Најавена е нова пензиска реформа која треба да стапи на сила на почетокот на следната година. Со оглед на тоа што пензионерите во Хрватска се меѓу најсиромашните во ЕУ и дури една третина од нив се во ризик од сиромаштија (просекот во ЕУ е 17,3 проценти), секоја најава за подобрување на пензискиот систем буди надеж дека состојбата ќе се подобри.

Главниот проблем што треба да се коригира е фактот што мнозинството граѓани се решава да премине од комбинираниот прв и втор столб на пензиското штедење исклучиво на првиот столб, со што се поништува целта на големата пензиска реформа со која се создаде вториот и третиот столб на пензиското штедење.

Така, според податоците, во првите осум месеци од годинава се пензионирале околу 6.200 пензионери кои биле во вториот столб, но само секој петти од нив прифатил пензијата да им биде исплатена заедно од првиот и вториот столб. Мнозинството избира да ги префрли средствата од вториот столб, а тоа е приватната пензија на работниците, во првиот (државен) пензиски столб.

Според „Вечерњи лист“, Владата ќе претстави мини-реформа на капитализираниот штеден систем, со што треба да се зголеми профитабилноста на вториот столб за сите негови членови, особено за околу 84.000 работници на возраст од 60 и повеќе години кои ќе одат во пензија во следните пет години.

Имено, останувањето во втората пензиска колона е поповолно само за оние чии пензиски заштеди се повеќе од 50 илјади евра. Беше најавено дека со новите измени границата на рентабилноста треба да се намали на 40 илјади евра, но тоа сепак не го решава проблемот бидејќи просечно платен работник кој само 20 години уплаќал во вториот столб има околу 20 илјади евра заштеда.

Се менува и нивото на можно еднократно повлекување на заштедите од вториот столб од сегашните 15 на 20 проценти од следната година. Но, правилото не се менува дека оние кои избрале да ја префрлат целата своја заштеда од вториот во првиот столб немаат право на исплата на дел од пензиските заштеди, односно целиот износ се префрла на државата. Се зголемуваат додатоците за двата столба, од сегашните 20,25 на 27 отсто.

Ова ретроактивно ќе се применува за сите 15.000 пензионери кои примаат пензија од вториот столб. Но, пензискиот систем во сегашната форма е осуден на долг рок. Впрочем, тоа е веќе неодржливо, а се одржува во живот само со трансфери од општиот државен буџет.

Во 2022 година, само 61 процент од трошоците за исплата на пензиите можеа да се покријат од придонесите што ги плаќаат сегашните работници во пензискиот систем.

The post Хрватскиот пензиски систем е на работ на бездната appeared first on Република.

Ниту како човек, ниту како министерка нема да го доведам системот за пензиско и инвалидско осигурување во состојба во која не може да ги исплати пензиите на ниту еден пензионер. Во 2019 дефицитот на фондот беше 47 отсто, секоја година како Влада го намалуваме за моментално дефицитот да е една третина. Тоа се достигнува само со добри политики, изјави министерката за труд и социјална политика Јованка Тренчевска.

Во гостување во дневниот на Телевизија 24, Тренчевска истакна дека едно од првите системски решенија што сегашната влада го има направено е методологијата за растот на пензиите.

Во март 2022 година пензиите беа 9.000 денари а сега најниската пензија е 12.500 денари додека во септември најниската ќе изнесува 13.200 денари – додава министерката.

Таа ги истакна и преземените мерки во текот на економската и енергетската криза и посочи дека тогаш на пензионерите од најранливата категорија им беа доделени финансиски средства од 3.000 или 6.000 денари согласно поставените критериуми.

Министерката заклучи дека оваа Влада работи транспарентно и дека на следната седница на Влада ќе биде формирана работна група која ќе работи на нови сет мерки кои ќе ги помогнат ранливите категории на пензионери со средства кои ќе паднат директно на централниот буџет и на системот на социјална заштита.

The post Тренчевска: Никогаш нема да ја доведам во прашање стабилноста на пензискиот фонд appeared first on Република.

Моменталната состојба со пензиските финансии не дозволува зголемувања на пензиите надвор од предвиденото законско усогласување, кое е доволно за да го задржи животниот стандард на примателите во услови на растечки цени, порачуваат од Finance Think.

Нагласуваат дека за стабилноста на пензиските финансии и за добросостојбата на сегашните и идните генерации, вклучително и поради ризиците од дополнително подгревање на инфлацијата и инфлациските очекувања, од клучна важност е да продолжи патеката на стабилизација на Фондот за пензиско и инвалидско осигурување.

-Во услови на зголемени трошоци за живот, од особена важност е животниот стандард на граѓаните да се задржи. Во сегментот на социјалната заштита, односно социјалните надоместоци и пензиите, клучно е нивното усогласување со порастот на трошоците на живот. Според следната табела, усогласувањата на пензиите со трошоците на живот, како и ад-хок зголемувањата на пензиите во претходните две децении, овозможија порастот на пензиите да го следи или да го надмине порастот на трошоците на живот, и оттука, во целост да го заштити животниот стандард на пензионерите, велат од Finance Think.

Зголемувањата на пензиите, особено зголемувањата надвор од предвиденото законско усогласување со порастот на трошоците на живот и просечната плата, како што посочуваат, е неопходно да се гледаат од призма на макро-стабилноста на пензиските финансии, односно дали Фондот за пензиско и инвалидско осигурување може стабилно и без ликвидносни проблеми да ги исплаќа преземените обврски кон пензионерите сега и во иднина.

