Премиерот на Канада, Џастин Трудо вчера се сретна со новоизбраниот американски претседател Доналд Трамп на неговиот имот во Флорида.

Средбата уследи неколку дена откако Трамп најави воведување царини за Канада поради проблеми на границата.

Трамп на 25 ноември се закани дека ќе воведе 25 проценти царина на увозот од Канада и Мексико ако Отава и Мексико Сити не ја засилат борбата против шверцот на дрога, посебно фенталинот и не ги запрат мигрантите кои влегуваат во САД.

Трудо претходно одржа состанок со премиерите на сите десет канадски покраини, со кои разговараше за односите со САД.

Канада е четврти најголем производител на нафта во светот и шести најголем производител на гас во светот. Огромното мнозинство енергетски производи се извезуваат во САД, а Трамп не прави исклучок за нив во својот план за воведување на царини.

The post Трамп се сретна со Трудо во Флорида appeared first on Република.

Трговскиот центар Парк Плаза Мол се евакуира, иако полицијата соопшти дека во моментов нема активно пукање.

Полицијата соопшти дека реагирала на „активен агресор“, кој не е уапсен.

Според првичните информации, две лица кои се познавале пукале меѓу себе во продавница. Во пукотницата имало најмалку тројца ранети, но не се во животна опасност, објави локалната НБЦ.

На терен се голем број полициски и итните служби.

🇺🇸 Police are responding to an 'active aggressor' incident at Park Plaza Mall, 600 W in Little Rock, Arkansas, according to local media.

There are confirmed reports of shots fired. pic.twitter.com/nlsC80r4xF

— The Global Beacon (@globalbeaconn) November 29, 2024

The post Пукотница во преполн трговски во САД на „црн петок“, најмалку тројца повредени appeared first on Република.

Портпаролката на новоизбраниот американски претседател Доналд Трамп и идната претставничка за медиуми на Белата куќа, Керолин Ливит, изјави дека сè уште не е донесена одлука за прашањето околу статусот на трансродовите лица во американската војска.

Ваквиот коментар, Ливит го даде одговарајќи на некои наводи дека овие луѓе би можеле да бидат отпуштени од војската.

Овие неименувани извори шпекулираат и немаат поим за што зборуваат. Ниту една политика нема да биде прогласена за официјална, освен ако не доаѓа директно од претседателот Трамп или од неговите овластени претставници на медиумите“, изјави Левит.

Непрофитната организација „Спарта Прајд“, која се залага за правата на трансродовите лица во војската, оваа недела за порталот „Милитари“ соопшти дека околу 15.000 трансродови припадници на војската се распоредени низ светот, вклучувајќи и борбени зони.

The post Портпаролката на Трамп негираше дека има одлука за отпуштање на трансродовите лица од армијата на САД appeared first on Република.

Новоизбраниот претседател на САД Доналд Трамп соопшти дека го назначил својот лојален соработник, поранешниот генерал Кит Келог, за пратеник за Украина и Русија.

Тој беше со мене од самиот почеток! Заедно ќе постигнеме мир преку сила и ќе ги направиме Америка и светот повторно безбедни, напиша Трамп во објавата на својата социјална мрежа „Трут“ (вистина).

Трамп многу ја критикуваше помошта од повеќе милијарди долари на САД за Украина и вети дека ќе ја реши војната меѓу Киев и Москва уште пред да положи заклетва за нов мандат во јануари, но никогаш не објасни како планира да го направи тоа.

Келог накратко го предводеше Националниот совет за безбедност во Белата куќа за време на првиот мандат на Трамп. Тој долго време беше главен воен советник на Трамп и служеше како советник за национална безбедност на поранешниот американски потпретседател Мајк Пенс.

Војната во Украина во февруари влегува во трета година.

The post Трамп назначи поранешен генерал и свој близок соработник, за пратеник за Украина и Русија appeared first on Република.

Овој Декември ќе започне есенско-зимската турнеја на Владимир Четкар во САД каде тој ќе се претстави со својата авторска музика во некој од најпрестижните американски музички клубови.

