Пописот на населението и домаќинствата во Албанија, како значајна статистичка операција, што беше одложена минатата година, поради пандемијата со Ковид-19, ќе се спроведе во октомври годинава и ќе чини 16 милиони евра.

Според директорката на секторот за социјална статистика, Мајлинда Нестури, точниот датум на почеток на пописот што треба да го одреди парламентот се очекува да трае шест недели.

Прибирањето на податоците нема да боде рачно на хартија, туку ќе се врши со електронски таблет, за да има поголема сигурност и брзина во обработката на податоците. Овој нов начин има свои предизвици, но ќе ни обезбеди поголем квалитет и ќе го забрза процесот на обработка. Процесот е многу сложен, ќе бидат ангажирани вкупно 8.000 попишувачи, околу 1.200 контролори и 6.000 геодети, изјави Нестури за „MCN Economy“.

На прашањето кои дополнителни елементи ќе има овој попис, Нестури рече дека прашалникот за 2022 година ќе биде ист како оној во 2011 година. Меѓу другото, таа додаде дека пописот е регулиран со конкретен закон, притоа нагласувајќи дека прашањата за етничките малцинства се на основа на доброволно изјаснување.

Прашалникот ќе ги содржи истите прашања како и на пописот во 2011 година. Cодржи чувствителни прашања, етничка и верска припадност, јазик, прашања за лицата со попреченост, а ќе имаме прашања и за домување, други. Пописот е статистичка активност која е регулирана со конкретен закон и за прашањата поединците се изјаснуваат она што се чувствуваат на добровлна основа и доколку не одговорат сега не е предвидена казна. Апликацијата е организирана на таков начин што одговорот не може да се измени подоцна, ова за да се избегне погрешно толкување, посочи таа.

Инаку, пописот во 2011 година Македонците, Грците, Власите, Ромите, Србите, Црногорците и Египќаните го бојкотраат пописот, поради „дискриминаторскиот закон за попис со кој се предвидуваше казна од илјада долари за секој кој ќе каже друга етничка припадност од онаа што му пишува во матичната евиденција“.

Поради бојкотот тие беа попишани според матичната евиденција.

Исто така малцинствата не ги признаа резултатите од пописот, поради тоа дека „пописниот процес бил преполн со манипулации, злоупотреби и ја немало потребната транспарентност, поради што за малцинствата тој е целосно неуспешен“.

The post Пописот во Албанија во октомври appeared first on Република.

Вкупната корисна површина на населените станови 55 212 163 м2, додека на ненаселените е 27 850 636 метри квадратни. Во просек населените станови имаат по 103 метри квадратни, додека ненаселените во просек се по 90 метри квадратни.

Ова го покажува третиот сет на податоци од Пописот на населението, домаќинствата и становите, 2021, објавен од Државниот завод за статистика.

По региони најмногу празни станови има во Југозападниот регион каде од вкупно 51 348 станови над половината се ненаселени. Најмалку празни станови има во Скопскиот регион, каде од 243 252 станови, 29 проценти се празни или 70 094.

Од скопските општини најмногу празни станови има Центар – 10 865 или над 40 проценти од вкупниот број, а најмалку празни станови има Чаир – 22,5 проценти од вкупно 17 771 стан. Интересно е дека за 20 години во Центар бројот на станови е зголемен за над 30 проценти, додека во Чаир за само 3,62 проценти.

Во земјава официјално има 34 градови. Од нив осум се големи со над 50 илјади жители, 18 се средни со меѓу 10 и 50 илјади жители и осум се мали со под 10 илјади жители.

Една третина од становите во сите големи градови во земјава се празни

Куманово, кој е втор по големина град во земјава со 98 104 жители има околу 12,5 илјади празни станови или 33 проценти од вкупниот број. Исто како него и Битола, кој со 85 164 жители е трет по големина град во земјава и има над 16 илјади празни станови или 36,7 проценти.

Слично е и во останатите големи градови во земјава Тетово (84 770 жители) има 9 747 празни станови или 32,3 проценти, Прилеп (69 025 жители) има над 11 илјади празни станови или 33,5 проценти, Гостивар (59 770 жители) има над 12 илјади празни станови или 44 проценти, Охрид (51 428 жители) има 17 820 празни станови или 53 проценти и Струга (50 980 жители) има над 10 илјади празни станови или 45 проценти од вкупниот број станови се ненаселени.

Околу половина од вкупниот број на станови се празни и во Кичево (39 669 жители) има речиси 13 илјади празни станови, Крива Паланка (18 059 жители) има над 5 илјади празни станови, Берово (10 890 жители) речиси пет илјади празни станови и Ресен (14 373 жители) има над четири илјади празни станови.

Во Струмица (49 995 жители) има над осум и пол илјади празни станови, Кочани (31 602 жители) има над седум илјади празни станови, Радовиш (24 122 жители) има речиси четири илјади празни станови, Гевгелија (21 582 жители) има над три и пол илјади празни станови и Свети Николе (15 320 жители) и Виница (14 475 жители) имаат над 2 600 празни станови.

Во четири мали градови празни се околу половина од становите – Кратово (7 545 жители) има речиси три илјади празни станови, Демир Хисар (7 260 жители) има над четири илјади празни станови, Македонски Брод (5 889 жители) има 2 248 празни станови и Пехчево (3 983 жители) има над 1 500 празни станови.

Скопскиот регион има 607 007 жители и 243 252 станови, од кои 70 094 или 29 проценти се празни

Најмногу празни станови има општина Сопиште, каде 60 проценти од вкупно 4 214 станови се празни, додека најмалку празни станови има Арачиново, каде само 578 станови или 20,5 проценти се ненаселени.

