Македонија, земја без излез на море во Југоисточна Европа е вистински скриен скапоцен камен кој изобилува со пејзажи што го одземаат здивот, богата историја и живописно културно наследство.

Вака американската телевизија ЦНБЦ ја почнува својата репортажа за Македонија. Во репортажата, се опишани неколку места во Македонија, за коишто се вели дека мора да се посетат при туристичка посета.

Во продолжение репортажата на ЦНБЦ.

„Сместена во срцето на Балканот, Македонија често останува неоткриена од туристите, засенета од нејзините поистакнати соседи. Но, не дозволувајте нејзината скромна големина да ве измами - овој скриен скапоцен камен изобилува со пејзажи што го одземаат здивот, богата историја и живописно културно наследство. Ајде да тргнеме на патување за да истражиме некои од најкул нештата што може да се направат во Македонија, дестинација за патување со неверојатна патека која ветува незаборавни искуства.

Охрид: Светско наследство на УНЕСКО

Нашата прва станица не води во волшебниот град Охрид, место на светско наследство на УНЕСКО. Поставен на позадината на Охридското Езеро, едно од најстарите и најдлабоките езера во Европа, Охрид зрачи со шарм на секој агол. Изгубете се во тесните улички на стариот град, каде историјата оживува со калдрмата и средновековната архитектура. Откријте ја црквата Света Софија, симбол на духовното значење на градот и одушевете се пред манастирот Плаошник, доказ за богатото културно наследство на регионот.

Откопување на антички богатства во Хераклеја Линкестис

Следно, одиме во близина на градот Битола да ги истражиме интригантните урнатини на Хераклеа Линкестис. Чекорете назад во времето додека талкате низ остатоците од овој антички град, основан во 4 век п.н.е. Восхитувајте се на извонредно зачуваниот амфитеатар, каде што некогаш се собирале луѓето за забава и шетајте меѓу остатоците од храмовите и бањите. Хераклеја Линкестис нуди волшебен поглед во минатото, оставајќи ги посетителите во стравопочит од архитектонската моќ на античкиот свет.

Авантурата ве чека во Националниот парк Маврово

Вљубениците во природата и авантуристите на отворено ќе најдат утеха во живописните предели на Националниот парк Маврово. Вистински рај од планини, езера и шуми, овој парк о одзема здивот и нуди изобилство од пешачки патеки погодни за сите нивоа на вештини. Потопете се во спокојството на природата додека поминувате по добро обележаните патеки, наситувајќи се со прекрасните глетки по патот. Без разлика дали барате лежерна прошетка или предизвикувачка експедиција, Националниот парк Маврово сигурно ќе го плени вашиот авантуристички дух.

Откривање на тврдината Кале во Скопје

Ниту една посета на Македонија не би била целосна без истражување на главниот град Скопје. А сместена на врвот на еден рид, со поглед на градскиот пејзаж, се наоѓа прекрасната тврдина Кале. Датира од 6 век, ова историско упориште е сведок на текот на времето и на одливот и текот на историјата. Почнете патување низ вековите додека талкате по неговите ѕидини, восхитувајте се на античката архитектура и уживајте во панорамскиот поглед на Скопје долу. Тврдината Кале е симболична знаменитост што ја обединува суштината на минатото и сегашноста на Македонија.

Уживајте во кујната на Македонија

Ниту едно патувачко искуство не е целосно без уживање во локалната кујна, а кулинарските задоволства во Македонија сигурно ќе ги привлечат вашите вкусови. Спој на турски, грчки и балкански влијанија, гастрономијата на земјата нуди прекрасен спектар на вкусови. Искусете го прекрасното тавче гравче, традиционално јадење со грав зготвен до совршенство во глинен сад. Почестете се со сладок и солен бурек, популарно пециво кое ќе ве остави да копнеете за повеќе. И не пропуштајте го ајварот, вкусен намаз направен од печени црвени пиперки и модар патлиџан - вистинско кулинарско уживање“.

