Минатогодишниот попис на населението во Црна Гора покажа дека секој четиринаесетти граѓанин не живее во оваа земја или секој тринаесетти, ако се исклучат странците вклучени во пописот, јавија црногорски медиуми.

https://republika.mk/vesti/makedonija/pretsedatelkata-silanovska-davkova-vo-ofitsijalna-poseta-na-tsrna-gora/

Според конечните податоци од пописот на населението во Црна Гора, од 623.633 лица со вообичаено место на живеење, 44.017 живеат или работат во странство.

Дирекцијата за статистика на Црна Гора (Монстат) претходно објави дека најголем број од нив студираат, живеат или работат во Германија, а порталот Банкар објави анализа колку жители на црногорските општини живеат во странство во однос на вкупниот број, а кои се државите најатрактивни за работа и кои за образование и кои се најчестите причини зошто го напуштиле родното место.

Според таа анализа, општина Петњица има повеќе жители во странство отколку во таа општина. Од 5.552 жители на Петњица, колку што е изброено минатата година, 3.271 од нив живеат, работат или студираат надвор од својата општина. Тоа практично значи дека во таа општина живеат само 2.281 жители.Најголем број од нив има во Луксембург, речиси секој втор жител на оваа општина, односно 1.580 од нив. Околу 600 се во Германија, додека Швајцарија, Франција и Словенија се меѓу најчестите дестинации што ги избираат жителите на таа општина.

Втор град со најголем број жители кои живеат во странство е Гусиње. Од 4.662 граѓани, 1.032 живеат во странство, односно речиси секој четврти, а најголем дел се во САД.

Од вкупно 44.017 жители на Црна Гора кои живеат, работат или студираат во странство, повеќе од десет илјади се во Германија, односно секој четврти. Повеќето од нив се жители на Бијело Поље и Рожаје.

The post Секој шести жител на Црна Гора регистриран на пописот живее во странство appeared first on Република.

Според резултатите од пописот одржан во декември минатата година, најмногу граѓани на Црна Гора се изјасниле како Црногорци - 41,12 отсто (256.436). По нив следат Србите со 32,93 отсто (205.370), додека 9,45 отсто од граѓаните (58.956) се изјасниле како Бошњаци.

Мнозинството граѓани го зборуваат српскиот јазик, додека во Црна Гора живеат вкупно 623.158 жители.
4,97 отсто од граѓаните (30.978) се изјасниле како Албанци, 2,06 отсто (12.824) како Руси, а 1,63 отсто (10.162) како муслимани.

Според прелиминарните резултати од пописот, во Црна Гора живеат 623.158 жители, што е за два отсто повеќе од 2011 година.

Мнозинството граѓани се идентификуваат како Црногорци и Срби

Според пописот од 2011 година, Црногорците биле, исто така, најмногу 44,97 отсто (278.865), Србите 28,72 отсто (178.110), Бошњаците 8,64 отсто (53.605), Албанците 4,9 отсто (30.439), муслиманите 3,35 (6, 25 отсто), 20 отсто ), а Хрватите 0,97 отсто (6.021).

Според податоците од пописот, 43,18 отсто зборуваат српски, 34,52 отсто црногорски. Повеќе граѓани на Црна Гора се изјасниле дека зборуваат српски јазик, покажаа резултатите од пописот.

Црногорскиот јазик го зборуваат 215.299 граѓани, а српскиот 269.307 граѓани.

The post Ќе бара ли ЕУ Рамковен и за Црна Гора: Повеќе се зборува на српски отколку на црногорски јазик, покажа пописот appeared first on Република.

Црногорскиот завод за статистика (Монстат) денеска ќе презентира дел од конечните резултати од Пописот на населението, домаќинствата и становите во Црна Гора, што беше спроведен на крајот на минатата година по двегодишно доцнење.

Како што соопшти Монстат, на прес-конференцијата ќе бидат презентирани резултатите од населението според пол и возраст, државјанство, национална или етничка припадност, вероисповед, мајчин јазик и јазик што вообичаено се зборува.

The post Како да се Кинези: Денеска ќе се објават резултатите од пописот во Црна Гора, се броеја две години appeared first on Република.

Пренесувајќи го ставот на најголемата албанска опозициска партија, Демократската, пратеничката Ина Жупа, рече дека резултатите од пописот од 2023 година не ги признаваат бидејќи се манипулирани.

Според Жупа, Владата интервенирала во Пописот со тоа што не ја покажала реалноста а споредбата со податоците на Евростат „покажуваат дека пописот бил изманипулиран по барање на владата"

Посочи дека Пописот од 2023 година навистина не ја покажува состојбата на населението во Албанија, правејќи споредба на податоците на ИНСТАТ и оние на Евростат.

- Споредбата на податоците дадени од Евростат за Албанија, велат дека има 900 илјади албански граѓани, кои меѓу двата пописа ја напуштиле земјата. Но, тоа се само во земјите од Европската Унија, почнувајќи од оние кои имаат дозвола за престој, од оние кои бараат азил, односно целиот опсег, не вклучувајќи ги оние кои се во Велика Британија, САД или Канада. Деветстотини илјади не ги одразуваат податоците што ги покажува ИНСТАТ, кој тврди дека станува збор за 400 илјади, додаде таа.