Градот Скопје има 526 502 жители и 213 850 станови, од кои 27,7 проценти се ненаселени. Од скопските општини најмногу празни станови има Центар – 10 865 или над 40 проценти од вкупниот број, по што следи Карпош со 10 041 стан или 31 процент од вкупниот број на станови во општината. Најмалку празни станови имаат Чаир – 22,5 проценти од вкупно 17 771 стан и Бутел – 22,8 проценти од вкупно 12 324 станови.

Во последните 20 години бројот на станови е зголемен за 22,5 проценти. Најголем раст има во Аеродром – 32,7 проценти и Центар – 30,2 проценти. Најмал раст во бројот на станови има во Чаир – 3,62 проценти и Бутел – 10 проценти.

Вардарски регион има 138 722 жители и 59 103 станови, од кои 17 453 или 29,5 проценти се ненаселени. Интересно е што ова е единствениот регион каде во последните 20 години бројот на станови е намален и тоа за 3,83 проценти.

Од општините во регионот најмногу празни станови има во Чашка, каде над 58 проценти од становите се празни, а најмалку има во најголемиот град во регионот – Велес, каде ненаселени се 4 147 стана или 22,26 проценти од вкупниот број.

Вториот по големина град во општината – Кавадарци брои 35 733 жители и иако во последните 20 години бројот на станови се има намалено за над 1 400 или 9,7 проценти, сепак околу 27,5 проценти од становите во општината се ненаселени.

Југоисточен регион има 148 387 жители и 74 588 станови, од кои 27 248 или 36,5 проценти се празни.

Најмногу празни станови има во Дојран каде 68,3 проценти од вкупно 3 147 станови се празни. Иако над две третини од становите се празни, нивниот број во оваа општина во последните дваесет години е зголемен за над 32 проценти.

Во најголемиот град во регионот Струмица во последните 20 години бројот на станови е зголемен за речиси 25 проценти.

Источен регион има 150 234 жители и 84 324 станови, од кои 33 144 или 39 проценти се празни.

Најмногу празни станови има Берово, каде од 10 890 станови 56 проценти се празни, а над половина станови се празни и во Пехчево.

Во најголемиот град во регионот Штип – празни се 31,5 проценит од становите, а во Кочани над 700 станови или 38,5 проценти од вкупниот број.

Во последните 20 години и во Берово и во Штип бројот на станови е зголемен за 22 и за 19 проценти.

Пелагониски регион има 210 431 жители и 107 602 станови, од кои 41 671 или 38,7 проценти се празни.

Во Битола има 16 063 ненаселени станови, а во Прилеп 11,094, но во последните 20 години во овие градови бројот на станови е зголемен за 15, односно 10 проценти.

Најмногу празни станови има Демир Хисар, каде од вкупно 6 583 станови, празни се 64 проценти.

Полошки регион има 251 552 жители и 100 647 станови, од кои 39 140 или 38,9 проценти се празни.

Во двата најголеми градови во регионот Тетово и Гостивар за 20 години бројот на станови е зголемен за над 25 проценти, но сепак во Гостивар празни се над 12 илјади станови или 44 проценти, додека во Тетово ненаселени се една третина од вкупно 30 167 стана.

Североисточен регион има 152 982 жители и 68 580 станови, од кои 27 089 или 39,5 проценти се празни.

Една третина од становите во најголемиот град во регионот – Куманово се празни. Иако над 12 и пол илјади станови се празни, бројот на станови во Куманово во последните 20 години е зголемен за 4 679 или 12 проценти.

Над половина од становите се празни и во Кратово, додека во Крива Паланка над 5 илјади станови или 45 проценти од вкупниот број се ненаселени. Сепак, во последните 20 години во Крива Паланка бројот на станови е зголемен за 18,6 проценит, а во Кратово за 10 проценти.

Југозападен регион има 177 398 жители и 101 078 станови, од кои 51 348 или 50,8 проценти се ненаселени.

Во најголемиот град во општината Охрид, над половина од вкупниот број на станови или над 17 илјади се празни. Во последните 20 години во Охрид бројот на станови е зголемен за околу 5 илјади или 15 проценти.

Во Струга празни се над 10 илјади станови или над 44 проценти, а во Кичево речиси 13 илјади станови се ненаселени./МИА

The post Една третина од становите зјаат празни, од нив најмногу во Центар appeared first on Република.

Ниту владиниот коалициски партнер ПЦЕР не е задоволен од пописот. Претседателот на ромската партија Самка Ибраимовски најави нов попис кој од куќа на куќа ке го спроведат Ромите во Македонија.

Овој попис е срамота и ние не го признаваме и тој што го спровел треба кривично да одговара. Ромите имаат најголем наталитет, а пописните бројки покажуваат дека во нашата држава само умирале, а не се раѓале. Ние ќе се жалиме до странските амбасади, до Брисел и Вашингтон, и наскоро ќе започнема операција во која ќе докажеме дека овој попис е фалисификуван и дека Ромите наместо реално да бидат над 7 проценти како трет по број етникум во државата, се катастрофално оштетени, вели Ибраимовски за Канал 77, за кого целиот попис бил направен со една цел како да се обезбедат и фризираат бројките и потребниот сооднос на застапеност на Албанците.

The post Ибраимовски: Ромите се многу оштетени, пописот е направен за да се обезбедат физирани бројки за Албанците appeared first on Република.

