Вчера во 08.45 часот во ОВР Прилеп, Е.Б.(25) од с.Десово, општина Долнени, пријавил дека околу 3 часот во неговиот двор во селото била фрлена експлозивна направа.

Полициски службеници од ОВР Прилеп извршиле увид и било констатирано дека била фрлена рачна бомба, од чија експлозија биле оштетени неколку прозорци од куќата и две патнички возила „фолксваген голф“ и „опел корса“ со прилепски регистарски ознаки, сопственост на Е.Б..

За настанот бил известен јавен обвинител и се преземаат мерки за расчистување на случајот.

The post Фрлена бомба во двор во Прилеп appeared first on Република.

Во ликовниот салон на Центарот за култура „Марко Цепенков“ во Прилеп синоќа беше отворена изложба на дела од ликовната колонија Дрен 2024. На изложбата се претставени 30 дела од уметници од земјава и од странство кои твореа на 16. колонија „Марко Цепенков - Дрен 2024“ што се одржа од 8 до 13 август 2024 г.

Каролина Мицевска, советник зa односи со јавноста во Центарот, на отворањето на изложбата посочи дека ликовната колонија Дрен, ни испраќа светлост во длабочината на нашите срца, што и е целта на самите уметници, кои годинава учествувајќи на колонијата, со многу љубов создадоа спонтани дела, кои ќе останат во трајна сопственост на Центарот за култура „Марко Цепенков“, на Прилеп, Македонија.

Отворајќи ја изложбата Викторија Димеска, историчар на уметност истакна дека на 16. издание на меѓународната ликовна колонија Дрен 2024 , учествуваа бројни уметници со моќен креативен потенцијал и особен сензибилитет, со посебни карактеристични артистички пориви и јасни уметнички визии и дека во суштина, се воочуваат неколку стилски правци : фотораеализам, надреализам, симболизам, енформел, асоцијативни апстракции и геометриска апстракција.
Посетителите ќе можат да ги видат делата од Петја Ѓеоргиева од Бугарија, Небојша Станков, Среќко Здравковиќ, Јована Ѓуриќ, Немања Вучковиќ, Милица Алимпиќ Илиќ од Србија, Радица Лелова Докузовска, Александар Таневски, Светлана Попова, Суарта Луфи, Ангел Коруновски, Валентина Стеваноска и Слободан Милошески од Македонија и прилепчаните Тони Чатлески, Марјан Стојаноски, Столе Дурланов и Никола Димески, Колонијата се реализираше со финансиска поддршка на Министерството за култура и туризам.

Со отворањето на изложбата и концерт на ФИА ТРИО, ЦК „Марко Цепенков“ одбележа 45 години од своето формирање.

The post Во ликовниот салон на Центарот за култура „Марко Цепенков“ отворена изложбата на дела од ликовната колонија Дрен 2024 appeared first on Република.

Немам што да дополнам на тоа што претходните говорници го кажаа. Ќе ја искористам оваа прилика да се заблагодарам на раководството на Тутунски комбинат АД Прилеп овде на пречекот.

Слушнавте и самите од тука се извезува на 9 пазари. Да се заблагодарам на пратениците од Прилеп коишто доаѓаат во македонското Собрание, коишто се борат секогаш и приоритет им се тутунопроизводителите од овој регион, Министерството за земјоделие, на министерот се разбира којшто е исто така врвен приоритет му се тутунопроизводителите како и впрочем сите земјоделци.

Очекувам овој период на консолидирање на тутунскиот комбинат Прилеп да е веќе позади нас. Состојбата од тоа што можев да видам е консолидирана и очекувам во годините коишто следат повеќе внимание да посветиме на развојот, на нови инвестиции, на зголемување на производството зошто да не овие 9 пазари да не бидат 18 пазари за некоја година од денеска. Тоа е она на коешто сите ние треба заедно да работиме и тоа е она за коешто оваа Влада ќе даде безусловна поддршка и очекувам овие услови да бидат дел од нашата заедничка соработка и во иднина.

