Актуелниот англиски фудбалски шампион Манчестер сити има 32 натпревари без пораз во Премиер лигата од декември 2023 година.

Ова е најдобрата серија во историјата на клубот.

Во дуел од денешното 9. коло на Англиското фудбалско првенство, избраниците на Пеп Гвардиола го совладаа Саутемптон со 1:0.

Последен пат „граѓаните“ загубија на 6 декември 2023 година од Астон вила (0:1) на гости.

На 2 ноември, Манчестер сити ќе игра против Борнмут во 10. коло од Премиер лигата.

The post Манчестер сити постави клупски рекорд appeared first on Република.

Светската и европска шампионка Јарослава Махучих од Украина го собори светскиот рекорд во скок во височина во женска конкуренција кој 37 години го држеше Бугарката Стефка Костадинова.

Махучих (22) денеска на митингот од Дијамантската лига во Париз во првиот обид ја прескокна летвичката на височина од 210 сантиметри, што е за еден сантиметар подобар резултат од долговечниот рекорд на Костадинова.

Стефка Костадинова го постави претходниот рекорд од 209 сантиметри на Светското првенство во 1987 година во Рим.

Второто место во скок во височина во Париз го освои светската шампионка во сала Никола Олислагерс од Австралија со 201 сантиметар, а на третото место заврши Анџелина Топиќ од Србија со прескокнати 198 сантиметри.

The post Соборен рекорд стар 37 години во скок во височина appeared first on Република.

Во јуни годинава просечната вредност на максималните дневни температури во Грција била на екстремно високи нивоа споредено со просекот од периодот 2010-2019 година, а минатиот месец бил најтоплиот јуни во последните 14 години, според мрежата од 53 метеоролошки станици на порталот Метео на Националната опсерваторија, јави дописничката на МИА од Атина.

Најголеми отстапувањата на просечната максимална температура во јуни 2024 година имало на Пелопонез (+4,8 степени), во областа Атика и дел од централна Грција (+4,6 степени) и во северниот дел на земјата (+4,3 степени).

Во првата половина на минатиот месец, односно во периодот од 10 до 12 јуни кога Грција беше зафатена од топлотен бран, во одредени делови од земјата температурата била од десет до 12 степени Целзиусови над нормалните нивоа за конкретниот период од годината.

Како што пишува Метео, 11 станици од мрежата на Националната опсерваторија на Атина регистрирале рекордно високи температури.

Во Атина, просечната месечна вредност била за четири степени повисока, при што 29 од 30 дена во месецот беа потопли од нормалното.

The post Во јуни измерени рекордно високи температури во Грција appeared first on Република.

Кениската атлетичарка Беатрис Чебет постави нов светски рекорд на 10.000 метри митингот од Дијамантската лига во американскиот град Јуџин.

Чебет победи со време од 28:54,14 минути.

Таа го собори рекордот од 29:01.03 минути поставен од Летесенбет Гиди на 8 јуни 2021 година во Холандија.

Второто место на синоќешниот митинг Префонтејн во Јуџин го зазеде Гудаф Цегаи од Етиопија со време од 29:05,92 минути.

The post Кенијката Чебет постави светски рекорд на 10.000 метри appeared first on Република.

Арсенал го совлада Вулверхемптон на гостински терен во натпреварот од 34. коло на Премиер лигата со 2:0. Ова за лондонскиот тим е шести натпревар во низа како не примаат ниту еден гол на гостински терен во првенството, со што се наоѓаат пред изедначување рекорд стар 15 години.

Претходно таков резултат остварија само Челзи во декември 2008 година и Манчестер јунајтед во февруари 2009 година. Тогаш екипите одиграа седум натпревари на гости со „чиста мрежа“, што е рекорд во Премиер лигата.

Следно гостување на „Топчиите“ во Англиското фудбалско првенство е на 28 април против Тотенхем.

Арсенал со 74 бодови го престигна Манчестер сити (73) и изби на првото место во Премиер лигата, но „граѓаните“ имаат натпревар помалку.

The post Арсенал на чекор од изедначување на рекорд во Премиер лигата appeared first on Република.

Новак Ѓоковиќ собори уште еден тениски рекорд. Српскиот тенисер стана најстариот „број еден“ во историјата на АТП листата, со што го собори рекордот што со години го поседуваше швајцарскиот тенисер Роже Федерер.

Популарниот Ноле денеска има 36 години и 321 ден, додека Швајцарецот последен пат во кариерата беше светски рекет број еден со 36 години и 320 дена.

Српскиот тенисер во понеделник ќе ја почне 420-та недела на врвот на АТП листата.