Пратеничката на СДСМ Снежана Калеска Ванчева, во емисијата „Топ тема” на телевизија Телма истакна дека пописот е целосно успешен и спроведен согласно стандардите на Евростат, што е потврдено и од ЕУ.

Факт е изјавата на портпаролката на Европската унија, која многу јасно и прецизно вели дека методотологијата и законот, врз чија основа е спроведен пописот е согласно Евростат и тоа е нешто што го потврдува она што ние уште при ноесење на законот го говоревме, иако за жал од говорницата во Собранието се изнесуваа ставови дека тоа не е така, a сега стигна потврда од ЕУ, нагласи Калеска Ванчева.

Таа додаде дека сега се објавени првичните резултаи од пописот од страна на Државниот завод за статистика, потоа следи анализа на сите резултати и тоа треба да биде предмет на експерската и научната јавност, а не на политичарите.

Мора да разбереме дека ова е огромна важност статистичка операција, која секоја држава на секои 10 години, според меѓународните правила и стандарди ја спроведува за добивање на релевантни статистички податоци, кои низ научно докажана и утврдена методологија и анализа на тие податоци треба да дадат правци за проекција на развојот, нагласи Калеска Ванчева.

Таа истакна дека забелешките на резултатите од пописот само покажуваат дека нашето општество е премногу исполитизирано.

Очигледно е дека сите политички чинители во изминатите 30 години на ваков или онаков начин некако придонеле оваа најсложена и најпотребна статистичка операција, биде анализирана речиси исклучиво низ политички аспект, што е недозволиво и сега наместо да се соочиме со факти како да да го проектираме развојот, иднината на нашата држава, ние одиме со нешто што се вика политизирање, за некои дневно политички цели, рече Калеска Ванчева.

Пописот е завршен, негово отварање сега и вметнување на податоци е кривично дело, а трагично беше што ние 20 години немавме попис, ако имавме попис пред 10 години како што се налага, многу порано ќе ги знаевме вистинските состојби и ќе знаевме во кој правец треба да ги насочуваме реалните политики, порача пратеничката на СДСМ Снежана Калеска Ванчева, во емисијата „Топ тема” на телевизија Телма.

The post Калеска Ванчева: Пописот е целосно успешен и спроведен во согласност со стандардите на Евростат appeared first on Република.

Сакам да изразам задоволство што после 20 години државата спроведе попис по европски стандарди, рече премиерот Димитар Ковачевски во денешното интервју во емисијата 360 степени на Алсат М телевизија.

Доколку ги погледнете споредбените податоци за пописи во други држави има граѓани неопфатени кои и над 10% не биле опфатени. Кои се причините кај нас затоа што околу 120.000 не се опфатени? Прво, пописот се одржа во специфични околности, се спроведе во услови на ковид криза. Второ беше поместен од април во септември, на барање на опозицијата, кога имаме граѓани кои излегуваат да работат во тој период на полињата, од руралните области. Трето, имаше активен и скриен бојкот од опозицијата. Левица беше против попишувањето а ВМРО-ДПМНЕ прво водеше кампања за бојкот а потоа и скриен бојкот, со што направи лоша услуга на Македонците пред се, во однос на пописот. Не може да зборуваме за критики на пописот од оние кои во голема мера креираа одреден проблем со тоа што на своето гласачко тело им кажуваа дека не треба да има попис, рече премиерот Ковачевски во вечерашното интервју на Алсат М телевизија.

The post Премиерот задоволен што по 20 години власта спровела попис по европски стандарди appeared first on Република.

Премиерот Димитар Ковачевски, во вечерашното гостување во емисијата „360 степени“, вели дека бројката од околу 132 илјади граѓани кои не беа лично попишани, се должи на повеќе причини, меѓу кои, и бојкотот кој јавно или скриено го заговарале дел од опозициските партии. Се работи за околу 7,2 проценти од резидентното население кое не беше теренски попишано, туку податоците беа преземени од административните бази.

Ако ги погледнете споредбените податоци за пописи во други држави, опфатот на граѓаните во други држави, има и со поголем процент на неопфатени во пописи. Примери има многу и се движат и до 10 проценти на неопфатено население. Кои се причините кај нас за 132.000 коишто од резидентното население не се опфатени, прво е што пописот беше спроведен во услови на ковид-криза, при што дел од граѓаните не можеа да отворат. Второ, на барање на опозицијата, пописот беше поместен од април во септември, кога дел од граѓаните кои живеат во руралните средини излегуваа на работа. И трето, имаше и активен бојкот и скриен бојкот од опозицијата. Левица беше против попишувањето, а ВМРО-ДПМНЕ прво водеше кампања за бојкотирање на пописот, а потоа имаше и скриен бојкот којшто им направи лоша услуга на Македонците, пред сè, во попишувањето. Така што, ние не можеме да зборуваме за критики на пописот од тој аспект, а посебно од оние коишто тој проблем и го креираа во голема мера, со тоа што на своето гласачко тело и на своите симпатизери им кажуваа дека не треба да излегуваат на пописот, рече Ковачевски.

 

The post Ковачевски: Опозицијата им направи лоша услуга на Македонците со бојкотот на пописот appeared first on Република.

Не ги прифаќаме лажните резултати од пописот, немаме доверба во официјалните органи на актуелната власт и немаме намера да дадеме легитимитет на перфидното поништување на нашиот народ. Се надеваме дека со официјална поддршка на нашата татковина, во втората половина од годинава ќе спроведеме попис, електронски и теренски, на кој ќе може да се изјаснат сите оние кои се сметаат за припадници на српскиот народ, најавуваат од Демократската партија на Србите во Македонија и Српската заедница во Македонија.

