Симон Трпчески со оркестарот на Филхармонијата за прв пат настапил на 15 години, реализирал уште неколку заеднички концерти низ годините, а вечерва ќе настапи на роденденскиот концерт насловен „80 години - Љубов“, на кој ќе го изведе „ Концертот за пијано и оркестар во а- мол“ од Едвард Григ.

Мило ми е што сум еве дел од нив. Секогаш кога се свири дома е посебно чувство. А, кога се има повод за особено еден ваков, сериозен и многу голем и убав јубилеј, секако дека чувствата работат со поголем интензитет. И мислам дека тоа се чувства кај сите колеги од оркестарот и им посакувам сѐ најдобро, вели Трпчески во изјава за Телма телевизија .

Покрај делото на Григ, ќе биде изведена праизведбата на „ Куклици“ од Ана Пандевска, со што продолжува традицијата на нашиот најголем симфониски оркестар за афирмација на домашното творештво, а во завршиницата ќе биде изведена Симфонијата бр 1- „Титан “ , од Густав Малер.

Меѓу гостите на концертот, ќе бидат и директорите на Филхармонијата од Софија и на Симфонискиот оркестар од Солун, пред првиот заеднички настап со нашата Филхармонија, на 17. февруари идната година во салата НДК.

Пред концертот, во фоајето ќе може да се види изложбата на фотографии, од развојот и најважните мигови во опстојот на Македонската филхармонија. А, ќе натапи и хорот „ Мирче Ацев“, со три композиции од основоположниците на овој оркестар, Тодор Скаловски и Трајко Прокопиев.

Македонската филхармонија е формирана на 24 ноември 1944 година во домот на композиторот Тодор Скаловски. Првично се викала Државен симфониски оркестар. За 80 години постоење , одржала над 2500 концерти, со учество на над 3500 уметници.

The post Симон Трпчески пред вечерашниот роденденски концерт на Македонската филхармонија: Секогаш кога се свири дома е посебно чувство appeared first on Република.

Со концертот насловен „80 години – Љубов“, денеска, со почеток во 20 часот, оркестарот на Македонската филхармонија ќе го прослави својот јубилеј – осумдесет години од формирањето. На програмата е светска премиера на „Куклици“ од македонската композиторка Ана Пандевска, како и Концерт за пијано и оркестар во а-мол од Едвард Григ и монументалната Симфонија бр. 1 – „Титан“ од Густав Малер.

Како солист ќе настапи нашиот пијанист со блескава интернационална кариера – Симон Трпчески, а концертот ќе го води шеф-диригентот на Македонска филхармонија - маестро Јерухам Шаровски од Израел, информираат од Македонска филхармонија.

Оттаму истакнуваат дека македонскиот пијанист Симон Трпчески во својата богата кариера има соработувано со над стотина оркестри на четири континенти, меѓу кои: Лондонскиот симфониски оркестар, Оркестарот Филхармонија, Националниот оркестар на Франција, Кралскиот оркестар Концертгебау, Оркестарот Тонхале во Цирих, Германскиот симфониски оркестар во Берлин, Радио-симфонискиот оркестар Берлин и Елбфилхармонијата.

Во Северна Америка, тој често настапува како солист со оркестрите во Кливленд и Филаделфија, Лос Анџелес и Њујоршката филхармонија, како и со симфониските оркестри на Чикаго, Сан Франциско, Сент Луис, Сиетл и Балтимор. Во Јужна Америка има изградено прекрасна релација со Оркестарот „Естабле дел Театро Колон“, а настапувал и со симфониите на Сеул, Хонгконг и со симфониските оркестри на Сиднеј, Мелбурн и Нов Зеланд, велат од Филхармонија.

Трпчески има работено со голем број истакнати диригенти, меѓу кои и: Лорин Мазел, Владимир Ашкенази, Марин Алсоп, Густаво Дудамел, Кристијан Мачелару, Џанандреа Носеда, Василиј Петренко, Владимир Јуровски, Антонио Папано, Габриел Бебешелеа, Давид Цинман.

Неговата долгорочна соработка со Василиј Петренко резултираше со богата дискографија; меѓу другите и заедно со Кралскиот ливерпулски филхармониски оркестар ги снимија сите пијано-концерти на Рахмањинов и пијано-концертите на Чајковски и Прокофјев. Во сезоната 2023-24, како резидентен уметник со Кралскиот шкотски национален оркестар, Трпчески го сними својот најнов албум за „Лин Рекордс“, кој ќе ги содржи концертите бр. 2 и бр. 5 на Сен-Санс под диригенство на Томас Сондергард. Во сезоната 2024-25, пак, ќе ја отвори концертната сезона на Симфонискиот оркестар на Дизелдорф, а ќе има нови бројни настапи со симфонискиот оркестар на Монтреал и Оркестра Симфоника де Сао Паоло, Симфонијата на Балтимор, со Џанандреа Носеда и Циришката филхармонија, соопштуваат од Македонската филхармонија.

Инаку, Трпчески е посветен и на зајакнување на културниот имиџ на неговата родна Македонија. Неговиот проект за камерна музика „Македонисимо“ е посветен на запознавање на светската публика со богатите традиционални македонски фолклорни корени.

Со посебна поддршка од „КултурОп“ – македонска организација за култура и уметност – Симон Трпчески редовно работи со млади музичари во својата татковина, негувајќи го талентот на идната генерација уметници. Во 2009, доби Орден за заслуги на Македонија, награда за странски и домашни заслужни личности за афирмација на Македонија во странство. Во 2011 година стана првиот што ја понесе титулата „Национален уметник на Македонија“. Роден е во Македонија во 1979 година, а дипломирал на Факултетот за музичка уметност во класата на проф. Борис Романов. Беше уметник од новата генерација на „Би-би-си“ во периодот 2001 – 2003 година, а во 2003 година ја доби Наградата за млад уметник од Кралското филхармониско друштво, посочуваат од Филхармонија.

Роден во Буенос Аирес, Аргентина, маестро Јерухам Шаровски рано започнал да изучува музика, а потоа студирал флејта, контрабас, композиција и диригирање на Националниот конзерваториум за музика во неговиот град. Во раните 70-ти имигрирал во Израел, каде што дипломирал на Академијата за музика „Рубин“ во Ерусалим, под палката на проф. Менди Родан. Во 1990 година, Шаровски бил избран од страна на славниот маестро Зубин Мехта да ја прими наградата „Млад артист на годината“. Тогаш ја добил и привилегијата да диригира со Израелската филхармонија, како и со другите поголеми оркестри во Израел.

- По турнејата во поранешниот Советски Сојуз (СССР), која за него била значајна во кариерата, во 1991 година станал уметнички директор и шеф диригент на Симфонискиот оркестар „Раанана“ во Израел. Под палката на Шаровски, овој оркестар прераснал во еден од најпопуларните симфониски ансамбли изведувајќи стотици дела и надвор од земјата. Од 1998 до 2004, маестро Шаровски раководел и со бразилскиот симфониски оркестар на Рио де Жанеиро, со кој остварувал турнеи во Бразил и во Европа и снимил четири цедеа. Во тој период, Шаровски го формирал Младинскиот симфониски оркестар на Бразил, кој станал еден од најпознатите ансамбли во земјата, известуваат од Филхармонија.