Следен предизвик за Ѓоковиќ ќе биде на Мастерсот во Монте Карло, а од елиминацијата во Индијан Велс, српскиот тенисер нема играно, туку само тренира. Ѓоковиќ е првиот носител на турнирот и ќе биде слободен во првото коло.

The post Ѓоковиќ собори уште еден рекорд – стана највозрасниот „број еден“ во историјата на тенисот appeared first on Република.

Њујорк, 19 март 2024 (МИА) - Просечната дневна температура на површината на океаните во светот во март го собори рекордот поставен во 2023 година, достигнувајќи ја „највисоката температура досега забележана“ од 21,2 степени.

Според податоците од Климатскиот реанализатор на Универзитетот во Мејн и Националната океанска и атмосферска администрација на САД (NOAA), глобалното затоплување исто така доведе до зголемување на температурите на површината на океаните.

Според податоците, највисоката температура на океаните во 2023 година е измерена во август од 21,1 степен, додека овогодинешниот рекорд на температурата на површината на океанот од 21,2 степени е соборен уште во март.

Вработен во NOAA, Грегори С. Џонсон изјави за Си-Ен-Ен дека просечната глобална температура на океаните измерена во 2023 година е за 0,25 степени повисока отколку во 2022 година, а ова зголемување одговара на 20 години затоплување за една година.

Џонсон изјави дека очекуваат овие рекордни температури да продолжат да се бележат со зголемување на концентрацијата на стакленички гасови во атмосферата.

The post Температурата на океаните соборува рекорди, во март биле измерени 21,2 степени appeared first on Република.

Тимоти Шаламе се прослави со улогата во драмата „Call Me By Your Name“ од 2017 година, а во период од само седум години стана најбараниот млад актер во Холивуд. Неговите успеси се нижат еден по друг, а според порталот „Дексерто“, Шаламе штотуку го соборил рекордот што го држел само еден актер пред него.

Имено, благодарение на главните улоги во филмовите „Dune: Part Two“, кој беше премиерно прикажан на почетокот на месецот и „Вонка“, чија премиера беше во декември, Шаламе се појави во два блокбастери по ред, пренесува „Индекс“.

Пред него тоа му успеа само на Џон Траволта, најбараниот актер од 70-тите години. Во декември 1977 година, Траволта се појави во светскиот хит „Треска на саботната вечер“, а шест месеци подоцна ја игра главната улога во мјузиклот „Брилијантин“, кој многумина го сметаат за најдобар филмски мјузикл на сите времиња.

„Треска на саботната вечер“ заработи над 237 милиони долари од продажбата на бокс-офисот, додека „Брилијантин“ заработи повеќе од 366 милиони долари. Трошоците за снимање на овие два филма изнесуваа помалку од десет милиони долари.

Мјузиклот „Вонка“ на Шаламе заработи 628 милиони долари, додека „Dune: Part Two“, кој се уште се прикажува во кината, досега има заработено 498 милиони долари. Експертите предвидуваат дека вториот дел од „ Dune“ би можел да достигне приход од милијарда долари.

По два блокбастери по ред, Тимоти Шаламе моментално го снима биографскиот филм „A Complete Unknown“, базиран на животот на Боб Дилан.

The post Тимоти Шаламе го собори рекордот што Џон Траволта стар 45 години appeared first on Република.

Седумнаесетгодишната Јана Атанасовска на вчерашната слаломска трка во скијачкиот центар Веинебене во Австрија го освои 2-то место, со вкупно време од 1:46.94. Овој пласман македонската скијачка надеж во силна конкуренција го оствари со резултат од 37.29 FIS точки, што претставува најдобар резултат во историјата на македонското скијање. Претходниот најдобар резултат од 47.97 FIS точки Јана го постигна пред два месеца.

По првата трка Атанасовска беше прва, со време од 50.55 и со голема предност од 0,71 секунда пред второпласираната, но во втората трка таа одлучи да скија повнимателно и да ја заврши трката за којашто знаеше дека ќе ѝ обезбеди одличен пласман.

Атанасовска во континуитет постигнува одлични резултати, а со неа македонското скијање за првпат има натпреварувачка надеж од која се очекувааат многу нови успеси на европско и светко ниво

The post Македонската скијачка надеж Јана Атанасовска со нов рекорд за македонскиот спорт во Австрија appeared first on Република.

Температурите го соборија 64-годишниот рекорд во оддалечениот западен кинески регион Ксинџијанг, спуштајќи се до минус 52,3 степени Целзиусови во услови на студен бран, предизвикувајќи прекини во сообраќајот по лунарниот новогодишен празник.

