Премиерот на Косово Албин Курти, по повод 145-годишнината од основањето на Призренската Албанска лига изјави дека ќе ги зачува нејзините достигнувања, пренесува „Репортерс“.

Курти изјави дека сегашните лидери на Албанците треба да ја следат филозофијата на Лигата на Призрен.

„Со околните соседи и Отоманската империја на чело, политичките лидери тогаш ги штитеа териториите, како што мора да направиме денес. Лојални на Лигата, можеме да напредуваме на нашиот пат кон политичко зајакнување на нашите држави, заедно со нашите американски и Европски сојузници.

Лигата на Призрен е скратено име на воено-политичкото здружение наречено Лига (сојуз) за одбрана на правата на албанскиот народ. Ова здружение е формирано во Призрен од група Албанци на 10 јуни 1878 година, по завршувањето на војната меѓу Русија, Србија и Црна Гора против Отоманската империја во 1878 година.

За причините за основањето и за карактерот на Призренската лига има многу контрадикторни мислења.

Албанската историографија ја смета Призренската лига како израз на сеалбанското национално движење. Од друга страна, многумина сметаат дека Лигата на Призрен е форма на манипулација на албанскиот народ во водењето на балканската политика, бидејќи таа главно била инструмент на отоманската политика и политиката на европските сили.

Членовите на оваа група Албанци, избрани поради изразената лојалност кон Отоманската империја, биле вооружени од Портата и ги платиле патните трошоци за собирање во Призрен.

Призренската лига во суштина се засноваше на идејата за Голема Албанија, игнорирајќи ги правата на Србите и Грците. Агресивната антисрпска програма на Призренската лига трајно ги затегна односите меѓу Србите и Албанците.