Многу е направено и многу е постигнато во овие години, состојбата е консолидирана ајде сега сите заедно да работиме на развојот, тоа е она што е наш приоритет.

Така што тука ќе завршам бидејќи се што имаше да се каже кажаа претходните говорници, јас не би сакал да се повторувам.“

https://www.youtube.com/watch?v=zWCqDFKaC38

The post Мицкоски: Тутунски комбинат АД Прилеп извезува на 9 пазари, очекувам во следниот период зголемување на производството appeared first on Република.

Секое второ дете во прилепските градинки има проблеми со говорот и потребна е интервенција на логопед. Ова го покажуваат последните терстирања на децата од 4 до 6 години згрижени во градинките.

-Податоците се алармантни. Тестиравме околу 500 деца, згрижени во градинките и резултатите покажаа дека секое второ дете има проблеми со говорот, но за жал, во последно време и се зголемува проблемот со деца кои воопшто не зборуваат. Најчесто станува збор за една полиморфна дислалија, односно каде се опфатени фонемите и изговорот на Р, Л, потоа еден парасигматизам каде имаме замена на Ш и Ж, со С и З. Но за жал, најчесто, во последно време се појавуваат случаи на тотално отсуство на говор, една алалија каде што треба алармантно да се реагира од логопед и дефектолог, вели Даниела Пајмакоска Момироска, еден од двајцата логопеди кои работат со децата во прилепските градинки „Наша иднина“.

Според Пајмакоска Момироска, една од главните причини е – екранизацијата, или напредокот на технологијата, но и отсуството на поголем надзор на родителите над децата. Алармира на голема комуникација меѓу родител и дете.

-Живееме во нова технолошка ера, тоа е разбирливо. Но не може да им дозволиме на децата постојано да се изложени на телевизорите, таблетите, телефоните. Отсуствува комуникацијата родител-дете. Таа комуникација мора да се засили и не смеат младите да бидат пропуштени сами на себе. Затоа главната препорака е: родители, комуницирајте со децата. Зборувајте им и кога ги земате од градинка како го поминале денот, и кога сте дома со некои обврски, пак, разговарајте, комуницирајте, одговарајте на сите прашања на децата. Бидете упорни и кога не сакаат да зборуваат. Најдете време за своите деца, препорачува логопедот Даниела Пајмакоска Момироска, вработена во градинките „Наша иднина“ во Прилеп.

За родителот Габриела Стефаноска чие дете на петгодишна возраст е згрижено во детска градинка, мора да се обрне внимание на проблемот и не смее да биде табу тема.

-Моето дете има проблеми со изговорот на неколку тврди согласки. Работам со логопед во градинката, а и надвор од неа. Не сакам да има проблем поматаму, ниту да биде за потсмев меѓу врсниците или пак да се појави булинг. Ситуацијата со проблемите во говорот е алармантна. Во групата на моето дете од 35 деца, 30 посетуваат логопед. Не смее ова да биде табу тема и добро е што родителите се охрабруваат. Затоа, логопедот и помошта што може да ја добијат, топло им ја препорачувам, вели Стефаноска која има дете во училиште и со кое претходно работела посетувајќи логопед.

The post Секое второ дете во прилепските градинки има проблеми со говорот, покажуваат последните тестирања appeared first on Република.

Центарот за култура „Марко Цепенков“ го доби проектот за изградба на нов театар во Прилеп. Од Министерството за транспорт и врски се чека одобрение за градба, а од Министерството за култура и туризам средства за реализација во програмата за 2025 година.

Проектантите неодамна го завршија проектот и Центарот за култура „Марко Цепенков“ располага со комплетна ревидирана проектна документација од проектот за реконструкција со доградба и надградба на објектот наменет за обезбедување простор за потребите на театарот. Всушност, станува збор за два одделни проекти по барање на Министерството за транспорт и врски: еден е за реконструкција на постојниот објект на Центарот, а другиот е за доградба и надградба на постојниот објект, изјави Марија Попова Јованоска, в.д. директорка на Центарот за култура „Марко Цепенков“.