За демократите има и други индиции кои го прават пописот неверодостоен.

-Прелиминарните резултати секогаш се објавуваа во рок од два месеца, а конечните резултати во рок од 6 месеци а сега прелиминарните по 8 месеци а конечните е најавено за наесен. Од ИНСТАТ велат дека за 12 години во Албанија се изградени само 70 илјади станови. Значи, ИНСТАТ не ги гледа овие кули, овие палати, овие градби на крајбрежјето, овие одморалишта, овие резиденции? За попишувачите  се набавија таблети, а пописот се правеше со хартиени формулари, обвини Жупа.

Претходно пописните резултати не ги признаа албанската афтикефална православна црква и католичката црква, бидејќи сметаат дека бројките во однос на верската припадност не се реални.

Со заедничка декларација пописните резултати не ги признаа и осум од девет малцинства (освен бугарското) признати со законот од 2017, Македонците, Грците, Власите, Србите, Црногорците, Бошњаците, Египќаните и Ромите, поради, според нив, нереалната бројка по етничка припадност и јазик

The post По сите малцинства сега и Демократите во Албанија не ги признаваат резултатите од пописот appeared first on Република.

Агенцијата за статистики на Косово (АСК) ги објави денеска прелиминарните резултати од пописот на населението, според кои Косово има 1.586.659 резидентни жители, од кои 795.046 се мажи, а 791.614 се жени, јави дописникот на МИА од Приштина.

Досега, како што информира вршителот на должноста директор на АСК, Авни Кастрати на прес-конференција на која присуствуваа премиерот Албин Курти, министри, градоначалници и амбасадори, регистрирани се и околу 600 илјади нерезидентни жители.

Соодносот на половите не е променет и останува ист, односно жени се 49,90 отсто а мажи 50,10 отсто.

Само во девет од 38 општини има зголемување на бројот на жители, додека во другите 29 има намалување.

Според првичните податоци, просечната возраст на населението е 34,82 години.

Според АСК, има намалување на бројот на жители во возрасната група од 0-15 години и зголемување на бројот на жители над 64 години.

Густината на населеност, според АСК, е 145,5 жители на еден квадратен километар.

Општини со најголема густина се Косово Поле со 762 жители на квадратен километар, Мамуша со 513 жители и Приштина 434 жители на квадратен километар.

Просечниот број на членови во едно домаќинство во 2024 година е 4,5 жители.

Според АСК, во четирите северни општини на Косово, населени со мнозинско срспко население - Лепосавиќ, Зубин Поток, Звечан и Северна Митровица, имало масовен бојкот, но дел од жителите биле попишани.

Премиерот Албин Курти по повод објавувањето на податоците рече дека тие се мошне значајни за носење одлуки во иднина.

Без точни податоци, без статистики, и одлуките ќе бидат неточни. Во демократијата, носењето политички одлуки е многу важно. Горд сум како премиер на посветеноста и заложбите на оние кои учествуваа во овој процес. Јас лично за кратко време неколку пати разговарав со АСК за да ја дадам мојата поддршка. Европската унија, УСАИД се потпираат на други статистички податоци за да донесат други одлуки. Оваа посветеност ја зголемува интеграцијата на меѓународната сцена. Моќна агенција за статистики која обезбедува важни статистики е драгоцена агенција за земјата -рече Курти.

Вршителот на должноста директор на АСК, Кастрати, истакна дека целиот процес на попис бил дигитален.

Според него, податоците се објавени за резидентните жители но и за дијаспората. Тој рече дека процесот на попис за дијаспората ќе продолжи до крајот на август и ги повика иселениците да ја искористат можноста за попишување.

Кастрати најави дека конечните резултати од процесот ќе бидат објавени во декември годинава, но тие „не се очекува да се разликуваат многу од прелиминарните“.

Годинешниот попис на населението се одржа од 5 април до 24 мај, а според претходниот, одржан во 2011 година, во Косово имало 1.739.825 резидентни жители

The post Косово има 1.586.659 резидентни жители, според прелиминарните резултати на пописот appeared first on Република.

Македонско друштво „Илинден“-Тирана утврди Декларација против резултати од пописот во Албанија спроведен од 18 септември до 30 октомври, а во одделни делови продолжен до 16 ноември 2023 година.

Во декларацијата стои дека друштвото ги отфрла прелиминарните пописни резултати поради „фалсификат на бројот на етничките Македонци, со грубо мешање во внатрешните работи на Албанија од страна на бугарската амбасада во Тирана, Владата во Софија и неколку фондации од Бугарија, пред и за време на пописот".

Во Албанија „етнички Бугари“ нема. Во ниту еден попис не постои макар и еден „Бугарин” на целата територија на Албанија. Исто така најостро ја осудуваме злоупотребата на терминот „северномакедонци“ од Институтот за статистика и употребата на име на земја како супститут за македонската етничка заедница, веќе призната во Албанија, се наведува во декларацијата.

