Портпаролот на Европската комисија, Петер Стано, коментирајќи ја посетата на Александар Вулин на Русија рече дека одржувањето врски со Москва за време на нејзината агресорска војна против Украина не е во согласност со вредностите на ЕУ и процесот на пристапување во Европската Унија.

- Европската унија сака да смета на сите земји кандидати како европски партнери од доверба кои споделуваат заеднички принципи, вредности, безбедност и напредок. Европската унија беше кристално јасна со своите партнери: односите со Русија не можат да бидат вообичаени поради неоправданата, агресорска војна на Русија против Украина, изјави тој за Н1, пренесува Бета.

Српскиот вицепремиер Александар Вулин, за време на средбата со рускиот претседател Владимир Путин во Владивосток, рече дека „Србија предводена од претседателот Александар Вучиќ нема да стане членка на НАТО, дека нема да воведува санкции кон Руската Федерација и нема да биде територија од која се врши антируско дејствување“, соопшти Кабинетот на вицепремиерот на Србија.

The post Стано за посетата на Вулин на Русија: Одржувањето врски со Русија не е во согласност со вредностите на ЕУ appeared first on Република.

Портпаролот на Европската унија, Петер Стано, денеска на прес-конференција во Брисел реагираше на изјавата на вицепремиерот на Косово, Бесник Бислими, кој минатата недела рече дека има информации оти е препорачано укинување на мерките од ЕУ кон Косово.

Стано, како што пренесуваат медиумите во Приштина, нагласи дека извештајот за чекорите преземени од Косово за исполнување на неговите обврски е делегиран на високиот претставник на ЕУ за надворешна политика, Жозеп Борел од Советот на ЕУ, но додаде дека нема потреба никој однадвор да шпекулира за содржината и времето на известувањето.

- Не ни треба некој од надвор да шпекулира за содржината и распоредот. Тоа ќе биде направено во време погодно за високиот претставник и земјите-членки, кои први ќе ја видат и ќе дискутираат за содржината, пред да ги донесат потребните одлуки. А кога тоа ќе се случи, тогаш ќе ги објавиме резултатите. Нема простор и причина за јавни шпекулации од различни актери, изјави Стано.

Тој нагласи дека извештајот на Борел за Косово е „институционално прашање меѓу високиот претставник и земјите членки“.

- Ова е институционално прашање меѓу високиот претставник и земјите членки. Земјите членки се тие кои побараа извештај и секако високиот претставник ќе го испрати извештајот до земјите членки. Тие први ќе знаат кога ќе се случи и што содржи извештајот, а тоа се уште не се случило, потенцира Стано.

Минатиот четврток, на 13 јуни, вицепремиерот и главен преговарач на Косово во дијалогот со Србија, Бесник Бислими изјави дека има информации оти во извештајот на Борел е препорачано укинување на мерките на ЕУ кон Косово.

Во собраниската Комисија за евроинтеграции, Бислими рече дека „содржината на извештајот е позитивна“, јави дописникот на МИА од Приштина.

- Извештајот на господинот Борел е предуслов за зачленување во Советот на Европа, тој беше изготвен во април, но имаше двоумење да се испрати до Комисијата. Извештајот требаше да биде доставен (на 11 јуни), но дел од Комисијата побара мало одложување... Информациите што ги имам се дека содржината на извештајот е позитивна и препорачува укинување на мерките, рече Бислими.

Рестриктивните мерки против Косово беа воведени пред една година, како резултат на ескалацијата на безбедносната состојба на косовскиот север, населен со мнозинско српско население, кога официјална Приштина ги смести во општинските згради градоначалниците Албанци избрани на изборите што беа бојкотирани од Србите.

Мерките вклучуваат привремено суспендирање на работните групи за Договорот за стабилизација и асоцијација, непоканување на Косово на состаноци на високо ниво и суспензија на билатералните посети.

Исто така, суспендирано е програмирањето на средствата за Косово, кои беа планирани да се испорачаат преку Инвестициската рамка во Западен Балкан и ИПА 2024 (Претпристапни инструменти).

По казнените мерки, Косово остана надвор од грантовите што ЕУ ги одобри во јули минатата година, во износ од 2,1 милијарди евра.