Набрзо Четкар патува за Њујорк каде на 6-ти Декември ќе одржи концерт во музичкиот клуб Chelsea Table and Stage. На 13-ти Декември турнејата продолжува во Детроит во џез клубот Aretha's Jazz Cafe at the Music Hall, а наредниот ден, 14-ти Декември тој ќе одржи концерт во BOP STOP во Кливленд.Нa 27-ми Декември Четкар ќе настапи во градот Колумбус во Natalie's Grandview а на 8-ми  Декември во Сан Франциско во џез клубот Black Cat.

Турнејата на Четкар ќе заврши во Чикаго на 10-ти Јануари со настап во Skadarliya.

Македонскиот композитор, аранжер, продуцент, гитарист и вокалист неодамна го издаде својот најнов авторски студиски албум 'Let Us Be' ексклузивно во Јапонија преку познатата Јапонска музичка куќа P-Vine Records и се здоби со извонредни критики и радио поддршка ширум Јапонија. За брзо овој албум ќе се издаде и надвор од Јапонија, насекаде во светот а паралелно со неговото издавањето ќе се издадат и ремикси од авторски композиции на Четкар сработени од светски познати ди-џеј продуценти.

Четкар е единствениот Македонски музички автор и изведувач кој својата  музика редовно ја издава и продава во Јапонија и Јужна Кореја преку некој од најголемите тамошни музички куќи.

The post Владимир Четкар со концерти во Њујорк, Детроит, Кливленд, Колумбус, Сан Франциско и Чикаго appeared first on Република.

Русија испрати автоматско предупредување до Соединетите Американски Држави за лансирањето на „оревокршачка“ 30 минути порано, бидејќи се работи за балистичка ракета, изјави на брифинг портпаролот на Кремљ, Дмитриј Песков.

- Постои руски национален центар за намалување на нуклеарните закани, кој работи во автоматски режим и е во постојана врска со истиот систем што постои во САД. Врз основа на тоа, 30 минути порано е испратено предупредување за лансирање преку овој систем, бидејќи се работи за проектил со краток и среден дострел - објасни Песков.

Тој додаде дека предупредувањето за неговото лансирање не е задолжително, бидејќи не е интерконтинентално, но сепак е балистичко и дека во тие случаи центарот работи во автоматски режим.

Портпаролот, исто така, нагласи дека Русија не е обврзана да испрати известување за такво лансирање.

Дополнително, Песков нагласи дека тестирањето на најновата руска суперсонична ракета ја покажа способноста на Москва да му одговори на Западот доколку продолжи да ја игнорира нејзината загриженост.

The post Песков: Русија испрати автоматско предупредување до САД за лансирањето на „оревокршачка“ 30 минути порано appeared first on Република.

САД ќе обезбедат нов пакет воена помош за Украина во вредност од 275 милиони долари, соопшти американското Министерство за одбрана.

Пакетот вклучува муниција за систем за ракетни фрлачи (ХИМАРС), кој има дострел од околу 80 километри. Во пакетот се вклучени и дронови, противтенковско оружје, артилериска муниција од 105 и 155 милиметри, соопшти Пентагон.

САД се најголемиот снабдувач на оружје за Украина. Според податоците на Пентагон, од февруари 2022 година во Украина испратена е воена помош со вкупна вредност од над 60,4 милијарди долари.

The post САД со нова воена помош за Украина во висина од 275 милиони долари appeared first on Република.

Вашингтон денеска и порача на Турција дека како нивен сојузник оваа земја не треба да биде домаќин на лидерите на палестинската организација Хамас.

Во врска со тврдењето дека некои лидери на Хамас се преселиле од Катар во Турција, портпаролот на Стејт департментот, Метју Милер, рече дека одредени лидери на оваа организација се под обвиненија од САД, поради што треба да бидат екстрадирани во САД.

-Ние мислиме дека лидерите на оваа сурова терористичка организација не треба да живеат удобно никаде, што секако го вклучува и големиот град на еден од нашите клучни сојузници и партнери, рече Милер.

Анкара ги отфрла тврдењата дека Хамас го преселил своето политичко седиште во Турција, но наведува дека членовите на организацијата понекогаш ја посетуваат.

Хамас соопшти дека тоа се гласини кои Израел понекогаш ги шири, пренесуваат британските медиуми.

