Во првата недела од декември ќе се одржи Економско-социјалниот совет на кој, според најавите на министерот за економија Бесар Дурмиши, ќе се разговара за зголемувањето на минималната плата. Министерот Дурмиши денеска изјави дека во Буџетот се предвидени пари за оваа намена, но дека треба да се разговара со сите засегнати страни колкаво би било зголемувањето. Од Сојузот на синдикати, кои на првомајскиот протест побараа зголемување на сите плати, вклучително и на минималната плата на 450 евра, велат дека аргументите се на нивна страна.

Во март, според законот ќе се направат пресметките и ќе се види колку ќе биде минималната плата. Средства се предвидени во буџетот за да се покачи минималната плата, но колку ќе биде тоа, ќе видиме во текот на јануари и февруари. Кога ќе заврши годината, ќе се направат пресметките и ќе знаеме точно за колку ќе се покачи минималната плата - изјави денеска Дурмиши.

Вели дека има политичка волја да се зголеми минималната плата, но дека мора да се чујат сите засегнати страни.

Јас сакам минималната плата да биде и 600 евра. Реално да кажеме, барањето е 450, јас сакам да биде 600 евра. Но, да ги видиме сите засегнати страни, да се отвори темата во првите денови на декември. Ќе ги чуеме сите засегнати страни, ќе ги видиме и можностите на Владата дали се предвидени толку средства и дали има можност. Ќе ги видиме и барањата на работодавачите оти и тие се засегнати страни од ова барање и на крај ќе донесеме заедничка одлука - истакна Дурмиши.

Според Дурмиши, предвидени се средства за зголемување на минималната плата за околу 2.000 денари што е согласно со законското решение според кое во март минималната плата би се зголемила за 1.600 до 1.800 денари.

Ваквото зголемување, според претседателот на Сојузот на синдикати на Македонија, Слободан Трендафилов, не е доволно за преживување, а зголемувањето на минималната плата нема да биде преголем товар за државниот буџет со оглед на тоа дека околу 35.000 работници земаат плата во износ на минимална или под минимална плата.

Според последните податоци, во Македонија 25. 000 работници примаат плата во висина на минимална плата, а 10.00 работници примаат плата од еден денар до 22.000 денари но она што е поразително е што сите овие работници примаат плата во плико за што не се плаќаат придонеси од задолжително социјално осигурување и тоа ја чини државата на годишно ниво околу 250 илјади евра, односно неуплатени придонеси во Фондот - изјави Трендафилов.

Според Трендафилов, дијалогот е отворен во однос на минималната плата и аргументите се на страна на синдикатите.

Ако знаете дека минималната плата во Црна Гора од 600 е на 800 евра, ако знаете дека минималната плата во Босна и Херцеговина од 1 јануари ќе биде 600 евра, ако знаете дека во Србија е 544 евра и дека синдикалната минимална кошничка изнесува 62. 000 денари покажува дека платите мора да се зголемат. разговараме по однос на ова прашање поврзано и со мерките на Владата за ограничување на маржите и мислам дека на наредната седница на ЕСС ќе ги презентираме нашите аргументи со кои располагаме за да ги убедиме за потребата од растот на сите плати, вклучително и на минималната плата - рече Трендафилов.

The post Во декември ќе се разговара за зголемувањето на минималната плата appeared first on Република.

Работни групи на ВМРО-ДПМНЕ и коалицијата Вреди денеска ќе ги продолжат разговорите за состав на нова влада. Оттаму ја потврдуваат средбата, но нема официјална информација за што ќе се разговара денеска и каде.

Од ВМРО-ДПМНЕ за МИА посочуваат дека има тековни разговори на ниво на работни групи и оти ќе известат за каков било евентуален договор.

Правата официјална средба помеѓу претставници на ВМРО-ДПМНЕ и Вреди се одржа во саботата на 14 мај. Тогаш беше соопштено дека нивната соработка ќе се базира на три постулати - евроинтеграции, забрзан економски развој, борба против криминалот и корупцијата и владеење на правото.

Заклучено е дека двете страни ќе формираат работни групи, на кое ниво ќе продолжат разговорите до нивно финализирање, соопштија тогаш од ВМРО-ДПМНЕ.

На средбата во саботата присуствуваа лидерот на ВМРО-ДПМНЕ Христијан Мицкоски со партиските потпретседатели и лидерите од партиите во Коалицијата „Влен“ - Арбен Таравари, Изет Меџити, Биљал Касами и Африм Гаши.