The post Брисел го демантира Бислими дека Борел ќе препорача укинување на санкциите на ЕУ кон Косово appeared first on Република.

Портпаролот на ЕУ, Петер Стано, изјави дека Приштина може да побара правно мислење од Венецијанската комисија во врска со нацртот на Заедницата на српските општини (ЗСО), но оти не треба да го одложува исполнувањето на обврските во врска со формирањето на ЗСО.

Како што пренесува Политика, тој ова го рече во врска со изјавата на приштинскиот премиер Албин Курти дека специјалниот пратеник на ЕУ за дијалогот Мирослав Лајчак треба да поднесе нацрт за ЗСО до Венецијанската комисија и оти тој нацрт потоа ќе го достави до Уставниот суд.

Стано за „Газета Експрес“ изјавил дека вклучувањето на Венецијанската комисија не е предвидено како дел од бриселските договори од 2013 и 2015 година за формирање на Заедницата на српски општини (ЗСО).

Според него, официјален Брисел и земјите од Квинтата јасно ставиле до знаење дека очекуваат Приштина да го испрати нацртот на ЕУ до Уставниот совет на евалуација и нагласи дека ЕУ очекува Косово брзо да реагира по ова прашање и да стави крај на понатамошните одложувања во исполнувањето на своите обврски.

– Очекуваме дека Косово брзо ќе реагира по ова прашање и ќе престане со дополнително одложување на исполнувањето на обврските, изјави Стано.

The post Стано: Приштина да не доцни со исполнување на обврските околу формирањето на ЗСО appeared first on Република.

Европската унија смета дека нацрт-статутот на Заедницата на српски општини треба да биде претставен во дијалог, во согласност со релевантните договори, изјави портпаролот на ЕУ, Петер Стано.

Во изјава за Радио Слободна Европа тој нагласи дека Брисел не може да зборува за содржината на предлогот од Приштина, бидејќи тоа е непознато за европските институции, но предупреди дека тоа е прашање што треба да се реши во рамките на разговорите меѓу Белград и Приштина.

Според него, содржината на нацрт-статутот што го објави Приштина е непозната и дека за тоа не се разговарало со Србија и посредникот на ЕУ.

The post Стано: Нацрт-статутот на ЗСО треба да се најде во дијалогот, не сме запознаени со предлогот на Приштина appeared first on Република.

Европската Унија и нејзините земји членки засега се уште не решиле дали ќе присуствуваат на утрешната инаугуративна церемонија во Москва со што официјално треба да започне новиот мандат на рускиот претседател Владимир Путин, соопшти денеска портпаролот на Европската комисија за надворешни работи и безбедносна политика Петер Стано.

– Можам да потврдам дека поканата од Кремљ за утрешната инаугурација на Путин е пристигната и до земјите членки и до Делегацијата на ЕУ во Москва. Ние секогаш имаме за цел да изградиме координиран европски пристап кога е во прашање надворешната политика, па во моментов меѓу земјите членки се дискутира како да се одговори земајќи ги предвид сите релевантни елементи, истакна Стано.

Тој нагласи дека засега не е донесена никаква конечна одлука во однос на поканата, но потенцира дека високиот претставник на ЕУ за надворешна политика безбедност Жозеп Борел е против учество на претставници на Унијата на овој настан во Москва.

The post Стано: ЕУ се уште не решила дали ќе учествува на инаугурацијата на Путин, Борел е против присуство appeared first on Република.

Наодите во извештајот на Канцеларијата за демократски институции и човекови права при ОБСЕ (ОБСЕ/ОДИХР) за изборни нерегуларности во Србија треба да се истражат на транспарентен начин, вклучително и оние поврзани со локалните избори, оцени денеска портпаролот на Европската комисија за надворешни работи и безбедносна политика Петер Стано.

- Конечниот извештај на ОБСЕ/ОДИХР за предвремените парламентарни избори во Србија ја потврди загриженост на ЕУ дека изборниот процес бара видливо подобрување и дополнителни реформи, наведе Стано на платформата Икс по повод објавувањето на конечниот Извештај на ОБСЕ/ОДИХР за предвремените парламентари, покраински и делумни локални избори во Србија одржани на 17 декември 2023 година.