The post САД ја предупредија Турција да не им биде домаќин на лидерите на Хамас appeared first on Република.

Илон Маск, кој се промовира во еден од најблиските соработници на одновоизбраниот американски претседател Доналд Трамп, и официјално ја поддржа номинацијата на Хауард Лутник за нов секретар за финансии. Се работи за една од најважните 2-3 позиции во американската влада, а Трамп сѐ уште нема формално најавено кој е неговиот фаворит за ова место.

Во трката за позицијата секретар за финансии во моментов се Лутник, кој е еден од шефовите на транзицискиот тим на Трамп каде се распределуваат кадровските решенија на новата администрација, и инвеститорот Скот Бесент. Илон Маск лично и јавно се вклучи во оваа дискусија со порака на неговата мрежа Х.

- Моето мислење, колку и да вреди тоа, е дека Бесент ќе биде избор со кој работите ќе продолжат како до сега. Од друга страна, од Хауард Лутник можеме да очекуваме вистински промени. Работењето како до сега ја банкротираше Америка. Мораме да ги смениме работите, напиша Маск, по што размени и неколку твитер пораки во поддршка на овој предлог и со основачот на Рамбл Крис Павловски.

Courage during tough times is a great virtue https://t.co/4kVCwdiOi8

— Elon Musk (@elonmusk) November 16, 2024

Лутник и Павловски ја посетија Македонија во јули, при што имаа интензивни средби со премиерот Христијан Мицкоски и македонската влада. По средбите, Мицкоски соопшти дека разговарал за повеќе развојни проекти од кои Македонија може да има голема полза.

The post Илон Маск го поддржа Хауард Лутник за секретар за финансии appeared first on Република.

Австралискиот премиер, Ентони Албанезе, изјави дека неговиот однос со новоизбраниот американски претседател Доналд Трамп имал „многу добар“ старт и го раскажа телефонскиот разговор што го имал со републиканскиот лидер по неговата победа на претседателските избори во САД.

Албанезе изјави дека му рекол на Трамп оти САД имаат трговски суфицит со Австралија и дека е во интерес на Вашингтон да „тргува праведно“ со својот сојузник.

За време на неговиот прв претседателски мандат, Трамп не воведе царини за увоз на челик и алуминиум од Австралија.

Албанезе изјави дека неговиот телефонски разговор со реизбраниот претседател од Републиканската партија на САД бил „многу добар почеток“ на билатералните односи.

Разговаравме 10 минути и тоа беше еден од првите телефонски повици што ги имаше“, рече шефот на централно-левичарската лабуристичка влада на Австралија.

Трамп и Албанезе, исто така, разговарале за безбедносните врски, вклучувајќи го и пактот АУКУС, според кој Австралија ќе купува американски нуклеарни подморници во текот на следната деценија и ќе развие нова класа нуклеарни подморници заедно со САД и Велика Британија.

Австралиската министерка за надворешни работи Пени Вонг овој месец изјави дека Канбера е уверена во својот сојуз со Вашингтон, нејзиниот најголем безбедносен партнер.

The post Премиерот на Австралија: Односите со Трамп имаат многу добар почеток appeared first on Република.

Новоизбраниот претседател на САД, Доналд Трамп, најави дека за секретар за енергетика ќе го номинира Крис Рајт, извршен директор на нафтената компанија „Либерти енерџи“.

Рајт е основач и извршен директор на „Либерти енерџи“ со седиште во Денвер, главен давател на енергетски услуги во Cеверна Америка. Се очекува Рајт да го поддржи планот на Трамп да го максимизира производството на нафта и гас, како и да најде начини за зголемување на производството на електрична енергија.

Рајт веројатно ќе го следи и ставот на Трамп против глобалната соработка во борбата против климатските промени.

Рајт ги критикуваше еколошките активисти за создавање непотребна вознемиреност меѓу луѓето и ги спореди напорите на демократите да се борат против глобалното затоплување со комунизмот од советски стил.

Не постои такво нешто како климатска криза и не сме среде енергетска транзиција“, рече Рајт во видеото објавено минатата година.