„Попишувањето ќе биде доброволно, а попишаните лица ќе добијат службено уверение кое ќе можат да го користат при остварување на правото на образование, стекнување имот, добивање државјанство, како и за други привилегии во нашата татковина, Република Србија. Исто така, лицата чии презимиња се на „иќ“, а ја немаат оваа потврда, нема да бидат третирани како валидни претставници на српскиот народ во македонската администрација, туку како кукавички јајца спуштени во нашето гнездо.

Ова важи и за политичките и за невладините организации со префиксот „српски“, а всушност основани за потребите на одредена политичка партија како привремено покритие за немањето на српски партнер во нивната коалиција, кои со своето неработење, односно со поддршката на криминалните пописните активности од позиција на власт ги десеткуваа Србите и се директни виновници за оваа ситуација. За се ќе бидете навремено информирани“, напиша пратеникот Иван Столковиќ, претседател на Демократската партија на Србите во Македонија на својот фејсбук-профил.

The post Стоилковиќ: Не ги прифаќаме лажните резултати од пописот, ќе организираме вистинско пребројување на српскиот народ! appeared first on Република.

Објавувањето на резултатите од пописот во Македонија отвора многу дебатa коja бара длабинска анализа, но и одговорност од политичките сили кои сакајќи да ја задржат ексклузивноста и нетранспарентноста, денес го преземаат целиот историски товар на еден процес кој за жал отвори многу дилеми и нејаснотии, вели Аријанит Хоџа од движењето Беса.

Движењето БЕСА уште еднаш го потврдува својот политички став дека процесот на попис на населението е и треба да остане само статистички, а колективните законско-уставни права на етничките заедници, во овој случај на Албанците треба да произлегуваат од бројот на жители кои се државјани на државата, а не по бројот на резидентни жители во државата. Преку нашата анализа на последниот попис на населението во земјата произлегуваат некои пораки кои сакаме да ги споделиме како загриженост со јавноста, потенцира Хоџа и додава:

„Прво: Формата, начинот и водењето на процесот помина во целосна тајност, додека процесот на одложување односно прекин на процесот и пречките со кои се соочуваа граѓаните за пријавување, особено оние во дијаспората, го губи кредибилитетот на пописот како процес. Одтука, се сомневаме дека овој процес се претвори во политичко пазарење помеѓу СДСМ и ДУИ, како и многу други прашања во минатото, кои за жал докажаа дека при секое политичко пазарење на ДУИ последиците се долгорочни за Албанците во државата. Второ: Ако тргнеме од статистичките податоци кои произлегуваат од овој попис, на површина излегува една голема вистина која континуирано ја покренуваме како грижа, а тоа е дека во сите овие години на владеење на ДУИ, Албанците масовно си заминаа од родното место.“

Според Хоџа погрешните политики, корупцијата, непотизмот, партизацијата на сите институции принудија многу семејства, но пред се многу млади луѓе да ја напуштат државата.

Факт е дека колку подолго ДУИ ги води државните институции преку неспособни луѓе, партиски приврзаници и оние чии главни заслуги се послушноста кон партијата, толку повеќе Албанци ќе ги напуштат своите родни места. Овој процес на масовен егзодус на Албанците мора итно да се запре, тоа се прави со создавање подобри услови за живот, економска благосостојба, отворање нови работни места, но сето тоа може да се случи само со отстранување од власт на ДУИ, поконкретно на нејзините преставници во Владата. Го потврдуваме нашиот став дека државата треба што поскоро да оди на предвремени избори, а ДУИ да оди во опозиција, и да се реформира, бидејќи секој ден се докажува дека тие се штетни за иднината на Албанците, а тоа го потврдија и од пописот на населението, за што и самите биле учесници во организацијата на истиот, заклучува Хоџа.

The post Хоџа: Пописот докажа дека со ДУИ во Владата, бегството на Албанците е масовно appeared first on Република.

Самиот факт што имаме попис после цели 20 години е успех сам по себе. Направивме попис со сите нишани, кој не отстапува од традицијата на направени пописи што ја имавме и ние и регионот и континентална Европа, во изминатите неколку децении. Не станува збор за попис најдобар во историјата на Европа, туку станува збор за попис кој ги запазува највисоките стандарди за попишување што ги има ЕУ, изјави денеска во Прилеп претседателот на државата Стево Пендаровски.

Оваа оценка, Пендаровски ја базира не само од она што го слушнал на вчерашната презентација на резултатите, туку и од коментарите дадени од експертот ангажиран од страна на ЕУ.

По барање на новинарите за коментар околу „оние седум проценти, кои предизвикаа најмногу контроверзи”, Пендаровски посочи дека секогаш има контроверзи, особено кај нас на балканскиот регион, каде сме измешани и во религиозна и од политичка смисла. Тој наведе дека она што го знае од разговорите со неколку експерти, не постои попис воопшто во Европа и пошироко, кој нема одредена бројка на лица кои не се опфатени со пописот.

Кај нас значаен дел, тие седум и колку проценти кои не се опфатени, за жал се резултат на бојкотот на политички субјекти. Очигледно е дека тоа имаше ефект во одредени делови од државата. Се разбира дека не треба да се исклучи како дополнителен фактор за тој процент и пандемијата, изјави шефот на државата Пендаровски, по обраќањето на конференција на тема „Дигитализација”, во организација на Амбасадата на Франција и Францускиот институт во Скопје.