За време на својата кариера, маестро Шаровски диригирал со над 50 оркестри во повеќе од 20 различни земји, вклучувајќи ги и серијата концерти со маестро Лорин Мазел, диригирајќи со Минхенската филхармонија во Германија и со Симфонискиот оркестар на Ерусалим заедно со Баварскиот радио-оркестар на концерти посветени на градот Ерусалим. Во моментов, маестро Шаровски ја извршува и функцијата шеф диригент на Македонската филхармонија.

Свечената церемонија по повод одбележувањето на 80-годишниот јубилеј ќе започне во 19.30 часот, во фоајето на Филхармонија со настап на академскиот хор „Мирче Ацев“ кој ќе изведе три композиции од основоположниците на оркестарот на Македонска филхармонија – Тодор Скаловски и Трајко Прокопиев. Публиката ќе има можност да ги чуе „Ленка“ од Прокопиев и „Рапсодија бр. 2“ и „Македонска хумореска“ од Скаловски. Со хорот ќе диригира Јасмина Ѓорѓеска – Каро. Во фоајето ќе биде поставена и изложба на фотографии кои го следат историскиот континуитет на Македонската филхармонија и нејзините најзначајни моменти.

Свечениот концерт на Македонската филхармонија преку директен пренос ќе го пренесува МРТ со цел јубилејното чествување да го проследи поголем број на публика, ширум нашата држава.

Преносот ќе биде збогатен со дополнителни прилози и содржини, а за време на паузата од отвореното студио на МРТ во фоајето на Филхармонија, гледачите ќе имаат можност да проследат кратки разговори и интервјуа со значајни дејци од музичкиот живот во земјата.

The post Македонска филхармонија го слави јубилејот со концертот „80 години – Љубов!“ appeared first on Република.

Со концертот насловен „80 години – Љубов“, в четврток, со почеток во 20 часот, оркестарот на Македонската филхармонија ќе го прослави својот јубилеј – осумдесет години од формирањето. На програмата е светска премиера на „Куклици“ од македонската композиторка Ана Пандевска, како и Концерт за пијано и оркестар во а-мол од Едвард Григ и монументалната Симфонија бр.1 – „Титан“ од Густав Малер. Како солист ќе настапи нашиот пијанист со блескава интернационална кариера – Симон Трпчески, а концертот ќе го води шеф-диригентот на Македонска филхармонија- маестро Јерухам Шаровски од Израел.

Македонскиот пијанист со светско реноме, Симон Трпчески, добива позитивни критики за својата моќна виртуозност и длабоко изразен пристап, како и за неговото харизматично присуство на сцената. Пред дваесет години започна на меѓународната сцена како уметник од новата генерација на „Би-би-си“, и во својата неверојатно брзорастечка кариера, без ограничувања во музиката, има соработувано со над стотина оркестри на четири континенти, меѓу кои: Лондонскиот симфониски оркестар, Оркестарот Филхармонија, Националниот оркестар на Франција, Кралскиот оркестар Концертгебау, Оркестарот Тонхале во Цирих, Германскиот симфониски оркестар во Берлин, Радио-симфонискиот оркестар Берлин и Елбфилхармонијата. Во Северна Америка, тој често настапува како солист со оркестрите во Кливленд и Филаделфија, Лос Анџелес и Њујоршката филхармонија, како и со симфониските оркестри на Чикаго, Сан Франциско, Сент Луис, Сиетл и Балтимор. Во Јужна Америка има изградено прекрасна релација со Оркестарот „Естабле дел Театро Колон“, а настапувал и со симфониите на Сеул, Хонгконг и со симфониските оркестри на Сиднеј, Мелбурн и Нов Зеланд. Трпчески има работено со голем број истакнати диригенти, меѓу кои и: Лорин Мазел, Владимир Ашкенази, Марин Алсоп, Густаво Дудамел, Кристијан Мачелару, Џанандреа Носеда, Василиј Петренко, Владимир Јуровски, Антонио Папано, Габриел Бебешелеа, Давид Цинман... Неговата долгорочна соработка со Василиј Петренко резултираше со богата дискографија; меѓу другите и заедно со Кралскиот ливерпулски филхармониски оркестар ги снимија сите пијано-концерти на Рахмањинов и пијано-концертите на Чајковски и Прокофјев... Во сезоната 2023-24, како резидентен уметник со Кралскиот шкотски национален оркестар, Трпчески го сними својот најнов албум за „Лин Рекордс“, кој ќе ги содржи концертите бр. 2 и бр. 5 на Сен-Санс под диригенство на Томас Сондергард. Во сезоната 2024-25, пак, ќе ја отвори концертната сезона на Симфонискиот оркестар на Дизелдорф, а ќе има нови бројни настапи со симфонискиот оркестар на Монтреал и Оркестра Симфоника де Сао Паоло, Симфонијата на Балтимор, со Џанандреа Носеда и Циришката филхармонија.... Бројна е и неговата рецитална програма во големи сали во градови како Њујорк, Сан Франциско, Вашингтон, Лондон, Париз, Амстердам, Милано, Минхен, Прага, Хамбург, Билбао, Истанбул, Даблин и Токио. Од своето деби во Вигмор Хол во 2001 година, тој редовно настапува во оваа престижна сала, а неговиот природен афинитет кон руските композитори од 19 и 20 век е претставен во седум албуми со рецитали. Инаку, Трпчески е посветен и на зајакнување на културниот имиџ на неговата родна Македонија. Неговиот проект за камерна музика „Македонисимо“ е посветен на запознавање на светската публика со богатите традиционални македонски фолклорни корени. Со посебна поддршка од „КултурОп“ – македонска организација за култура и уметност – Симон Трпчески редовно работи со млади музичари во својата татковина, негувајќи го талентот на идната генерација уметници. Во 2009, доби Орден за заслуги на Македонија, награда за странски и домашни заслужни личности за афирмација на Македонија во странство. Во 2011 година стана првиот што ја понесе титулата „Национален уметник на Македонија“. Роден е во Македонија во 1979 година, а дипломирал на Факултетот за музичка уметност во класата на проф. Борис Романов. Беше уметник од новата генерација на „Би-би-си“ во периодот 2001 – 2003 година, а во 2003 година ја доби Наградата за млад уметник од Кралското филхармониско друштво.

Свечената церемонија по повод одбележувањето на 80-годишниот јубилеј ќе започне во 19.30 часот, во фоајето на Филхармонија со настап на академскиот хор „Мирче Ацев“ кој ќе изведе три композиции од основоположниците на оркестарот на Македонска филхармонија – Тодор Скаловски и Трајко Прокопиев. Публиката ќе има можност да ги чуе „Ленка“ од Прокопиев и „Рапсодија бр.2“ и „Македонска хумореска“ од Скаловски. Со хорот ќе диригира Јасмина Ѓорѓеска – Каро. Во фоајето ќе биде поставена и изложба на фотографии кои го следат историскиот континуитет на Македонската филхармонија и нејзините најзначајни моменти.