Се посочува дека и покрај постојаното алармирање пред јавноста и институцииите на власта на Албанија, во текот на цела година, за очигледните подготовки за пописен фалсификат, ништо не е сторено.

Изразуваме жалење и разочараност поради незаинтересираноста на албанската Влада за грубото мешање на Бугарија во внатрешните работи на Албанија со цел денационализација и асимилација на Македонците во областите и местата каде што живеат. Жалиме што албанската Влада не презеде мерки за заштита на правата и слободите на Македонците во Албанија, стои во декларацијата.

Друштвото ќе и предложи на Федералната унија на европските националисти (ФУЕН), каде е постојана членка, со посебна резолуција да го отфрли пописот во Албанија како груб фалсификат со огромен број на нерегуларности.

Исто така се посочува фактот дека Македонците и другите национални малцинства во Албанија, не го прифаќаат пописот од 2023 година и бараат нов попис на населението во согласност со меѓународните стандарди на ООН и ЕУ, заради „елиминација на двојното попишување на населението во Албанија и манипулација со бројките на националните малцинства".

Ги повикуваме на обединување и единство сите македонски здруженија и партијата, Македонска алијанса за европска интеграција, заради одбрана на идентитетот на Македонците, против обидите за денационализација и асимилација на Македонците во „Бугари“ од страна на Владата во Софија, повикува друштвото.

Декларацијата, ќе биде доставена до албанскиот Парламент, Владата, претседателот на државата, Државниот институт за статистика и Народниот правобранител, до македонскиот претседател, Собранието и Владата, како и до Европската Унија, Советот на Европа, ОБСЕ, ФУЕН и странските амбасади акредитирани во Албанија.

Декларацијата е потпишана од претседателот на друштвото, Никола Ѓурѓај, на ограноците за Голо Брдо, Фатри Фетаху, за Округот Елбасан, Елса Џелили, како и генералниот координатор друштво за татковината Македонија, Ламбе Шатровски, додаваат од Македонско друштво „Илинден“-Тирана.

The post Декларација на МД „Илинден” против пописните резултати во Албанија и повик за семакедонско обединување appeared first on Република.

Македонското и другите малцинства во Албанија најавија дека ќе излезат со заедничка декларација за непризнавање на резултатите од пописот во оваа земја и официјално ќе побараат нов попис.

Подготвуваме заедничка декларација задно со претставниците на грчкото, влашкото и другите малцинства со која не ги признаваме пописните резултати. Во неа ќе наведеме цврсти докази дека истите се фалсификувани, чиста манипулација. Ќе ја доставиме до сите државни и меѓународни институции, изјави за МИА, Васил Стерјовски, претседател на македонската партија, МАЕИ.

Партијата и другите македонски здруженија веќе се изјаснија дека не ги признаваат резултатите, а тоа го направија и здруженијата на Грците.

Според пописот во оваа земја живеат 2.281 лица што е за повеќе од половина помалку споредено со пописот во 2011 година. Според македонските претставници во оваа земја живеат над 100 илјади Македонци, главно концентрирани во областите Мала Преспа, Голо Брдо и Гора, а со илјадници ги има во Тирана, Елбасан, Драч и други градови.

И грчките претставници не ги признаваат презентираните 23 485 лица со грчка етничка припадност. Тие тврдат дека во земјата живеат околу 400 илјади Грци, главно населени во јужниот дел на земјата.

Во реакцијата на грчкото здружение „Омонија" уште се наведува дека манипулација се и податоците за верската припадност. Од таму сметаат дека бројот на православните е поголем од прикажаниот.

Најголемо изненадување на овој 12. попис е бројот на припадниците на бугарското малцинство, кое до 2017 воопшто не беше признато во Албанија. Властите тоа го сторија по бугарските закани со евроинтегративниот пат на Албанија.

Сега во Албанија „живеат" 7057, иако во претходните 11 пописи ниту еден жител на Албанија не се изјаснил како Бугарин.

Во меѓувреме обвинувањата за фалсификувани податоци ги отфрли директорката на Институтот за статистика, Елса Дули, која рече дека пописот бил транспарентен и професионално спроведен според меѓународните стандарди.

The post Македонците и други малцинства во Албанија подготвуваат заедничка декларација за непризнавање на пописните резултати appeared first on Република.

Бугарскиот амбасадор во Тирана, Ивајло Киров, искажа задоволство од пописните резултати според кои во Албанија живеат 7057 лица со бугарска националност, јави „Ора њуз“.

Амбасадорот Ивајло Киров при посета на северниот албански град Кукс, каде учествувал во активност за бесплатни здравствени прегледи на жителите на овој град од страна на бугарски лекари изразил „благодарност за сработеното, но и за почитувањето на правата на малцинството“.

Киров додал дека со „овој процес се создале хармонични услови за жителите со бугарско потекло слободно да ја изразат својата етничка припадност“.