Стано во објавата додава и дека ЕУ го поздравува тоа што властите на Србија изразиле подготвеност да работат заедно со ОБСЕ/ОДИХР за спроведување на наведените препораки во извештајот.

- Нема време за губење пред идните избори во земјата, потенцира Стано.

Како што јави допсиникот на МИА од Брисел, во извештајот на ОБСЕ/ОДИХР за изборите во Србија, објавен вчера, се наведува дека тие биле „технички добро администрирани и на гласачите им бил понуден избор на политички алтернативи“, но дека „системските предности на владејачката партија создале неправедни услови за натпреварувачите“, што овозможиле таа да извојува убедлива победа.

- Во кампањата генерално беа почитувани основните слободи, но таа беше нарушена со остра реторика, пристрасност на медиумите, притисок врз вработените во јавниот сектор и злоупотреба на јавните ресурси, се наведува во извештајот на ОБСЕ/ОДИХР, чии набљудувачи од претходно пријавија дека на изборите имало „неправилности“, вклучително и „купување гласови“ и „полнење на гласачките кутии“. 

Српската премиерка Ана Брбаниќ во првата реакција, го поздрави Извештајот на ОБСЕ/ОДИХР оценувајќи дека тој ставил крај на шпекулациите за наводна изборна измама.

- Овој извештај става крај на сите лаги и глупости за кражба на изборите, изјави Брнабиќ, нагласувајќи дека Владата е подготвена да соработува со ОБСЕ во спроведувањето на препораките од Извештајот.

Истрага за текот на изборниот процес во Србија беше побарана и во Резолуцијата што на 8 февруари ја усвои Европскиот парламент, но властите во Белград тогаш го игнорираа оваа барање.

Претходно и Врховниот суд на Србија го отфрли барањето на опозицијата за поништување на изборните резултати поради серија изборни нерегуларности.

Во коментар на Извештајот на ОБСЕ/ОДИХР една од лидерите на здружената српска опозиција „Србија против насилството“, Мариника Тепиќ изјави дека кога некој ќе каже дека изборите се одржале во нееднакви услови, каде што се фаворизира една структура и со агресивна кампања, поларизација на општеството, говор на омраза и навреда на политичките противници и нережимските новинари, тоа се нарекуваат нерамноправни, недемократски и неслободни избори.

- Сите знаат што се случи, само никој не сака да му каже на кралот дека е гол, нагласи Тепиќ.

The post Стано: Србија да спроведе транспарента истрага за наводите на ОДИХР за изборни нерегуларности appeared first on Република.

Рускиот претседател Владимир Путин е баран од Меѓународниот кривичен суд и постои потерница по него во врска со бруталната и нехумана агресија врз Украина, врз европската стабилност и врз глобалниот поредок базиран на правила и се надевам дека нашите турски партнери се свесни за тоа, изјави денеска портпаролот на Европската комисија за надворешни работи и безбедносна политика Петер Стано, во коментар на најавената посета на Путин на Турција.

Запрашан дали ЕУ очекува Турција да го уапси Путин, Стано изјави дека потписничките на Римскиот статут на Судот се должни да ги почитуваат неговите потерници, но дека не е на ЕУ да кажува кој што треба да прави.

Инаку, според податоците на ОН, Турција не е меѓу земјите потписници на Римскиот статут на Меѓународниот кривичен суд.

Стано нагласи дека Турција прави напори да придонесе за мир во Украина, но дека руската страна засега е некредибилна и се што предлага како мировно решение е несериозно и покриено со константа ескалација на конфликтот и насилство врз луѓето во Украина.

ЕУ поддржува секаква кредибилна иницијатива што би можела да доведе до праведен мир во Украина во согласност со меѓународното право и почитување на нејзиниот суверенитет и територијален интегритет, но сето она што доаѓа од Кремљ како понуда за мир е целосно некредибилно и несериозно, додаде Стано.

На прашање во врска со можното „руско мешање“ на претстојните избори во ЕУ, Стано истакна дека Унијата работи на тоа да се заштити од странски влијанија, но најголем дел од одговорноста е на земјите членки од кои очекува да преземат мерки за заштита на претстојните избори од обиди за странско мешање.

- Во минатото веќе видовме манипулации, влијанија, хибридни закани и мешање во изборите насочени против ЕУ, додаде Стано.