The post Откривање на Македонија: Скриен скапоцен камен на Балканот appeared first on Република.

Специјализираната интернет-страница за патувања и туристички доживувања „Travel off path“, една од најреномираните на северноамериканскиот континент, објави текст посветен на Охрид и на Охридското Езеро. Во неа посетата на Охрид е посочена како неверојатно искуство, „патување што нуди чисто блаженство и спокојство…“

(Travel off path)

Овој мал град во Европа е најмирното место што може да се замисли

На само 30 минути возење веднаш до границата со Албанија се наоѓа спокојниот крајезерски град во Македонија. Овој мал град со 40 илјади е прекрасна, драгоцена тајна за жителите од регионот, независно дали доаѓаат само на викенд или да го направат тука своето летно бегство.

За останатите од целиот свет, тоа место високо би било рангирано на листата како дестинација за нивниот следен одмор или место од соништата за пензионерските денови, само доколку би знаеле дека ова место постои.

Добредојдовте во Охрид!

Охридското Езеро е едно од најголемите и најдлабоките слатководни езера во Европа. Поточно, тоа е поделено меѓу две земји, Албанија и Македонија (попозната како Македонија). Езерото изгледа неверојатно чисто, независно од кој страна се погледне. Но, малиот град Охрид на источната страна од езерото е местото за најдобро искуство. Оние кои ќе се решат да го посетат нема да бидат разочарани!

Повеќе авиокомпании веќе имаат свои летови, како до Тирана така и до Охрид, што го прави мошне попристапен отколку што беше порано. Овој шармантен град е всушност само два часа патување од главниот град на Албанија, споредбено со четирите часа патување од главниот град на сопствената земја – Скопје.

Историскиот град Охрид

Охрид, дел од светското наследство на УНЕСКО, е мешавина од старото и новото, како и многу други европски градови. Стариот град е местото каде што туристите ќе го откријат чукањето на срцето на Охрид.

Улиците и сокаците со калдрма го испресекуваат цик-цак центарот на градот, исполнети претежно со локални жители кои одат на прошетка или со дигитални номади со нивните лаптопи, испоседнати терасите од кафулињата. Македонците го живеат животот во бавно темпо, тука тоа е лесно забележливо. Сакате кафе, на пример? Можеби ќе треба да почекате вашиот келнер прво да ја заврши утринската цигара пред да ја прими вашата нарачка. Ви треба возење со такси? Можеби вашиот возач сè уште не завршил со читање на весникот… Точно така, весник!

Бројни ресторани во Стариот град нудат свежа риба директно од езерото и евтини локални пијалоци. Повеќето од нив имаат свои тераси на отворено, за посетителите да можат да уживаат во спокојното свежо ветре и да уживаат во прекрасната глетка кон Охрид. Многу од тие угостителски објекти се специјализирани за кујна од соседните земји, Грција или дури Турција, така што оние кои сакаат да се нагостат тука навистина не можат да згрешат!

Патување назад во времето

Шетајќи низ Стариот град и околните улици, сигурно ќе наидете на црква. Всушност, спротивното би било речиси невозможно затоа што овој град некогаш бил познат по тоа што имал 365 цркви – различна црква за секој ден од годината!

Наследството е неверојатно. Тие градби се речиси недопрени, некои датираат дури и од 9-тиот век од нашата ера! Во Охрид има многу ридови што ги предизвикуваат посетителите, да бидат искачени. Погледот што го нудат е достоен за разгледница, а во комбинација со уникатниот дизајн на романескните цркви, го наградуваат трудот на посетителот со неповторливо искуство.

Македонија е трета најмалку посетена земја во Европа, но туристите кои веќе имат заокружено Охрид на нивната листа патувања, го препорачуваат стрмното искачување до Самуиловата тврдина заради неверојатниот поглед од 180 степени што го одзема здивот.

Ако некој успее да подзаборави на мобилниот во џебот, навистина би почувствувал дека пропатувал назад во времето.