Реконструкцијата на објектот се однесува на содржинско збогатување и функционално редефинирање на просторот како и подобрување на постојната физичка состојба на просторот и замена на дотраените материјали и техничка опрема, а доградбата и надградбата се однесуваат на обезбедување целосно нов простор за потребите на театарот во рамките на Центарот за култура со претходно отстранување дел од просторните целини.

Театарот е предвиден да ги опфати просторните делови од сегашното кино „Мис Стон“, од „Арт“ кагулето и дел од ликовната галерија.

Двата дела, предвидената реконструкцијата и доградбата со надградбата, ќе делуваат како една содржинска целина, со можност за работа како самостојни целини во иднина, објаснува Попова Јованоска.

Центарот се обрати до Министерството за култура за да одобри финансиски средства за изградба на новиот театар во Прилеп во програмата за наредната 2025 година.

За овие два проекти веќе се обративме до Министерството за култура и туризам и побаравме да обезбеди финансиски средства за реализација и да ги одобри во годишната програма за изградба на нови објекти и реконструкција, санација и адаптација на постојните објекти што ги користат националните установи од областа на културата за 2025 година, рече Марија Попова Јованоска.

Според проектантите, за изградба на театарот ќе бидат потребни околу 18.000.000 евра, а за реконструкција на Центарот за култура околу 9.000.000 евра.

Проектант на проектите е Друштвото за производство, промет и услуги Архиум Љупчо ДООЕЛ увоз-извоз Скопје, а ревидент е Друштвото за проектирање и инженеринг Хидро градежен инженеринг Скопје.

За реализација на двата проекти од Министерството за култура и туризам беа одобрени 60.000 евра.

The post Прилеп доби готов проект за нов театар, се чекаат средства за изградба appeared first on Република.

Во ликовната галерија на Центарот за култура „Марко Цепенков“ во Прилеп синоќа беше отворена годишната изложба на членовите на Друштвото на ликовните уметници од Прилеп. Пред прилепската публика се претставија 16 ликовни уметници кои ги изложија своите дела.

Уметниците ги презентираа своите дела изработени во најразлични техники, материјали и форми. Публиката има можност да види слики, скулптури, графики односно творби кои се создадени во текот на годинава. Изложбата е традиционална и е дел од годишната програма на друштвото, поддржана од Министерството за култура и туризам, рече Методи Исков, претседател на ДЛУП.

На скулпторот Емил Солески Друштвото му додели награда за најдобро дело претставено на изложбата.

Изложбата е во рамките на одбележувањето на 3 Ноември, Денот на ослободувањето на Прилеп. 

The post Во Прилеп претставена годишната изложба на ДЛУП appeared first on Република.

Во ликовната Галерија во НУЦК „Марко Цепенков" во Прилеп, во петокот имаа можност да присуствуваат на отворањето на изложбата на слики „Нова димензија во создавањето 2" од академската уметница Александра Димитрова од Кочани, која за првпат пред прилепчани се претстави со 19 дела.

Уметницата Димитрова во нејзините дела визуелно манифестира сликарски автентични димензии и раскошни колоритни универзуми рече на отворањето Викторија Димеска, историчар на уметност.

Разновидните брановидни линии обврзуваат женски портрети, коишто суптилно се преобразуваат во симболични претстави со креативен наратив и емотивен поттекст. Многуликоста на разните контрастни линии дополнително пробудува бројни доживувања и чувствувања - рече Димеска.

Уметницата со делата раскажува свои визуелни наративи во кои посетителот ќе може да ужива.

The post Изложба на Александра Димитрова во Прилеп appeared first on Република.

Во Прилеп функционира советувалиште за лица зависници од коцкање и обложување. Советувалиштето, кое функционира во рамки на Клубот на лекувани алкохоличари, го посетуваат дванаесетина лица, од кои седум редовно.