Од коалицијата „Влен“ по средбата оценија дека преговорите се одвиваат во позитивна и вистинска насока.

Според првичните официјални резултати за парламентарите избори што ги објави ДИК, Коалицијата Твоја Македонија предводена од ВМРО-ДПМНЕ освоено најмногу пратенички мандати, 58, по што следуваат Коалицијата Европски фронт предводена од ДУИ со 19 пратенички мандати, Коалицијата за европска иднина предводена од СДСМ, 18, Коалицијата ВЛЕН, 13, а Движење ЗНАМ за наша Македонија и Левица по шест пратенички мандати.

The post ВМРО-ДПМНЕ и Вреди ги продолжуваат разговорите за нова влада appeared first on Република.

Разговорите во Брисел беа неуспешни во однос на изнаоѓање јасен пат кон нормализација на односите, изјави српскиот претседател Александар Вучиќ по завршувањето на трилатералната средба во рамки на дијалогот Белград-Приштина.

Албанците имаат свои, ние имаме наши. На крајот ние како Србија го прифативме компромисниот предлог на Европската унија, Курти не сакаше да го прифати и средбата заврши - рече Вучиќ.

Говорејќи за атмосферата на средбата, претседателот на Србија вели дека имало „многу непријатни работи“.

Јасно е дека Курти одбива да формира ЗСО, тоа е суштината на се. Затоа Србија не бега од обврските, но ЕУ рече дека работите мора да се направат и ние го прифативме нивниот предлог – и покрај тоа што не ни е воопшто лесно. Курти го отфрли. Ние изјавивме дека од нашата последна средба и декларацијата на „дваесет и седумте“ дека ЕУ направи 22 ескалирачки потези од Приштина, рече Вучиќ и продолжи:

Вакви потези имавме и денеска. Во околината на општина Звечан се обидоа да ги заплашат луѓето, па кога го кажав на дијалогот тие се повлекоа. Но тоа се случува секој ден, во последните два месеци имаме имаше 55 отсто повеќе инциденти под Кути отколку во најлошата година за време на кој било друг на власт во Косово. Тие факти овде ги посочивме.

Мислам дека наскоро ќе добиете потврда од европските претставници за ова, додаде претседателот на Србија.

Како што рече, очигледно е дека времето пред нас не е лесно.

Србија напорно се трудеше и беше многу конструктивен, сериозен и одговорен партнер на меѓународната заедница. Ќе видиме како ќе се одвиваат работите во иднина - изјави Вучиќ за новинарите.

Вучиќ рече дека неуспешните преговори не се „крајот на светот“ и вака одговори на прашањето кој е следниот чекор.

Не знам што да ви кажам. Секако дека секогаш ќе треба да разговараме, не верувам дека ова е „крајот на светот“. Сигурен сум дека ќе се слушне одговорот кој е одговорен, кој е одговорен, тоа е едноставно нешто што треба да се случи. Она што е важно за нас е дека јас сум сигурен дека мора да продолжиме да разговараме - изјави Вучиќ во Брисел.

The post Далеку се од договор: Разговорите меѓу Србија и Косово завршија неуспешно appeared first on Република.

Министерот за надворешни работи и претседавач со ОБСЕ, Бујар Османи, денес, непосредно при неговото пристигнување во Астана, која е дел од неговата централно азиска турнеја, поради сензитивноста што се случува во Лачин Коридорот и потребата за итно реагирање, оствари два одделни телефонски разговори со Министрите за надворешни работи на Азербејџан и Ерменија, Џејхун Бајрамов и Арарат Мирзојан.

Министерот Османи ја изрази својата загриженост за состојбата околу коридорот Лачин и влијанието врз цивилното население, особено ранливите групи, вклучително жените и децата. Воедно, Османи истакна дека внимателно ја следи ситуацијата во Лачин коридорот и го повтори својот повик за конструктивен и продуктивен дијалог како авенија за одржливи решенија, за доброто на локалното население.

Претседавачот Османи истакна дека треба да преовладуваат хуманитарните аспекти и непосредните потреби на луѓето. Воедно ја потенцира потребата за користење на ОБСЕ механизмите и соодветни мерки како дел од решенијата за нормализирање на односите и градење доверба меѓу Ерменија и Азербејџан.

Претседавачот на ОБСЕ Османи, ја потврди својата подготвеност да продолжи со личниот, активен ангажман со страните и во таа насока, тој повтори дека Македонија е подготвена да понуди платформа за дијалог, додавајќи ги напорите и можните решенија за одржлив мир.

