Реактивиран е пожарот на депонијата за градежен шут кај месноста Ралова Чука во делчевското село Очипала. Пожарникарот Лоренцо Трајановски, кој со екипа на ТППЕ Делчево интервенира во гаснењето, информира дека моментално гори внатрешниот дел на депонијата.

-Во моментот се обидуваме да спречиме ширење на надворешниот дел на депонијата преку негова обиколка, по што ќе пристапиме кон гаснење на внатрешниот дел од депонијата, истакна Трајановски.

Пожарот на депонијата Ралова Чука синоќа беше локализиран, но, како што додаде, делчевскиот пожарникар, повторно избувнал денес во попладневните часови.

Во текот на вчерашниот ден во Делчевско беше локализиран пожарот во атарот на делчевските села Тработивиште и Разловци, во кој беа опожарени околу 50 хектари борова и дабова шума кај месноста Енѓовски колиби. Пожарникарите интервенираа и на запален семеен дом на улицата „Голачка” во Делчево.

The post Повторно е активен пожарот во делчевско appeared first on Република.