Според клиничкиот психолог Јован Велески, кој работи со лицата во советувалиштето, станува збор за релативно млади луѓе, најмладото лице е 22-годишна девојка. Коцкањето има медицинска и социо-патолошка квалификација.

- Живееме во време во кое слободата на сопствената е една од поважните работи, кога личноста се чувствува слободно и може да троши пари или да располага со имотот во поголема мера како што сака. Меѓутоа, сето тоа треба да има позитивни импликации за околината и социјалното опкружување, без да направи каква било штета на другите. За жал, таа слобода на сопственоста не е добро дефинирана кај нас и тоа предизвикува многу негативни конотации во овие состојби, особено како што се зависноста од коцкање, злоупотребата на пари. Од нашето искуство кое го имаме од последнава година, заедно со примариус д-р Павлина Васкова, еден од националните координатори за болестите на зависности, направивме мала програма како да го регулираме терапискиот дел за лицата кои имаат каква било зависност од коцкањето. Тоа го правиме во склоп на здружението за болести на зависности, изјави Велески.

Во земјава ваквите состојби не се регистрирани како болест, иако според меѓународната квалификација на болести, оваа состојба спаѓа под нарушување на навиките и импулсите.

Во САД, оној што сака да игра на апарати и игри на среќа, се смета дека е негово ексклузивно право, но за да не прави негативни импликации на околината, треба да има месечна заработувачка од 55 000 долари. Во Европа таа сума е околу 36 000 евра месечна заработувачка. Ккај нас не е така поради што многу семејства страдаат зашто нивните членови прават големи непромислени потези.

Во Хрватска и Словенија напреднале во мерките за оваа зависност. На Клиниката која се занимава со зависности во Загреб има групи кои работат групна психотерапија, додека кај нас, во овој момент најбитно е терапијата да е индивидуална и да е дискретна. Некои доаѓаат сами, но, најчесто под притисок на семејството.

- Колку е помлада личноста, толку е поголема интервенцијата на терапијата и на психологот. Може поефектно да се насочи и да се контролира нејзиното однесување. Има четири техники на дејствување, најбитната е онаа на поддршка. Ова го кажувам за стручните лица во земјава да ги охрабрам да почнат да работат со овие категории луѓе, бидејќи овој проблем за брзо време ќе стане многу голем, можеби во рамките на болестите од психотропни супстанции и алкохолизмот, додава Велески.

Тој се надева дека во иднина Прилепската болница ќе ја сфати тежината на оваа зависност и ќе се ангажираат поголем број професионалци кои ќе се носат со овој, не само медицински, туку и социјален проблем.

- За ова е информирана и Комората на психолози на Македонија, а ќе биде информирано и Здружението на психијатри за да може да се направат специјални групи кои ќе се занимаваат со оваа проблематика. Земјите имаат регулатива и политика за овој проблем - да не се даваат брзи кредити за коцкање. САД, на пример, за овој проблем го измислиле Лас Вегас, посочува Велески.

Граѓаните бараат ригорозни контроли и големи даноци за поголемиот број коцкарници, казина и обложувалници. Освен во Прилеп, преку Здружението за броба против зависностите, советувалишта има и во Скопје и во Куманово.

The post Една година во Прилеп функционира советувалиште за зависници од коцкање appeared first on Република.

Баба вчера влегла кај внукот на час во училиште во Прилеп и недолично се однесувала кон него.

Мајката на ученикот вчера го пријавила случајот во полиција.

Во ОВР Прилеп, 44-годишна прилепчанка пријавила дека во основно училиште во Прилеп во кое учел нејзиниот малолетен син влегла неговата баба и за време на час недолично се однесувала кон него“, соопшти полицијата.

Полицијата презема мерки за расчистување на случајот.

The post Во Прилеп, баба влегла на час и недолично се однесувала со внукот appeared first on Република.

Со поклон и почит пред моштите на загинатите борци кои се во криптата на Могилата на непобедените во Прилеп, бројни делегации го означија чествувањето за празникот 11 Октомври - Денот на народното востание.

