Пратениците и во седмиот обид денеска не избраа претседател на 51. Народно собрание на Бугарија. Номинираните за функција повторно беа четворица пратеници, а овој пат до крајното гласање стигнаа Раја Назарјан (ГЕРБ-СДС) и Силви Кирилов („Има таков народ“), меѓутоа ниту еден од двајцата не го собра потребниот број гласови за да биде избран.

Во вториот круг, 118 пратеници го поддржаа Силви Кирилов, 103 беа „против“, а 17 воздржани. Во прегласувањето што го побара ИТН, тој доби 117 гласови за поддршка, 104 пратеници беа „против“, а 17 воздржани. Пред самото гласање пратениците од „Демократска Бугарија“ најавија дека ќе му дадат еднократна поддршка на Силви Кирилов за претседател на Собранието.

Раја Назарјан доби 69 гласа „за“, 159 „против“ и 10 „воздржани“.

The post Бугарските пратеници и во седмиот обид не избраа претседател на Народното Собрание appeared first on Република.

Албанските опозициски политичари запалија куп дрвени столчиња пред Собранието во знак на протест поради апсењето на нивниот колега.

На почетокот на редовната собраниска седница пратениците од опозицијата ги извадија столчињата од собраниската сала и ги запалија на скалите од зградата.

Припадниците на службата за безбедност брзо го изгаснале пожарот.

Апелациониот суд на Албанија во петокот ја потврди пресудата на понискиот суд со која Ервин Салијани, член на опозициската Демократска партија, беше осуден на една година затвор.

Понискиот суд го прогласи Салијани за виновен за „лажна пријава“ против поранешниот министер за внатрешни работи. Салијани ја негираше вината и рече дека судењето е политички мотивирано.

Претходно овој месец, водачот на Демократската партија Сали Бериша, кој е во домашен притвор од декември, беше обвинет за корупција за дејствија што ги презел додека бил премиер од 2005 до 2013 година. Бериша, исто така, ја негира вината.

Демократската партија повика на голем протест во главниот град Тирана на 7 октомври.

The post Пратеници запалија столчиња пред Собранието во Тирана appeared first on Република.

Од утре до 2 септември пратениците официјално ќе го користат годишниот одмор, кој годинава е со задоцнување поради ребалансот на Буџетот. Вообичаено пратениците секоја година се на одмор од 1 август до почетокот на септември.

Пратениците ќе бидат на одмор од 15 август до 2 септември, но бидејќи Собранието е во постојано заседание не се исклучува можноста да се свикаат седници на работните тела или пленарна седница доколку се работи за некој итен случај, велат за МИА од Кабинетот на претседателот на Собранието Африм Гаши.

Од почетокот на работата на овој параламентерен состав на 28 мај се одржани десетина седници, а последната беше вчера кога беа донесени измените на Законот за здравствена заштита и се укинаа економските директори.

The post Собранието до 2 септември ќе заседава само за итни потреби, пратениците од утре на одмор appeared first on Република.

„Нив не ги вознемирува и не ги задева никој, тие не се чинител! ДУИ со кибернетски електронски мејлови си се закануваат самите на себе, па го пријавуваат тоа во полиција! Тоа се нивни политички акробации!“ – изјави вицепремиерот Изет Меџити и лидер на Демократското движење во рамки на коалицијата Вреди. Ова го објави ТВ 21.

ТВ 21 ја цитира изјавата на Изет Меџити, дадена во овој контекст:

„Самите ги пишуваат тие електронски мејлови, па ги пријавуваат во полиција. Ним не им се заканувал никој се додека не беа во опозиција, а сега не се некој чинител, што може да го натера некого за закани кон нив. Тие мора да си се посветат самите на себе, мора да се реформираат. Треба да се огласуваат со нови идеи, а не со ваквите политички акробации преку електронски мејлови да се закануваат самите на себе и да го пријавуваат тоа во полицијата! Нив не ги вознемирува никој и не ги задева, тие не се чинител!“

https://republika.mk/vesti/crna-hronika/pratenitsite-dobile-zakana-deka-ke-im-se-nashteti-i-na-nivnite-semejstva/

The post Меџити: ДУИ самите си праќаат на себе заканувачки мејлови и пријавуваат во полиција! appeared first on Република.

