Претседателката Гордана Сиљановска Давкова денеска се обрати на чествувањето на 2 Август, Илинден - Денот на Републиката што под нејзино покровителство се одржа во Меморијалниот центар на АСНОМ во Пелинце.

Претседателката Сиљановска Давкова положи свежо цвеќе пред Меморијалниот центар на АСНОМ во Пелинце и ја посети спомен собата во Меморијалниот центар. Во рамки на чествувањето настапи ансамблот за народни игри и песни „Танец”.

Во своето обраќање, претседателката Сиљановска Давкова рече дека на 2 Август 1944-тата, пред точно 80 години, делегатите на АСНОМ ја воспоставија слободната македонска држава врз републикански, демократски и антифашистички основи. Асномските документи, како што посочи, пулсираат со европските прогресивни идеали и се повикуваат на правото на самоопределување и рамноправност меѓу народите. И денес, рече претседателката Сиљановска Давкова, нашата независна република е компатибилна со проектот за обединета Европа бидејќи во нашите асномски темели се препознаваат напредните европски вредности.

Според претседателката Сиљановска Давкова, успехот на републиката се мери според тоа дали таа е пристојно место за живеење и дали им нуди еднакви шанси за напредок на сите.

Според претседателката Сиљановска Давкова, македонските институции се подготвени за европските реформи. Но, како што посочи, од нашите европски и стратешки партнери очекуваме разбирање и праведно деблокирање на процесот на преговорите. Нашето место, рече претседателката, беше и е во Европа, но со заштитен македонски идентитет, јазик, култура и историско паметење, меморија.

Во продолжение е интегралниот текст од обраќањето на претседателката Сиљановска Давкова.

Почитувани граѓани,
Почитувани потомци на нашите знајни и незнајни херои кои своите животи ги положија за татковината Македонија,

Ќе зборувам како партизанска ќерка. Илинден е ден на светлината и на слободата. На овој празник над празниците се потсетуваме на двете етапи на вековната македонска борба за слобода и за државност. На овој ден над деновите се сеќаваме на двете илинденски поколенија – на Гоце Делчев и на Кузман Јосифовски-Питу, на Никола Карев и на Методија Андонов-Ченто. А таа силна врска меѓу двете етапи и двете генерации најдобро ја изрази Панко Брашнаров, живиот сведок на двата Илиндени. Пред 80 години, во манастирот „Св. Прохор Пчински“, тој со треперлив глас, како мојов, воскликна дека по вековните борби и жртви „се роди нова, светла и слободна македонска држава“.

Но, како дојдовме до тој победоносен Илинден?

Во 1939-тата, пред 85 години, неколкумина млади напредни македонски интелектуалци објавија една мала, но многу важна книга. Насловена „150 години од Француската револуција“, оваа брошура меѓу кориците ги собра француската Декларација за правата на човекот и граѓанинот од 1789-тата и Крушевскиот манифест од 1903-тата година.

Клучната поента на оваа книга е дека секој народ има своја Француска револуција. И дека токму Крушевската Република, „иако мала по обем и краткотрајна“, со својот полет, одушевување и идеали „многу потсетува на првите денови на Големата револуција“.

Со Француската револуција започна нова епоха. Револуцијата стана патоказ за народите на Европа и на светот како да се пресметаат со непријателите на слободата и напредокот. Врз урнатините на старите монархии се издигнаа модерните егалитарни републики. Нејзините демократски придобивки станаа инспирација и за македонската револуционерна интелигенција којашто ги вгради идеалите за слобода, еднаквост и братство, за неотуѓиви човекови и граѓански права во сите наши востанички устави, прогласи и манифести.

Не случајно, Гоце Делчев се бореше за „слободна Македонија со широки права за сите сиромаси од сите нации, религии и јазици во неа“.

Не случајно, Васил Главинов се залагаше за слободна македонска република како центар на балканската демократија.

Не случајно, Крушевскиот манифест прокламираше слобода, братство и рамноправност, независно од вера, народност и убедување.

Малата книга била најпрво цензурирана, а потоа и забранета. Но, пред да биде запленета и уништена, таа веќе била поделена меѓу македонската младина, којашто станала свесна дека е наследник на две големи револуционерни традиции – француската и илинденската. И дека нивна генерациска одговорност е да го продолжат незапирливиот марш кон слободна македонска република.

Во предвечерјето на Втората светска војна и на фашистичкиот мрак којшто се спушти над Европа, оваа мала книга ги мобилизираше напредните сили и ги фокусираше нивните напори кон претстојната народноослободителна и антифашистичка борба. Во неа, тие најдоа инспирација за прогласите, за паролите и за манифестите со кои се окрупнуваше фронтот и се ослободуваше татковината.

И конечно, на 2 Август 1944-тата, пред точно 80 години, делегатите на АСНОМ ја воспоставија слободната македонска држава врз републикански, демократски и антифашистички основи. Асномските документи пулсираат со европските прогресивни идеали и се повикуваат на правото на самоопределување и рамноправност меѓу народите. И денес нашата независна република е компатибилна со проектот за обединета Европа бидејќи во нашите асномски темели се препознаваат напредните европски вредности.

Земете ја Декларацијата на АСНОМ за правата на граѓаните. Во неа се гледа дека нашите основоположници не биле реалисти коишто се адаптирале кон моќта, туку биле идеалисти ко создавале република на национална слобода и социјална правда, на рамноправни граѓани, „не гледајќи на нивната народност, пол, раса и вероисповедание“. Тие создале република на гарантирани човекови права и слободи.

Драги сограѓани, почитувани присутни,

Секоја генерација има право и должност да го обнови духот на републиката и да го усогласи со новите околности и новите можности.