Според Рубинчо Белчески, претседателот на прилепскиот Сојуз на борци, тој победнички истрел кој се случил во Прилеп на 11 октомври 1941-та година не бил само симболичен чин. Тоа било автентично сведоштво на определбата на македонскиот народ да се истрае на Балканските ветришта и од почетокот на борбата до денот на победата- 9 мај во 1945 година, да биде на страната на антихитлеровската коалиција. Белчески испрати порака до новите генерации да се почитува историскиот влог на борците.

До новите генерации порачуваме да ја почитуваат државата, да ја почитуваме историјата, да ги почитуваме борците, бидејќи без минато нема иднина. Ако знаеме дека минатото дало многу жртви, и од тоа мора многу да учиме, а во иднината да ги применуваме позитивните аспекти од минатото, да ги паметиме и да не ги повториме грешките од минатото, изјави Белчески.

Владината делегација ја предводеше министерот за земјоделство Цветан Трипуновски. Тој рече дека нашата обврска е да ја одржуваме традицијата и да ги градиме добрососедските односи, зачувувајќи ја државата.

Денеска сме овде да ја зачуваме традицијата, да се потсетиме на минатото кое, практично е водилка и за иднината. Градиме единство, Македонија низ годините била кон непокор за да го има она што е денеска. Нашата обврска е да продолжиме да ја градиме традицијата, да ги одржуваме и сите добрососедски односи, но и нормално, да ја зачуваме нашата Република Македонија, изјави Трипуновски.

Според прилепскиот градоначалник Борче Јовчески, Прилеп – градот херој гордо стои како споменик на непокорот, храброста и борбата за слобода.

Се навршија 83 години од почетокот на борбата против фашистичката окупација во Македонија го покажува духот на нашиот народ кој ни остава една традиција да се надградуваме, односно секогаш со сплотеност и сложност да можеме да се спротивставиме на сите предизвици кои ја затекнаа нашата Македонија. Со изразувањето спомен за минатото не прекинуваме, туку продолжуваме со нашите обврски за сегашноста и за иднината, рече Јовчески.

На чествувањето присуствуваа и гости од повеќе здруженија на Словенија, Хрватска и Србија, почитувачи на придобивките одпоранешната заедничка држава, СФРЈ нагласувајќи дека треба да продолжи соработката меѓу државите на Балканот.

Денеска дојдовме со вас да го увеличиме вашиот празник и да ве поздравиме. Ја пренесуваме заложбата за трајното наследство од минатите времиња, а тоа е борбата против фашизмот. Тука се претставници од Ју-центарот „Тито“ од Белград и антифашистите од Словенија. Ова ново време бара нови облици на соработка, но постојат и темелни вредности. Сметаме дека темелна вредност е антифашизмот. Без тоа нема напредок. А постојат повеќе облици за соработка – култура, технологија, стопанство преку кои мора да соработуваме, рече Мио Миљак, потпретседател на здружението „Јосип Броз Тито“ од Пула, Хрватска.

Прилеп во Народното востание дал 650 борци и 10 народни херои. Уште пет народни херои што ги дал градот починаа по Ослободувањето за што се подготвува проект во Алејата на народните херои за покрај 10-те бисти да се постават уште пет.

The post Чествување на 11 Октомври во Прилеп со пораки да не се заборави минатото и да се гради иднината appeared first on Република.

Пратеникот и генерален секретар на ВМРО-ДПМНЕ, Ѓоѓија Сајкоски, по повод денешниот празник беше во посета на Прилеп.

Денес положивме свежо цвеќе кај мемориалниот комплекс – Могила на непобедените во Спомен паркот на револуцијата во Прилеп, со што им изразивме почит на сите храбри борци и херои што го дадоа животот за слободна и самостојна Македонија и ни оставија аманет да ја чуваме сувереноста и независноста на татковината и да се бориме за подобра и посветла иднина, истакна Сајкоски.