Свечениот концерт на Македонската филхармонија преку директен пренос ќе го пренесува МРТ со цел јубилејното чествување да го проследи поголем број на публика, ширум нашата држава.

Преносот ќе биде збогатен со дополнителни прилози и содржини, а за време на паузата од отвореното студио на МРТ во фоајето на Филхармонија, гледачите ќе имаат можност да проследат кратки разговори и интервјуа со знајачни дејци од музичиот живот во земјата.

The post Со светска премиера на „Куклици“ од Ана Пендевска и концерт за пијано и оркестар од Григ во изведба на Трпчески, Филхармонија го слави 80-годишниот јубилеј appeared first on Република.

Македонскиот пијанист Симон Трпчески на 20 декември во арената „Борис Трајковски“ ќе одржи новогодишен концерт насловен „Новогодишна музичка идила со Симон и пријателите“.

Концертот е во организација на „Прагма продукција“, а Трпчески ќе настапи заедно со неговите пријатели, врвни македонски уметници.

Ова нема да биде класичен концерт, туку ќе биде новогодишен спектакл, каде што за првпат, Симон Трпчески ќе свири и популарни новогодишни песни, како што тоа го прават и најголемите музички ѕвезди. Но, овојпат тој ќе оди чекор понатаму, па заедно со него, на сцената ќе му се придружат врвни пејачи кои дополнително ќе ја зајакнат атмосферата, најавија организаторите.

Како што посочуваат, на програмата ќе биде „Оревокршачка“, но и омилените арии и популарните дуети, па сѐ до валцерите и бисерите од класичната музика и виртуозни предизвици.

Секој дел од програмата е вистински виртуозен предизвик, но Трпчески и неговите пријатели се подготвени да го исполнат со леснотија и страст, како што само тие знаат. Зборувајќи за новата средба со македонската публика, Симон Трпчески вели дека секогаш кога настапува на сцените низ светот дава сѐ од себе, но потенцира дека емоцијата е посилна кога се свири дома. Вистинска реткост е да се слуша Симон во Скопје, бидејќи неговите концертни активности траат во текот на целата година и се одвиваат на сите континенти низ светот, се вели во соопштението.

Трпчески редовно соработува со познати диригенти, а меѓу нив се издвојуваат имиња како Шарл Дитоа, Сер Лорин Мазел, Василиј Петренко, Владимир Ашкенази, Густав Дудамел итн. Настапува со најголемите странски оркестри, како Њујоршката филхармонија, Кралската филхармонија од Лондон, симфонискиот оркестар на Сан Франциско… Многу музички критичари го споредуваат со најдобрите пијанисти на денешницата, истакнувајќи дека Трпчески не само што ја поседува техниката, туку и длабока, уникатна музикалност што му овозможува да ги спои традицијата и современиот израз на извонреден начин.

Оваа новогодишна вечер е за сите – за оние кои го сакаат класичниот звук, но и за оние кои едноставно сакаат да уживаат во празничен концерт кој носи радост и инспирација. Во пријатната атмосфера на декемвриската ноќ, арената ќе биде вистинско уметничко прибежиште. Затоа, подгответе се за незаборавна вечер, споделете ја со своите најблиски и дозволете си да бидете дел од оваа ноќ, каде што Симон Трпчески и неговите пријатели ќе запишат уште една незаборавна страница во македонската музичка приказна, посочуваат организаторите.

The post „Новогодишна музичка идила со Симон и пријателите“ на 20 декември во арена „Борис Трајковски“ appeared first on Република.

Еминентниот македонски пијанист, маестро Симон Трпчески, уште еднаш ја крена европската публика на нозе, овој пат со концерт во свечената сала на Музичката академија „Франц Лист“ во Будимпешта, каде што настапи со Симфонискиот оркестар на Унгарското радио и под диригентската палка на италијанскиот диригент Рикардо Фрица. Присутната публика имаше можност да ужива во неговата виртуозна изведба на Концертот за пијано и оркестар број 2 од Јоханес Брамс во првиот дел од вечерта. Според Трпчески, се работи за едно од најсложените дела во творештвото на Брамс.

„Се чувствувам прекрасно. Имав чест да го изведувам токму во градот каде што беше и светската премиера на ова дело. Будимпешта толку многу зрачи со уметност, да не кажам со музика од секој агол, но и воопшто, Унгарија е една земја со богати култура и историја“, рече Трпчески.

Тој за првпат настапи со Оркестарот на Унгарското радио, и тоа на покана од диригентот Рикардо Фрица од Италија, со кого веќе има настапувано заедно.

„Трпчески не е само пијанист, тој е, пред сè, мој пријател, се знаеме многу години и настапувавме заедно. Многу е лесно за мене да соработувам со него, бидејќи имаме иста страст кон музиката, имаме совршена музичка комуникација. Се надевам, ќе имаме уште многу заеднички концерти“, истакна диригентот.

Концерт-мајсторот на Оркестарот на Унгарското радио, воедно и прв унгарски уметник награден со „Еми“, исто така имаше пофални зборови за македонскиот музичар: „Трпчески свиреше одлично, неговата изведба е виртуозна. Го претстави на вистински начин делото на Брамс. Со пијанистот имаме план за македонско-унгарска соработка во иднина, како концерт на камерна музика“.

На крајот од својот настап, Трпчески ѝ подари на публиката македонска композиција.

„Изведов дел од ‘Македонисимо’, поточно ‘Пиперково оро’. Секогаш сакам да презентирам нешто наше, поради тоа што сум горд на она што го имаме како ризница, богатство, фолклорно, како земја, како Македонија. На концертот во Будимпешта публиката имаше можност да слушне унгарска народна музика преку ‘Концертот’ на Брамс, така што направив една поврзаност и изведов и македонска композиција“.

На концертот присуствуваа и неколкумина Македонци, меѓу кои и Ивица Боцевски, специјален претставник на Владата при унгарското Претседателство со Советот на Европската Унија.

„Во официјално својство, веќе на трет континент го слушам, дел сум од неговата публика, никогаш не пропушта кога прави бис, да ме поздрави, особено кога ги изведува македонските композиции. Повторно, и овој пат, го добив најнезаслужениот аплауз кога ме претстави како амбасадор од неговата татковина и кога ми го посвети ‘Пиперково оро’. Се сеќавам кога ме поздрави пред преполната сала на Државниот оркестар од Сао Паоло со делото од Шуплевски ‘Не си го продавај, Кољо, чифлигот’“, изјави Боцевски, за кого Трпчески е најголем македонски културен амбасадор.

„Тој е и најдобар доказ што пропушта Европа поради недовршената македонска и општо, балканска европска интеграција. Целиот талент, целата креативност, ум, труд и професионалност на секој Балканец е нераскинлив дел од европската цивилизација, култура, економија и придонесува кон зголемување на европската конкурентност во трката кон врвот во 21 век. Унгарците одамна го знаат тоа и затоа срдечно ја поддржуваат нашата европска интеграција, а и се однесуваат кон нас како веќе да сме земја членка. Беше гордост да се проследат петте биса што му ги даде унгарската публика на Симон, а и потоа да се ужива во друштвото на најдобрите унгарски и европски уметници, кои беа дојдени да го проследат концертот“, додаде тој.