The post Се надеваме дека Турција е свесна оти постои меѓународна потерница по Путин, порача Стано appeared first on Република.

Европскиот патот на Србија и на Косово води преку дијалогот што го водат со посредство на ЕУ и ако нема напредок во него, ќе нема напредок ниту во нивните пристапни процеси, изјави денеска портпаролот на Европската комисија за надворешни работи и безбедносна политика Петер Стано.

Тоа е потенцирано во голем број документи и заклучоци на Советот, во Преговарачката рамка за Србија и во извештаите за проширување за Косово и Србија. Во нив е многу јасно наведено што очекуваат ЕУ и земјите членки кога станува збор за пристапниот процес и дијалогот. Тие се дел од еден ист процес и се неодвоиви. Тоа значи дека без напредок во дијалогот и во спроведувањето на обврските, ќе нема напредок на европскиот пат - нагласи Стано.

Според него, доколку има напредок само од едната страна тоа ќе придонесе само за нејзин напредок кон ЕУ.

Во однос на ланскиот инцидент во Бањска, Стано истакна дека кога ќе биде готов конечниот извештај од истрагата на косовските власти за овој случај, ЕУ ќе го анализира и ќе донесе одлука за евентуални последици за одговорните.

ЕУ очекува безусловна соработка од сите што можат да помогнат за да се разјасни што се случи, кој соработувал, кој го организирал и кој учествувал во него. За да можеме да преземеме нешто, мора да ги видиме конечните официјални резултати од истрагата на косовските власти - додаде Стано.

The post Стано: Европскиот пат на Србија и на Косово зависи од напредокот во дијалогот appeared first on Република.

Газа треба да биде управува од администрација, а не од Хамас, која е терористичка организација и гледаме каква мизерија и трагедија им донесе на луѓето и на Појасот во целина, изјави денеска портпаролот на Европската комисија за надворешни работи и безбедносна политика Петер Стано.

Газа не може да биде реокупирана, да биде поделена или да биде одвоена од идната палестинска држава и треба да биде управувана соодветно од легитимни власти, изјави Стано.

Според него, таа палестинска управа треба да има легитимитет, кој треба да биде потврден од страна на Советот за безбедност на ОН.

Деталите на сево ова ќе бидат утврдени кога ќе влеземе во процесот. Сега приоритетите се многу јасни. Прво треба да се соочиме со хуманитарната трагедија, која има две лица и од израелска страна и од палестинска страна, рече Стано.

Тој додаде дека од израелска страна таа трагедија се согледува во задржувањето на заложници, како и во постојаните ракетни напади од страна на Хамас, а од палестинска страна е видливото страдање на цивилите.

Според него, справувањето со овие настани е она на што ЕУ е фокусирана во моментов и што беше содржано и во заедничката изјава на 27-те земји членки од неделата и за време на вчерашната дискусија на министрите на Советот за надворешни работи на Унијата.

- Вториот чекор е за тоа што ќе правиме со конфликтот во целина. Предлогот за две држави е идејата на која што треба да работи меѓународната заедница, но секако и самите Израелци и Палестинци, изјави Стано.

Тој додаде дека некаде меѓу овие две точки треба да биде процесот што ќе се одвива чекор по чекор за конкретни прашања поврзани со идното управување со Газа.

- Но, за тоа секако, пред се, се потребни заеднички напори и од страна на Израелците и од страна на Палестинците, со огромна поддршка од меѓународната заедница, при што Европската Унија ќе игра важна улога заедно со нејзините меѓународни партнери, истакна Стано

The post Стано: Со Газа не треба да управува Хамас, туку легитимни палестински власти appeared first on Република.

Европската Унија соопшти дека е „тешко да се проверат“ извештаите дека лидерот на групата „Вагнер“, Евгениј Пригожин, загинал во авионската несреќа.

Видовме извештај за авионската несреќа во која наводно загинал Евгениј Пригожин, заедно со членовите на неговата придружба и членовите на екипажот. Меѓутоа, како и многу други работи во Русија, многу тешко ни е да потврдиме за тоа, а не е наше да коментираме, изјави Петер Стано, портпарол на ЕУ за надворешни работи и безбедносна политика.

