На денешната седница на Владата на Република Македонија, министерот за европски прашања Орхан Муртезани, ги запозна членовите на Владата со користењето на средствата достапни преку Европската Унија, со фокус на користењето на ИПА II и ИПА III фондовите.

Министерот Муртезани презентираше  извештај за искористеноста на ИПА средствата, преку кој се демонстрира слабиот капацитет на институциите пред сѐ заради недостиг на квалитетни кадри. На Седницата беа разгледани можностите за подобрување на апцорпцискиот капацитет за користење на ИПА преку приоритетност на вработувањата во ИПА структурата.  Министерот Муртезани  предложи приоритизација на вработувањата во линиските министерства и тоа Министерството за финансии, Министерството за транспорт, Министерството за животна средина и просторно планирање, Министерството за економија и труд, Министерството за социјална политика, демографија и млади, но и јавните претпријатија кои ќе ги спроведуваат инфраструктурните проекти.

По разгледувањето на Информацијата и деталите во контекст на бавното спроведување и неискористените ИПА средства, како и стратешките мерки за јакнење на ИПА капацитетот преку нови вработувања и Политиката за задржување на кадарот во ИПА структурата, кои беа детално елаборирани на денешната прес-конференција на МЕП Муртезани, Владата ги задолжи релевантните Министерства за соодветно планирање и реализирање на вработувањата. Министерството за европски прашања е задолжено да го финализира текстот на Политиката за задржување на кадарот во ИПА структурите согласно насоките на Европската комисија, најдоцна до октомври 2024 година.

Муртезани претходно на прес конференција рече дека „ургентна“ е потребата од комплетирање на ИПА структурата, бидејќи, како што рече, постои значителен недостаток на доволен број, но и квалификуван персонал во националната ИПА структура, поради „високата флуктуација на обучени ИПА професионалци кои често се привлечени од приватниот сектор“.

– Ќе и предложам на Владата да се разгледаат плановите за вработувања во ИПА структурата, која оваа структура ги изработува согласно европските правила и добри практики и ќе предложам приоретизација на вработувањата на линиските министерства, како што се Финансии, Транспорт, Животна средина и просто планирање, Економија и труд, Министерството за социјална политика, демографија и млади, но и јавните претпријатија кои ќе спроведуваат инфраструктурни проекти, рече Муртезани.

Посочи дека земјава се соочува со неискористени ИПА средства на кои им истекува рокот за користење и истите се враќаат во Буџетот на Европската Унија, и затоа, вели, за справување со овој предизвик земјава ќе побара компаративни искуства од земји членки на Унијата, но и земји кандидати од регионот.

– Дополнително ќе побараме компаративни искуства од одредени земји членки на ЕУ и земји кандидати од регионот, за да научиме од нивниот успех во управувањето и имплементирањето на средствата од Европската Унија, односно да ги имплементираме најдобрите практики при овој сложен процес. Како заклучок, финансиската анализа за искористеноста на ИПА фондовите по години е крајно поразителна. Додека користиме средства од заеми, ни стојат неискористени десетици милиони евра за капитални инвестиции од еврофондовите, рече Муртезани.

Во изминатите две години, додаде, во буџетот на ЕУ биле вратени вкупно 79 милиони евра неискористени средства, а до крајот на оваа година, вели, постои опасност од губење на дополнителни 43 милиони евра.

– Во изминатите две години, покрај бавното спроведување, Македонија се соочи неискористени ИПА средства, на кои им истече рокот за користење и истите се вратени во буџетот на Европската унија. Така, на крајот од 2022 година и 2023 година, беа изгубени 24 милиони евра, односно 55 милиони евра, соответно во двете години, односно вкупно 79 милиони евра. Се проценува дека до крајот на 2024 постои опасност од губење на дополнителни 43 милиони евра од ИПА-2, рече Муртезани.

Прашан зошто Министерството се одлучува на ваков чекор, знаејќи дека Европската комисија во неколку наврати негативно ја нотира превработеноста во јавната администрација, Муртезани вели доколку не се зајакне инфраструктурата со професионални кадри, земјава само ќе има пристап до европските средства, но нема да може да ги апсорбира.