Трпчески истакна дека особено му е мило што овој концерт се одржа токму во време на претседавањето на Унгарија со Европската Унија.

„Ова е една убава културна соработка помеѓу Македонија и Унгарија и ќе придонесе за развивање на понатамошните односи“.

Македонскиот пијанист доби пофални зборови од многубројната публика, врвни музичари и познавачи на музичката уметност. Меѓу нив и Франческа Испан, која е основач на камерниот оркестар „Солти“, составен од млади дипломирани музичари од Музичката академија. Таа воедно беше и пријателка со македонскиот композитор Властимир Николовски.

Турнејата на Трпчески продолжува во Белград, и тоа со два концерта во една вечер, па во Солун, Нови Сад и во Сараево.

The post Трпчески уште еднаш ја крена на нозе европската публика: Секогаш сакам да презентирам нешто наше, поради тоа што сум горд на она што го имаме како ризница, богатство, фолклорно, како земја, како Македонија appeared first on Република.

Овации во полната сала Tonhalle Düsseldorf во Дизелдорф... за концертите за отворање на сезоната со Симфонискиот оркестар и маестро Алпеш Чауан!, напиша на видеото кое го сподели нашиот пијанист Симон Трпчески.

Трпчески одржа три концерти на отворањето на сезоната на Симфонискиот оркестар на Дизелдорф (30 август-2 септември), каде под диригентската палка на британскиот маестро Алпеш Чауан учествуваше во изведбата на Концертот за пијано и оркестар број 2 од Рахманинов.

The post Овации за маестро Трпчески во Дизелдорф appeared first on Република.

По трите концерти на отворањето на сезоната на Симфонискиот оркестар на Дизелдорф (30 август-2 септември), каде под диригентската палка на британскиот маестро Алпеш Чауан учествува во изведбата на Концертот за пијано и оркестар број 2 од Рахманинов, нашиот прославен пијанист Симон Трпчески се враќа дома за уште еден настап со интернационалниот музички проект „Македонисимо“, информира Здружението за култура и уметност „КултурОп“.

Добиј ги најважните вести, бесплатно на Viber
По струшкото село Збажди, Скопје, Штип, Битола и село Секирник, Општина Босилово, Струмица, Трпчески и Пријателите и пред публиката во Делчево ќе го изведат албумот „Македонисимо“, којшто во издание на британската етикета „Лин Рекордс“ го обиколи светот – проект во чии рамки на оригинален начин се обработува македонската народна музика од страна на нашиот композитор, Панде Шахов, кој, како што вели Трпчески, „со својот посебен музички јазик ја обои на многу поинаков начин, испреплетувајќи со нашата традиционална музика различни музички стилови“.

Уникатниот тим на квинтетот „Македонисимо“ и на овој концерт, што ќе се одржи на летната сцена во Градскиот парк во Делчево на 6 септември, со почеток во 20 часот, го сочинуваат Александар Краповски на виолина; Александар Сомов на виолончело; кларинет, саксофон и на кавал Хидан Мамудов, а зад удиралките е Влатко Нушев, кој е роден токму во Делчево.

Концертот, во организација на Општина Делчево во соработка со „КултурОп“, се одржува во чест на 80-годишнината од ослободувањето на градот и, како и сите досегашни изведби на отворено, публиката ќе може да го проследи бесплатно.

The post Празничен концерт на „Македонисимо“ на Симон Трпчески и пријателите во Делчево appeared first on Република.

Македонскиот пијанист Симон Трпчески одржа концерт во Амстердам заедно со Романскиот камерен оркестар и маестро Габриел Бебешелеа. На истиот, Трпчески го изведе Концертот број два од Рахмањинов.

Благодарност до публиката, вклучително и моите драги пријатели од Македонија кои дојдоа да не поддржат. Фантастично чувство за освежување на спомените од моите претходни концерти во Амстердам, за моето прво враќање во оваа сала после Ковид пандемијата“, истакна Трпчески.

Претходно тој настапи во „Палатата на Принцот“каде го заокружи своето гостување како резиденцијален артист на Филхармонискиот оркестар на Монте Карло, во чии рамки одржа серија концерти во тековната сезона 2023/24 година. Во рамките на резиденцијалниот престој што започна во октомври, минатата година, кога Трпчески на сцената во салата „Рение Трети“ со Филхармонискиот оркестар на Монте Карло настапи со вториот концерт за пијано и оркестар од Рахманинов, веќе во јануари годинава заедно со своите пријатели Краповски, Сомов, Мамудов и Нушев го изведе проектот Македонисимо.

Следуваше целовечерен рецитал на кој Трпчески исполни програма со дела од Шопен, Моцарт, Чајковски/Плетњев, Бетовен и Прокофјев.

The post Симон Трпчески одржа концерти во Монте Карло и Амстердам appeared first on Република.

Македонскиот пијанист од светски глас Симон Трпчески синоќа (4 август) во „Палатата на Принцот“ во Монте Карло со блескав настап го заокружи своето гостување како резиденцијален артист на Филхармонискиот оркестар на Монте Карло, во чии рамки одржа серија концерти во тековната сезона 2023/24 година. Овој пат публиката со овации ја поздрави изведбата на Концертот за пијано и оркестар број 2 од Јоханес Брамс, што Трпчески и  овој реномиран оркестар го изведоа под диригентската палка на неговиот уметнички и музички раководител, маестро Казуки Јамада од Јапонија. Минатиот месец оваа добитна концертна комбинација настапи и во Колмар, Франција. Пребирливата публика од својот миленик беше наградена и со изведба на бис (квартет од Брамс од албумот „Пријателство“).

Во рамките на резиденцијалниот престој што започна во октомври минатата година, кога Трпчески на сцената во салата „Рение Трети“ со Филхармонискиот оркестар на Монте Карло настапи со Вториот концерт за пијано и оркестар од Рахманинов, веќе во јануари годинава заедно со своите пријатели Краповски, Сомов, Мамудов и Нушев го изведе проектот МАКЕДОНИСИМО.  Следеше целовечерен рецитал на кој Трпчески исполни програма со дела од Шопен, Моцарт, Чајковски/Плетњев, Бетовен и Прокофјев.

Богатиот концертен распоред на нашиот пијанист што изминатиот период го одведе на сцените во Соединетите американски држави, Швајцарија, Романија, Шкотска, Јужна Кореја и Германија, наредниве два месеца продолжува во Холандија, Франција, Германија, Шведска, Романија и Соединетите американски држави.

The post Симон Трпчевски блескаво ја заокружи серијата концерти во Монте Карло appeared first on Република.

Квинтетот „Македонисимо“ на Симон Трпчески и пријателите синоќа одржа концерт во салата „Бугарија“ во бугарската престолнина, со еден од водечките оркестри во регионов, софиската филхармонија. Диригент на концертот беше нашата млада диригентка Ана Спасовска.