За резултатите од пописот, сакам да и се заблагодарам на албанската влада која создаде хармонични услови за спроведување на овој процес каде што луѓето беа слободни да одлучуваат сами. Доколку албанската влада не ги создадеше овие услови жителите на бугарската заедница слободно да ја изразат својата определба, немаше да ги имаме бројките што ги имаме денес. И тука има жители од бугарското малцинство, и нагласуваме дека бугарското малцинство овде се чувствува како дома. Искрено сме многу изненадени од резултатите. Албанија е најпријателската и најгостопримлива земја за Бугарија и за Балканот, изјавил Киров.

Тој оценил дека „ова е една од причините зошто албанската држава преговара со ЕУ“.

Многу е важно албанската држава да го прикаже бројот на населението, бројот на станови бидејќи врз основа на овие податоци ќе биде распределбата на албанските претставници во ЕУ и приходите што Албанија може да ги апсорбира од фондовите на ЕУ. Морам да нагласам дека пописот во Албанија е надгледуван од претставници на ЕУ и други заинтересирани земји, посочил бугарскиот дипломат.

The post Бугарскиот амбасадор во Тирана: И благодариме на Албанија што создаде услови Бугарите слободно да се изјаснат appeared first on Република.

Македонското друштво Илинден-Тирана остро реагира по објавените пописни резултати, кои се однесуваат на бројот на Македонците во Албанија.

Не ги признаваме и со огорченост ги отфрламе прелиминарните пописни резултати во Република Албанија, кои ги сметаме за груб пописен фалсификат, по желба на Бугарија. Јавна тајна е дека Бугарија го контролираше пописот, што го потврдува и фактот дека во Бугарија за време на пописниот период во Република Албанија, на социјалните мрежи беа објавувани фотографии од пописните формулари како се изјаснувале жителите во Република Албанија“, пишува во реакцијата.

Се додава дека “овие податоци се заштитени со закон, но објавуваните материјали покажуваа дека бугарските служби имале пристап до нив”.

Во име на Македонците во Република Албанија не само што не ги признаваме фалсификуваните пописни податоци за македонското национално малцинство, туку бараме и од државата и од меѓународните институции да го сторат истото, бидејќи овие фалсификувани резултати се против уставниот поредок и европските аспирации на Република Албанија“, нагласуваат од МД Илинден.

Исто така друштвото бара спроведување на нов попис, заснован на меѓународни стандарди и под меѓународен мониторинг, за да се гарантира чесен и транспарентен процес кој ќе ја одразува етничката реалност во Република Албанија.

Воедно, од Специјалното обвинителство за организиран криминал и корупција на Република Албанија бараме да поведе истрага не само за ИНСТАТ, туку и за “сите показатели за незаконски извршена попишувачка активност од страна на попишувачите, бидејќи отворен е сомнежот во нивната улога во пописот”.

Ги повикува европските институции, кои, како што пишува во реакцијата, тврдат дека се темелат на демократското однесување во однос на основните човекови права, да се позанимаваат со суровото и бескрупулозно нафрлање на бугарските емисари врз македонското национално малцинство во Република Албанија.

Македонско друштво Илинден-Тирана ќе го информира раководството на Федералната унија на европските националности, ФУЕН за грубиот пописен фалсификат, зашто во Албанија етнички Бугари нема. Во ниту еден попис од 11. претходно спроведени ниту едно лице не се изјаснило како Бугарин. Нив ги нема на целата територија на Албанија, освен во бугарската амбасада“, се посочува во реакцијата потпишана од претседателот Никола Ѓурѓај и на огранокот за Голо Брдо, Фатри Фетаху.

На пописот кој беше спроведен од 18 септември до 30 октомври, а во неколку рурални подрачја продолжен до 15 ноември, како Македонци попишани се 2.281 лице, наспроти 7.957 Бугари.

The post МД Илинден-Тирана бара нов попис под меѓународен мониторинг appeared first on Република.

Албанската агенција за статистика ја корегираше техничката грешка на пописот, менувајќи ги „Северномакедонци“ во „Македонци“ по дипломатскиот притисок, особено од македонското Министерство за надворешни работи.

Дипломатска расправија избувна по резултатите од пописот во Албанија, каде што Македонците беа првично идентификувани како Северномакедонци, но брзо поправени со Македонци. Оваа промена доаѓа по интервенцијата на македонското Министерство за надворешни работи, нагласувајќи ја чувствителноста на етничката категоризација во регионот.

Албанското Министерство за надворешни работи ја призна техничката грешка во категоризацијата на пописот по дискусиите на форумот во Дубровник на кој учествуваа македонскиот премиер Мицкоски и министерот за надворешни работи Тимчо Муцунски. Министерот Муцунски изрази благодарност за брзата интервенција на неговиот албански колега, истакнувајќи ја тековната билатерална загриженост.

Со премиерот Мицкоски внимателно ја следевме ситуацијата и во повеќе наврати се ангажиравме со Министерството за надворешни работи. Денеска, загриженоста што ја идентификувавме како нација беше јавно решена во соопштението на Министерството. Присутен беше албанскиот министер за надворешни работи Хасани и јас лично го контактирав. Тој веднаш го пренесе ова прашање до надлежните власти во Албанија, признавајќи го како техничка грешка. Искрено ја ценам неговата брза интервенција, изјави за Канал 5 министерот за надворешни работи Тимчо Муцунски.

