен од Стопанската комора.

Проф. Мимоза Ристова презентирајќи ја анализата денеска рече дека најчесто студирале (и останувале) во Велика Британија, САД, во земји на ЕУ, но и во Швајцарија и Израел. Од корисниците на стипендија за прв циклус, во земјава не се вратиле 67 отсто, а 48 отсто од тие со стипендија за магистерски студии, иако имале обврска да работат во државава. За четиригодишни додипломски студии, рече Ристова, тоа се 160.000 евра.

Значи, само за периодот 2013/2014 – 2016-2017, биле дадени 2,5 милиони евра, а во исто време издвојувањето од буџетот за наука во нашава држава е 0,02 отсто. За 67 отсто кои не се вратиле биле потрошени 1,7 милиони евра, кои од нашиот сиромашен буџет сме ги платиле за поттикнување на економскиот развој на други држави, рече проф. Ристова.

За магистерските студии, за кои има податоци за периодот од 2010 до 2021, платени се 6 милиони евра за стипендии, односно 2,8 милиони евра, рече Ристова, за поттикнување на економијата на други земји зашто таму да работат останале 47 проценти од стипендираните.

На прашање дали меѓу корисниците што ги истражиле наишле на „звучни“ имиња, Ристова рече дека препознала некои презимиња, но сепак не е сигурна, и дека целта им била не да следат судбини на луѓе, туку да ги следат парите на државава.

Проф. Мирјана Најчевска рече дека стипендирањето не е регулирано со Законот за високо образование и дека никаде во законите нема критериуми по кои ќе се одреди потребата од финансирање студенти во странство. Информации за условите и критериумите, според наведеното во конкурсите за овие стипендии, рече Најчевска, кандидатите добиваат усно во МОН, а министерот има дискреционо право за пропишување на видот на стипендиите и начинот на нивното доделување. Во законската регулатива и во подзаконските акти, рече, нема процедура за враќање на парите - иако е предвидено студентот да потпише меница, нема процедура како таа ќе се активира доколку студентот не работи две години во државава, по завршување на студиите. Конкурсот наведува десеткратно враќање на парите.

На прашањето до МОН - дали има случаи кога е активирана меницата односно случаи кога студентите вратиле пари, ни одговорија дека нема ниту еден таков случај. Видовме колку студенти останале да работат во странство. Тие студенти не одработиле ниту еден единствен ден во државата. Значи дека ова е класична кражба, а не само несоодветно работење со буџетските пари. Затоа што меницата, според облигационите односи, е јавна исправа врз која треба да се вратат пари кои се земени, истакна Најчевска.

Според анализата што ја презентираше НАкС, најголем број стипендии биле дадени во 2014/2015 година. За додипломски студии, на пример, во 2014/2015 биле доделени 25 вакви стипендии, односно 600 проценти повеќе од претходната академска година кога биле доделени четири.

Професорите од НАкС на презентацијата истакнаа дека стипендирањето за студии во странство почнало во 2010 година и дека токму тогаш државата престанала да ги објавува конкурсите за финансирање магистерски и докторски студии во земјава и за финансирање научно-истражувачки проекти.

Од пет министри за образование во изминатиов период барале овие стипендии да се укинат и средствата да се пренасочат за нашата наука и истражувачки проекти, но министрите само се согласиле дека оваа програма за стипендирање е штетна. Пред околу два месеца МОН објави нов повик за 10 вакви стипендии при што, како што укажаа, не се наведени областите на студиите.

Проектот „Aнализи на НАкС за исплатливоста од стипендирањето студенти на прв, втор и трет циклус студии на еден од првите 100 универзитети од шангајската листа“ е изработен и финансиран од Независниот академски синдикат. Анализата во целост ќе биде објавена на веб-страницата на НАкС.

The post Над 300 лица за кои се потрошени дури 24,4 милиони евра од државата за студии на еден од првите 100 рангирани универзитети на Шангајската листа, не се вратиле во Македонија appeared first on Република.

Државата речиси и не се интересира какви се ефектите од вложувањето во младите луѓе кои се образуваат на престижните универзитети во странство со државни пари, пишува „Плусинфо“, анализирајќи дека иако се потрошени неколку десетици милиони евра за една деценија, само 58 од вкупно 222 завршени државни стипендисти на престижните универзитети пријавиле дека се вработени. Каде се останатите 164 не се знае, иако тие имаат обврска по завршувањето на студиите да се вратат во земјава за да го одработат периодот што го договориле со добивањето на стипендијата. Неофицијално, голем дел од нив веќе се во странство, а дел кои не нашле работа во земјава се подготвуваат да заминат во странство и да ја ефектурираат дипломата која ја стекнале.

Со овие стипендии во јавноста проструија и неколку афери на деца на функционери на кои им беше исплаќан највисокиот износ на стипендија од 40.000 долари годишно, а за кои нема информација дека се вратени во земјава и бараат работа.

Тоа говори дека државата нема план како да го ефектуира ова вложување, не го планира нивно вработување и не успева да создаде клима за да ги задржи во земјава, велат експерти.

Целата сторија тука

The post Сме потрошиле 24,4 милиони евра за само 58 „светски“ дипломци по десетгодишното стипендирање студенти во странство appeared first on Република.

Министерството за образование и наука информира дека се објавени резултатите од Конкурсот за доделување на стипендии на редовни студенти запишани на додипломски студии од прв циклус на јавните и приватните универзитети и високообразовни установи во Македонија за студиската 2022-2023.