На пратениците од ДУИ им биле испратени смртни закани на нивните е-мејл адреси. Освен заканите по нивниот живот, во пораката е напишано дека ќе им се наштети и на нивните семејства, а пораката завршува и со националистичка содржина за со зборовите “Чиста Македонија”. Заканувачките содржини се испратени до осум пратеници на ДУИ, од непознат испраќач, пренесе Фактор.

Случајот во четвртокот бил пријавен до МВР, од каде, пак, известија дека единицата за компјутерски криминал го расчистува случајот.

https://republika.mk/vesti/crna-hronika/nekolku-pratenitsi-dobile-zakanuvachki-sms-poraki/

The post Пратениците добиле закана дека ќе им се наштети и на нивните семејства appeared first on Република.

Претседателот на Собранието Африм Гаши денеска информира дека пратениците на ДУИ добиле електронски пораки со закани од непознат испраќач и апелира надлежните институции да го истражат инцидентот.

Вознемирен од овие пораки, како што информира собраниската прес-служба, претседателот Гаши веќе се обратил до колегите од ДУИ и до надлежните институции да го истражат инцидентот.

- Претседателот на Собранието најостро осудува секаков облик на закани, обиди за насилство или поттикнување насилство. Пратениците се директно избирани од граѓаните и додека слободата на говор е неприкосновена, таа не смее да ја загрозува слободата на другите. Анонимноста во испраќањето такви пораки или на социјалните мрежи може да му даде на испраќачот чувство на неказнивост, но мора да признаеме дека нашите институции се активни и способни. Претседателот Гаши е уверен дека испраќачот ќе биде идентификуван и соодветно санкциониран, стои во соопштението.

Во демократско општество, како што се наведува, нема место за закани, ниту за вознемирување во било која форма.

- Претседателот Гаши ги повикува и охрабрува сите надлежни институции веднаш да постапат во овој случај. Претседателот Гаши нагласува дека сочувствува и ја споделува вознемиреноста на пратениците и нивните семејства. Во моментот кога институциите ќе достават било каква информација за предметниот случај, медиумите ќе бидат веднаш известени од страна на Кабинетот на претседателот, се вели во соопштението.

Министерството за внатрешни работи синоќа информира дека на 25 овој месец во 13:58 часот во полициската станица „Центар“, претставник на една политичка партија пријавил дека на 23 јули 2024 година во 18:15 часот, од непозната електронска адреса, на службените електронски адреси на неколку пратеници во Собранието била испратена порака со заканувачка содржина.

Од МВР посочија дека за настанот е известена Единицата за економски и компјутерски криминал при СВР Скопје и дека се преземаат мерки за расчистување на случајот.

The post Гаши ги осудува заканите кон пратениците, апелира надлежните да го истражат инцидентот appeared first on Република.

Министерството за внатрешни работи информираше дека вчера во 13.58 часот во Полициската станица Центар, претставник на една политичка партија пријавил дека на 23.07.2024 околу 18.15 часот од непозната електронска адреса на службените електронски адреси на неколку пратеници во Собранието на РСМ била испратена порака со заканувачка содржина.

За настанот е известена Единицата за економски и компјутерски криминал при СВР Скопје и се преземаат мерки за расчистување на случајот.

The post Неколку пратеници добиле заканувачки СМС пораки appeared first on Република.

Пратениците во рамки на 11. седница вечерва едногласно со 81 глас „за“ го даде на натамошно читање Предлог на закон за изменување на Законот за здравствената заштита, во прво читање. Со овие измени се предвидува укинување на економските директори во 40 болници и јавно здравстевни установи. Собранието со 68 гласа „за“ и осум „против“ го донесе Предлог на закон за дополнување на Законот за катастар на недвижности.

Министерот за здравство Арбен Таравари истакна дека со поставувањето двајца директори во болниците се создал паралелизам и поголеми трошоци. Целта на законот, рече Таравари, е рационализација и поголема ефикасност. Подоцна во одговор на пратеникот Димитар Ковачевски од СДСМ, чија пратеничка група го поддржа законот, објасни дека ова е почеток на реформите што следуваат најавувајќи спојување на Клиничкиот центар во Скопје, но и дека секој град ќе има своја општа болница. Максимум за една година, додаде министерот за здравство, ќе има нов закон за здравствена заштита.