Неколку делови на Кина се борат со уште едно длабоко замрзнување додека луѓето се враќаат од еднонеделните прослави на најголемиот празник во годината. Непосредно пред почетокот, снежните бури и замрзнатиот дожд ги заробија патниците на железницата и патиштата.

Државните медиуми објавија дека во неделата, населбата Туерхонг во округот Фујун ја забележала најниската температура од почетокот на рекордите во Ксинџијанг, надминувајќи ги минус 51,5 степени Целзиусови забележани на 21 јануари 1960 година.

Бројката беше само малку под националната минимална температура од минус 53 Целзиусови степени во градот Мохе, североисточната провинција Хеилонгџианг, на 22 јануари минатата година. За време на неколкудневниот студ и снег, во регионот на Алтај беа зафатени 853 километри патишта, објави CCTV. Ова ги натера транспортните власти да испратат 47 возила и 86 спасувачи да го расчистат снегот во текот на ноќта.

Податоците од Министерството за транспорт покажаа дека регионите на Внатрешна Монголија и Ксинџијанг, заедно со провинциите Лиаонинг, Џилин и Хеилонџијанг, затворија 43 патни делови и 623 патарини.

Националната метеоролошка служба го подигна своето предупредување за услови на замрзнување на второто највисоко ниво, според весникот Глобал Тајмс, со драматичен пад на температурите што се очекуваат низ целата земја до четврток.

The post Во Кина измерени минус 51,5 степени Целзиусови appeared first on Република.

Македонскиот атлетичар во скок во далечина Андреас Трајковски го освои денеска сребрениот медал на Балканското сениорско првенство во сала во Истанбул, постигнувајќи нов државен рекорд.

Трајковски прескокна 7.79 метри што на крајот беше за два сантиметри зад остварувањето на победникот Лука Чурковиќ (7.81 метри) од Хрватска.

Бронзениот медал го освои Бугаринот Божидар сарабуков со прескокнати 7.74 метри.

Својот следен настап на меѓународната сцена Трајковски ќе го има веќе во вторник кога ќе настапи на атлетски митинг во сала во Белград.

The post Трајковски постави нов македонски рекорд во скок во далечина во сала appeared first on Република.

„И за греота пиши пак така, еве ве доѓав на Рекорд“ 

Ова во описот на видеото кое сам си го објави на „Инстаграм“ го пишува Јетон од Чаир, кој на својот профил го сподели тепањето кое се случи на „Рекорд“ во центарот на Скопје.

Во видеото може да се види како претепува момче со клоци и му вика: „Пи*ка ти матер, на кој му се праиш мафијаш?“.

„Кралот“, како што го нарекуваат другарите на „Инстаграм“, покрај видеото и фотографии од претепаното момче, објавува и постови на кои држи пиштол, како и фотографија од пријателот Сулејмани кој си набавил мало лавче.

The post Јетон тепа Македонец на „Рекорд“, на „Инстаграм“ сам се фали со видео од нападот appeared first on Република.

Турција соопшти дека вчера била измерена рекордна температура од 49,5 степени Целзиусови во централната анадолска провинција Ескишехир, а експертите предупредуваат дека трендот на топлотни бранови во медитеранскиот слив ќе продолжи до 2040-тите.

Рекордна температура е евидентирана во централната анадолска провинција Ескишехир, напиша синоќа министерот за животна средина Мехмет Ожасеки на платформата Х, поранешен Твитер.

Претходниот рекорд беше 49,1 степени Целзиусови и беше измерен во 2021 година, додаде Ожасеки.

Националната метеоролошка служба денеска предупреди дека топлотниот бран ќе продолжи да ги надминува нормалните сезонски температури за дури 11 степени.

Главната причина за топлинските рекорди се климатските промени, според Барш Онол, професор по метеорологија на Техничкиот универзитет во Истанбул.

Иако временскиот феномен Ел Нио носи и температурни рекорди, топлотните бранови стануваат се почести и траат подолго, рече Онол во телефонски разговор со ДПА.

Турција ќе биде многу повеќе изложена на високи температури во следните 30 до 40 години, како и остатокот од медитеранскиот регион. Од 2040 година врвот на туристичка сезона во медитеранските земји ќе биде во септември и октомври, предвидува Онол.

Управувањето со водите и водните ресурси ќе биде исто така клучно за регионот, смета Онол, и предвидува суша во летните месеци во годините што доаѓаат.

Турција е многу зависна од фосилните горива. Според официјалните податоци, околу 34,6 отсто од електричната енергија е произведена од јаглен во 2022 година, а 22,2 отсто од природен гас.