Како што соопшти „КултурОп“, квинтетот „Македонисимо“ настапи во оригиналниот состав: Симон Трпчески на пијано, Хидан Мамудов на кларинет, саксофон и кавал, Александар Краповски на виолина, Александар Сомов на виолончело и Влатко Нушев на удиралки, заедно со софиската филхармонија, под палката на диригентката Ана Спасовска, која го имаше своето деби со познатиот бугарски оркестар.

Долготрајните аплаузи од софиската публика беа наградени со три изведби на бис, а посебно одушевување предизвика гостувањето на познатата бугарска певица Александра Борисова, која им се приклучи на музичарите на сцена, информира „КултурОп“.

Меѓу присутните на концертот биле и бугарскиот министер за култура диригентот Најден Тодоров, како и македонската амбасадорка во Бугарија, Агнеса Руси Поповска.

Следната квинтет-изведба на „Македонисимо“ е закажана за 9 јуни во Глазгов, Шкотска (како дел од резиденцијалниот циклус концерти на нашиот пијанист од светски глас со Кралскиот шкотски национален оркестар). Симон Трпчески до крајот на овој дел од сезоната го очекуваат и редовните концертни гостувања во САД, Велика Британија и Германија.

The post Публиката ги врати трипати на бис квинтетот „Македонисимо“ на Симон Трпчески и пријателите кои настапија со софиската филхармонија appeared first on Република.

По исклучително успешната светска оркестарска премиера на проектот МАКЕДОНИСИМО минатата година во, веројатно најпрестижната концертна сала во светот, Музикферајн (Musikverein) во Виена, заедно со Тонкунстлер оркестарот од Австрија под диригентската палка на нивниот шеф-диригент Маестро Јутака Садо, нашиот Камерен оркестар „АЈГА“ во соработка со КултурОп, на 31 март и 1 април, ја претставија македонската, а воедно и балканска премиера на оркестарската верзија на проектот МАКЕДОНИСИМО.

Македонскиот пијанист рече дека е најголема одговорност да се свири дома и се обиде да ја долови светската премиера на оваа верзија на проектот, која се одржа во престижната сала „Музикферајн“ во Виена.

Се тресевме како ќе биде во Виена и на крајот се тресеше ‘Музикферајн’. Композиторот Панде Шахов успеа да го долови нашиот фолклор на оркестарски начин, да го спои со класичната музика и да допре до длабочината на македонската песна, рече Трпчески.

МАКЕДОНИСИМО / оркестарска верзија се базира врз транскрипции на македонска традиционална музика од нашиот композитор Панде Шахов, во соработка со Симон Трпчески.

Овој прв сплет композиции во кој ги препознавте и ората ‘Беровка’, ‘Малешевка’ и ‘Црногорка’ се свири на нашите прекрасни веселби. Го избравме за почеток за да се загрееме и да си ја олабавиме душичката, рече Трпчески.

Шахов направил богати и возбудливи оркестарски аранжмани, многу пријатни за слушање, музика која сигурно ќе биде прифатена и кај луѓето кои не го познаваат македонскиот фолклор. Тоа е таа умешност да се спои класиката со народното.

Како што истакна екипата уште од почеток на реализацијата, овој проект му го посвети на македонскиот народ. Дека почитта е взаемна, публиката покажа и на квинтет-изведбите на проектот низ земјава, на отворено, почнувајќи од с. Збажди на планината Караорман, преку Скопје, Битола и Штип, заклучно со струмичкото село Секирник, на кои овациите кажуваа се’.

Овој пат, финесите на филигрански осмислениот и изведен проект, во оркестарското концертно исчитување понудија уште повозвишен приказ на богатството на македонската музичка традиција.

За тоа, на сцената на Македонската филхармонија се погрижи Квинтет МАКЕДОНИСИМО (во состав:  Симон Трпчески на пијано, Хидан Мамудов на кларинет, саксофон и кавал,  Александар Краповски на виолина и Влатко Нушев на удиралки заедно со Камерниот оркестар АЈГА, под диригентската палка на Ана Спасовска, како и специјалните гости Владимир Крстев на виолина, Александар Димитров и Паскал Краповски на виолончело.

The post Овациите кажаа се: Трпчески, Квинтетот „Македонисимо“ и Камерниот оркестар „Ајга“ понудија возвишен приказ на богатството на македонската музичка традиција appeared first on Република.

Вечерва во 20 часот во Филхармонија ќе се одржи концерт на светски познатиот пијанист Симон Трпчески и пријателите кои заедно со Камерниот оркестар „Ајга“ ќе ја изведат македонската премиера на оркестарската верзија на проектот „Македонисимо“. Синоќа, на 31 март Трпчески и пријателите исто така имаа концерт во Филхамронија. Овие две концертни вечери го означија почетокот на првото издание на „Скопје интернационален музички фестивал“.

Два концерта се одржуваат поради големиот интерес за првично најавениот концерт на 1 април. Вториот концерт се одржа синоќа поради програмскиот распоред на учесниците и достапноста на големата сцена на Македонската филхармонија.

Оркестарската верзија на „Македонисимо“ се базира врз транскрипции на македонската традиционална музика од композиторот Панде Шахов, во соработка со врвниот пијанист Трпчески.

Квинтетот „Македонисимо“ го сочинуваат:  Симон Трпчески на пијано, Хидан Мамудов на кларинет, саксофон и кавал, Александар Краповски на виолина, Александар Сомов на виолончело и Влатко Нушев на удиралки, кои ќе настапат заедно со Камерниот оркестар „Ајга“ под диригентската палка на Ана Спасовска.

Специјални гости на вечерта ќе бидат Владимир Крстев на виолина, Александар Димитров и Паскал Краповски на виолончело.

The post Македонска премиера на оркестарската верзија на „Македонисимо“ на Симон Трпчески и пријателите во Филхамронија appeared first on Република.

Поради голем интерес и распродаден прв, Камерниот оркестар „Ајга“ во соработка со „КултурОп“ го најавуваат и вториот концерт и македонска премиера на оркестарската верзија на проектот „Македонисимо“ на пијанистот со светски глас Симон Трпчески и пријателите.

Концертот ќе се одржи на 31 март 2024 година од 20 часот на големата сцена на Македонската филхармонија. Двете концертни вечери ќе го означат и стартот на првото издание на Скопје интернационалниот музички фестивал што го организира Камерниот оркестар „Ајга“.

Билетите веќе се во продажба на платформата МКтикетс: https://mktickets.mk/event/makedonisimo2/

По исклучително успешната светска оркестарска премиера на проектот „Македонисомо“ минатата година во, веројатно најпрестижната концертна сала во светот, Музикферајн (Musikverein) во Виена, заедно со Тонкунстлер оркестарот од Австрија под диригентската палка на нивниот шеф-диригент Маестро Јутака Садо, нашиот Камерен оркестар „Ајга“ во соработка со КултурОп ја претставуваат македонската, а воедно и балканска премиера на оркестарската верзија на проектот „Македонисомо“.