Спокојството на Охридското Езеро

Каде и да талкаат патниците низ Охрид, невозможно е да го пропуштат Охридското Езеро. Во многу делови од светот, вообичаено е езерата да бидат матни и да немаат некоја репутација. Охридското Езеро едноставно не спаѓа во таа категорија. Мирната, кристално чиста вода може да се споредува со она што некој би го видел во одморалиште со пет ѕвездички на Малдивите.

На око недопрено, не е мистерија зошто оваа област е позната како „бисер на Балканот“. Има многу опции за најдобро да се доживее ова природно чудо: параглајдерство, пливање
риболов, пловење или доволно со едноставно потопување на нозете во водата и уживање во спокојното опкружување и бујните зелени околни ридови.

Многу туристи велат дека најдобриот начин да се доживее Охридското Езеро е возење со брод на зајдисонце. Портокаловиот сјај го осветлува целиот град. Еден патник што неодамна бил тука го опиша езерото како „навистина посебно место“ што „го одзема здивот“.

Ако сте во потрага по чисто блаженство и спокојство, не гледајте подалеку од Охрид, Македонија.

The post Охрид во специјализираниот туристички интернет-магазин „Travel off path“: Овој мал град во Европа е најмирното место што може да се замисли appeared first on Република.

Напуштени продавници и празни улици, со малку знаци на живот во градот Валандово, од каде младите луѓе масовно бегаат во странство во надеж дека ќе најдат подобар живот. Вака новинската агенција Агенс Франс Прес ја почнува својата репортажа од југот на Македонија, во која предупредува на масовното иселување на младите.

Како и другите земји во сиромашниот раб на југоисточна Европа, оваа мала балканска нација лежи врз темпирана демографска бомба со население кое старее, опаѓачка стапка на прираст и масовно исселување. Македонија загуби 10 проценти од своето население во изминатите 20 години. Околу 600,000 Македонци сега живеат во странство, според проценки на Светската Банка и властите. Очајно слабиот економски раст и недостигот на инвестиции ја притискаат земјата во која сега живеат само 1,8 милиони жители. „Ако имате над 2,4 милиони жители, но повеќе од четвртина од нив си заминале, треба сериозно да се загрижите за тоа што ви се случува“, вели Апостол Симовски, директор на Државниот завод за статистика“, пренесува АФП.

Дописникот на агенцијата разговарал и со Перо Костадинов, градоначалник на Валандово, кој вели дека „го загубивме ентузијазмот да останеме дома и да се бориме“. Во градот, 90 проценти од приходите произлегуваат од земјоделието.

Пет од 20-те соученици кои бевме во исто одделение веќе се исселија со нивните семејства, вели Бојан Николов, член на младинска организација од Валандово.
АФП ги цитира резултатите од пописот спроведен во 2021, според кои Македонија загубила околу 200,000 жители од 2002 година, кога беше спроведен последниот попис. Перспективите на граѓаните биле поврзани со можното членство во ЕУ, но по блокадите од Грција и Бугарија, граѓаните решаваат дека нема веќе што да чекаат, пишува агенцијата. „Ако останете, просечната плата е само 470 евра. 'Подобро да бидам роб за 2,000 евра во некоја странска земја отколку роб дома за 300 евра'", велат соговорниците на АПФ.

Француската новинска агенција пренесува дека состојбата е слична и во Албанија и другите земји од регионот. Се проценува дека Албанија загубила 1.7 милиони жители во изминатите 30 години, односно 37 проценти од населението. Во Србија, се смета дека 10,000 доктори ја напуштиле земјата во последните 20 години.

А ако овие земји се надеваат дека членството во ЕУ ќе ја подобри ситуацијата, Хрватска е предупредувачки пример. Откако влезе во ЕУ во 2013 година, хрватското население од четири милиони жители се намали за 10 проценти. Обединетите нации проценуваат дека Хрватска ќе има само 2,5 милиони жители на крајот на векот“, пишува АФП.

The post Репортажа на АФП: Македонците се откажаа од својата земја и бараат спас во странство appeared first on Република.