Студентите кои се стекнаа со правото на користење студентска стипендија треба да испечатат и пополнат ТРИ примероци од договорот за соодветната стипендија ( објавени со резултатите) и заедно со копија од лична трансакциска сметка, од 02.02.2023 до 17.02.2023 година, да ги достават до Министерството за образование и наука (директно во писарницата на МОН или по пошта – препорачана пратка со повратница на адреса бул. „Св. Кирил и Методиј“ бр. 54, 1000 Скопје).

Одбиените кандидати пак, ќе имаат можност за поднесување жалба до Државната комисија за одлучување по управна постапка и постапка од работен однос во втор степен во рок од 15 дена од денот на приемот на решението од МОН во кое ќе биде наведена причината поради која апликацијата не е прифатена. Ги замолуваме одбиените кандидати да не доставуваат приговори пред да го добијат решението.

Решенијата и за прифатените и за одбиените апликации се изработуваат во моментов и ќе бидат испорачани на домашната адреса на секој апликант, велат од МОН.

The post Објавени се резултатите од конкурсот за студентски стипендии за академската 2022-2023 appeared first on Република.

На иницијатива на Министерството за образование и наука, а со одлука на вчерашната владина седница, бројот на стипендии кои се доделуваат на учениците од средните училишта во учебната 2022-2023 година значително се зголемува. Обезбедени се дополнително средства за оваа намена, а целта е да се мотивираат и да се поддржи образованието на што поголем број средношколци кои аплицираа на конкурсите за доделување на стипендиите.

Согласно одлуката, бројот на стипендии за социјална поддршка на ученици од предвидените 900, се зголемува на 1.318. Наместо 120 стипендии за ученици со посебни потреби, ќе бидат доделени 168. Вкупно 167 стипендии ќе се доделат на талентирани ученици – спортисти, односно 17 повеќе од првично предвидените. За талентираните ученици од областите на природните и техничките науки ќе се доделат 115, наместо како што беше првично предвидено да се доделат 100, додека за учениците кои реализираат наставни програми од дефицитарни струки наместо 240, ќе се доделат 267 стипендии.

Министерството за образование и наука известува дека веднаш по излегувањето на Одлуката во Службен весник, на веб страната www.mon.gov.mk ќе бидат објавени и резултатите за сите категории на стипендии согласно новите квоти, a учениците ќе добијат насоки за понатамошно постапување.

The post Зголемен бројот на ученички стипендии кои ќе се доделат годинава appeared first on Република.

Фондот за стипендии „Проф. Д-р Љубе Миленковски“ позитивно го прифати барањето на Заменикот народен правобранител Проф. Д-р Јован Андоновски кој беше иницијатор за да се подаде рака до секој талентиран студент кој заслужува сто процентна стипендија на Универзитетот за туризам и менаџмент Скопје.

На свеченото доделување кое се организираше во просториите на УТМС, стипендиите беа доделени од страна на Ректорот Проф. Д-р Аце Миленковски каде тој ја поздрави иницијативата на Заменикот народен правобранител и ги охрабри сите политичари, бизнисмени и луѓе од влијателните позиции да се потрудат да дејствуваат со цел за поголем развој во образованието и науката.

Проф. Д-р Јован Андоновски истакна дека преку ова стипендирање, покажуваат дека постојат повеќе начини со кои што би им се помогнало на младите за усовршување на нивното образование и задржување на истите во државата. Андоновски пренесе дека ваквите активности се од исклучителна важност за подигнување на нивото и квалитетот на образовен кадар кој ќе придонесе за подобра иднина.

УТМС на вчерашната церемонија дополнително додели и по 15 стипендии од секоја општина во Македонија за додипломски и последипломски студии на повеќе факултети, како што се: Факултет за информатика, Факултет за менаџмент на човечки ресурси, Факултет за меѓународен маркетинг менаџмент, Факултет за туризам, како и Економски факултет.

The post Младите заслужуваат можност за бесплатни студии appeared first on Република.

Конкурсот за студентски стипендии на Министерството за образование и наука за академската 2022-2023 година, покрај сите досегашни ќе понуди и две нови категории на стипендии кои се резултат на информациите за недостиг на кадар во одредени области.

Едната категорија ќе биде наменета за студентите запишани додипломски студии од прв циклус на јавните и приватните високообразовни институции на студиските програми за преведување и толкување од македонски на албански јазик и обратно (мајчин јазик) и преведување и толкување од албански на македонски јазик и обратно (немајчин јазик).

Другата категорија пак, ќе биде наменета за студенти запишани на додипломски студии од прв циклус запишани на студиски програми по историја на уметност, археологија, ликовна уметност и етнологија и антропологија.

Висината на двата вида стипендии ќе изнесува 6.050 денари месечно, а право на аплицирање имаат студентите кои постигнале особено висок успех во учењето од I-та до тековно запишаната студиска година со најмалку 7,50 просечен успех.

Воведувањето на овие нови студентски стипендии значи проширување на можностите за финансирање на студирањето на младите и уште еднаш ја потврдува заложбата на МОН за подобрување на студентскиот стандард.

The post МОН доделува стипендии за студентите по македонски и албански јазик и за историја на уметност, археологија, ликовна уметност и етнологија и антропологија appeared first on Република.