Министерството за надворешни работи официјално и препорача на Владата дека треба да се прифати предлогот на Европската Унија, вклучувајќи го ставот на експертите, вели министерот за надворешни работи, Бујар Османи.

Мислам дека разговорите денеска беа отворени и транспарентни, се надеваме дека ќе го заокружиме брзо овој процес, рече Османи во емисијата „Топ Тема“ на телевизија Телма.

Тој додаде дека не смета оти овој предлог е идеален, но, како што рече, ни овозможува после 17 години влегување и фаќање на последниот воз за пристап во ЕУ.

Се разбира дека секое решение, предлог, којшто треба да задоволи две страни е компромисен и дека не е идеален само за едната страна, било кој предлог ќе треба да ги остави двете страни подеднакво задоволни или незадоволни. И за овој предлог мислам дека не е идеален, но дека ни овозможува после 17 години влегување и фаќање на последниот воз за пристап во ЕУ – рече Османи.

Министерот потсети оти бугарските позиции беа дека не треба да има македонски јазик во ЕУ и дека треба да има поглавје 35 во кое сите барања на Бугарија ќе бидат таму.

Ние сега имаме рамка во која има чист македонски јазик кој станува официјален јазик на ЕУ без никакви додавки, квалификации. И со тоа после децении се завршува прашањето на македонскиот јазик. Мислам тоа е најголемата добивка, најголемиот успех. Најголемата победа на овој предлог е што засекогаш се затвори меѓународното оспорување на јазикот – рече Османи, додавајќи дека ова е можеби последниот воз за членство во ЕУ.

Османи посочи дека во делот на фундаменталните прашања во последниот предлог, каде се патоказите по кои мора да одиме, единствено имало акциски план за човекови права кој, според него, апсолутно не е спорен и во кој Македонија ќе дозволи почитување човекови права на сите етнички заедници, не само Бугарите.

Нема ништо спорно во тој дел – рече Османи.

The post Османи: Предлогот не е идеален, но со него го фаќаме последниот воз за ЕУ appeared first on Република.

Режисерот Вуди Ален, кој и во поблиското минато се соочи со обвиненија за сексуална злоупотреба на неговата посвоена ќерка, изјави оти оваа есен ќе сними нов филм во Париз, Франција, и дека тој би можело да му биде последен.

Во инаку реткото интервју преку видеоврска, режисерот разговара со глумецот Алек Болдвин за својата кариера и новата книга „Нулта гравитација“ (Zero Gravity) – збирка хумористични есеи.

Голем дел од возбудата исчезна, вели Ален за снимањето филмови. – Кога ќе снимав филм порано, тој одеше во кината ширум земјата… Сега снимаш филм и добиваш неколку седмици в кино – можеби шест недели, или четири недели, а тоа потоа оди на стрим или плаќање по преглед на малите екрани – тоа не е задоволство за мене!, додаде тој.

Вуди Ален (86) не кажува подробности за новиот филм, којшто инаку ќе биде негов 50-ти, јубилеен кинопроект.

Инаку награден со вкупно четири „Оскари“, режисерот на „Ени Хол“ и други комедии постојано ги порекнуваше наводите дека ја злоставувал својата посвоена ќерка Дилан Фароу во 1992 година. Многу познати личности во Холивуд, сепак, се дистанцираа од него откако движењето против сексуално недоличното однесување – „#МеТоо“ зеде светски замав од 2017 година.

„Ејч-би-о“ ги преиспита обвинувањата против Ален во минисеријата од 2021 година под наслов „Ален против Фароу“.

The post Вуди Ален есенва во Париз ќе го снима последниот филм appeared first on Република.