Нагласуваат дека, според последните податоци на Државниот завод за статистика, пензионерите имаат стапка на сиромаштија од 7 отсто, што е значајно пониска од вкупната стапка на сиромаштија од 21,8 отсто, и уште пониска споредено со други општествени групи, како децата со 30,3 отсто, самохраните родители 41,6 и многудетните семејства 45,6 отсто. Лицата над 65 години кои живеат како самци, додаваат, имаат стапка на сиромаштија од само 4,1 отсто.

-Повремените зголемувања на пензиите надвор од законското усогласување, посебно кога тие беа големи и посебно во предизборни и изборни години, доведоа до значајно продлабочување на дефицитот на ФПИОСМ. Дефицитот на ФПИОСМ е делот кој Фондот не може да го покрие од изворни приходи – придонеси на плати, поради што дополнување прави централниот буџет. На следниот графикон е прикажано дека уделот на буџетските во вкупните приходи на ФПИОСМ забележа драматичен раст кој достигна кулминација во 2017 година и изнесуваше 43,6 отсто. Тоа означува дека скоро половина од пензиските исплати се вршеа од општиот буџет на државата, односно се на товар на општото оданочување, што имплицира дека голем дел од расходите за пензии ги покриваат плаќачите на даноци од кои дел во иднина можеби и нема да бидат под капата на ФПИОСМ затоа што не се во осигуран работен однос, прецизираат од Finance Think.

Со реформата на пензискиот систем од 2019 година, која, како што велат, меѓу другото подразбираше и благо зголемување на стапката на пензиските придонеси во две последователни години, неодржливата патека на ФПИОСМ запре и уделот на буџетските во вкупните приходи почна да се намалува и моментално се движи околу една третина.

-За тогашната реформа, Finance Think се произнесе со свои сценарија и симулации кои беа претставени во Студија за политиките 14: Одржливост на пензискиот систем во Македонија: Сеопфатна анализа и предлог-реформа со МК-ПЕНС – динамички микросимулациски модел и последователно објавени во проминентното меѓународно списание Journal of Pension Economics & Finance, потсетуваат од Finance Think.

Од Finance Think забележуваат дека интензивирањето на барањата од страна на разни општествени групи за пораст на примањата - плати, пензии и сл., е во еден дел водено од порастот на трошоците на живот, што е легитимно барање.

-Но, во друг значаен дел од поттикнувањето реторика дека платите може да пораснат без зголемување на продуктивноста, и од одлуката на Уставниот суд, и последователниот молк од страна на Владата, со која се одмрзнаа зголемувањата на платите на избраните и именуваните лица, што доведе до нивен кумулативен раст од 78 отсто. За последново, Finance Think ја повикува Владата да изнајде итен и неодложен механизам за воспоставување на првобитната состојба и да отвори дијалог во рамки на кој ќе се дојде до прифатливо решение за разумен пораст на платите на функционерите, посочуваат од Finance Think

The post Finance Think: Моменталната состојба со пензиските финансии не дозволува зголемувања на пензиите appeared first on Република.

Министерството за труд и социјална политика ги демантира и отфрла тврдењата дека Фондот за пензиско и инвалидско осигурување е во криза и државата доцни со исплатите кон банките.

Од МТСП тврдат дека во изминатите години нема ниту еден ден доцнење на исплатата на пензиите, а растот на истите е континуиран и јасно забележлив. Тие исто така тврдат и дека трансферите кон ПИОМ биле навремени и сигурни, дури и во време на Ковид пандемијата, кога започна првата предвремена исплата на пензиите.

- Со последните измени на Законот за пензиското и инвалидското осигурување, кои стапија на сила во март 2022 година, и воведувањето на новиот начин на усогласување на пензијата, со усогласување со комбиниран модел од 50 орсто пораст на просечната плата и 50 отсто пораст на трошоци на живот пензиите пораснаа за околу 21 отсто. Првото усогласување во Септември 2022 година беше 6.8 отсто, второто во Март 2023 година, 8.4 отсто и моменталната проекција за Септември 2023 година која изнесува најмалку 6 отсто, известуваат од МТСП.

Нагласуваат и дека ниту едно од зголемувањата не ја загрози стабилноста на Фондот, ниту ја поремети редовната исплата на пензиите, и додадоа дека тоа е јасен показател за посветеноста кон граѓаните и стратешкиот избор на донесени политики како и долгорочното планирање кое обезбедува стабилност на Пензискиот Фонд, но и за сигурност на пензионерите.

- Пензионерите се приоритет на Владата на Република Македонија. Во овој владин состав се донесоа низа мерки за помош и поддршка на пензионерите, и трендот не сопира. Предлозите од пензионерите се на маса, се дискутира за истите и во најскоро време ќе продолжиме со промоција на нови мерки и пакети кои ќе осигурат достоинствен живот на пензионерите и понатаму, соопшти МТСП.

Министерството за труд и социјална политика апелира да не се креира страв кај пензионерите и да не се манипулира со недостатокот на информации кои го имаат, а се со цел да се обезбеди масовност на протестите кои се политички обоени.

The post МТСП уверува дека пензискиот фонд е стабилен, да не се креира страв кај пензионерите appeared first on Република.