Националниот сојуз на слепи лица на Македонија по месец и половина денеска повторно со мирен протестен марш ги повтори своите барања за системско решение за обезбедување помагалата и за покачување на додатоците за попреченост и за туѓа нега.

По вторпат за месец и половина го обновивме мировниот протест поради нашите потреби и барања. Првото барање е додатокот за попреченост да изнесува 40 проценти од просечната плата, туѓата нега 30 проценти од просечната плата и помагалата да се решат системски, истакна во изјава за медиумите претседателот на Националниот сојуз на слепи лица во Македонија, Жарко Селковски.

Тој рече дека и другите лица со попреченост имаат потреба од помош, меѓутоа кај нив проблемот е системски решен со ортопедски помагала, апарати за слух и слична помош, само слепите немаат никакво право на помагало.

Без помагалата не можеме да функционираме, а имаме проблеми со движењето, со читањето и со пишувањето. За сето тоа нас ни требаат говорни помагала за функционирање во секојдневниот живот. Апелирам и до премиерот и до Владата да не не игнорираат, да седнеме да разговараме и да најдеме решение за нашите барања односно нашите потреби, додаде Селковски.

На прашањето што досега е побарано и каков одговор добиле до сега, Селковски рече дека се работи за истите барања, но немаат никаков одговор и нагласи дека се игнорирани, како да не постојат.

Ние нема да се откажеме и по трет пат и по четврти пат, и по петти пат ако треба, ги бараме нашите права и нашите потреби барем малку да се ублажат во овие тешки времиња, изјави Селковски.

Прашан што планираат ако повторно не добијат одговор од институциите, тој најави дека набрзо ќе имаат и Извршен одбор на здружението, којшто одлучува за ваквите постапки и да се види што ќе се организира понатака.

Сојузот на слепите лица реализираше протестен марш и минатиот месец со истите барања, меѓутоа, како што тврдат, се уште не добиле никаков одговор од Владата.

Протестниот марш, започна од ДХО „Даре Џамбаз“, од каде демонстраните поминаа пред Собранието и потоа преку градскиот плоштад, го завршија протестот пред Владата.

The post Владата нема слух за барањата на слепите лица: Тие денеска повторно излегоа на протест appeared first on Република.

По повод Меѓународниот ден на музеите – 18 Мај, професор д-р Игор Неделковски, проректор за наука на Универзитетот „Св. Климент Охридски“ пред експертите на НУ Завод и Музеј Битола презентираше Методологија за изработка на 3Д тактилни мапи и слики на културно-историски споменици.

Методологијата е развиена во соработка со м-р Јове Парговски и консултации со д-р Ирена Ружин од НУ Завод и Музеј Битола и Весна Софрониевска од Сојузот на слепи – Битола, а се темели врз дигитализација на постојните културно-историски споменици кои потоа се печатат во 3Д тактилни модели според Стандардот за тактилна графика објавен во 2010 од Брајовата Асоцијација на Северна Америка (BANA).

3Д тактилните модели преку допир можат да ги „гледаат“ слепите лица. Тактилните модели преку NFC и QR технологија се поврзани со апликација за паметни уреди телефони и таблети која содржи наративен опис за објектите и видео на знаковен јазик. Според изработените 3Д модели во наредниот месеци ќе се изработат и модели од метал, за што се обезбедени средства од Европската Унија кои ќе му бидат предадени на Општина Битола за да ги постави пред десетте најзначајни културно-историски споменици, појасни Неделковски.

Со овој проект, Битола ќе биде прв град на Балканот и меѓу првите во Европа што ќе ги направи „видливи“ своите најзначајни културно-историски споменици за слепите лица.

Пристапниот туризам наменет за лица со попречености во Европа и светот се повеќе добива на значење, не само од аспект на креирање инклузивно општество туку како и сериозен извор на приходи, посочи проректорот Неделковски на меѓународниот ден на Музеите.

The post Битола прв град на Балканот и меѓу првите во Европа што ќе ги направи „видливи“ културно-историските споменици за слепите лица appeared first on Република.