„Нека ни е честит 11 Октомври, Денот на народното востание, симболот на непокорот и слободарскиот дух на македонскиот народ“ – порача тој.

The post Сајкоски: Им изразивме почит на сите храбри борци и херои што го дадоа животот за слободна и самостојна Македонија appeared first on Република.

Во Прилеп продолжи традицијата на формирање на македонското знаме во срцето на градот. Годинава, 1.200 ученици од сите основни и средни училишта од Прилеп се здружија за nа плоштадот „Матодија Андонов Ченто“ да го формираат нашиот најголем национален симбол – македонското знаме, во чест на националниот празник 11 Октомври.

Оваа традиција, воспоставена во 2010 година, имаше прекин од пет години за време на пандемијата. Знамето, со димензии 24 на 12 метри, е формирано со учество на четири ученици од секој квадратен метар, кои доаѓаат од основните и средните училишта во градот и околината.

Ова е повеќе од перформанс – тоа е израз на нашата почит кон историјата, кон сите оние кои се бореле за слободата и независноста на Македонија. Симболично, преку овие млади генерации, ја негуваме љубовта кон татковината и ги всадуваме основните вредности на слободата, демократијата и почитта кон националните симболи. Нашата иднина е во рацете на овие млади луѓе, и затоа е клучно да ги учиме на важноста на историјата, на сплотеноста и љубовта кон нашата татковина. Со нивната енергија и ентузијазам, ние се движиме напред кон нови достигнувања, горди на минатото и полни со надеж за иднината, велат од Општина Прилеп.

The post 1200 ученици од Прилеп го формираа македонското знаме по повод 11 Октомври appeared first on Република.

Во вторник, на 8 октомври, од 19.30 часот во големата сала на Центарот за култура „Марко Цепенков“ целовечерн концерт ќе одржи универзитетскиот ансамбл Македонија. Концертот е дел од годишната програма на Центарот за 2024 година, поддржана од Министерството за култура и туризам.

Ансамблот „Македонија“ претставува репрезент на македонската традиционална култура при Музичката Академија на Универзитетот „Гоце Делчев“ - Штип. Единствен во државата, од ваков тип, ансамблот работи со кадар - професионалци кои се едуцираат низ споменатите институции. Со него раководат врвни професионалци и стручен кадар од областа на традиционална игра, традиционалните инструменти и пеење. Репертоарот на Ансамблот Македонија е категоризиран според орските и музичките стилски карактеристики обработувајќи сценски адаптации од сите играорни подрачја во Македонија: Западно; Југозападно; Јужно; Источно и Северно играорно подрачје. Орскиот репертоар или традиционалното играње се презентира преку обредната и соборската традиција како на пример:

Главно обележје на орскиот и музичкиот репертоар се сценско-уметнички сегменти од традиционалната културата како на Македонците, така и на останатите етноси во Македонија.

Ансмблот Македонија, е оформен 2012 година, и во краткиот временски период на активно творење реализираше голема турнеја во Јапонија во 2013 година турнеји и гостувања во Холандија, Бугарија, Германија, Србија, Турција, Полска, Литванија како и голем број на концерти во повеќе градови во Македонија. Во изминатите седум години ансамблот има реализирано повеќе од 500 концертни активности низ Македонија и светот.

The post Концерт на ансамбл „Македонија“ во Прилеп appeared first on Република.

Во организација на фото кино клубот „Прилеп“ викендов се одржува манифестацијата „Прилеп Фото Фест“. Манифестацијата синоќа беше отворена со две изложби на уметнички фотографи. Во фоајето од Центарот за култура „Марко Цепенков“ беше отворена изложбата на фотографии на Мери Бошкоска насловена „Црно-бели фрагменти“, а потоа и изложбата на Димитар Ристески со уметнички фотографии под наслов „Светот одозгора“.