Ковачевски, кој беше премиер на претходната Влада, рече дека укинувањето на економските директори било дел и од анализа која неговата Влада ја спровела за рационализација во здравството.

Драгана Бојковска од ВМРО-ДПМНЕ истакна дека за овие 40 економски директори годишно се одвојувале 960.000 евра и уште толку за оперативни трошоци. Со овие средства, како што кажа, ќе може да се реконструираат или изградат нови здравствени домови и друго.

Со дополнувањето на Законот за катастар на недвижности ќе се овозможи зградата на ЕЛЕМ да стане Министерство за енергетика, рударство и минерални суровини.

Пратениците во рамки на 10 седница ја изгласаа и Одлуката за испраќање на припадници на Армијата на Република Македонија за учество во меѓународната операција на Организацијата на обединетите нации „УНИФИЛ“, во Република Либан.

The post Укинувањето на економските директори во болниците поддржано од сите пратеници, законот оди во второ читање appeared first on Република.

Откако претседателот на Собранието на Македонија ја известил Државната изборна комисија дека на пратениците Синиша Стојаноски и на Бобан Николовски, двајцата од коалицијата предводена од ВМРО-ДПМНЕ, им престанал пратеничкиот мандат, денеска комисијата соопшти кои се новите пратеници од листата на таа коалиција.

На седница Државната изборна комисијата информираше дека согласно чл. 153 ст.2 од Изборниот закон, ДИК со допис ги извести наредните кандидати од листите за кандидати за пратеници во Собранието на РСМ за ИЕ 1 и ИЕ 2 од коалицијата Твоја Македонија предводена од ВМРО – ДПМНЕ, Јане Мицевски и Малиша Станковиќ кои стануваат нови пратеници во Собранието на РСМ. Согласно ова, ДИК издаде уверенија за избрани пратеници во Собранието на Република Македонија, се вели во соопштението на ДИК.

Инаку, пратеничкиот мандат на Синиша Стојаноски и на Бобан Николовски заврши откако тие се назначени за директори – Стојаноски за директор на ГОБ „8 Септември“, а Николовски за директор на Царинска управа.

The post Двајца нови пратеници доби Собранието на местото на директорите Синиша Стојаноски и Бобан Николовски appeared first on Република.

Државната изборна комисија ја одржа 109–тата седница на која Комисијата го разгледа Известувањето доставено од Претседателот на Собранието на Република Македонија со кое информира дека Собранието на седницата одржана денеска констатира дека на избраните пратеници Синиша Стојаноски и Бобан Николовски од Коалицијата „Твоја Македонија“ предводена од ВМРО- ДПМНЕ им престанува мандатот на пратеници согласно чл. 152 од Изборниот закон.

Синиша Стојаноски е назначен за нов директор на ГОБ „8-ми Септември“, а Бобан Николовски за директор на Царинската управа.

На местото на Стојаноски и Николовски во Собранието ќе бидат Јане Мицевски и Малиша Станковиќ.

На седницата, Комисијата информираше дека согласно чл. 153 ст.2 од Изборниот закон, ДИК со допис ги извести наредните кандидати од листите за кандидати за пратеници во Собранието на РСМ за ИЕ 1 и ИЕ 2 од Коалицијата „Твоја Македонија“ предводена од ВМРО - ДПМНЕ, Јане Мицевски и Малиша Станковиќ кои стануваат нови пратеници во Собранието на РСМ. Согласно ова, ДИК издаде уверенија за избрани пратеници во Собранието на Република Македонија, соопштија на денешната седница членовите на ДИК.

The post Јане Мицевски и Малиша Станковиќ се нови пратеници на местото на Синиша Стојаноски и Бобан Николовски appeared first on Република.

Собранието денеска на осмата седница треба да ги верификува мандатите на новите пратеници кои доаѓаат на местата на премиерот Христијан Мицкоски и на неколкумина новоизбрани министри.