The post Османи итно разговараше со Бајрамов и Мирзојан: Преку конструктивен дијалог да се стабилизира состојбата околу Лачин коридорот appeared first on Република.

Премиерите на Бугарија и на Македонија, Галаб Донев и Димитар Ковачевски, денеска имале телефонски разговор за актуелните случувања во односите меѓу двете земји.

Прес-службата на бугарската Влада соопшти дека двајцата премиери разговарале за потребата претстојните празнувања на 151-годишнината од раѓањето на Гоце Делчев да се одвиваат мирно и непречено.

Во таа насока, в понеделник на 30 јануари вршителот на должноста вицепремиер и министер за внатрешни работи на Бугарија Иван Демерџиев и претседателот на државната агенција „Национална безбедност“ Пламен Тончев ќе имаат работна средба со своите македонски колеги во Скопје на која ќе ги прецизираат заедничките активности за да се гарантира мирно и безбедно одбележување на 4 февруари.

– Донев и Ковачевски разговараа и за придобивките од подлабоката соработка меѓу двете земји во областа на безбедноста, особено во случаите на криминални дејствија или закани врз граѓани на Република Македонија со бугарски идентитет. Во разговорот, премиерот Донев повторно потсети на очекувањата, Република Македонија да ги преземе неопходните активности за ставање крај на говорот и актите на омраза, како и за почитување на правата на македонските Бугари, се наведува во соопштението од прес-службата на бугарската влада.

The post Ковачевски и Донев телефонски разговарале за актуелните случувања во односите меѓу двете земји appeared first on Република.

Турскиот претседател Таип Реџеп Ердоган постојано се обидуваше да се претстави како посредник во постигнувањето некаков мировен договор меѓу Русија и Украина.

Тој денеска разговараше со новинарите во авионот на враќање од патувањето во Азербејџан и сугерира дека рускиот претседател неодамна бил поподготвен за мировни преговори отколку порано.

Ердоган рече дека сè уште се надева оти може да се постигне мировен договор додавајќи: „Видов дека Путин е многу помек и поподготвен да преговара на оваа тема отколку порано“, пренесе „Индекс.хр“.

The post Ердоган: Путин е помек и поподготвен да преговара од порано appeared first on Република.

Францускиот претседател Емануел Макрон денеска најави дека планира во наредните денови да оствари нови телефонски разговори со рускиот и украинскиот претседател Владимир Путин и Владимир Зеленски.

Во следните денови повторно телефонски ќе разговарам со украинскиот претседател Володимир Зеленски и неговиот руски колега Владимир Путин, изјави Макрон за ТВ Франс 2.

Тој на 7 февруари ја посети Москва, кога разговараше со Путин, а следниот ден францускиот лидер беше и во Киев, каде имаше средба со Зеленски.

По дијалогот во Москва, Макрон и Путин имаа редовни телефонски разговори, а во последните неколку недели имаше вкупно девет, јави Тасс.

The post Макрон најави нови разговори со Путин и Зеленски appeared first on Република.

Портпаролот на Кремљ, Дмитриј Песков, изјави дека е потребен дијалог меѓу Русија и САД и покрај неодамнешните изјави на американскиот претседател Џо Бајден.

Личните навреди оставаат негативен белег на односите меѓу шефовите на држави - рече Песков.

Сепак, дијалогот меѓу Русија и САД е неопходен во секој случај не само во интерес на нашите две земји туку и во интерес на целиот свет, додаде тој.

Вака или онака, порано или подоцна, Русија и САД ќе треба да разговараат за прашања за стратешка стабилност, безбедност и други прашања за кои само ние можеме да разговараме“, рече Песков.

Да потсетиме, Бајден во неделата рече дека рускиот претседател Владимир Путин не може да остане на власт, ​​но еден ден подоцна објасни дека не сака да биде направена промена на политиката, туку реченицата му ја упатил на рускиот народ.

The post Кремљ: Навредите оставаат трага, но дијалогот меѓу Русија и САД е неопходен appeared first on Република.

Третата рунда преговори помеѓу руската и украинската делегација попладнево почна во Белорусија.

Како што јави руската новинска агенција ТАСС, украинската делегација во Бјеловешка шума пристигнала со два хеликоптера.

Првите две рунди преговори исто така се одржаа во Белорусија на 28 февруари и 3 март.

The post Почна третата рунда преговори Русија – Украина appeared first on Република.