Во градската библиотека „Борка Талески“се одржа фото работилница на која пред вљубениците на уметничката фотографија предавање одржа Александар Томовски, мајстор на фотографијата на НФУМ (Национална фото унија на Македонија). Во Библиотеката се прикажаа проекции на фотографии од автори од Македонија, Кралството Бахреин, Србија и Турција, а беше претставена и групната изложба на уметнички фотографии.

Фото кино клубот „Прилеп“ за учесниците на „Прилеп Фото фест“ денеска организира фото сафари во Крушево.

The post Во Прилеп се одржа „Прилеп фото фест“ appeared first on Република.

Во Прилеп, утрешниот ден се прогласува за Ден на жалост поради трагично загинатите медицински лица, кои утрово ги загубија животите во тешка сообраќајна несреќа на магистралниот пат Прилеп-Битола.

Одлуката беше донесена од страна на Советот на Општина Прилеп на вонредна седница.

The post Во Прилеп утре Ден на жалост по трагичната несреќа во која загинаа три медицински лица appeared first on Република.

Во ликовната галерија на НУЦК "Марко Цепенков" во Прилеп, е отворена изложбата на слики „Видување" од Анита Јовеска Сот. Уметницата на отворањето посочи дека верува во позитивната енергија, мисла и видување на секојдневието од еден друг агол, агол исполнет со боја и шаренило.

Таа мисла ме инспирира и движи понатаму, каде низ спектарот на бои и елементи ги прикажувам различностите во изразите на лицата, сите нивни емоции, со што на некој начин го отсликувам сопствениот автопортрет или трансмисија на своите чувства низ времето и процесот на работа, рече Анита Јовеска Сот.

Изложбата ја отвори м-р Викторија Димеска, историчар на уметност, која посочи дека восхитувачките портрети на Јовеска одразуваат исклучителен визуелен ансамбл извезен со лиричен сликарски сензибилитет и облагороден со личните индивидуални чувства на авторката.

Во раскошните експресивни композиции уметницата умешно ја обликува формата со примената на силни колоритни топло - студени и комлементарни контрасти за одразување на моќна чувствена изразност и драматичност, со употреба на контраст на линиите за создавање на динамична вибрантна ликовна содржина.Јовеска во сопствените лирични, автентични и драматични креации го создава единството во композицијата по пат на доминанта, поставувајќи акцент на емотивната експресија на портретот, рече Димеска.

Отворањето на изложбата, на кое присуствуваа голем број љубители на уметноста, беше збогатено со настапот на музичарите Андријана Дукоска и Борче Миленкоски.

The post Отворена изложбата „Видување“ на Анита Јовеска Сот во Прилеп appeared first on Република.

На плоштадот „Методија Андонов Ченто" во Прилеп вчера во 17.30 часот, полициски службеници од ОВР Прилеп го лишиле од слобода Н.Е.(30) од Прилеп, кој бил баран со потерница по издадена судска наредба од Основен суд Прилеп.

МВР денеска соопшти дека Н.Е. бил баран за издржување казна затвор во траење од една година. Лицето е спроведено во Казнено-поправната установа Затвор Битола.

The post Во Прилеп приведено лице барано со потерница appeared first on Република.

Вчеравечер во 23.40 часот во ОВР Прилеп било пријавено дека на ул.„Васко Карангелески“ во Прилеп, патничко возило „пежо“ со прилепски регистарски ознаки, управувано од А.Г.(20) од Прилеп, удрило во оградата од касарната „Мирче Ацев“.

Во несреќата со тешки телесни повреди се здобил малолетен сопатник од Прилеп, а со телесни повреди се здобиле возачот и двајца други малолетни сопатници од Прилеп, констатирани во болницата во Прилеп, сите од Прилеп, соопшти МВР.

Извршен бил увид од увидна екипа од ОВР Прилеп.

The post 20-годишник се заби во оградата на прилепската касарна, повредени четири лица appeared first on Република.

Прилепскиот Завод и музеј ги заокружува првите конзерваторски работи на агората, средиштето на античкиот локалитет „Стибера“ кај Прилеп. Агората е плоштадот и јадрото на стопанскиот и на културниот живот во античкиот град „Стибера“, најпознат по мермерните статуи. Агората е единствена градба од таков вид, откриена на тлото во Македонија.