„Македонисомо“/ оркестарска верзија базира врз транскрипции на македонска традиционална музика од нашиот композитор Панде Шахов, во соработка со Симон Трпчески. Овој пат, финесите на филигрански осмислениот и изведен проект, во оркестарското концертно исчитување нудат уште повозвишен приказ на богатството на македонската музичка традиција.

За тоа, на сцената на Македонската филхармонија ќе се погрижи Квинтетот „Македонисомо“ (во состав: Симон Трпчески на пијано, Хидан Мамудов на кларинет, саксофон и кавал, Александар Краповски на виолина, Александар Сомов на виолончело и Влатко Нушев на удиралки) заедно со Камерниот оркестар „Ајга“, под диригентската палка на Ана Спасовска.

Специјални гости на вечерта ќе бидат и Владимир Крстев на виолина, Александар Димитров и Паскал Краповски на виолончело.

По распродадениот прв концерт закажан за 1 април од 20 часот, а со оглед на програмскиот распоред на учесниците и достапноста на големата сцена на Македонската филхармонија, но и на почитта кон веќе потврдените концерти на други македонски музички уметници, вториот концерт ќе се одржи ден порано, на 31 март (недела).

The post Втор концерт со македонска премиера и оркестарска верзија на „Македонисомо“ на Трпчески и пријателите во Филхармонија appeared first on Република.

По исклучително успешната светска оркестарска премиера на проектот Македонисимо минатата година во, веројатно најпрестижната концертна сала во светот, Музикферајн (Musikverein) во Виена, заедно со Тонкунстлер оркестарот од Австрија под диригентската палка на нивниот шеф-диригент Маестро Јутака Садо, нашиот Камерен оркестар „АЈГА“ во соработка со КултурОп  ја претставуваат македонската, а воедно и балканска премиера на оркестарската верзија на проектот Македонисимо .

Македонисимо  / оркестарска верзија, потсетуваме, базира врз транскрипции на македонска традиционална музика од нашиот композитор Панде Шахов, во соработка со Симон Трпчески

Како што истакна екипата уште од почеток на реализацијата, овој проект му го посвети на македонскиот народ. Дека почитта е взаемна, публиката покажа и на квинтет-изведбите на проектот низ земјава, на отворено, почнувајќи од с. Збажди на планината Караорман, преку Скопје, Битола и Штип, заклучно со струмичкото село Секирник, на кои овациите кажуваа се’.

Овој пат, финесите на филигрански осмислениот и изведен проект, во оркестарското концертно исчитување нудат уште повозвишен приказ на богатството на македонската музичка традиција. За тоа, на сцената на Македонската филхармонија ќе се погрижи Квинтет МАКЕДОНИСИМО (во состав: Симон Трпчески на пијано, Хидан Мамудов на кларинет, саксофон и кавал, Александар Краповски на виолина, Александар Сомов на виолончело и Влатко Нушев на удиралки заедно со Камерниот оркестар АЈГА, под диригентската палка на Ана Спасовска.

Специјални гости на вечерта ќе бидат и Владимир Крстев на виолина, Александар Димитров и Паскал Краповски на виолончело.

Концертот ќе се одржи на 1 април 2024 година од 20 часот на големата сцена на Македонската филхармонија. Билетите веќе се во продажба на платформата МКтикетс.

The post Македонска премиера на оркестарска верзија на „Македонисимо“ на Симон Трпчески и пријателите appeared first on Република.

Ви благодарам за топлите овации од полната сала во Темишвар на мојот прв концерт со Банатул Филармонија!

До следниот!, напиша маестро Симон Трпчески по прекрасниот концерт во Темишвар.

The post Полна сала и овации за Симон Трпчески во Темишвар appeared first on Република.

Одлично е што се вратив во Ванкувер по некое време, со симфонијата на Ванкувер и маестро Николас Елис!, напиша на својот фејсбук профил Симон Трпчески по настапот во Ванкувер.

Ви благодариме за стоечките овации од топлата публика во Ванкувер 3 пати!

Прекрасно е да се сретнам со групата Македонци и пријатели далеку од дома!

До следниот пат...

The post Стоечки овации за Трпчески во Ванкувер appeared first on Република.

Пијанистот со светски глас Симон Трпчески, вечерва, на 13 јануари, кога се одбележува Православаната Нова година, во салата „Рение Трети“ во Монте Карло заедно со своите пријатели ќе го изведе „Македонисимо“.

Трпчески, Краповски, Сомов, Мамудов и Нушев продолжуваат со претставувањето на проектот базиран врз традиционалната македонска музика, чии транскрипции, по идеја на Трпчески, ги потпишува нашиот истакнат композитор Панде Шахов. Со овој настап македонскиот пијанист го продолжува своето гостување како резиденцијален артист на Филхармонискиот оркестар на Монте Карло, во чии рамки е предвидено да одржи 4 концерти во тековната сезона 2023/24 година.

Првиот беше заедничката изведба на Вториот концерт за пијано и оркестар од Рахманинов во минатиот октомври, а по саботното гостување, како што информира „КултурОп“, остануваат уште две концертни вечери со различна програма до крајот на пролетта

The post „Македонисимо“ на Симон Трпчески вечерва ќе прозвучи во Монте Карло appeared first on Република.

Светот ќе го спаси убавината. Омилениот цитат на многумина е извадок од „Идиот“, ремек-делото на рускиот писател Фјодор Достоевски. Ја испраќаме 2023 во која беше тешко да се избере личност или настан кој ќе ја одбележи годината. Ние во „Република“ се решивме за убавината, добрината, хуманоста и уметноста. Бидејќи тие ќе го спасат светот. Личностите кои ги избравме се наш, личен, субјективен избор.

Пијанистот со светски глас, Симон Трпчески, математичарот Дамајан Давков, кој освои прво место на Интернационалната олипијада за математика, режисерката Тамара Котевска, Борче Стаменов од „Донирај компјутер“ и писателот Влада Урошевиќ се изборот на личности за 2023 година за кои се одлучи редакцијата на „Република“. Сите петмина се еднакво важни и успешни.

Симон Трпчески 

Врвниот македонски пијанист Симон Трпчески во 2023 година покрај многуте успешни концерти кои ги изведе на светските сцени, оваа година заедно со ВДР Симфонискиот оркестар од Келн и романскиот диригент Кристијан Мачелару ги сними монументалните концерти на Јоханес Брамс. Двојниот албум со двата концерти за пијано и оркестар од Јоханес Брамс го издаде британскиот „Лин рекордс“, а светските медиуми пишуваа блескави критики. Новото издание на Трпчески беше прогласено за албум на неделата на познатото лондонско радио „Класик ФМ“.

Пијанистот со светски глас, летово, во родното село на неговата мајка, Секирник, Струмичко настапи со „Македонисимо“, проект на кој тој е неизмерно горд. Со „Македонисимо“ тој имаше балканска турнеја, а за него се значајни изведбите на двата Брамсови концерта со Лондонскиот симфониски оркестар.

Трпчески во јуни првпат гостуваше во Грција, каде што имаше концерт со државниот Солунски симфониски орекстар.