Портпаролот на ЕУ истакна дека се добро познати „негативните акции“ на Пригожин и групата „Вагнер“, посочувајќи на нивното учество во војната во Украина и операциите во африканските земји.

Стано кажа дека ЕУ се надева дека ќе престане „негативното влијание“ на операциите на „Вагнер“, додавајќи дека е свесен дека платеничката група „не се врзува само за името на нејзиниот водач“. Тој посочи дека поврзаноста на групата со Кремљ е едно од неколкуте „комплексни прашања“, истовремено нагласувајќи дека не е на ЕУ да „погодува дали наводната смрт на Пригожин во авионска несреќа ќе има некои конкретни последици за активностите на „Вагнер“.

The post Портпаролот на ЕУ: Тешко е да се поверува дека Пригожин навистина загинал appeared first on Република.

Портпаролот на Европската унија, Петер Стано, денеска изјави дека ЕУ во неколку наврати била јасна што очекува од Косово за да бидат повлечени мерките воведени во Приштина и дека ЕУ е подготвена да воведе драстични мерки доколку нема деескалација на ситуацијата на северот на Косово.

ЕУ побара од Косово да дејствува во насока на деескалација и веднаш да ги прекине сите полициски акции во и околу административните општински згради во општините со српско мнозинство на северот на Косово. Четворица градоначалници привремено ќе ги извршуваат своите должности надвор од општинските згради. Ја забележавме и ја поздравивме најавата на Владата на Косово за намалување на полициското присуство за 25 отсто во и околу општинските згради. Сето тоа се важни чекори, но потребни се дополнителни чекори - рече Стано на редовниот брифинг со новинарите на прашањето дали ЕУ ќе почне да ги укинува мерките против Косово во моментот кога се распишуваат избори во четири општини на северот на Косово со српско мнозинство.

The post Стано: На Косово доколку не деескалира состојбата ќе превземеме драстични мерки appeared first on Република.

Европската унија не може да обезбеди безбедносни гаранции за Украина бидејќи тоа не е во нејзина надлежност, изјави денеска портпаролот на ЕУ за надворешни работи и безбедност, Петер Стано.

Ние не сме безбедносна организација, така што дискусиите за безбедносните гаранции се дискусии за НАТО и за одделни земји, но не и за ЕУ ​​како организација, рече портпаролот на брифинг со новинарите во Брисел.

Тој додаде дека ЕУ го поддржува Киев во неколку области, вклучително и воената, што, како што рече, се рефлектира во испраќањето оружје за одбрана на Украина од руската агресија, но дека кога станува збор за безбедносните гаранции, таа може само да ги поддржи.

Тоа им останува на земјите-членки кои можат да обезбедат таков вид гаранција, рече Стано.

Украинскиот претседател Володимир Зеленски претходно побара безбедносни гаранции од НАТО и западните партнери за неговата земја.

На 12 јули, членките на Г7 објавија меѓународна рамка која го отвора патот за долгорочни безбедносни гаранции за Украина со цел зајакнување на нејзината одбрана од Русија и одвраќање на Москва од идна агресија.

Зеленски минатата недела кажа дека уште 12 земји се приклучиле на декларацијата на Г7 за безбедносни гаранции за Киев.

The post Стано: Европската унија не е надлежна за давање безбедносни гаранции за Украина appeared first on Република.

Портпаролот на Европската унија, Петер Стано, потврди дека ЕУ одлучила да спроведе низа мерки кон Косово, бидејќи земјата не ги презела потребните чекори за деескалација на ситуацијата.

Тој истакна дека станува збор за привремени мерки, а дали истите ќе бидат повлечени ќе зависи од развојот на ситуацијата на терен и одлуките за деескалација што ќе ги донесе премиерот на Косово, Албин Курти.

Тој изјави дека работата на органите на „Спогодбата за стабилизација и асоцијација“ е привремено суспендирана, дека е одлучено Косово да не биде покането на настани на високо ниво, билатералните посети да бидат прекинати, освен оние кои имаат за цел решавање на кризата на северот на Косово во рамките на Дијалогот со поддршка на ЕУ.

Додаде и дека ЕУ исто така внимателно следи дали Србија ги исполнува нивните барања и нагласи дека и во овој случај ЕУ е подготвена да преземе мерки доколку земјата покаже непочитување.