Пендаровски се осврна и на тоа дека постоеја и попишувачи кои беа со специфична опрема, со сите протоколи, а дел од нив работеа и подоцна во тој временски период и надвор и не влегуваа во куќите и становите на граѓаните.

Но, претпоставувам дека и првиот момент повикот на бојкот кој беше експлицитен од страна на некои парламентарни партии и целата ситуација околу Ковидот, придонесе дел од граѓаните да не ги отворат вратите од своите домови, изјави шефот на државата.

На новинарско прашање за предлозите за амбасадори објавени во некои медиуми, претседателот Пендаровски одговори дека станува збор за предлози од Владата, а тие предлози споменати од медиумите во текот на вчерашниот ден, како што рече, се уште не се пристигнати до него за да може да ги коментира.

The post Пендаровски: Направивме попис со сите нишани appeared first on Република.

Пописот се уште не е завршен, не е комплетиран и не може повеќе од 130 илјади граѓани да останат непопишани во едно мултикултурно општество, изјави денеска пратеникот Љупчо Пренџов од ГРОМ.

Кога таа операција ќе се заврши, тогаш, како што рече, може да се даваат сеопфатни оценки на првите, генерални бројки.

Повеќе од 130 илјади луѓе да не ги попишете која националност се, а притоа да знаете за нив дали имаат високо, средно или основно образование, кој е доктор, адвокат, општ работник, а само да не знаете на која етничка заедница припаѓа, кој му е мајчин јазик и кој јазик го зборуваат дома во семејството, тоа е јаболко на раздорот, кое свесно се пушта од страна на Владата, рече Пренџов.

Порача веднаш да организираат работни групи, луѓе кои ќе ги посетат овие 130 илјади граѓани и да им објаснат дека за нив се знае се, а не се знае само етничката припадност и вероисповеста. Тогаш, како што рече, ќе имаме релевантни бројки на Пописот.

Пренџов апелираше Пописот да не се злоупотребува, да не се прави дека е меѓуетнички. Според него, Пописот се однесува на резидентно населението, а не на дијаспората.

The post Пренџов: Пописот сè уште не е завршен appeared first on Република.

Во земјава живеат 1.836.713 лица, од кои 58,44 отсто Македонци, 24,3 Албанци, 3,86 Турци, 2,53 Роми, 0,47 Власи, 1,3 Срби и 0,87 Бошњаци, покажуваат податоците од Пописот на населението, домаќинствата и становите, што беше спроведен од 5 до 30 септември 2021 година.

Непопишани над 132 илјади граѓани

Во резидентно население се вклучени и 132.269 граѓани кои не биле попишани, што претставува 7,3 отсто од вкупниот број евидентирани 1.836.713 лица. Податоците за нив, како што објасни директорото на ДЗС Апостол Симовски, се преземени од административни извори и во нив нема податоци за етнички или верски карактеристики.

Бројката од 132.269 лица, според него, не е голема, со оглед на околностите во кои е спроведен пописот, а тоа е ковид-пандемијата, отсуството на граѓаните поради одмори, но и поради отворениот и скриениот бојкот.

Тој вели дека не можат сите овие лица да бидат казнети за неучество во пописот, со оглед на тоа што, како што рече, не се знае дали го бојкотирале, дали се плашеле од пандемијата, дали не биле во државата или пак не се попишани од некоја друга причина.

Според него, оние што повикуваа на бојкот, но не исклучиво само заради тоа, постигнаа да имаме еден  контигнент на население за кое немаме информации.

– Тие кои се одзвале на повикот за бојкот беа изманипулирани граѓани. Секој оној кој повикуваше на бојкот, во суштина правеше само лошо. Тие што повикуваа на бојкот, не и мислат ништо добро на државата и тоа се покажа сега во суштина, подвлече Симовски.

Повеќе домаќинства и станови, просечното семејство е тричлено

Бројот на домаќинства изнесува 598.632, а на станови 839.174.  Бројот на домаќинствата е зголемен за 34.336 или за 6,1 отсто. Од презентираните резултати, просечно домаќинство брои 3,06 члена.
Зголемен е и бројот на станови за 141.031 или за 20,2 отсто.

Бројот на странци времено присутни во земјава помалку од 12 месеци е 1 674.

Густината на населеност на еден километар квадратен е 72,2 лица, а просечната возраст на населението е 40,08 години. На 1.000 жени има 984,3 мажи.

Речиси третина од населението живее во Скопје

Вкупниот број на жители во Град Скопје изнесува 526.502 лица и во споредба со пописот од 2002 година е зголемен за 3,9 проценти, покажува Пописот спроведен во 2021 година.

-Бројот на домаќинства во град Скопје изнесува 171.171 и во споредба со 2002 се забележува зголемување за 16,8 проценти, соопшти директорот на Државниот завод за статистика Апостол Симовски, презентирајќи ги резултатите.

Зголемен е и бројот на станови во Скопје. Изнесува 213.850 станови што е пораст во однос на 2002 година за 30,6 проценти.

Најмала општина во земјава е Зрновци, а најголема Куманово. Преброени се и 207 празни населени места.

За претседателот на ВМРО-ДПМНЕ Христијан Мицкоски, овој попис е некомплетен и најави дека веднаш по промената на власта, ќе се направи нова статистичка и реална операција.

– Уште од почеток имавме многу забелешки за оваа статистичка операција, но оној заклучок кој што можеме да го кажеме покрај фактот дека таа е некомплетна е дека огромно мнозинство, повеќе од 90 проценти од тие кои што се неизјаснети се дел од македонскиот народ според општините каде што тие се наоѓаат,  рече Мицкоски.