Ожасеки потсетува дека целта на земјата е да достигне нулта стапка до 2053 година.

The post Во Турција измерени рекордни 49,5 степени Целзиусови appeared first on Република.

На јубилејната, 40. Балканска математичка олимпијада, која што се одржа во Анталија, Турција, Македонија оствари нов рекорд. Првпат се освоени шест медали меѓу кои еден златен, еден сребрен и четири бронзени медали, соопшти Сојузот на математичари на Македонија.

Златниот медал освои Никола Спировски, Дамјан Давков освои сребро, а бронзените медали им припаднаа на Јан Стојановски, Алексиј Тасиќ, Никола Цветаноски и Алек Танаскоски.

Бројот на освоени тимски поени кој само во 2022 година беше 118 е уште еднаш надминат, и оваа година изнесува 157 поени, што ја пласира Македонија на 5. место во официјалната конкуренција. Македонија е една од трите држави со златен медал.

Уште една радосна вест е што една од задачите кои сите учесници ја решаваа беше македонски предлог (задача 1), во авторство на лидерот Никола Велов.

Во оваа прилика сакаме да им се заблагодариме на Анастасија Трајанова, Илија Јовчески и претседателот на комисијата за ММО и меѓународни натпревари проф. д-р Мирко Петрушевски, кои заедно со нас учествуваа во подготовките на тимот. На крај неизоставно им искажуваме благодарност на спонзорите Виктор Симјаноски, Бојан Јовески, Предраг Груевски, Бобо Станковиќ, Бојан Серафимов, Валентин Ѓорѓиоски, Тодор Ристов и Стојан Трајановски кои во целост го покрија финансискиот дел за подготовките, велат од тимот и додаваат дека во наредните денови на веб страната на СММ со сите ученици кои ја сакаат математиката ќе ги споделат материјалите од подготвителните часови кои ги посетуваа одбрани ученици во склоп на Олимписката школа Александар Блажевски-Цане.

The post На 40. Балканската математичка олимпијада Македонија освои рекордни шест медали! appeared first on Република.

Навивачка група од Грција попладнето го наруши јавниот ред и мир во центарот на Скопје поради што имаше зголемено полициско присуство на прометната сообраќајница кај „Рекорд“. Од МВР велат дека сторителите ќе добијат соодветни поднесоци.

Денеска околу 16.00 часот во СВР Скопје било пријавено дека на подрачје на Центар-Скопје бил нарушен јавниот ред и мир од навивачи од навивачка група од Република Грција. Полициски службеници излегле на местото и било констатирано дека дел од лицата од групата одзеле предмети од продажен објект и физички нападнале случајни минувачи. Групата била обезбедена и по целосно расчистување и документирање на случајот против сторителите ќе бидат поднесени соодветни поднесоци, соопшти МВР.

„Република“ претходно извести дека ракометарките на грчкиот шампион ПАОК останаа без поддршка на реванш натпреварот против екипата на Металург во СЦ „Јане Сандански“ во рамки од второто коло од Европскиот куп, бидејќи пред натпреварот, кој започна во 16 часот, навивачите на ПАОК се задржани во Центар, на улицата „Димитрија Чуповски“ поради нарушување на јавниот ред и мир.

https://republika.mk/vesti/crna-hronika/kradele-vodichki-mu-se-zdale-na-vardarec-navivachite-na-paok-zaglavija-so-policija-namesto-da-gi-bodrat-rakometarkite/

The post МВР потврди: Грчките навивачи не само што напаѓале случајни минувачи, туку и краделе од пиљара appeared first on Република.

Најдобрата македонска пливачка, Миа Еминова-Блажевска имаше одличен настап на трката на 100 метри грбно на Светското првенство во пливање кое се одржува во Будимпешта, Унгарија.

Таа денеска настапи во втората квалификациска трка го освои третото место со време од 1:04.11 минута, што беше за 30 стоти делови од секундата подобро од нејзиниот досегашен рекорд на 100 грбно.

Ова време беше доволно за освојување на 30 место во квалификациите од вкупно 43 пријавени пливачки во оваа конкуренција.

The post Еминова-Блажевска со нов рекорд на Македонија на СП во Будимпешта appeared first on Република.

Атлетичарот Андреас Трајковски, член на Работнички го собори македонскиот рекорд на 100 метри.

На атлетски митинг одржан во Копенхаген (Данска), Трајковски учествуваше во трката на 100 метри со што оствари резултат од 10 секунди и 50 стотинки, што претставува нов македонски рекорд во оваа дисциплина. Досегашниот рекорд на Македонија во ова дисциплина беше 10 секунди и 59 стотинки, поставен на 1 мај оваа година од страна на Јован Стојоски).