На деескалација на состојбата на северот од Косово на синоќешната средба со српскиот претседател Александар Вучиќ во Белград повикаа и премиерите на Холандија и Луксембург бидејќи како што истакнаа неодамнешните тензии се закана која може да го турне балканскиот регион во нестабилност, додека Европа се соочува со руската агресија во Украина.

The post Стано: Од одлуките на Курти ќе зависи дали ЕУ ќе ги откаже мерките за Косово appeared first on Република.

Европската унија воведува негативни политички и финансиски мерки за Косово затоа што косовскиот премиер Албин Курти, и покрај постојаните повици од ЕУ, не презеде итни и решителни чекори за намалување на ескалацијата на Косово, изјави денеска во Брисел портпаролот на Европската комисија Петер Стано, пренесе Бета.

 И покрај нашите постојани барања, косовскиот премиер Курти не презеде решителни чекори за намалување на тензиите и неговиот план за намалување на ескалацијата испратен до високиот претставник на ЕУ (Жозеп Борел) не беше одговор и начин да се елиминираат клучните елементи што предизвикаа и беа основните причини за кризата, што очекуваме тој итно и решително да ги отстрани - изјави Стано за новинарите во Брисел.

Тој додаде дека „затоа, во согласност со своето соопштение од 3 јуни, Европската унија подготви рестриктивни мерки кои не се санкции, туку рестриктивни мерки кои стапуваат во сила веднаш“.

Членките на ЕУ, рече тој, ги поддржаа мерките поврзани со Косово и очекуваат дека „премиерот Курти веднаш ќе ги преземе неопходните чекори за намалување на ескалацијата, а тие мерки содржат политички и финансиски последици, почнувајќи од прекин на посетите, контактите и настаните на високо ниво, како и суспензија на финансиската соработка на ЕУ со Косово“.

Мерките се привремени и може да се повлечат, а зависат од развојот на ситуацијата на терен и убедливите, решителни чекори што премиерот Курти треба да ги преземе за да се намали ескалацијата - рече Стано.

Стано укажа на соопштението на членките на ЕУ од 3 јуни во кое беше наведено дека доколку не дојде до намалување на заострувањето предизвикано од спорните избори на северот на Косово, ќе следат „негативни последици“ за односите со Унијата.

Како што истакна, во изминатите денови и недели имало „многу силни контакти на високо ниво со цел да се надмине моменталната состојба на Косово, а вчерашните настани покажаа дека нема намалување на тензиите и оти затегнатоста сè уште постои“.

The post Стано: ЕУ воведува политички и финансиски мерки за Приштина appeared first on Република.

Европската унија (ЕУ) се радува на соработка со новиот црногорски претседател, како и со сите политички актери во Црна Гора, изјави портпаролот на шефот на европската дипломатија, Петер Стано.

-Очекуваме соработка со новиот претседател и сите релевантни државници во Црна Гора со цел да и помогнеме да остане на европскиот пат, да се изгради консензус за клучни приоритети што треба да се исполнат во текот на процесот на интеграција, а кои се потребни за земја да оди напред, рече Стано.

Стано на прес-конференција во Брисел изјави дека е многу важно Црна Гора да се фокусира на сите проблеми и прашања од владеењето на правото и тоа на начин пропишан од Европската комисија, пренесува порталот РТЦГ.

Тој додаде дека ЕУ е подготвена да ја поддржи Црна Гора и да продолжи да и помага на патот кон Унијата бидејќи тоа го сака мнозинството луѓе во Црна Гора.

-Во тој контекст, политичката стабилност во земјата е клучот за продолжување на патот кон ЕУ, рече Стано.

The post Стано: ЕУ се радува на соработката со новиот претседател на Црна Гора appeared first on Република.

Европската Унија најави дека расправата и предлозите за условите што ги постави косовскиот премиер Албин Курти за формирање на ЗСО треба да се одвиваат во рамките на дијалогот, пишува Коха, пренесува српски Данас.

Дијалогот Косово-Србија е простор каде што страните можат да разговараат и да дадат предлози за формирање на Заедница на општини со српско мнозинство“, оценуваат од ЕУ.

Портпаролот на ЕУ за надворешна политика и безбедност, Петер Стано, ја истакна подготвеноста на европскиот блок да овозможи разговори за ЗСО на претстојните состаноци.