Опозициската ВМРО-ДПМНЕ смета дека пописот е некомплетен и поради изнесениот податок дека 7,2 отсто од граѓаните не биле попишани, а податоците биле преземени од бази, без притоа да се дефинира нивната етничка припадност. Пописните бројки се показател за неуспех бидејќи, како што соопштија, има силен бран на иселувања, операција спроведена со низа забелешки, и со многу политика. Сметаат дека во објавените бројките секој има право да се сомнева. Од ВМРО-ДПМНЕ посочуваат дека и покрај многуте забелешки, повикале на масовно попишување за време пописот, и додаваат дека бојкотот нанел одредена штета на податоците, особено за Македонците.

По објавувањето на резултатите од пописот, Алијанса за Албанците соопшти дека е во процес на разгледување на објавените резултати и наскоро ќе излезе со детална анализа. Изразија резерви во веродостојноста на овој процес во два сегмента.

– Над 132.000 граѓани се импутирани и непопишани на терен, додека ние сметаме дека бројот од околу 260.000 грѓани кои што живеат надвор не соодвествува со реалноста и со публикуваните податоци до сега од страна на меѓународните организации, смета АА.

Според нив, не може да се вреднува како веродостоен еден попис каде што околу 8,5 отсто од вкупното население, и на резидентното население, не им се знае националната припадност. Неверодостоен е и бројот од околу 12 отсто на граѓани во дијаспората. Ова поради тоа што многу меѓунардни инстанци, како што е Светската банка и Еуростат непрекинато се имаат изјаснето дека најмалку околу 30 отсто од граѓаните на Македонија ја имаат напуштено земјата во последните децении.

За Демократски сојуз, резултатите од Пописот не се одраз на реалноста, тој е неуспешен и за тоа треба да се бараат причините и одговорноста. Според нив, многу фактори влијаеле да не успее пописот: деструкцијата и повикот за бојкот на некои партии, лошите подготовки, методологијата за спроведување на пописот, партизацијата, слабата обука на попишувачите, отсуството на контрола и сл. Предлагаат да се направат дополнителни вкрстувања и проверки на податоците, а за нерезидентното население (иселеници) да се спроведе дополнителен попис.

Левица ги оспорува резултатите од пописот и начинот на кој беа соопштени податоците во присуство на дипломатскиот кор, оценувајќи го тоа како „обид да се бара легитимитет кај странскиот фактор“. Нагласија дека нема да го признаат овој, како што велат, фингиран попис, посочувајќи дека целиот случај ќе биде детално истражен и „ќе следуваат кривични пријави“, што, ќе биде и  услов на партијата за влез во идна влада.

Сметаат дека еден од најголемите проблеми е попишувањето на дијаспората, за што, според партијата, со еднострано лобирање на министрите на ДУИ, како и користењето на државјанство како главен критериум за попишување, дошло до помешување на резидентното население и иселениците. Од резултатите, според нив,  призлегува дека непопишани се 300.000 државјани.

Државниот завод за статистика, пак, соопшти дека пописот е спроведен успешно и професионално, а нивниот тим покажа дека може, знаее и умее, дека е една од најпрофесионалните институции во земјава.

Објавувањето на податоците од пописот што се спроведе од 5 до 30 септември 2021 година, ќе се одвива сукцесивно, по сетови на податоци. Првиот сет што се објави вчера, ги опфаќа податоците за вкупното резидентно население, вкупното нерезидентно население, пол, возраст, етничка припадност, вероисповед, мајчин јазик и јазик кој вообичаено се зборува  во домаќинствата, број на станови и број на домаќинства, а идните месеци ќе бидат објавувани сетови на податоци за образовните и економските карактеристики на населението, за становите, за домаќинствата, попреченост…

Трет попис по осамостојувањето на државата

Пописот 2021 се спроведе под строги здравствени протоколи и во услови на КОВИД-пандемија, согласно нова методологија на ЕВРОСТАТ и првпат со комбиниран модел – освен прибирање податоци директно од населението на терен, се користеа и податоци од т.н. претпописна база, каде со внесувањето на матичниот број на граѓанинот во пописната апликација, автоматски се повлекуваа сите податоци што за тоа лице постојат во базите во државата.

Последниот попис во земјава беше одржан во 2002 година, кога вкупното население изнесуваше 2.022.547 лица, имало 564.296 домаќинства и 698.143 станови. Според националната припадност Македонци се изјасниле 1,297,981 (64,17%), Албанци 509,083 (25,17%), Турци 77,959 (3,85%), Роми 53,879 (2,66%), Срби 35,939 (1,77%), Бошњаци 17,018 (0,84%), Власи 9,695 (0,47%) и 20,993 (1,03%) останати.

На територијата на земјава, според податоците на Заводот за статистика, првите попишувања се јавуваат во 15 век, кога турските власти ги попишувале само даночните глави и машкото население, а првиот современ попис е спроведен во 1921 година. По Втората светска војна се спроведени осум пописи: 1948, 1953, 1961, 1971, 1981, 1991 и 1994 и 2002 година.

Пописот во 1991 година беше со нецелосен опфат. Затоа во 1994 година повторно е спроведен попис, што е прва пописна операција во Република Македонија по нејзиното осамостојување.мд/са/

The post Попис 2021: Колку сме, толку сме, токму не сме appeared first on Република.

Актерот Владо Јовановски во свој стил ги коментира резултатите од пописот.