Рајт стана на насловните страници во 2019 година кога испи течност за фракинг пред камерата за да докаже дека не е опасно.

За време на администрацијата на Бајден, производството на нафта во САД достигна највисоко ниво во историјата на земјата, потсетува Ројтерс, додавајќи дека не е сигурно до кој степен Рајт и идната администрација на Трамп ќе можат да го надминат овој обем. Повеќето одлуки за дупчење ги носат приватни компании кои работат на земјиште кое не е во сопственост на федералната влада, забележа агенцијата.

Американското Министерство за енергетика е задолжено за енергетската дипломатија и го надгледува Стратешкиот нафтен резерват, кој Трамп рече дека сака да го надополни. Покрај тоа, одделот има програми за грантови и заеми за развој на енергетската технологија.

Секретарот за енергетика го надгледува и американскиот комплекс за нуклеарно оружје, нуклеарниот отпад и 17 национални лаборатории.

Доколку Сенатот го потврди Рајт за министер за енергетика, тој ќе ја преземе функцијата од Џенифер Гранхолм, поддржувач на електричните автомобили, новите извори на енергија како што се геотермалната енергија и ветерот, соларната и нуклеарната енергија.

Рајт, исто така, најверојатно ќе биде вклучен во издавањето дозволи за пренос и проширувањето на нуклеарната енергија, која ужива поддршка и кај републиканците и кај демократите.

Побарувачката на електрична енергија во САД се зголеми за прв пат по две децении. Ова се должи на многуте случувања во областите како што се вештачката интелигенција, електричните возила и криптовалутите.

The post Трамп го номинираше шефот на нафтената компанија „Либерти енерџи“, Крис Рајт за секретар за енергетика appeared first on Република.

Кинескиот претседател Си Џинпинг, во неговиот последен разговор со Џо Бајден, кој се повлекува од Белата куќа за два месеци, вети дека ќе работи со владата на новоизбраниот американски претседател Доналд Трамп.

Двајцата лидери се состанаа во Лима на маргините на самитот на Азиско-пацифичката економска соработка (APEC) и разговараа за голем број прашања што предизвикуваат тензии, како што се кибер криминалот, трговијата, односите со Тајван и Русија, меѓу другото. Бајден и Си не разговарале од април.

Целта на Кина за стабилни, здрави и одржливи кинеско-американски односи останува непроменета по изборите. Кина е подготвена да работи со новата американска влада за да ја одржи комуникацијата, да ја прошири соработката и да ги контролира разликите“, рече Си, признавајќи ги „подемите и падовите“ во билатералните врски.

Си рече дека двете земји треба „да продолжат да го истражуваат вистинскиот пат“ за да се постигне договор и „да постигнат долгорочен мирен соживот“.

Бајден, од своја страна, му рекол на својот кинески колега дека иако не секогаш се согласуваат, разговорите меѓу двајцата секогаш биле „искрени“.

Трамп, кој ќе ја преземе функцијата на 20 јануари, вети дека ќе воведе вкупно 60 отсто царини за кинеските стоки увезени во САД. Пекинг се спротивстави на ваквите мерки. Покрај тоа, новоизбраниот претседател од Републиканската партија номинираше политичари познати по нивните тврдокорни позиции за Кина на највисоки владини функции. Меѓу нив се и сенаторот Марко Рубио и Мајк Волц, член на Претставничкиот дом од Флорида, кој беше номиниран за советник за национална безбедност во Белата куќа.

Во текот на неговата администрација, Бајден се обидуваше да ги намали тензиите со Кина, но Вашингтон неодамна беше налутен од хакерскиот напад поврзан со Кина врз телефонските комуникации на американските владини претставници и предизборниот штаб. Покрај тоа, САД се загрижени поради зголемениот притисок на Пекинг врз Тајван и неговата поддршка за Русија, додава Ројтерс.

Тајванскиот претседател Вилијам Лаи планира да ја посети американската држава Хаваи и можеби Гуам во наредните недели, а посетата сигурно ќе предизвика незадоволство во Пекинг. Исто така, претходно вчера, претставникот на Тајван на самитот АТИС разговараше со Бајден и го покани да го посети островот во блиска иднина.