– Мислам дека недостигот на доволни професионални кадри во целата ИПА структура и во структурата на евроинтеграции е неколку пати негативно нотирана токму од Европската комисија. Тука не станува збор за дополнително преоптоварување на јавната администрација со старата пракса на политички кадри, меѓутоа професионални кадри коишто ќе овозможат искористување на европските фондови. Зошто? Бидејќи, како што јавноста е запознаена, ние сме во последна фаза на усвојување на реформската агенда со која што ќе добиеме дополнителен пристап до 750 милиони евра финансиски средства. Мојата досегашна перцепција од институцијата и целата структура е ако ние не ја појачаме инфраструктурата со професионални кадри само ќе добиеме пристап до тие финансиски средства, меѓутоа нема да можеме да ги апсорбираме сите, рече Муртезани.

Не сакаше да прецизира во кои структури на ИПА ќе бидат новите вработувања, ниту за колкав број станува збор. Вели ќе треба да се зајакне целата ИПА структура во сите министерства, како и во општините.

– Ќе треба да се појача целата ИПА структура во сите министерства, не само министерствата туку и во општините, бидејќи тоа што јас досега го имам како увид една од главните пречки е токму недостигот на професионален кадар којшто ќе ги спрема тендерите, ќе ги евалуира и ќе ги имплементира. Затоа сметам дека е неопходно да се појача целата инфраструктура за да може да се искористат целите фондови коишто ќе бидат на располагање, рече Муртезани.

The post Усвоена Информација на седницата на Владата за користењето на ИПА фондовите appeared first on Република.

Вицепремиерот Маричиќ на денешниот настан TAIEX Самит за пристап до правдата -современи достигнувања во дигитализацијата на правосудството се обрати преку видео порака истакнувајќи ја важноста на “Дигитализацијата на правосудството“ како тема која датира од неговиот претходен мандат во Владата, како министер за правда, започнувајќи го процесот на дигитализацијата на судскиот систем, во рамки на Стратегијата за реформа во правосудството 2017-2022, која продолжува и во периодот од 2023 до 2027 година.

„Со првите опремени судници и овозможувањето судења на далечина, создадовме услови за сите учесници во судските спорови да комуницираат дигитално.“

Во продолжение порача дека Владата останува цврсто на ставот дека дигитализацијата на судството и употребата на вештачка интелигенција во судскиот систем не е веќе прашање на избор, туку на неминовност.

„Определбата за дигитализација на правосудтвото е во согласност и со приоритетот на актуелното шпанско претседателство со Европската Унија, за сеопфатно заокружување на процесот на дигитализација и внимателната апликација на регулативата за вештачка интелигенција. Тоа се исклучително значајни алатки за комуникација помеѓу земјите-членки и на агенцијата ЕВРОПРАВДА на ЕУ за судска соработка во кривичните прашања“

За крај, Вицепремиерот Маричиќ истакна дека судските реформи мора да бидат во корист на граѓаните и дека неговите очекувања се фокусирани на интензивирање на реформите во правосудството, продолжување на соработката со ЕУ и со земјите членки на Унијата.

На настанот воведни обраќања имаа и заменичката министерка за правда, Викторија Аврамовска Мадиќ, шефот на мисијата на ОБСЕ, Килијан Вал, генералниот директор за дигитална трансформација на администрацијата на правдата, Министерство за правда, Шпанија - Аитор Кубо Контрерас, настанот за почеток го модерираше проф д-р и судија Лазар Нанев.

The post Маричиќ: Судските реформи преку дигитализацијата на правосудството мора да бидат во корист на граѓаните appeared first on Република.

Синоќа на трибината во Тетово, предводникот на кампањата Ние сме Европа, заменикот претседател на Владата за европски прашања Бојан Маричиќ ја истакна клучната улога на младите во креирањето европска иднина за Македонија.

„Токму заради младите, мораме да го направиме финалниот исчекор. Повикувам да ја потврдиме нашата мнозинска одлука за нашиот нов голем чекор за членство во Унијата, затоа што младите бараат да го фатиме чекорот со времето и да извлечеме максимум од шансата која пред нас ја создава геополитичкиот момент во кој се наоѓаме.

Младите луѓе, се тие кои во најголем број ја препознаат ЕУ како стабилен и посакуван партнер и за тоа државата, и сите ние, имаме обврска да им бидеме партнер во обезбедувањето перспектива и европска иднина“

„Инвестициите кои со членството во ЕУ ќе растат ќе значат нови работни места за младите. Поддршката на нови старт-ап бизниси и стратешки партнерства се отвораат како можности.