„Македонци, ние кои сме запишани и вие кои не сте запишани, сите сме отпишани! (попишани).

И да, уште таква поделба ни требаше, бојкотирачи против небојкотирачи и обратно.

Уште има можност за поделби, сè уште не сме малцинство во сопствената земја.

Има време…!“, резигнирано констатира актерот.

The post Јовановски: Македонци, ние кои сме запишани и вие кои не сте запишани, сите сме отпишани! appeared first on Република.

Како и што се очекуваше, резулатите од пописот спроведен лани ги разлутија граѓаните. „Најголем фалсификат“, „гробари на сопствениот народ“, „корумпирани институции“, „оставка од Симовски и од Владата“, „Северџани направивте фалсификуван попис“, „лажовци, го прогласуваме пописот за умрено“, „уште малку и малцинство ќе станеме со погрешниве стаатстики“, „лесно ќе ја кантонизираат Македонија со овие брјки“ се само дел од првите реакции на социјалните мрежи објавени веднаш откако директорот на Државниот завод за статистика, Апостол Симовски, ги соопшти официјалите резултати од пописот 2021.

Граѓаните се сомневаат во резултатот од пописот поради тоа што голем број граѓани го бојотираа пописот, многу не отворија врата поради страв од корона вирусот, а некои се жалеа дека попишувачи воопшто и не им дошле на врата.

Директорот на Заводот за статистика Симовски соопшти дека со пописот не биле опфатени 132.260 граѓани, бројка што, според него, воопшто не била фактор во конечниот резултат.

Тој вели бројката на неопфатени граѓани со пописот е мала, очекувале да биде поголема.

The post Граѓаните не пијат нафта и порачуваат: „Лесно ќе ја кантонизирате Македонија со овие брјки“, „гробари на сопствениот народ“ appeared first on Република.

Резултатите на пописот спроведен минатата година покажаа дека 132.260 жители останале непопишани. Многу врати останаа затворени поради повиците да се бојкотира пописот. На многу врати не тропнаа попишувачите од едни или други причини, но тоа не ги натера Македонците да заминат во пунктовите и да се попишат самите. Со други зборови, цената на бојкотот и на апатијата ја платија Македонците.

Директорот на Државниот завод за статистика Апостол Симовски на денешната презентација на резултатите од пописот како еден од факторите за тоа што не се попишале 7,2 отсто граѓани, ги посочи оние кои отворено повикуваа на бојкот.

Да не беа црните кампањите дека работиме надвор од стандардните на ЕУ, дека веќе претходно се сме договориле, ќе беше многу помала оваа бројка. Ќе сфатат тие што ја злоупотребија кампањата, дека згрешиле. Мое мислење е дека никој не треба да биде казнет што не се попишал. Не знаеме дали поради отворен бојкот не се попишале, изјави Симовски.

Тој додаде и дека во периодот на попис голем број граѓани биле и на годишни одмори.

Плажите беа полни во тој период, особено по една година во која никој не можеше да оди на одмор, наведе првиот човек на ДЗС.

Симовски додаде дека постојат и други фактори кои ја диктирале оваа бројка.

Луѓето беа по нивите, доаѓаа по 20.00 часот, тешко се наоѓаа. Имавме ковид, исплашени луѓе имаше од евентуално ширење на болеста иако ги презедовме сите мерки, додаде тој.

Сепак, не летуваа и не копаа само Македонците. На плажите и по нивите одеа и Албанците. Но, нивната политика не остана рамнодушна и не дозволи „исончаните“ да останат непопишани.

Со жестока кампања спроведена и во дијаспората и дома ДУИ ги повика сите Албанци да се попшат. Не се противеа и не бојкотираа ниту опозициските партии на етничките Албанци.

Со месеци Артан Груби, Бујар Османи и други влијателни членови на владејачката партија одеа од куќа до куќа и во Македонија, но и во Швајцарија, Албанија, секаде каде што живеат Албанци,, агитираа, а имаа поддршка од сите албански партии. Денес ги гледаме плодовите од таа работа.

https://republika.mk/vesti/makedonija/grubi-na-albanski-jazik-ja-povika-dijasporata-da-se-registrira-makedonskata-ne-e-informirana-za-popisot/

Секој ден се броеја попишаните од дијаспората и се објавуваа постери со бројките.

Со денови на јавни настапи функционерите на ДУИ одговараа на прашања кои можат да се појават како нејаснотии поврзани со пописот.

https://republika.mk/vesti/makedonija/grubi-moze-da-se-popishat-i-tie-koi-se-otkazale-od-makedonsko-drzavjanstvo/

И како што велат албанските политичари наместо да се занимаваат со својот број, Македонците се грижат за бројот на Албанците. Всушност, на крајот гледаме дека Македонците не се гриже ниту за својот број ниту за својата држава.

The post Цената на бојкотот ја платија Македониците – останаа 132.260 непопишани appeared first on Република.

Вкупното резидентно население во земјава изнесува 1 836 713 лица, од кои 58,44 отсто се Македонци, 24,3 Албанци, 3,86 Турци, 2,53 Роми, 0,47 Власи, 1,3 Срби и 0,87 Бошњаци, покажуваат податоците од Пописот 2021 што денеска ги соопшти директорот на Државниот завод за статистика Апостол Симовски.