Пратеници стануваат Драган Недељковиќ, Велика Стојкова Серафимовска, Сергеј Попов, Емилија Ангелова, Весна Ѓорѓиева и Дијана Илиевска од коалицијата предводена од ВМРО-ДПМНЕ, Фериде Хаџиу и Каљтрина Хаџиу од коалицијата Влен.

Тие доаѓаат на местата на Мицкоски и на минустрите Гордана Димитриеска Кочоска, Љупчо Димоски, Изет Меџити, Владо Мисајловски, Иван Стоиљковиќ, Александар Николоски и Фатмир Лимани.

The post Собранието ќе ги пополни местата на пратениците кои станаа министри appeared first on Република.

29 пратеници од минатиот состав бараат апанажа, да седат дома и да земаат плата од државата, пишува ТВ21.

Во продолжение погледнете го списокот за кои пратеници станува збор.

The post 29 пратеници од минатиот состав бараат апанажа appeared first on Република.

„Многу храбро вака на Фејсбук“, „Што не го кажавте ова на говорница?“, „Зошто сте пратеничка“, се само дел од коментарите кои граѓаните ги оставија под статусот на пратеничката од СДСМ и довчерашната министерка за култура Бисера Костадиновска Стојчевска, преку кој таа порача дека новиот собраниски спикер Африм Гаши го прекршил Уставот и Законот за македонски јазик со тоа што заклетвата ја даде прво на македонски, а потоа на албански јазик.

Покрај македонскиот јазик, втор официјален јазик е албанскиот, но нема полоша политика од тоа јазиците да ни станат методи за политичка пропаганда. Затоа, да се почитуваме, да си ги почитуваме Уставот, државата, законите, различностите и особеностите, порача меѓудругото Костадиновска Стојчевска.

Но, не од собраниската говорница за време на конститутивната седница, туку преку „Фејсбук“.

Тоа што ни таа и ниту еден од нејзините сопартијци од СДСМ кои добија пратенички мандати во новото Собрание не се јавија за збор и не станаа ни еднаш да учествуваат во дискусијата која се водеше вчера, ги разлути и граѓаните, но и останатите членови на СДСМ.

Прво реагираше Андреј Петров, кој ги прозва јавно во вестите на „Сител“ велејќи рече дека „го изело срам“ од однесувањето на пратениците од СДСМ, а му се придружија и многу други сопартијци.

https://republika.mk/vesti/makedonija/dechki-aj-po-doma-dosta-beshe-im-poracha-kichevski-na-sopartijtsite-pratenitsi-od-sdsm/

The post „Дремевте ко мисири, што не го кажа ова на говорница?“ ѝ порачаа граѓаните на статусот на Костадиновска Стојчевска appeared first on Република.

И Васко Кичевски се приклучи кон критиките од членовите на СДСМ до сопартијците-пратеници, за нивниот вчерашен молк за време на конститутивната седница на Собранието.

Замислете пратеник на најголема опозициона партија кој сака да стане претседател на таа партија, а нема храброст да стане да зборува на ден на конституирање на собрание. Дечки ај по дома доста беше!, вели Кичевски.

Дека ниеден од пратениците на СДСМ не се јави за збор, прво реагираше Андреј Петров, кој ги прозва јавно во вестите на „Сител“ велејќи рече дека „го изело срам“ за нивното однесување.

https://republika.mk/vesti/makedonija/andrej-petrov-me-izede-sram-shto-denes-nikoj-od-pratenitsite-na-sdsm-ne-zede-zbor-na-sednitsata-na-sobranieto-toa-ne-e-mesto-kade-shto-treba-da-sedat-kutolozi/

Критики упати и Стефан Богоев, чие име се споменува меѓу можните кандидати за претседател на партијата, која бира нов лидер на 30 јуни.

https://republika.mk/vesti/makedonija/po-andrej-petrov-i-stefan-bogoev-so-komentar-pratenitsite-treba-da-znaat-deka-se-izbrani-od-narodot-za-vo-sobranie-da-argumentiraat-i-diskutiraat-a-ne-da-se-slikaat-i-da-molchat/

The post „Дечки, ај по дома, доста беше!“ им порача Кичевски на сопартијците пратеници од СДСМ appeared first on Република.