Кина го смета демократски управуваниот Тајван за своја територија. САД се најважниот меѓународен поддржувач и снабдувач на оружје на Тајван.

The post Си му вети на Бајден дека ќе работи со владата на Трамп appeared first on Република.

Русија, која е најголемиот светски снабдувач на збогатен ураниум, објави дека воведува привремени ограничувања на извозот на збогатен ураниум во САД, симболичен потег откако САД го забранија увозот на руски ураниум.

Русија поседува околу 44 отсто од светскиот капацитет за збогатување ураниум, а околу 35 отсто од увезеното нуклеарно гориво за САД доаѓа од Русија, според американската Агенција за нуклеарна енергија.

Меѓутоа, во мај, американскиот претседател Џо Бајден потпиша закон за забрана за увоз на руски збогатен ураниум, иако САД имаат можност да спроведат ослободување доколку има загриженост за снабдување.

The post Русија воведе привремени ограничувања за извозот на збогатен ураниум во САД appeared first on Република.

Ева Лонгорија објави дека го преселила своето семејство во Мексико и Шпанија, опишувајќи ги САД како „дистопија“.

Популарната латиноамериканска актерка како причини за нејзиниот потег ги наведе зголемениот број бездомници, високите даноци и неодамнешните изборни резултати, велејќи дека атмосферата во САД драстично се променила дури и пред Ковид кризата.

Размислувајќи за привилегии, таа коментира дека „Повеќето Американци не се толку среќни да живеат како таа“.

Сега живеејќи со нејзиниот сопруг Хозе Бастон и синот Сантијаго, Лонгорија изрази загриженост за оние кои се „заглавени“ во САД.

Ева не планира да се врати во Л.А.

https://republika.mk/vesti/svet/objaven-prirachnik-za-onie-shto-sakaat-da-gi-napushtat-sad-po-pobedata-na-tramp/

The post Ева Лонгорија ги напушти САД по победата на Доналд Трамп appeared first on Република.

Доналд Трамп ја назначи Елиза Штефаник на местото амбасадор на САД во ОН. Оваа вест предизвика голем интерес бидејќи се работи за една од клучните позиции во спроведувањето на американската надворешна политика.

Презимето Штефаник, Елиза го наследи од татко и, кој е Чех, додека нејзината мајка е Италијанка. Таа е католик.

Елиза Штефаник стана пратеник во 2014 година на 30-годишна возраст, со што стана најмладата жена некогаш избрана во Конгресот. Шест години подоцна, Штефаник го поддржа Трамп во неговиот обид да ги ревидира изборните резултати, а особено таа гласаше против потврдувањето на резултатите од изборите во Пенсилванија.

Нејзините напори беа наградени и во мај 2021 година ја замени Лиз Чејни како претседавач со републиканската конференција на Претставничкиот Дом. Ова е четврто најважно место во партиската хиерархија во ова тело.

Американските медиуми често пишуваат дека Стефаник како пратеник од умерен конзервативец се претворил во екстремен. Сепак, овие медиуми имаат тенденција да го мерат конзервативизмот само со придржување кон Трамп. Штефаник, на пример, беше меѓу ретките републиканци во 2022 година кои гласаа за правата на истополовите бракови на федерално ниво, иако Конференцијата на католичките бискупи на САД се спротивстави на тоа.

Во февруари 2022 година, таа, како и многу други, објави изјава за поддршка на Киев, нарекувајќи го Путин криминалец. Но, во април 2024 година, Штефаник беше единствениот претставник на републиканското раководство на Претставничкиот дом кој не поддржа предлог-закон за помош на Украина, што предизвика негативни коментари во либералниот печат.

The post Како член на Конгресот гласаше против помошта за Украина: Трамп ја назначи Елиза Штефаник за амбасадор на САД во ОН appeared first on Република.

Елизабет Пипко се наведува како име коешто може да стане прес-секретар во Белата куќа под администрацијата на новоизбраниот американски претседател Доналд Трамп.

Пипко, внука на советско-американскиот уметник Марк Клионски, претходно беше портпаролка на Републиканската партија.

Семејството на Елизабета се преселило во САД од Минск, од тогашниот Советски Сојуз.