Ги зедовме предвид коментарите на премиерот Курти во однос на Заедницата на општини со српско мнозинство, презентирани во Собранието на Косово на 2 февруари. Во рамки на дијалогот има и средба на која ќе се разговара за создавање Заедница на општини со српско мнозинство, како и за секој предлог што го имаат двете страни. ЕУ е подготвена да ги овозможи разговорите за ЗСО на идните состаноци, вели Стано.

Од косовската Влада најавија дека очекуваат на следните средби да се решат овие прашања во рамките на европскиот предлог.

Имаме пред нас европски предлог за кој рековме дека е прифатлив како добра основа за понатамошни дискусии и солидна платформа за одење напред. Очекуваме дека следните состаноци во Брисел, кога и да се одржат, ќе бидат добра можност за решавање на прашања во рамките на европскиот предлог поврзани со меѓународните гаранции, механизмите за имплементација и временскиот редослед. Потенцијалното условување од Србија на средбите во Брисел на кои ќе се разговара за ЗСО, несомнено треба да се толкува како обид на Србија да избегне дискусии за европскиот план, кој веќе го отфрли како таков, изјави портпаролот на Владата на Косово, Перпарим Криезиу.

The post Стано: ЕУ ги зема предвид коментарите на Курти во врска со Заедницата на српски општини на Косово appeared first on Република.

Европската Комисија реагираше денеска за договорот склучен меѓу првите дипломати на Русија и Србија за натамошни консултации, откако повеќе европратеници побараа замрзнување на преговорите со Белград, јави дописничката на МИА од Брисел.

Портпаролот за надворешни работи во Европската Комисија, Петер Стано, рече дека со оглед на контекст на нелегалната инвазија врз Украина, склучувањето на овој договор меѓу Србија и Русија е причина за загриженост во ЕУ.

Во овие услови, фактот што министерството за надворешни работи на Србија прифаќа редовни консултации со земја која врши вакви ѕверства е јасен сигнал дека ќе ги зајакнуваат нивните односи понатаму, и ова отвора сериозни прашања за ЕУ, рече Стано.

Портпаролот нагласи дека Србија е таа што го прогласи членството во ЕУ како приоритет, а од земјите кандидати за членство се очекува усогласување со ЕУ политиките, вклучително и во делот на надворешната политика.

Србија е исто така цел на остри критики во ЕУ затоа што не усвои санкции против Русија, а го остави отворен и својот воздушен простор за оваа земја.

Белград и Москва преку нивните министри за надворешни работи во Њујорк потпишаа договор за соработка минатата недела.

Во текот на овој викенд неколку европратеници повикаа да се замрзнат преговорите за членство во ЕУ со Србија. На ова прашање не одговори Европската Комисија.

The post Стано: Договорот меѓу Србија и Русија отвора сериозни прашања appeared first on Република.

Портпаролот на ЕУ, Петер Стано денеска во Брисел изјави дека никој не може да ја предвиди конечната цел на руската воена инвазија на Украина и ги отфрли објаснувањата на рускиот претседател Владимир Путин дека станува збор за спречување геноцид и „денацификација“ на Украина.

Тоа е целосно бесмислено, бидејќи тој е тој што го прави (геноцидот) или е на пат да го направи. Тој зборува за ослободување на Украина од нацизмот, но се однесува како нацист - рече Стано.

Портпаролот на ЕУ на редовната прес-конференција во Брисел рече дека никој не ја знае конечната цел на Путин, бидејќи, како што додаде, тој никогаш официјално не ја објавил.

Ова е толку нерационално, неоправдано и неразбирливо што е тешко да се види која е целта. Гледаме што се случува. Во основа, тој сака да ја уништи Украина, да и ја одземе независноста и да нанесе штета и страдање на украинскиот народ. Тоа е апсолутно нехумано и нецивилизирано и не припаѓа на Европа од 21 век - објасни Стано.

Тој заклучи дека ЕУ е подготвена за секое сценарио, а со санкции реагира на конкретни дејствија на Москва, вклучително и кршење на меѓународното право и територијалниот интегритет и суверенитет на Украина.

The post Стано: Никој не може да ја предвиди конечната цел на руската воена инвазија на Украина appeared first on Република.