Како одговор на несовпаѓањето на пописот, македонското Министерство за надворешни работи ја осуди недоволната застапеност на етничките Македонци во Албанија. Планираат итни консултации со амбасадорот Данчо Марковски за да се формулира стратешки одговор.

Ќе разговараме за нашиот ангажман и стратегија за овие прашања, внимателно следени од јавноста. Нашата цел е да ги заштитиме правата на Македонците во Албанија и да одржуваме силни билатерални односи со нашиот значаен сосед“, изјави министерот Муцунски.

Македонските општества во Албанија, вклучително и истакнатото „Друштво Преспа“, ги осудија резултатите од пописот како груб фалсификат. Тие ја обвинуваат вмешаноста на Бугарија во манипулирање со етничките категоризации, олеснување на емиграцијата во Западна Европа со бугарски пасоши под контроверзни услови.

Васил Стеријовски, претседател на Македонска алијанса за европска интеграција, го критикуваше издавањето бугарски пасоши на Македонците во Албанија:

Албанските функционери, со врски со владејачката партија, го олеснуваат овој коруптивен процес. И покрај доказите за измама, Албанија продолжува да ги дозволува овие практики, нагласи Стеријовски.

Вклучувањето на Бугарите во пописот во Албанија означува значително отстапување од претходните пребројувања, што предизвика силни реакции кај македонските здруженија и политички партии. Албанското признавање на бугарско малцинство во 2017 година дополнително го комплицира етничкиот терен, под влијание на надворешни дипломатски притисоци.

Оваа сериозна контроверзија во пописот ја нагласува тековната етничка чувствителност и геополитички маневрирање на Балканот, што претставува предизвици за регионалната стабилност и аспирациите за интеграција во ЕУ.

The post Од Северномакедонци во Македонци, Албанија ја исправи грешката на пописните резултати appeared first on Република.

Министерството за Надворешни работи на Македонија со сериозна загриженост ги нотира објавените прелиминарни резултати од пописот одржан во Република Албанија во 2023 година.

Техничките нерегуларности во начинот на реализација на истиот, на кои континуирано укажуваа македонските здруженија во Република Албанија во пресрет на Пописот, но и во текот на неговата реализација резултираа со објава на прелиминарни податоци кои што за жал не ја отсликуваат соодветно реалната бројка на етнички Македонци во земјата.

Дополнително, Министерството изразува незадоволство и остро реагира на употребата на термин „северномакедонци“ и употреба на име на земја како супститут за етничка заедница.

Министерството ќе го повика амбасадорот Данчо Марковски на итни консултации во насока на прецизирање на недостатоците и недоследностите во овој процес, разгледување на можностите за соодветна корекција на направените пропусти и изнаоѓање на најадекватни начини за понатамошно заедничко дејствување и унапредување на билатералните односи со Република Албанија.

Министерството во претстојниот период интензивно ќе соработува со надлежните претставници на властите во Република Албанија и со претставниците на Македонската заедница во Република Албанија во насока на нивна културна и социјална промоција во рамките на албанското општество, што за жал и повеќе од очигледно било целосно запоставено од страна на претходната политичка гарнитура во нашата држава.

Сите отворени прашања меѓу две соседни држави треба да се решаваат преку дијалог и меѓусебно разбирање и почитување на правилата, принципите и вредностите на меѓународниот правен поредок.

The post МНР: Пописот во Албанија не ја отсликува реалната бројка на етнички Македонци во земјата appeared first on Република.

По претставниците на македонското малцинство, и Здружението „Омонија“ кое го претставува грчкото малцинство во Албанија, се спротивстави на објавените резултати од Пописот спроведен во 2023 година, а кои Институтот за статистика, ИНСТАТ, ги објави вчера.

Во реакцијата „Омонија“ ги нарекува резултатите неосновани, нереални и неприфатливи во однос на демографијата на грчкото малцинство.

Исто така, во име на Грците во оваа земја, изразуваат загриженост и за бројките за населението, кои се однесуваат за верска припадност, не прифаќајќи го дури ни бројот на православните во земјата.

Конкретно, сакаме да изразиме загриженост во однос на димензијата на сликата на религиозниот состав што ја претстави ИНСТАТ. Бидејќи огромното мнозинство од припадниците на грчкото етничко малцинство припаѓаат на Православната црква, не можеме да не ја осудиме упорноста да се поправи бројната големина за православните, далеку од реалноста и од она што е историски потврдено. Тоа не е добар предзнак за мирен соживот во земјата, ниту пак служи на добриот имиџ што ѝ е потребен – се нагласува во реакцијата.

Според пописната статистика, 23.485 лица се изјасниле дека се Грци, додека вкупниот број православни бил 174.000.

Македонските претставници ги отфрлија пописните резултати, оценувајќи ги манипулација и фалсификат. ИНСТАТ соопшти дека во земјата живеат 2.281 Македонец што ни од далеку не соодветствува со реалната бројка.