Потпретседателот на СДСМ – Стефан Богоев попладнево на социјалните мрежи ја коментираше денешната седница во Собранието на која се верифицирани мандатите на пратениците, а на која Африм Гаши (коалиција ВРЕДИ) е избран за собраниски спикер.

Според Богоев, пратениците треба во Собрание да дискутираат, а не да молчат и да се сликаат.

The post По Андреј Петров и Стефан Богоев со коментар: Пратениците треба да знаат дека се избрани од народот за во Собрание да аргументираат и дискутираат, а не да се сликаат и да молчат! appeared first on Република.

Андреј Петров од СДСМ во денешното гостување на Сител телевизија рече дека го изел срам што денес никој од пратениците на СДСМ не зел збор на седницата на Собранието.

За жал, малку и срам ме изеде заради однесувањето на СДСМ на таа седница бидејќи никој не стана да каже ништо, а веројатно требаше да им каже на новите коалициони партнери во власта дека сега може да биде Претседател на Собрание, што не го спорам, човек што има два пратеници во Собранието и што не е од македонска етничка група, што исто така не е спорно, но до пред извесен момент беше спорно за тогашната опозиција. Никој од тамошните пратеници од СДСМ не смогна сила да каже и тоа да ви кажам кај мене предизвика чувство на срам, рече Петров.

Според него, едно е да бидете конструктивни, и треба да биде опозицијата конструктивна, затоа што државата е пред партиите и треба заеднички да ја градиме.

Ама работата на пратеник во Парламентот е да зборува на говорница. Ако некој нема намера да зборува на говорница наместо да поднесува оставки од партиските органи, да си поднесе оставка од пратеничкиот мандат. Тоа е мојата порака до сите оние што наоѓаат причина зошто не би требале да зборуваат. Точно дека на конститутивна седница треба да се има респект и спема чинот и спрема изборот на Претседател на Собрание, меѓутоа барем еден човек или двајца да ги кажат овие забелешки што ви ги кажав на почетокот и ред други работи. Демократскиот амбиент тоа иманентно го бара, тоа не е место каде што треба да седат ќутолози, истакна Петров.

The post Андреј Петров: Ме изеде срам што денес никој од пратениците на СДСМ не зеде збор на седницата на Собранието, тоа не е место каде што треба да седат ќутолози appeared first on Република.

„Како претседател на УМС на ВМРО-ДПМНЕ сум исклучително задоволен што успеавме заедно со сите млади луѓе најпрвин да ја победиме апатијата околу тоа дека воопшто не треба да се учествува во политика и дека политиката е нешто гнасно“, истакна Сергеј Попов, претседател на УМС на ВМРО-ДПМНЕ во емисијата „24 Отворено“ на 24ТВ.

И затоа младите луѓе во рекорден број масовно излегоа на овие избори. Младите луѓе сепак на овие избори излегоа и гласаа, заклучи тој.

Попов додаде дека младите луѓе ја препознаа искрената понуда на ВМРО-ДПМНЕ и за нејзе гласаа.

ВМРО-ДПМНЕ имаше искрена понуда, таа не беше поткрепена на лажни ветувања. ВМРО-ДПМНЕ имаше понуда на она што е реално и она што може да се направи“, нагласи тој.

Тој посочи дека младите можат да бидат на сигурно со ВМРО-ДПМНЕ.

Кога зборуваме за вклученост на младите луѓе во политика и за новиот парламентарен состав сакам да истакнам дека ние како млади политичари цело време бараме да бидеме што е можно повеќе вклучени во Парламентот, Советите итн. Но, мислам дека е многу поважно кога ќе влеземе таму да покажеме што знаеме“, рече Попов.

„УМС на ВМРО-ДПМНЕ под мое раководство изминатите три години поднесовме над 10-тина амандмани во Собранието на Република Македонија преку нашата пратеничка група за сите прашања релевантни за младите луѓе имавме реакција. Но, најважно од се пробувавме работите да ги решаваме институционално“, потсети тој.

Попов нагласи дека младите пратеници од ВМРО-ДПМНЕ ќе останат да се партнерот на младите, ќе ги решаваат младинските проблеми од реалниот живот кон македонските институции, а во оваа ситуација тоа е македонскиот Парламент.

The post Попов: Нашите пратеници ќе ги решат проблемите на младите appeared first on Република.