Патот на преговорите за членство во ЕУ со себе носи низа придобивки за младите како што се дополнителни мерки за мобилност. За размена на контакти, знаења и идеи на младите со нивните врсници од регионот и од ЕУ. “

Понатаму во своето обраќање Јетон Шаќири министерот за образование и наука истакна:

„Во сето ова што го направивме или го правиме, имаме поддршка од нашите надворешни партнери, особено од Европската унија чии фондови се достапни и за нас како држава, нормално со одредени ограничувања.

Сега, замислете како ќе биде кога ќе станеме дел од тоа семејство. Тогаш помошта и поддршката нема да ги имаат ограничувањата што денес постојат, така што развојот на државата ќе биде значително забрзан.

Но, за тоа е потребно национално единство. Потребно е политичко единство. Согласност од сите политички чинители, да ги направиме последните чекори до остварувањето на целта, а тоа се уставните измени како клучен услов за влез во ЕУ“

Министерот за информатичко општество Азир Алиу истакна:

„Работејќи како универзитетски професор ја имам таа чест да работам со младите и тие веруваат дека „Ние сме Европа“. Младите се чувствуваат како европјани, знаат неколку јазици, знаат да размислуваат критички и се креативни“

Понатаму додаде:

„Ние сме Европа дека имаме европски вредности огледувајќи се на познати ликови како Мајка Тереза, Ферид Мурати, пејачот Нацовски, имаме препознатливи ликови но не сме членка на ЕУ. За да бидеме членка на ЕУ потребно е да се инвестира во инфраструктурата заедно со поддршка на европски фондови, да создадеме сајбер инфраструктура, да создадеме екосистеми, спин оф и старт ап компании и потребно да создадеме услови за да нашите граѓани бидат во можност да создаваат во европски услови.

За крај Министерот додаде дека е потребно да се направи последниот чекор на одлука со цел да добиеме пристап до многу повеќе европски фондови кои ќе ни обезбедат европски услови за сите граѓани и за младите.

„До сега министерството за информатичко општество и администрација со европски фондови успева да реализира повеќе проекти кои го модернизираат општеството по европски терк.“

На трибината во Тетово учествуваа и амбасадорот на Република Италија и претставничката на невладиниот сектор Пранвера Касами од институтот за лидерство и јавна политика.

The post Кампањата Ние сме Европа од Тетово: Младите се прогресивната сила за европската иднина на државата appeared first on Република.

Вицепремиерот за европски прашања Бојан Маричиќ во Брисел оствари средба со Сајмон Мордју, советникот за надворешна политика на претседателот на Европскиот совет Шарл Мишел, на која разговараа за европската перспектива на Македонија и регионот, во услови на новата геополитичка реалност.

Имаме иста желба и цел, наскоро Cеверна Македонија да ја видиме во рамките на ЕУ. Вратата на ЕУ е отворена, задачите кои ги имаме мора да ги исполниме и да продолжиме со земјите кои преговаат со ЕУ на патот кон членство во Унијата, рече Маричиќ, пренесува Секретаријатот за европски прашања.

Соговорниците, стои во соопштението од СЕП, се согласија дека оваа година Македонија треба успешно да заврши дел од обврските кон ЕУ и да го отвори првиот кластер „Фундаментални вредности“.

Вицепремиерот и главен преговарач со ЕУ на состанокот посочил дека македонската Влада е свесна за предизвиците и дека е подготвена да работи на нивно надминување и на европските реформи.

Мордју, пак, навел дека постои позитивно расположение кај Европската Унија за проширување и дека тоа е шанса за регионот и Македонија сега да ја обезбеди очигледната европска перспектива, за што потребни се брзи резултати, а не само декларативна посветеност на европската интеграција.

Маричиќ и Мордју изразиле верување дека ќе се задржи динамиката на процесот на преговори со ЕУ и ќе добие континуитет, поради што вицепремиерот смета дека „на овој процес треба да гледаме како на одлична можност побрзо да ги совладаме европските правила кои ќе нè направат членка на ЕУ“.

Во рамки на својата работна посета во Брисел вицепремиерот Маричиќ и македонската делегација се сретнала и со вршителката на должност директор за Западен Балкан во Генералниот директорат за соседска политика и преговори за проширување на Европската Унија, Микела Матуела, со која одржале координативен состанок во врска со текот на преговарачкиот процес и идните чекори кои треба да се направат до завршувањето на скрининг процесот.

