Пролетните проекции за инфлацијата во земјава на Меѓународниот монетарен фонд се слични со есенските очекувања на Народната банка, дека инфлацијата ќе се намалува и годинава за околу 4% и за околу 2% догодина, во просек. Трендовите се поволни и доколку инфлацијата и натаму се намалува во согласност со проекциите, без да се остварат позначителни ризици, тоа ќе создаде простор за промена на монетарната политика во втората половина од оваа година, истакна гувернерката на Народната банка, Анита Ангеловска-Бежоска во интервју за Гласот на Америка, коешто го даде за време на Пролетните средби на Меѓународниот монетарен фонд и Светската банка.

Говорејќи за економскиот раст, таа укажа дека со оглед на големата трговска и финансиска отвореност на нашата економија, изгледите за растот годинава и догодина, покрај од домашните фактори, во голема мера ќе зависат и од глобалните случувања. Според најновите проекции на ММФ, глобалната економија и натаму би растела со стабилна стапка од 3,2% во 2024 и во 2025 година, што сепак е малку подобро од претходните очекувања. Низ подолгорочна перспектива, овие стапки на економски раст се историски ниски, што говори дека кризите оставија подолгорочни последици врз глобалната економија. За ЕУ, којашто е нашата најзначајна економска партнерка, се очекува постепено забрзување на растот, односно од 0,5% во 2023 година на 0,9% и на 1,7% за годинава и за следната, но тоа сепак е побавно во однос на претходните очекувања. За македонската економија, ММФ направи надолна ревизија за годинава, односно 2,7% во споредба со претходните очекувања од 3,2%.

Гувернерката посочи дека Народната банка работи на пролетните макроекономски проекции за нашата економија, во кои ќе бидат вклучени најновите расположливи податоци. Пролетните проекции на Народната банка ќе бидат објавени во текот на следниот месец.

Во интервјуто, гувернерката се осврна и на постојаните напори на Народната банка за јакнење на транспарентноста, што беше препознаено и од испитаниците на анкетата спроведена од Светската банка, кои ја препознаа Народната банка како домашна институција со најголема доверба. Гувернерката говореше и за значењето на поддршката за женското претприемаштво, коешто може да придонесе за подигање на економскиот раст. За таа цел се и активностите на Народната банка со новиот Меморандум за поддршка на женското претприемаштво, којшто неодамна го склучи со ЕБРД. Со овој проект, Народната банка го проширува опфатот на своите активности во овој домен и како предводник на проектот, ќе работи заедно со јавниот и со приватниот сектор за зголемување на финансиската вклученост на жените, што ќе придонесе за отворање нови бизниси и работни места и за придвижување на економскиот раст.

The post Ангеловска-Бежоска: Доколку не се остварат ризиците, олабавување на монетарната политика ќе има во втората половина од годинава appeared first on Република.

Во светот ќе доминират три војни оваа година – Русија против Украина, сега веќе трета година, Израел против Хамас, сега во третиот месец, и САД против самите себе, конфликт подготвен да започне во секој момент, според годишниот извештај на консултантска компанија за политички ризик Eurasia group.

Претседателските избори во САД ќе претставуваат најголем политички ризик за светот во 2024 година, без разлика кој ќе победи, а институциите на најмоќната демократија сигурно ќе ги трпат последиците, објави групата Евроазија, наведувајќи дека изборите на 5 ноември ќе ја тестираат американската демократија на ниво што нацијата не го доживеала 150 години, мислејќи на граѓанска војна во земјата, објави Гласот на Америка.

Со исходот од гласањето во суштина фрлање паричка, барем засега, единствената сигурност е континуираната штета на општественото битие на Америка, политичките институции и меѓународната положба“, се вели во извештајот.

Се додава дека ако републиканскиот фаворит Доналд Трамп повторно загуби од претседателот Џозеф Бајден, магнатот со недвижности веројатно повторно ќе се соочи со обвинувања за масовна измама и ќе поттикне тешка кампања на заплашување против изборните службеници.

Групата Евроазија го рангираше насилството на Блискиот Исток како втор најголем глобален ризик, а војната меѓу Израел и Хамас веројатно ќе биде само првата фаза во поширокиот конфликт во 2024 година. Групата проценува дека се влошува.

Третиот најголем ризик ќе биде Украина, а во извештајот се наведува истата прогноза како и за Блискиот исток: се влошува.

Групата Евроазија укажува дека оваа година Украина ќе изгуби значителен меѓународен интерес и поддршка, а особено за САД – таа стана далеку втор и сè по трет или помал приоритет и покрај стотиците илјади жртви, милиони раселени и убиени луѓе.

Други ризици вклучуваат вештачка интелигенција и бавноста со која владите ширум светот не успеваат да го регулираат развојот на ВИ.

Алијансата и меѓусебната поддршка на Русија, Иран и Северна Кореја се исто така високи на списокот со ризици. Веднаш зад неа е Кина, како и нејзината економија.

The post Што го очекува светот во 2024 година? Три војни ќе доминираат, една допрва се очекува appeared first on Република.