Мандатот на новиот собраниски состав што беше избран на вчерашните парламентарни избори, почнува да тече од конститутивната седница на Собранието. Според одредбите од Уставот, новоизбраното Собрание се состанува на конститутивна седница најдоцна 20 дена по одржаните избори. Конститутивната седница ја свикува претседателот на Собранието од претходниот состав.

Доколку не се закаже конститутивна седница во предвидениот рок, пратениците сами се состануваат и го конституираат Собранието на дваесет и првиот ден од денот на завршувањето на изборите.

Собранието го сочинуваат од 120 до 140 пратеници. Пратениците се избираат на општи, непосредни и слободни избори со тајно гласање. Пратеникот ги претставува граѓаните и во Собранието одлучува по свое уверување.

Избори за пратеници во Собранието се одржуваат во последните 90 дена од мандатот на стариот пратенички состав или во рок од 60 дена од денот на распуштањето на Собранието.

Пратениците во Собранието се избираат за време од четири години. Мандатот на пратениците го верифицира Собранието. Мандатот на пратениците во Собранието може да се продолжи само во случај на воена или вонредна состојба.

Со закон се утврдува неспојливоста и неизбирливоста на функцијата пратеник во Собранието со вршење на други јавни функции или професии. Собранието се распушта ако за тоа се изјасни мнозинството од вкупниот број пратеници.

The post Новиот состав на Собранието треба да се конституира најдоцна 20 дена по изборите appeared first on Република.

Вкупно 2 356 гласови изнесува разликата да се стане пратеник во Изборна единица 6 каде се потребни 6 662 гласови и Изборна единица 1, каде се потребни најмногу гласови на граѓаните, односно 9 018. Во случај на една изборна единица секој од 120-те пратеници би вредел по 8 088 гласа.

Ова го покажува анализата на МИА на вкупниот број на гласови што партиите ги освоија во секоја од шестте изборни единици на Парламентарните избори 2024 година поделени со бројот на мандати.

Во Изборна единица 2, еден пратеник чини 8 577 гласови, нешто помалку во Изборна единица 3 – 8 035 гласови и 8 264 во Изборна единица 4.

Изборна единица 5 е местото на кое еден пратеник се добива со 7 959 гласови на граѓаните.

Симулацијата на изборните резултати од Парламентарните избори 2024 година, според Донтовиот модел, доколку цела држава би била Една изборна единица, покажуваат дека ВМРО-ДПМНЕ би имале два помалку од освоените мандати, односно 56, СДСМ плус еден (19), ДУИ два помалку, или 17, Вреди исто како и сега – 13, Левица плус два пратеници (8) и ЗНАМ еден повеќе, или седум пратеници. Во случај на една изборна единица секој пратеник би вредел по 8 088 гласа.

The post Пратеник во ИЕ6 се станува со 6.662 гласови, во ИЕ1 со 9.018 appeared first on Република.

Независниот пратеник Константинос Флорос, кој беше избран со малата радикално десничарска партија Спартанци, претпладнево физички го нападнал пратеникот од партијата Грчко решение, Василис Граменос во Парламентот, пред салата во која се одржува пленарната седница, јави дописничката на МИА од Атина.

На инцидентот му претходела вербална расправија во самата сала, што во ходникот се претворила во физичка пресметка, кога Флорос со тупаници го нападнал Граменос.

На нападнатиот веднаш му била пружена прва помош од лекарот во Парламентот.

Медиумите во Грција коментираат дека станува збор за инцидент без преседан во Парламентот.

Претседателот на Парламентот Константинос Тасулас за насилното однесување на пратеникот побара највисока казна предвидена со правилникот на работа, односно исклучување на Константинос Флорос од Парламентот на 15 дена, а паралелно ќе биде побарано и одземање на пратеничкиот имунитет и кривично да одговара.

Флорос на изборите во јуни минатата година беше избран со малата радикално десничарска партија Спартанци, која подоцна ја напушти и стана независен пратеник.

Спартанци се поврзува со поранешниот пратеник од Златна зора, Илиас Касидиарис кој издржува затворска казна

The post Двајца пратеници во Грција се истепале пред пленарна седница appeared first on Република.