Дамјан Давков

2023 година беше мошне успешна 15-годишниот математичар Дамјан Давков. Штипјанецот, кој како основец освојуваше високи пласмани во повисоки категории, сега е средношколец во Математичко-информатичката гимназија во Скопје. Освен математиката, одлично му оди и инфоррамтиката. Тој го освои првото злато за Македонија на 64. Интернационална математичка олимпијада што летово се одржа во Чиба, Јапонија. Давков беше дел од македонкиот тим во кој Алексиј Тасиќ освои сребрен медал, Никола Цветаноски и Никола Спировски – бронзи, а Јан Стојановски и Бранко Јангеловски пофалници за успешно учество. Водач на тимот е Илија Јовчески, а заменик-водач е Мирко Петрушевски.

Дамјан на 27. Јуниорска балканска математичка олимпијада освои златен медал со максимален број поени.

Давков оваа година освои златен медал на 7. Европска јуниорска олимпијада по информатика (ЕЈОИ 2023) која се одржа во Кутаиси, Грузија. Тоа беше прво злато за Македонија и најголем досегашен успех за нашите млади информатичари на престижниот интернационален натпревар во програмирање за ученици на возраст до 15,5 години. Покрај златото на Давков, забележително претставување имаа и останатите тројца членови на македонскиот тим: Владимир Грчев, сега осмоодделенец од Кочани, кој освои олимписка пофалница, како и Никола Стојковски и Андрија Младеновиќ од Скопје кои ги делеа само 5 поени од освојување на олимписка пофалница.

Тамара Котевска 

Во 2020 година македонскиот документарен филм „Медена земја“ на режисерите Љубомир Стефанов и Тамара Котевска ја испиша историјата кога доби две номинации за престижната награда „Оскар“, за најдобар документарец и најадобар странски филм. Три години подоцна Костевска стана првата македонска авторка која доби покана да одржи говор на престижниот Венециски филмски фестивал. Котевска зборуваше за филмови кои имаат моќно социјално влијание и прават општествена промена. На Фестивалот Котевска го претстави својот нов долгометражен документарец „The Walk“ (Патешествието), кој премиерно беше прикажан на Њујоршкиот фестивал на документарни филмови (Doc NYC). „Патешествието“ (The Walk), е филм за глобалната сензација Амал – триметарската кукла што претставува дете-бегалче од Сирија, која го обиколила светот подигнувајќи ја свеста за бегалците.

Борче Стаменов 

Здружението „Донирај компјутер“ на Борче Стаменов од Кавадарци недамна го прослави седмиот роденден. За тоа време Борче и екипата успеале да подарат 2.710 компјутери, да израдуваат деца со новогодишни пакетичиња, украси, елки, лампиони, гардероба и друго.

Хуманизмот на Стаменов беше препознаен конечно и од државата, па тој неодамна ја доби државната награда „Мето Јовановски“ за долгогодишни остварувања во областа на промоцијата, заштитата и унапредувањето на човековите права.

Иницијативата стари, па потоа надградувани компјутери да се донираат на семејства кои не можат да си дозволат да купат почнала сосема случајно, кога една самохрана мајка го замолила Стаменов да ѝ помогне со половен компјутер за нејзините деца. Оттогаш Борче со свој тим, ентузијастички и волентерски работат на тоа секое дете чие семејство не е во можност да му обезбеди компутер, тој да му го донира. Стар, но надграден и сосема солиден. Откако во 2016 година сам поправил и подарил 20 компјутери без никаква логистика, упатил апел за стари компјутери. На апелот се пријавуваат компании и физички лица. Денес Борче е херој кој е идеен творец на благородната иницијатива која израдувала мноу деца, но и нивните родители.

Влада Урошевиќ 

Академик Влада Урошевиќ (89) е еден од најзначајните македонски книжевни и културни дејци. Во 2023 година тој стана добитник на две мошне значајни и престижни литературни награди, „Златен венец“ на Струшките вечери на поезијата (СВП) и „Роман на годината“ за романот „Вистинита но не многу веројатна историја за семејството Пустополски за куќата покрај Вардар и за четирите прстени“ во издание на „Арс Ламина“.

Во 2023 тој ја доби и наградата „13 Ноември“ која ја доделува Град Скопје и наградата автор на годината од Македонската асоцијација на издавачи.

Академик Урошевиќ твори во речиси секој жанр и секоја форма: поезија, расказ, роман, есеј, патопис, книжевна и ликовна критика, книжевна теорија и превод. Зад себе има три книги записи и патописи, повеќе книги во кои се собрани критиките и есеите за македонските писатели и две книги за фантастиката во сликарството. Се афирмира и како антологичар на повеќе изданија. За своите дела и преводи е добитник на многубројни награди и признанија: трипати на наградата „Браќа Миладиновци“ за најдобра поетска книга на „Струшките вечери на поезијата“, двапати на наградата „Стале Попов“, двапати на наградата „Григор Прличев“ за најдобар препев. Освен домашните, носител е и на неколку странски признанија. За својот книжевен и преведувачки опус, пак, именуван е првин за витез на Редот на уметноста и литературата, а потоа и за офицер на истиот Ред од Владата на Република Франција. Книгите на Влада Урошевиќ се преведени на повеќе јазици: англиски, бугарски, германски, дански, полски, руски, словенечки, српски, хрватски, француски и шпански.

The post Уметност, памет и хуманост е тоа што ни треба: „Република“ ги избра личностите за 2023 година appeared first on Република.

Двата концерта на македонскиот пијанист од светски глас Симон Трпчески заедно со Лондонскиот симфониски оркестар и повторната соработка со прославениот диригент Џанандреа Нозеда од Италија (инаку актуелен музички директор на Националниот симфониски оркестар од Вашингтон и главен гостин-диригент на Лондонскиот симфониски оркестар), наидоа на лавина одушевувачки рецензии во најугледните лондонски медиуми, информира „КултурОп“.

Во две вечери (на 7 и 10 декември), одбраната екипа во салата „Барбикан“ во Лондон хронолошки ги изведе Првиот и Вториот концерт за пијано и оркестар на Брамс.

Симон Трпчески беше остроумен и елегантен солист во Вториот концерт за пијано на Брамс“, пишува критичарот на „Гвардијан“, Тим Ешли. „... Длабоко проживеана изведба на Вториот концерт за пијано на Брамс со Симон Трпчески како солист. Тој внесе многу тежина, увид и драма во органски развивачкиот почетен став и турбулентното скерцо, а сепак деликатноста на неговото свирење најмногу ќе остане во сеќавањето на друго место - чувството за тивка тишина во центарот на бавниот став, на пример, или грациозноста на финалето, со неговата ненагласена елеганција и духовитост...“ – истакнува Ешли.