Конзерваторските работи ќе се одвиваат во етапи.

Оваа година почнуваме со првата фаза на градба, согласно со проектот за конзервација и делумна реконструкција на агората, што е непосредно до храмот на божицата Тихе, заштитничка на Стибера. Во агората се најдени многу ексклузивни движни наоди. Еден од нив е мерната маса за течни продукти која беше изложена во Музејот на Македонија. Исто така, во едната ниша е пронајдена мермерна ара со натпис кој сведочи за нејзиното настанување и кој ја донирал мерната маса. Конзервацијата на вакви значајни објекти од античкиот период е многу комплексна. Многу е специфичен изборот на материјали. Годинава имавме среќни околности и е куриозитет да откупиме куќа која е правена со камен токму од Стибера и е од 1920 година. Дури најдовме и една монета, објаснува Кире Јованоски, архитект, конзерватор советник во прилепскиот Завод и музеј.

Стибера го имала најголемиот подем во првите три века од нашата ера. Досега се откриени градбите на Гимназиумот, на храмот на божицата Тихе, заштитничка на градот кој броел околу 20 000 жители, потоа Собранието, а агората е средишниот дел, јадрото, плоштадот каде се одвивале стопанските и културните активности и е единствена градба од таков вид откриена во Македонија.

Стибера е македонската Помпеја поради зачуваноста на големиот број артефакти, мермерни статуи. Административната зграда на агората е вид објект првпат откриен кај нас. Тоа бил градскиот плоштад каде покрај тоа што се вршела купопродажба на продукти и намирници, се одржувале манифестации и настани, јавни собири. Агората е центар, јадро, на секој антички град, смета архелогот Душко Темелкоски при прилепскиот Завод и музеј.

Минатата година првпат со опрема на Археолошкиот музеј на Македонија беше направено подземно сондирање, скенирање на тлото со што се потврди претпоставката дека на овој простор кај агората и плоштадот се наоѓаат уште неколку градби со различни функции. Но, најголем проблем се парцелите под кои „лежи“ градот, а се во приватна сопственост.

Во соработка со Министерството за култура, се надевам дека ќе излезат во пресрет, да можеме да добиеме поголеми средства за да се направи и откуп на дел од парцелите на кои е предвидено истражување. Во соработка со архелогот Душко Темелкоски ќе се направи соодветна документација и сета состојба да биде презентирана пред Министерството за култура за да се добијат поголеми средства за да може да продолжиме со работа и да се обезбеди просторот во кој ќе може да се извршат археолошките ископувања. Стибера е голем археолошки град со кој треба да се гордееме и да не бидеме во ситуација да го затвораме за туристите и туризмот зашто е атрактивен и привлекува големо внимание, објаснува в.д. директорката на прилепскиот Завод и музеј, Мимоза Христоска.

Проектот за конзервација е 1,7 милини денари. Сега се работеше со 500 000 денари буџет. Првите козерваторски работи завршуваат денес, а траеја 20-тина дена. Стибера привлекува големо внимание на посетители и туристи. Жителите на селото Чепигово сведочат за посета на туристи од Грција, Турција.

The post Прва конзервација на агората во античкиот локалитет „Стибера“ кај Прилеп appeared first on Република.

На 20.09.2024 во 17.45 часот во Прилеп, полициски службеници од ОВР Прилеп го лишиле од слобода Н.Н.(35) од Прилеп. При претрес во неговиот дом, извршен со судска наредба, биле пронајдени и одземени марихуана, бела прашкаста материја, различни таблети, грутчеста материја и дигитална вага.

Лицето било приведено во полициска станица и по целосно расчистување и документирање на случајот, против него ќе биде поднесена соодветна пријава.

The post Дома имал разни видови дроги, марихуанам дигитална вага: Уапсен 35-годишен дилер од Прилеп appeared first on Република.