Маричиќ истакнал дека ја цениме поддршката од европските институции во процесот на преговори и дека силен фокус е ставен на следен напредок кон ЕУ, со верување дека како што вели тој „ќе успееме оваа година да отвориме важни политички поглавја“.

На средбата беше разговарано и за сеопфатните актуелни реформи што ги спроведува Македонија во областите како што се владеењето на правото, демократските институции и реформата на јавната администрација, информира СЕП.

The post Маричиќ: Да ги исполниме задачите и да продолжиме со земјите кои преговараат со ЕУ на патот кон членство appeared first on Република.

Вицепремиерот за евроинтеграции Бојан Маричиќ  ги потпиша договорите со седумте економски оператори кои се ангажирани дополнително да ги преведуваат актите на Европската унија на македонски јазик.

Досега преводите редовно ги извршуваше Секретаријатот за европски прашања, но по првата меѓувладина конференција на Македонија со ЕУ преку јавен повик се ангажирани уште седум фирми кои со своите преведувачи ќе треба да помогнат.

„Денешното официјализирање на соработката со економските оператори, во еден од клучните делови за нашата успешна евроинтеграција на земјата, а тоа е преводот на правните акти на Европската Унија, доаѓа во вистинско време кога ги отворивме преговорите со Унијата и кога мораме уште поинтензивно да работиме на усогласеноста на нашето националното законодавство со правото на ЕУ“, вели Маричиќ.

Според Маричиќ процесот на преведување на европското право на македонски јазик се одвива без прекин, бидејќи и по отворањето на преговорите со Унијата и отпочнувањето на скрининг процесот земјата паралелно мора да работи на усогласувањето на националното законодавство со правото на ЕУ.

„Успехот на скринингот и неговото времетраење во голема мера зависи од усогласувањето, односно процесот на преземање и примена на acquis. Овој услов за членство е идентичен за сите земји кандидатки, а произлегува од правниот систем на ЕУ, кој одредува дека сите официјални јазици на земјите-членки се и официјални јазици на Унијата и дека сите јазични верзии на правните акти се оригинални и еквивалентни“, рече Маричиќ.

Маричиќ истакна дека добар и квалитетен превод значи правилно транспонирање и имплементирање на законодавството на Европската Унија, а истовремено македонскиот јазик ќе ужива статус на еднаков и официјален јазик на Унијата кога нашата држава ќе стане нејзина полноправна членка.

Изминатата година, од страна на внатрешните ресурси со кои располага Секретаријатот за европски прашања, заедно со ангажираните надворешни лица, беа преведени, јазично ревидирани и лекторирани вкупно 17.322 страници, што претставува показател на една успешна приказна, која мора и треба да продолжи.

Оваа година СЕП склучи Рамковна спогодба со седум економски оператори за превод на европското законодавство, кои вкупно имаат 110 преведувачи и 35 лектори. Согласно оваа Рамковна спогодба ќе се врши превод од англиски и француски јазик на македонски јазик, истите текстови јазично ќе се ревидираат и лекторираат. Понатаму пакетите се испраќаат во СЕП и Секторот за подготовка на националната верзија на правото на ЕУ врши внатрешна контрола на доставените материјали. Оваа година има предвидено вкупно 20 милиони денари со ДДВ за усогласување хармонизација со европската правна рамка и се очекува превод, јазична ревизија и лектура на над 15 илјади авторски страници.

„Правото на ЕУ претставува инструмент за успешна интеграција, но неговото усвојување е услов, а не предмет на преговарање со Унијата. Оттука, преводот на правото на ЕУ претставува обврска која мора да биде извршена со највисок квалитет и да се одвива континуирано. Македонскиот јазик ќе ужива статус на еднаков и официјален јазик на Унијата кога државата ќе стане нејзина полноправна членка. Преводот на правните акти на ЕУ мора да соодветствува со стандардите на македонскиот јазик, а сепак да го одразува духот на евро-жаргонот, со што ќе се обезбеди збогатување, но и заштита на самиот јазик, а тоа бара интензивна работа, особено во годините што доаѓаат“, додаваат од СЕП.

The post Седум преведувачки фирми покрај СЕП ќе ги преведуваат актите на ЕУ appeared first on Република.