Своето одушевување не го криеше и посебно инспирираниот рецензент на „Стандард“, Бери Милингтон, кој во својот критички осврт вели:

Македонскиот пијанист Симон Трпчески има лојални следбеници и можете да видите зошто кога го изведува Вториот концерт за пијано на Брамс во Б-дур, технички брилијантен, но полн со суптилни детали. Елоквентноста со која Тимоти Џонс го свиреше соло воведниот дел на хорна беше усогласен со извонредниот одговор на Трпчески, формулиран и одмерен до совршенство. Тој така продолжи во сите четири става, проникливо надополнет со обликувањето на оркестарот од Нозеда, вешто интегрирајќи ги виртуозното прикажување и внатрешното размислување.
Трпчески има близок однос и со оркестарските музичари. Тој низ пијаното охрабрувачки и’ се насмевна на главната виолончелистка, Ребека Гиливер, додека таа се подготвуваше да го свири солото што го започнува бавниот став и што таа го направи со чувство кое допира. Гиливер беше наградена и со продолжен бакнеж од Трпчески кога уметниците и’ се поклонуваа на публиката.
Не сум го слушнал овој концерт изведен со таква воодушевувачки експресивна широчина, откако Даниел Баренбоим го свиреше во истата сала под диригентската палка на Антонио Папано, кој сега ја презема улогата на главен диригент на ЛСО (Лондонскиот симфониски оркестар, н. заб.). Тоа беше пред 18 години.“ – поентира критичарот на лондонски „Стандард“, Бери Милингтон.

Кон првата концертна вечер на која екипата од соништата го изведе Првиот концерт за пијано и оркестар од Брамс, критичарот на ценетиот портал за класична музика „Бахтрек“, Рој Вестбрук, напиша:

Солистот Симон Трпчески покажа целосно владеење на пијанистичката делница, вешто снаоѓајќи се низ нејзината очигледно незгодна испишаност за тастатурата. Односот на пијаното со оркестарот се менува од утеха до конфронтација. Успеа и во двете, а посебно беше импресивен во првото... Адаџото беше благослов, соодветно затоа што ракописот е напишан Benedictus qui venit in nomine Domini. Без разлика дали се однесува на трагедијата на Роберт Шуман или не, тоа влијаеше врз пијанистот. Трпчески постави живо темпо во стартот на финалето, а еланот во неговото свирење и изведбата на Лондонскиот симфониски оркестар заработија искрени овации во преполната сала.

Трпчески му го посвети својот бис, Брамсовиот валцер, оп.39 бр.15, на диригентот, велејќи дека телефонскиот повик „пред осум или девет години“ од Нозеда, бил причина да го научи Првиот концерт за пијано на Брамс.“ – пишува Вестбрук.

Инаку, снимката од изведбата на Вториот концерт за пијано и оркестар со Трпчески, Нозеда и ЛСО ќе биде емитувана на Третата програма на Би-Би-Си на 19 февруари.

Во меѓувреме, по максималните 5 ѕвездички од критичарот на „Тајмс“, одлична рецензија на новиот албум за британска етикета „Лин Рекордс“ на кој Симон Трпчески е повторно обединет со романскиот диригент Кристијан Мачелару и Симфонискиот оркестар на WDR од Келн, Германија, во изведбата на двата концерта за пијано и оркестар од Јоханес Брамс, објави и врвниот светски авторитет за класична музика, магазинот „Грамофон“. Критичарот Роб Ковен истакнува дека за таков голем потфат е неопходен голем пијанист каков што несомнено е Трпчески:

„... Трпчески е намуртениот, изнемоштен аристократ, кој својата душа ја нуди до импресивен учинок“, алудирајќи на сложеноста на изведувачките барања поставени од композиторот Брамс.

Симон Трпчески концертната 2023 година ќе ја заокружи на 23 декември во познатата сала „Коларац“ во Белград каде што со Симфонискиот оркестар на Српската радио-телевизија под палката на шеф-диригентот Бојан Суѓиќ ќе го изведе Вториот концерт за пијано и оркестар од Сергеј Рахманинов.

The post Најугледните лондонски медиуми со одушевување пишуваат за концертите на Трпчески со Лондонскиот симфониски оркестар appeared first on Република.

Еден од најугледните светски медиуми, лондонски „Тајмс“ излезе со максимална оценка од пет  ѕвездички и блескава критика за двојниот албум на кој нашиот пијанист од светски глас Симон Трпчески е повторно обединет со романскиот диригент Кристијан Мачелару и Симфонискиот оркестар на Западногерманското радио од Келн, Германија, во изведбата на двата концерта за пијано и оркестар од Јоханес Брамс.

За албумот што деновиве го објави престижната британска етикета „Лин Рекордс“ , критичарот Џеф Браун со воодушевување пишува дека со него „класиката е блескаво освежена“ и подвлекува дека „Симон Трпчески може најпоетично да ги гали клавишите“:

Извонредната двојка се враќа! И тоа не се (композиторот и тенорот, наша заб.) Бритн и Пирс, ниту (комичното дуо, наша заб.) Морекамбе и Вајс. Не, тоа се македонскиот пијанист Симон Трпчески и романскиот диригент Кристијан Мачелару, кои претходниот пат нè воодушевија со двата концерта за пијано на Шостакович, а сега го прават истото со двата на Брамс. Секое од делата е репертоарски колос, иако со овие музичари и најзаморените слушатели мора да излезат не само освежени, туку и возбудени.

Нивниот успех се должи особено на две поврзани состојки. Една од нив е леснотијата на дуото во меѓусебната музичка придружба, од суштинско значење кога односот пијано-оркестар во овие дела е толку разновиден. Нивната сплотеност, исто така, има полза и од извонредно живописно и будно музицирање на WDR Симфонискиот оркестар од Келн. Втората, не толку тајна состојка, е вроденото разбирање на фразирањето и ритамот на централноевропската народна музика од страна на пијанистот и диригентот. Германецот Брамс го сакал унгарскиот ритам, но доминантното отскокнување на Трпчески и Мачелару се шири низ целите концерти, а не само низ нивните танцувачки финалиња.

И Трпчески најпоетично може да ги погали клавишите. Подоцнежниот, посончев концерт во Бе-дур му дава повеќе шанси отколку неговиот величествен и турбулентен претходник во Д-мол. Исто така, во вториот концерт, Мачелару и оркестарот навистина ги достигнаа височините, без разлика дали наголемо забрзуваат или нè маѓепсуваат со соло-делниците на хорна и виолончело, сите клучни делови од извонредно широката таписерија на музиката. Ова е вид на издание каде што победуваат сите: музичарите, слушателите и самиот Брамс. “ – поентира критичарот на „Тајмс“, Џеф Браун.

Новото издание на Трпчески е албум на неделата на познатото лондонско радио „Класик ФМ“.

„Оваа снимка на концертите за пијано на Брамс од Симон Трпчески и Кристијан Мечелару е едноставно божествена.“ - буквално одушевено извикува водителот на лондонското КЛАСИК ФМ РАДИО, Александер Армстронг, образложувајќи го изборот на изданието за албум на неделата.

Мачелару и Трпчески имаат извонредна историја на соработка и ако ја слушате текстурата на овој прекрасен Брамс... тоа значи дека пијаното и оркестарот се како едно. Балансот е сосема совршен, истакнува Армстронг.

The post Оценка од пет ѕвезди и блескава критика за новиот албум на Симон Трпчески од британски „Тајмс“ appeared first on Република.