Таа стана позната во јавноста и по појавувањата на страниците на неколку модни магазини.

The post Семејството и се преселило во САД од Белорусија: Елизабет Пипко ќе биде нова портпаролка на Белата куќа?! appeared first on Република.

Половина од сите американски држави, поточно 25 од нив, носат имиња на Индијанци.

Ова се тие 25 држави и значењата на нивните имиња.

1. Алабама: Именуванa по племето Алабама или Алибаму, племе што зборува мускогејски. Изворите се поделени помеѓу значењата „расчистувачи на шипражјето“ или „собирачи на тревки“.

2. Алјаска: Именувана по алеутскиот збор „alaxsxaq“, што значи „копното“

3. Аризона: Именувана по зборот Оодам „alĭ ṣonak“, што значи „мал извор“

4. Конектикат: Именуван по мохиканскиот збор „quonehtacut“, што значи „место на реката со долга плима“

5. Хаваи: Оригинален збор на хавајски јазик што значи „татковина“

6. Илиноис: Именуван по зборот од јазикот на племето Илиноис „illiniwek“, што значи „мажи“

7. Ајова: Именувана по племето Ајвеј, чие име значи „сив снег“

8. Канзас: Именуван по племето Канза, чие име значи „луѓе од јужен ветер“

9. Кентаки: Потеклото е нејасно, можеби е именувано по ирокејскиот збор „Кентаке“, што значи „на ливадата“

10. Масачусетс: Именуван по алгонкинскиот збор „Massadchu-es-et“, што значи „голем рид - мало место“.

11. Мичиген: Од зборот Чипева „Мичигама“, што значи „големо езеро“

12. Минесота: Именуван по индискиот збор во Дакота „Минисота“ што значи „бела вода“.

13. Мисисипи: Именуван по реката која го добила името Чокто, што значи „Голема вода“ или „Татко на водите“.

14. Мисури: Именуван по племето Мисури чие име значи „оние кои имаат кануа издлабени од дрво“

15. Небраска: Именувана по зборот од јазикот Отое „Нибраска“, што значи „рамна вода“, референца за реката Плате.

16. Ново Мексико: Иако под влијание на шпанските конвенции за именување, државата е именувана по народот Мексика, домородна група во Мексико.

17. Cеверна Дакота: Потекнува од племето Дакота Сиукс, со „Дакота“ што значи „сојузници“ или „пријатели“.

18. Охајо: Именуван по ирокејскиот збор „охи-јо“, што значи „голема река“.

19. Оклахома: од зборовите Choctaw „okla“ и „humma“, што значи „црвени луѓе“.

20. Орегон: Потеклото на името на Орегон е спорно, но една теорија сугерира дека доаѓа од домородниот американски збор „олиган“, што се однесува на риба пронајдена во реката Колумбија.

21. Јужна Дакота: Како Cеверна Дакота, именувана по племето Дакота Сиукс, што значи „сојузници“ или „пријатели“.

22. Тенеси: Се верува дека е именувано по чирокиското село „Танаси“ или „Танаски“.

23. Тексас: Именуван по зборот Кадо „тајша“, што значи „пријатели“ или „сојузници“.

24. Јута: Именувана по племето Уте, чие име значи „луѓе од планините“.

25. Висконсин: Именуван по зборот на Мајами „meskonsing“, што значи „лежи целиот црвен“, што е упатување на црвениот песочник на реката Висконсин.

Извор: Фејзбук Wisp 

The post Половина од државите во САД носат индијански имиња appeared first on Република.

„Вашингтон пост“ објави прирачник за оние кои сакаат да ја напуштат земјата по победата на Доналд Трамп.

Според шефот на компанијата „Експати“, која е специјализирана за помагање на луѓето кои живеат во странство, откако Трамп победи на изборите, посетите на страницата го урнале месечниот рекорд и за само неколку дена достигнале повеќемесечен интерес.

Најпопуларните дестинации се Канада, Велика Британија, Австралија, Нов Зеланд и Ирска. Односно, тоа се земји каде што официјален јазик е англискиот.

Во написот се нагласува дека, сепак, да се стане емигрант може да биде тешко и скапо.