The post И Грците се незадоволни од пописот во Албанија appeared first on Република.

По повеќе од две години одлагање, во Косово денеска ќе започне пописот на населението, домаќинствата и становите/куќите, вклучително и на северот на земјата, населен со мнозинско српско население, во процес кој ќе трае шест недели, односно до 17 мај годинава, јави дописникот на МИА од Приштина.

Во пописот ќе бидат ангажирани околу 3.500 попишувачи и 891 набљудувач, како и персоналот на Агенцијата за статистика на Косово (АСК).

Овојпат има седум прашалници што треба да се пополнат, а во овој попис е додаден и прашалникот за штетите од војната во 1998-99 година и прашалникот за регистрација на дијаспората.

Собирањето на овие податоци АСК го оправдува со важноста за градење подобри политики за државата, планирање на буџетот и инвестициите, подобрување на условите за живот во земјата и за странски инвестиции.

Според законот, секој жител на Република Косово е должен на попишувачот да му ги достави сите точни податоци во прашалниците за пописот на населението.

Прелиминарните резултати од пописот се очекува да бидат објавени во рок од три месеци.

The post Во Косово денеска почнува пописот на населението, резултатите се очекуваат по три месеци appeared first on Република.

Денеска почнува пописот на населението во Црна Гора, откако власта и опозицијата постигнаа договор за построгите услови под кои ќе се одвива.

Исполнети се условите за да се одржи пописот и ги повикуваме сите граѓани слободно да се изјаснат, изјави вршителот на должност претседател на опозициската Демократска партија на социјалистите Данијел Живковиќ.

Живковиќ вели дека доколку бидат забележани неправилности или злоупотреби, во секој момент можат да реагираат и да го прекинат пописот и ги повика граѓаните да ги информираат доколку забележат притисоци.

Црногорскиот премиер, Милојко Спајиќ, ги поздрави напорите и придонесот на сите кои учествуваа во преговорите и подготовката на Пописот на населението, домаќинствата и становите.

Спајиќ на платформата „Х“ напиша дека покажале оти Црна Гора има функционални институции и одговорни поединци подготвени да градат мостови за европската иднина.

Претходната влада на премиерот Дритан Абазовиќ го закажа пописот за 1 ноември, но опозицијата најави бојкот. Новата Влада на премиерот Милојко Спајиќ првично го одложи за 30 ноември, а дополнително за 3 декември на барање на опозицијата.

Пописот на населението во Црна Гора требаше да се одржи во 2021 година, кога беше одложен поради пандемијата на Ковид-19, а не беше одржан ни во 2022 година, како што беше објаснето, поради технички причини.

The post По неколку одложувања, почна пописот на населението во Црна Гора appeared first on Република.

Претседателот на опозициската Демократска партија на Косово (ПДК), Мемли Красниќи, по денешната одлука на Владата за одложување на пописот на населението во Косово, го обвини премиерот Албин Курти за политичко мешање и прикривање на реалните бројки во државата, јави дописникот на МИА од Приштина.

Во објава на својата страница на Фејсбук, Красниќи ја опиша денешната владина одлука како намерно кршење на законот.

Лидерот на најголемата опозициска парламентарна партија во Косово потсетува дека пописот на населението се одложува по трет пат и тоа го смета за уште еден показател за неспособноста и неодговорноста на актуелната власт.

- Уште од порано предупредив дека пописот на населението нема да се одржи годинава - а тоа намерно го прави самиот премиер Курти. Одложувањето на пописот, по трет пат, сега веќе за април идната година, докажува дека неспособноста, прекршувањето на законите, политичкото мешање и прикривањето на реалните бројки – ја карактеризираат оваа Влада и овој процес од самиот почеток, напиша Красниќи.

Во оваа прилика, опозицискиот лидер преобјави свој коментар од август годинава, каде што предупредува дека и покрај лажните оправдувања за наводно незавршување на подготовките, „има некои целосно политички причини поради кои е  одложен пописот“.

- Прво: Владата ја изгуби вистинската контрола во северниот дел на земјата, затоа не може да ги попише граѓаните таму. Второ: Масовно иселување на косовските граѓани, каде само за овие две години од оваа власт, државата ја напуштија околу 150 илјади граѓани. Трето, хаосот во кој се втурна Агенцијата за статистики поради политичките и партиските интервенции во неа од страна на Владата, напиша Красниќи во август годинава.

Пописот на населението, домаќинствата и становите првично требаше да се одржи на 1 септември годинава, но потоа беше одложен за 1 ноември, додека денеска Владата на Курти одлучи уште еднаш да го одложи и да се изведе од 5 април до 17 мај наредната година.

The post Kурти не сака попис на Косово appeared first on Република.

Владата на Косово одлучи денеска да го одложи за во април 2024 година пописот на населението, домаќинствата и становите, што требаше да започне на 1 ноември годинава, јави дописникот на МИА од Приштина.

