На 1 ноември, во 19 часот, Националната опера и балет во Скопје ќе биде домаќин на изложбата „Кара“ – новото дело на уметникот Бојан Ковски. Оваа изложба, инспирирана од незаборавната италијанска икона Рафаела Кара, ја претвора телесната уметност во живописен омаж на нејзината уметност и енергија. Но ова не е обична изложба. „Кара“ (Carra) е експлозија на движења, бои и форми, каде што телото станува платно, а секој потег – песна што не се слуша, туку гледа.

– Ковски преку „Кара“ ја истражува идејата за телото како живо платно, кое станува средство за изразување емоции, ставови и естетски идеали. Во оваа изложба ќе бидат претставени 12 боди арт инсталации, секоја со уникатен визуелен идентитет, кои на 15 македонски модели ќе раскажуваат своја приказна. Тука ќе видиме и некои истакнати лица на македонската сцена – Антониа Гиговска, Калтрина Круезиу, Миа Араби, Александар Динев, Ведрана Ѓорѓевиќ и други – кои со своето присуство го обликуваат духот на изложбата.

Магијата на уметноста не завршува со телото. Напротив, секое дело ќе биде овековечено од 12 фотографи, кои преку своите објективи успеваат да го пренесат уникатниот светоглед на Ковски и неговите инсталации. Фотографите како Бојан Стоилковски, Ани и Дими, Зонде, Горан Поповски, Дејан Џолев и други, создаваат визии што го доловуваат мистичниот танц помеѓу уметноста и телото, помеѓу формата и суштината. Секое фотографирано дело е бескрајно слоевито, со едноставен но длабок приказ на телесната експресија и креативниот импулс – се наведува во најавата.

Во целокупниот визуелен израз, важен дел се и фризурите, кои ја комплетираат уметничката инсталација. Врвни фризери како Октај, Шурбевски, Сретен Костиќ, Кека Махмуди и Даниел Николовски креираа фризури што се во совршена хармонија со телесната уметност, што на моделите им дава завршен изглед достоен на оваа изложба. Нивната креативност и елеганција ќе ги истакнат убавината и оригиналноста на секој од моделите, додавајќи нови слоеви на уметничкиот израз.

„Кара“ е повеќе од изложба – тоа е покана за дијалог помеѓу минатото и сегашноста, помеѓу телото и духот, каде што секој гест носи порака, а секоја боја – емоција. Ковски нè води низ прашалници за идентитетот и слободата, за моќта на уметноста да го пренесе она што не можат да доловат зборовите. Телото станува медиум на комуникација, симбол на универзалниот јазик, кој сите можеме да го разбереме – се наведува во најавата.

The post Изложба инспирирана од италијанската икона Рафаела Кара appeared first on Република.