Утре, на 12 септември, во 12 часот во спомен-собата „Т'га за југ“ во организација на Градската библиотека „Браќа Миладиновци“ - Скопје ќе се одржи промоцијата на книгата „Книжевен бинокулар“ од проф. д-р Соња Стојменска Елзесер, добитник на наградата „Димитар Митрев“ за најдобра критичко-есеистичка книга според Друштвото на писателите на Македонија.

За книгата, која е во издание на Институтот за македонска литература, ќе говори проф. д-р Анастасија Ѓурчинова. Промоцијата е дел од децениската традиција на библиотеката на поддршка и претставување на наградените книги од ДПМ пред пошироката јавност.

„Книжевен бинокулар“ е дело со книжевни и културолошки есеи кои во фокусот поставуваат актуелни истражувачки прашања од македонската култура. Книгата ја понесе престижната награда „Димитар Митрев“ за најдобра критичко-есеистичко остварување за 2022 година.

„Книжевен бинокулар“, во издание на Институтот за македонска литература, е дело со книжевни и културолошки есеи кои во фокусот поставуваат актуелни истражувачки прашања од македонската култура. Оваа публикација има структура на мозаик со теми и проблематики кои авторката ги истражувала изминативе неколку години, а сите се однесуваат на македонскиот книжевно-културен контекст.

Сите дваесет и два есеистичко-критички, книжевно-научни и културолошки текстови поместени во оваа збирка дишат во ритамот на едуцирана компаратистичка промисла на книжевните феномени, што првенствено се докажува со доминација на компаративниот метод и самата компаратистика како тема на повеќето студии. Но, тоа не само што не ѝ пречи на контактибилноста на овие писма со читателите од најразлична провиненција, туку напротив, може да биде и интересно и корисно четивно за различни генерации и профили читатели – забележува во поговорот проф. д-р Наташа Аврамовска.

Промоцијата на „Книжевен бинокулар“ во Градската библиотека е дел од богатата понуда на Град Скопје – кандидат за европска престолнина на културата за 2028 година.

The post Промоција на книгата „Книжевен бинокулар“ од Соња Стојменска Елзесер во Градската библиотека во Скопје appeared first on Република.

Книгата „Книжевен бинокулар“ од Соња Стојменска-Елзесер е новиот носител на наградата „Димитар Митрев“ за 2022 година. Тоа е награда што традиционално ја доделува Друштво на писателите на Македонија за книга со критики или есеи. Комисијата во состав: д-р Марина Мијаковска, проф. д-р Лидија Капушевска Дракулевска и Глигор Стојковски, детално ги разгледа сите пристигнати книги, и на последниот состанок едногласно одлучи наградата „Димитар Митрев“ да ја добие „Книжевен бинокулар“.

Есеистичката книга „Книжевен бинокулар“ на Соња Стојменска-Елзесер е дело со книжевни и културолошки есеи кои во фокусот поставуваат актуелни истражувачки прашања од македонската култура. Оваа публикација има структура на мозаик со теми и проблематики кои Стојменска-Елзесер ги истражувала изминативе неколку години, а сите се однесуваат на македонскиот книжевно-културен контекст. Според Стојменска-Елзесер „културата може да ја разбереме единствено во релации, контекстуално, компаративно.“ Затоа таа се служи со компаративен метод во анализа на делата од македонските автори.

Според образложението на Комисијата: „ова дело содржи дваесет и два текста поделени во два диптиси од вкупно десет поглавја. Секое поглавје е компонирано од два текста што може да се разберат како две оптички стакла од микроскоп или окулар што понудува различни агли на гледање на левото и десното око. Секој диптих е составен од два сродни тематско-содржински есеи кои се изделени во посебно поглавје според тематска сродност. Станува збор за концептуална книга со изграден стил, што проблематизира актуелни есеистички прашања и истражувања и носи иновативност во формата и содржината на ваквиот тип на книга. Во секое поглавје се понудени два текста како две оптички стакла, а читателот има избор преку неговата призма на гледање како трето оптичко стакло да одбере како да пристапи кон толкувањето на истражувачките прашања.

„Книжевен бинокулар“ на Соња Стојменска-Елзесер е есеистичко дело во кое компаратистичката промисла на книжевните феномени отвора нови видици и предизвици во македонската книжевна наука. Стилот е јасен и течен, а теориските импликации и цитатноста на делата со кои се служи авторката, воопшто не го отежнуваат читањето на есеите.

The post Наградата „Димитар Митрев“ за критика и есеистика ДПМ и ја додели на Соња Стојменска- Елзесер за „Книжевен бинокулар“ appeared first on Република.