Премиерот Албин Курти на денешната владина седница ги информира членовите на својот кабинет дека пописот пшовторно се одлага поради доцнења со подготовките за негово одржување од страна на Агенцијата за статистики на Косово (АСК), поради што минатата недела донел одлука да го разреши досегашното раководство на таа институција.

– Предлагам пописот на населението да се одложи за периодот од 5 април до 17 мај 2024 година за да се имплементираат принципите на ЕУРОСТАТ и да се даде можност на новото раководство да покаже ефикасност во извршувањето на своите обврски… Од почетокот на мандатот го планиравме и го изготвивме Законот со максимална вклученост на АСК. За да го обезбедиме процесот, побаравме обезбедување на лаптопи, таблети и регрутирање на набљудувачи и попишувачи за да избегнеме натамошно одолговлекување на постапката, рече Курти.

Тој напомена дека од новименуваниот вршител на должноста директор на АСК, Авни Кастрати добил писмо „кое докажува дека процесот на попис досега не е менаџиран добро“.

– Овојпат го имаме ветувањето дека грешките од минатото нема да се повторат и дека веќе е сé јасно со оглед на научените лекции, рече Курти.

The post Пописот на населението во Косово одложен за април 2024 година appeared first on Република.

Демократскиот сојуз на грчкото етничко малцинство во Албанија „Омонија“ обвини, како што наведува, за прекршувањето на правата на малцинствата од страна на попишувачите во текот на пописот на населението и домовите.

Преку соопштение за јавноста „Омонија“ наведува дека во областите населени со припадници на грчкото малцинство зачестиле случаите кога попишувачите „вршат емотивен притисок врз граѓаните кога тие инсистираат да им се запишат одговорите за нивното грчко потекло и православна вероисповест".

- Попишувачите често се појавуваат без потребната електронска опрема (таблет) и собираат податоци на хартија. Во многу случаи тие воопшто не се задржуваат на делот од формуларот кој се однесува на податоци за етничка и верска припадност и мајчин јазик. Забележани се зачестени случаи кога попишувачите вршат емотивен притисок врз граѓаните кога тие инсистираат да им се запишат одговорите за нивното хеленско потекло и православна вера, стои меѓу другото во соопштението.

Притоа, се додава понатаму, дека „несфатливо и недозволиво е тоа што надлежните органи во подрачните единици за следење на процесот, манифестираат намерна индиферентност кон поплаките на граѓаните во однос на прекршување на правилата за попис“.

Пописот на населението и домаќинствата почна на 18 септември и ќе трае шест недели, а првичните резултати Институтот за статистика, ИНСТАТ, ги најави за јуни 2024 година.

Ова е 12. попис во земјата, првиот е спроведен во 1923 година.

Последниот попис беше во 2011 година, кога произлезе дека земјата има 2.821.977 жители, со намалување од осум отсто споредено со претходниот попис, во 2001 година.

The post Друштвото на Грците „Омонија“ обвини за неправилности во пописот во Албанија appeared first on Република.

Додека се случуваат сите овие проблеми, пропагандите на соседите никогаш не престанаа. Додека оваа власт не убедува во придобивките од добрососедскиот договор кои самите го склучија, Бугарија тера отворена пропаганда против Македонија и како тоа да не е доволно, овие денови тие вршат жесток притисок и терор при пописот во Албанија, македонското малцинство да се впишува како етнички Бугари. И сега познати ни се намерите на бугарската политика, но необјаснив е молкот на македонската власт. Да бидам искрен не очекувам дека Али Ахмети ќе се прекрши за Македонците во Албанија, но барем Ковачевски да преземе мерки и да реагира на ваквиот отворен притисок за асимилација која гледаат како им се случува пред очи, рече лидерот на ВМРО-ДПМНЕ, Христијан Мицкоски говорејќи од Велес.

Мицкоски ги повика Македонците да бидат дел од пописот во Албанија.

Од овде, од срцето на Македонија јавно повикувам и апелирам Македонците од Албанија да излезат и да се попишат како Македонци, она што со векови биле и ќе продолжат да бидат. Апелирам дека сега е моментот да не потклекнуваат, и одговорот на сите туѓи пропаганди да биде масовност. Следуваат промени во Македонија и како Македонци и Македонија како нивна држава од која тие влечат потекло, ќе им помогне во иднина, и ќе ни биде полесно повеќе да се вклучиме во поддршката за развој и негување на македонските особености и култура. Апелирам сега кога притисоците и заканите се методот со кој Бугарија врши пропаганда, одговорот на Македонците од Албанија да биде масовност на пописот“, кажа Мицкоски.

Според него она што се случува во политиката тука во Македонија, се уставните измени.

Позади измените на Кривичниот законик, амнестијата која сами си ја гласаа, и оние јавни превирања и препукувања со сеништата од минатото, се основата на валканиот план на Владата, валканиот план на власта се само уставни измени. Бидејќи ја знаат непопустливоста на пратениците, ја знаат и одлучноста на раководството на ВМРО-ДПМНЕ и народот против прифаќање на бугарски диктати, тие пробуваат да создадат непринципиелни коалиции кои би можеле да доведат до уставни измени. Иако шансите реално тие да се случат не се ни ниту теоретски“, заклучи Мицкоски.