Понудена е и опцијата за јахта која за „бегалците“ од Трамп е многу поегзотична. Тоа е можноста за четиригодишно крстарење низ светот за оние кои сакаат да ги напуштат САД за време на претседателствувањето на Доналд Трамп. Кабина на бродот за крстарење „Villa Vie Odyssey“ ќе чини најмалку 266 илјади долари.

Се наведува дека незадоволните од Трамп за време на крстарењето ќе можат да посетат 140 земји.

Не е прецизирано дали крузерот ќе се врати во САД ако, на пример, Џеј Ди Венс победи на следните избори.

The post Објавен прирачник за оние што сакаат да ги напуштат САД по победата на Трамп appeared first on Република.

Соединетите Американски Држави (САД) денеска отворија нова база за противвоздушна одбрана во cеверна Полска, што претседателот на таа земја ја оцени како доказ дека Полска е безбедна како членка на НАТО, дури и додека Русија води војна во соседна Украина.

САД се гарант за безбедноста на Полска“, изјави полскиот претседател Анджеј Дуда.

Тој додаде дека постојаното присуство на американските сили во базата покажува дека Полска, комунистичка држава до 1989 година, „не е во руската сфера на влијание“.

Базата, која се градеше уште од 2000-тите, е сместена во градот Реџиково во близина на балтичкиот брег, кој се наоѓа на околу 100 километри од руската граница.

Официјален Кремљ ја нарече базата обид придвижување на американската воена инфраструктура поблиску до нејзините граници.

Американската база во Реџиково е дел од поширокиот антибалистички ракетен штит на НАТО, копнена верзија на американскиот противракетен одбранбен систем Ејџис, за кој Алијансата тврди дека може да пресретне балистички ракети со краток и среден дострел.

Уште во 2007 година, додека проектот беше во фаза на планирање, официјална Москва ја означи оваа база како закана. НАТО тврди дека штитот има чисто одбранбен карактер.

The post САД отвори нова ракетна база во Полска на 100 километри од руската граница appeared first on Република.

Претседателот на САД Џо Бајден денеска му порача на новоизбраниот претседател Доналд Трамп дека со нетрпение очекува „мирна транзиција“ во јануари, додавајќи дека ќе се погрижи неговиот претходник и наследник да биде соодветно прифатен при повторното преземање на Белата куќа во јануари.

Па, г-дине избран претседател, поранешен претседател, Доналд. Честитки, рече Бајден додека Трамп седеше до него пред камин во Овалната канцеларија.

Бајден му рече „добредојде назад“ на Трамп, по што двајцата се ракуваа.

Политиката е тешка и често не е многу пријатен свет, но денеска е убав свет и многу го ценам тоа“, одговори Трамп.

Нивната средба потоа продолжи зад затворени врати.

Последен пат кога Трамп беше во Овалната канцеларија, напиша двостранично писмо за Бајден и го остави во фиока во работното биро.

Тој денеска повторно се врати во Белата куќа, но под значително променети околности, уживајќи во своето враќање на власт.

Претходно денеска, Трамп се обрати пред Конференцијата на републиканците во Претставничкиот дом, фалејќи ги своите постигнувања на изборите и нарекувајќи го собирот „многу убав.“

Членовите почнаа да аплаудираат и сите станаа кога Трамп влезе. Спикерот на Претставничкиот дом, Мајк Џонсон, ја пушти музиката за негово влегување. Илон Маск влезе по Трамп, помина преку подиумот и беше придружен до седиште во првиот ред.

Не е ли убаво да се победи? Убаво е да се победи. Секогаш е убаво да се победи. Многу добри пријатели во оваа просторија, рече тој.

Додека новинарите заминуваа, Трамп се пошегува.

Мислам дека нема повторно да се кандидирам, освен ако не кажете, ‘Тој е толку добар, мора да смислиме нешто друг“, изјави Трамп.

Оваа забелешка предизвика смеа низ салата.

Луѓето што сега заминуваат ќе пишуваат дека јас го кажав тоа“, додаде Трамп.

The post Трамп и Бајден се сретнаа во Овалната соба: Претседателот во заминување очекува „мирна транзиција“ appeared first on Република.