Според Симовски, бројот на вкупно попишано население изнесува 2 097 319 лица, а на нерезидентното 260 606 лица. Од вкупниот број попишани, 54,21 отсто се изјасниле како Македонци, 29,52 се Албанци, 3,98 Турци, 2,34 Роми, 1,18 Срби, 0,87 Бошњаци и 0,44 Власи

Од неризедентното население опфатено со пописот 24,45 отсто се Македонци, 66,36 Албанци, 4,79 Турци, 1,02 Роми, 0,19 Власи, 0,35 Срби и 0,81 Бошњаци, истакна Симовски.

Пописот покажал дека бројот на домаќинства е 598.632. Најмала општина во земјава е Зрновци, а најголема Куманово. Преброени се и 207 празни населени места.

Бројот на странци времено присутни во земјава помалку од 12 месеци е 1 674.

Пописот е спроведен успешно и професионално. Тимот на Државниот завод за статистика покажа дека може, знае и умее, дека е една од најпрофесионалните институции во земјава, рече Симовски, додавајќи дека податоците се обработени во рекорден рок.

Пописот спроведен во 2021 година покажа дека во однос на 2002 година вкупното население во државата е намалено за 185 834 лица или за 9,2 отсто, а бројот на домаќинствата е зголемен за 34 336 или за 6,1 отсто. Зголемен е и бројот на станови за 141 031 или за 20,2 отсто.

Како што соопшти Симовски, презентирајќи ги резултатите, просечно домаќинство брои 3,06 члена. Бројот на станови изнесува 839.174.

Густината на населеност на еден километар квадратен е 72,2 лица, а просечната возраст на населението е 40,08 години. На 1.000 жени има 984,3 мажи.

Објавувањето на податоците од пописот што се спроведе од 5 до 30 септември 2021 година, ќе се одвива сукцесивно, по сетови на податоци. Првиот сет што се објавува денеска, ги опфаќа податоците за вкупното резидентно население, вкупното нерезидентно население, пол, возраст, етничка припадност, вероисповед, мајчин јазик и јазик кој вообичаено се зборува  во домаќинствата, број на станови и број на домаќинства, а во месеците што следат ќе бидат објавувани сетови на податоци за образовните и економските карактеристики на населението, за становите, за домаќинствата, попреченост…

Пред денешното соопштување на податоците, доделени им беа благодарници на институциите кои придонесоа за успешно спроведување на оваа сложена статистичка операција. 

The post Резултати од Пописот: Македонци има 54,21 отсто, Албанци 29,52 appeared first on Република.

Државниот завод за статистика денеска ќе ги објави податоците од Пописот на населението, домаќинствата и становите, 2021 година, кој што се спроведе од 5 до 30 септември 2021 година.

На настанот, како што е најавено, ќе се обратат директорот на Државниот завод за статистика Апостол Симовски, заменикот-директор Илми Селами и меѓународниот експерт од Словенија, Данило Доленц.

Настанот ќе биде поделен во два дела: во првиот дел ќе бидат доделени благодарници на институциите кои придонесоа за успешното спроведување на Попис 2021, а во вториот дел ќе бидат објавени податоците од Пописот.

Пописот 2021 е прв попис по многу параметри – прв по речиси две декади, првпат во пандемија, првпат со комбиниран метод, прв на кој се попишува дијаспората и најважно од се, наспроти сите предизвици успешно завршен.

Директорот на Државниот завод за статистика Апостол Симовски во интервју за МИА, вчера рече дека пописот и покрај сите предизвици е темелен, точен и прецизен приказ и пресек на нашето општество.

Објавувањето на податоците ќе се одвива сукцесивно, по сетови на податоци. Првиот сет на податоци што ќе биде објавен денеска, ги опфаќа податоците за вкупното резидентно население, вкупното нерезидентно население, пол, возраст, етничка припадност, вероисповед, мајчин јазик и јазик кој вообичаено се зборува  во домаќинствата, број на станови и број на домаќинства, а во месеците што следат ќе бидат објавувани сетови на податоци за образовните и економските карактеристики на населението, за становите, за домаќинствата, попреченост…

Според податоците објавени на веб страницата на Државниот завод за статистика веднаш по завршувањето на Пописот на 30 септември, попишани се вкупно 1.832.696 лица, регистрирани се 568.175 домаќинства и 837.255 станови. Самопопишани лица во странство се 204.805 граѓани.

Пописот 2021 се спроведе под строги здравствени протоколи и во услови на КОВИД-пандемија, соглано нова методологија на ЕВРОСТАТ и првпат со комбиниран модел – освен прибирање податоци директно од населението на терен, се користеа и податоци од т.н. претпописна база, каде со внесувањето на матичниот број на граѓанинот во пописната апликација, автоматски се повлекуваа сите податоци што за тоа лице постојат во базите во државата.

Последниот попис во државава беше одржан во 2002 година, кога вкупното население изнесуваше 2.022.547 лица, имало 564.296 домаќинства и 698.143 станови. Според националната припадност Македонци се изјасниле 1,297,981 (64,17%), Албанци 509,083 (25,17%), Турци 77,959 (3,85%), Роми 53,879 (2,66%), Срби 35,939 (1,77%), Бошњаци 17,018 (0,84%), Власи 9,695 (0,47%) и 20,993 (1,03%) останати.

На територијата на земјава, според податоците на Заводот за статистика, првите попишувања се јавуваат во 15 век, кога турските власти ги попишувале само даночните глави и машкото население, а првиот современ попис е спроведен во 1921 година. По Втората светска војна се спроведени осум пописи: 1948, 1953, 1961, 1971, 1981, 1991 и 1994 и 2002 година. аа/сп/

The post Државниот завод за статистика денеска ќе ги објави податоците од Пописот 2021 appeared first on Република.