The post Апелирам Македонците од Албанија масовно да учествуваат во пописот, порача Мицкоски appeared first on Република.

Сојузот на Македонците со исламска религија ги повика граѓаните на Албанија, Македонци по етничка припадност, а муслимани по верска припадност, да не потклекнуваат под никаква закана и да се изјаснат тоа што се - Македонци.

Ги повикуваме нашите сонародници во Албанија, на пописот кој е во тек да не дозволат никој, ама никој и по ниедна цена да им ја менува нивната македонска етничка припадност и по цена на не знаеме какви пасоши и привилегии што им се нудат, стои во повикот на СМИР.

https://republika.mk/vesti/makedonija/apel-od-mds-do-site-makedontsi-da-se-popishat-na-prestojniot-popis-vo-albanija/

Од здружението порачуваат дека „се е менливо освен етничката припадност“.

Барањето Бугари во чисти македонски етнички средини преку разни емисари ќе предизвика тешки историски последици по идните поколенија. Сте биле, сте и останете и понатаму она што единствено сте Македонци, се наведува во пораката на СМИР, потпишана од претседателот Латиф Пајкоски.

Пораката доаѓа по зачестените посети на бугарски високи претставници, меѓу кои и потпретседателката Јотова на областа Голо Брдо населена главно со Македонци со исламска вероисповест и притисокот врз нив да се попишат како Бугари, нудејќи пасоши и друга помош.

https://republika.mk/vesti/makedonija/bugarskiot-ambasador-vo-albanija-delel-telefoni-za-da-gi-ubedi-makedontsite-da-se-popishat-kako-bugari-tvrdat-od-most/

The post Македонците со исламска религија ги повикуваат Македонците во Албанија да се попишат тоа што се – Македонци appeared first on Република.

Министерството за здравство прави попис за сите медицински апарати кои се донирани, а не се користат во здравството. Фатмир Меџити, министерот за здравство кажа дека секаде каде што има донација во медицинските центри во државата, опрема која е скапо платена и не се користи ќе се истражи за да се знае точно каде, што има и дали има кадар.

Или да дисперзираме, или тие апарати да се носат во друга установа, каде ќе бидат корисни, изјави денеска министерот Меџити.

За ацелераторот на Клиниката за Онкологија, вели дека не знае зошто не се користел.

Да имаше нов акцелератор со таква финансиска сума и да стои под прашина седум години да не се стави во употреба, не би можел да кажам зошто е тоа така направено. Таму има четири акцелератори, два веќе се при крај со работењето и едниот од нив што е најстар, да може да се смени, но ние од утре веќе почнуваме да го демонтираме тој апарат и ќе треба, тој апарат седел седум години и за да се стави во функција. Нормално дека треба од таа компанија што има лиценца за тој апарат, да се сервисира и тоа сервисирање ние веќе од пред три месеци, знаеме дека изнесува многу голема сума финансиска, рече Меџити.

Како што кажа, според раководителите на Клиниката за онкологија, четири акцелератори ја покриваат потребата на пациентите.

Меџити рече дека исто така се работи и во други центри.

Клиничка болница Битола, таму има апарат, има еден дел од кадарот, треба уште малку да се доекипира тој кадар, за да можеме и тој апарат да го ставиме во функција, рече министерот.

За ацелераторот во Штип рече дека таму треба прво да се направи инфрастрктура.

Таму е набавен ацелератор, а нема инфраструктура. Во 2024 година, тој апарат ќе го ставиме во функција со новиот буџет на Република Македонија, најави Меџити.

Во врска со денешниот најавен протест во 18 часот, Меџити вели дека тоа е загарантирано со Уставот на Македонија.

Јас лично како човек и како министер, мислам дека тоа е најдемократски чин и секој има право да протестира. И јас ги поддржувам ваквите протести. Но, тоа што сакам да напоменам, секогаш, гледаме со случајот „Онкологија“ дека се злоупотребува. Апелирам за дневни политички евтини поенти да не се користат ваквите протести, изјави денеска Меџити.

Меџити на прашање по брифингот со новинарите дали на Онкологија и на други клиники имало злоупотреби поврзани со пациенти кои доаѓале од други држави, тој рече дека во моментов не би сакал и нема да сподели информации во интерес на процесот што се води од Обвинителството.

Затоа се што Обвинителството ќе донесе одлука на крај, тоа ќе биде јавно за сите. Пациентите кои се обратиле до Министерството за здравство и до мене лично, ние сме им ја кажале точната адреса, да одат во Обвинителство. И Обвинителството транаспарентно работи, многу отворено со пациенти, нивни семејства, со сите кои имаат точна информација. Значи информациите одат до истражните таму што се обвинители. И на крај, кога ќе има конечна одлука, транспарентно, очекуваме што побрзо на оваа неизвесност да се стави крај и да излезат и тука, одговори Меџити.

Според него, во прашање е и образот на здравствените работници.

The post Во медицинските центри во државата се прави попис на опрема која е донација или е скапо платена и не се користи appeared first on Република.