Со овој резултат и нов рекорд, атлетичарот го освои 3-то место на митингот и уште еднаш ја потврди одличната форма во која се наоѓа оваа сезона.

Трајковски покрај овој рекорд, го носи и рекордот во скок во далечина, 7 метри и 60 сантиметри, кој го постави на 17 мај оваа година во Александрија (Грција). Од почетокот на оваа година доби дозвола да настапува за Македонија (претходно настапуваше за Данска), и на неговиот прв меѓународен натпревар за македонскиот дрес во март освои бронзен медал во скок во далечина на Балканијадата во сала во Истанбул (Турција), додека пак пред две недели рекордерот настапи на Купот на Македонија во Скопје за својот клуб АК Работнички и тогаш се издвои со победи во 4 дисциплини (100 метри, 200 метри, скок во далечина и штафета 4 х 100 метри).

The post Атлетичарот на Работнички Андреас Трајковски го собори државниот рекорд на 100 метри appeared first on Република.

„Топ ган 2“ е едно од најдобрите блокбастерски продолженија некогаш направени, според раните реакции на социјалните мрежи.

Првите реакции на  филмот се многу подобри отколку што некој би помислил. Всушност, продолжението на најубавиот филм на Том Круз од 80-тите веќе се опишува како „едно од најдобрите продолженија на кој било филм досега“, кое, искрено, сите ги изненади, особено по многуте одложувања на премиерата и појавување речиси четири децении по култниот оригинал, според првичните рецензии.

Воден од емоции, немилосрдно кинетичен, стилски бомбастичен, филмот е величествена ода на видот блокбастер филмови кои некогаш ги испраќаа луѓето во киносалите.

Тој е еден од најдобрите филмови на годината и на деценијата. Се рангира како еден од најнаградуваните филмови, (според IMAX) и е интересен за љубителите на серијалот – подеднакво и за повозрасните и за младите.

Многу очекуваното продолжение заработи 156 милиони долари на домашните киноблагајни во првиот викенд заклучно со празничниот понеделник во САД, според „Комскор“ и 252.7 милиони долари во светски рамки, според „Парамаунт“.

The post Многу очекуваното продолжение „Топ ган Маверик“ заработи 156 милиони долари на домашните киноблагајни во првиот викенд appeared first on Република.

Македонскиот атлетичар Андреас Трајковски втор пат за помалку од една седмица го подобри националниот рекорд во скок во далечина, прескокнувајќи денеска на митинг во Грција 7.60 метри.

Трајковски на Меѓународниот атлетски митинг во Александрија во првата серија прескокна 7.60 метри со што го освои третото место и постави нов македонски рекорд.

Резултатот е за 19 сантиметри подобро постигнување од стариот македонски рекорд кој Трајковски го собори минатата среда кога на Меѓународниот митинг во Лимасол прескокна 7.41 метри.

The post Трајковски го помести македонскиот рекорд во скок во далечина на 7.60 метри appeared first on Република.

Продолжува доминацијата на Дарио Ивановски на „ХалкЕко Скопје трча“ на 10 километри, кој по шести пат успеа да слави и да постави нов рекорд.

Нашиот атлетичар трката ја мина со време од 29:42 минути, на второто место се најде Џастин Фриман, со време од 32:03, а третото место му припадна на Атанас Анчевски со време од 32:36. Кај дамите, триумф на Билјана Кираџиева, со 37:48 минути, второто место го освои Mиљана Ристиќ со 41:27 минути и на третото место заврши Весна Кираџиева со 43:18 минути.

Оваа година на веќе традиционалната трка „Скопје трча“ учествуваа 1.300 натпреварувачи, а е во организација на Сојузот на спортови на Скопје и атлетскиот клуб Работнички, под покровителство на Град Скопје и Агенцијата за млади и спорт.

Пред 6 години, се јави потреба, поради преголема заинтересираност, да се организира и оваа трка, која е во склоп на Скопски Маратон. „Скопје трча“ почна како локална, а многу брзо прерасна во меѓународна трка. Со оваа трка, исто и како со другите кои се дел од Скопски маратон, секоја година докажуваме дека нашата земја има активно, спортско население. Ја користам оваа прилика да ги поздравам сите учесници на трката, а на оние најдобрите им честитам за постигнатите резултати, изјави Гордана Николовска од Сојуз на Спортови на Скопје.

The post Дарио Ивановски постави нов рекорд на „Скопје трча 10км“ appeared first on Република.