Ако денес, 80 години потоа, ги прашате младите генерации, кое човеково право им е најважно, верувам дека огромен дел од нив ќе речат – правото на напредок, правото на потрага по среќа. Потрагата по среќа, за мене, не е холивудско клише, туку насушна потреба на човекот осмислено да придонесува за доброто на заедницата во која и самиот припаѓа. Ова право, што најпрво било прокламирано со Американската револуција, и било потврдено со Француската револуција, било прегрнато од нашите илинденци и асномци и, преку нив, вградено во македонската република.

И тоа не е случајно, бидејќи републиката постои заради граѓаните, заради вас, за да им овозможи, за да ви овозможи, да ја достигнете среќата, да создавате вредности, да напредувате не врз основа на врски, привилегии и протекции, туку само и само со врз основа на знаењето, квалитетот и способностите. Тоа е целта на постоењето на секоја република, вклучително и нашата, независна македонска република. Во 1991 година, таа беше конституирана за да „се обезбеди мир и соживот, социјална правда, економска благосостојба и напредок“, повторувам, „напредок на личниот и заедничкиот живот“.

Повеќе од многу други човекови права и слободи, токму правото на напредок, на потрага по среќа е сврзано со младите. Тоа е нервот што ги придвижува младите луѓе, ги мотивира да се надградуваат, да се натпреваруваат, да бидат активни, да бидат граѓани коишто се залагаат за позитивни општествени промени. И затоа, повеќе од многу други права, токму од правото на прогрес зависи иднината на републиката.

Да се запрашаме: Зошто многу млади луѓе ја напуштија нашата држава изминативе години и децении? Зошто си заминаа од Македонија? Зошто имаме сè помалку деца во градинките, сè помалку ученици во училиштата, сè помалку студенти на факултетите? Причината, за мене, не се само платите и примањата бидејќи, статистички, низ годиниве доходот растеше. Животниот стандард е многу повеќе од пари и од куповната моќ на граѓаните. Животниот стандард се и вредностите, владеењето на правото, односот на институциите кон граѓаните и меѓучовечките односи.

Успехот на републиката се мери според тоа дали таа е пристојно место за живеење и дали им нуди еднакви шанси за напредок на сите. Токму ова право е загрозено од корупцијата и од непотизмот коишто, изминативе години и децении, создадоа двојни стандарди, го нарушија владеењето на правото и го поткопаа општото добро. Но, и од долгогодишните неправедни блокади на нашите европски и евроатлантски интеграции коишто ја исцрпуваа државата.

Затоа, сè повеќе млади Македонци, Албанци, Турци, Срби, Роми, Власи, Бошњаци и други, веруваат дека потрагата по среќа и по напредок ги води надвор од нашата единствена заедничка татковина. За некои од нив татковината станува само место за привремен престој, хотел, наместо дом во кој би основале семејство.

Свесна сум дека многу млади луѓе со големо внимание и со голема надеж ги следат зборовите и чекорите на новоизбраната власт. Свесна сум дека кај многу млади луѓе еден наш збор или една наша одлука може да биде пресудна – дали да останат тука и да ѝ дадат шанса на државата или, пак, да си заминат, и да ја бараат среќата во туѓина. А таквата нивна одлука влијае и на нивните семејства.

Почитувани граѓани, почитувани присутни,

Поклонувајќи се пред спомениците на нашите илинденци, партизани и асномци, ќе забележиме дека и покрај разликите, речиси сите имаат две нешта заеднички. Тоа се нивните идеали и нивната младост.

Во минатото, младите се жртвуваа за нашата слобода. Денес, ние мора да се жртвуваме за иднината на младите.

Таа наша жртва подразбира да не правиме компромис со нивната иднина. Колку и да е тешко, ние мора да создаваме услови за младите Македонци, Албанци, Турци, Срби, Роми, Власи, Бошњаци и други, не само да трагаат, туку и да ја остваруваат својата среќа тука, во нашата единствена и нивна заедничка татковина. Да ги оставиме на страна поделбите и караниците, тесните партиски и лични интереси, и да се сплотиме околу општото добро и јавниот интерес. Преку таа жртва, ние всушност ќе учествуваме во создавањето на новата, четврта македонска република.

Таа република мора да биде грижлива кон најдобрите, инклузивна кон различните, солидарна кон ранливите и праведна кон сите. Грижлива бидејќи најдобрите, најуспешните се предуслов за нашиот успех. Републиката мора да биде инклузивна бидејќи нашата сила е во нашата различност, етничка, верска, јазична, генерациска. Инклузивноста не трпи поделби и предрасуди. Четвртата македонска република мора да биде и солидарна бидејќи грижата за сиромашните, ранливите и маргинализираните е аршинот за мерење на вистинската вредност на општеството. И, конечно, таа република мора да биде праведна бидејќи правдата е врската меѓу граѓанинот и државата.

Драги и поитувани сограѓани, присутни,

Битката за младите е битка за четвртата македонска република.

Битката за најдобрите и на најталентираните е битка за четвртата македонска република.

Битката за знаењето наспроти незнаењето, за извонредноста наспроти просечноста, за креативноста наспроти деструктивноста, е битка за четвртата македонска република.

Битката за заштита на нашите шуми, на животите и имотите на нашите граѓани од огнените стихии, е битка за четвртата македонска република.

Оваа битка ќе ја добиеме само со европеизација на државата, со владеење на правото, со борба против корупцијата, со ефикасни институции, со компетитивна економија, со демократски вредности и демократска политичка култура, со човекови права и слободи, конечно, со функционални системи што ќе можат да се справат со пожарите, поплавите и другите елементарни непогоди. За да ја добиеме оваа битка, мора да ги вклучиме младите во секоја етапа на носење одлуки што се однесуваат на нив и на нивната иднина. Ние не смееме да носиме одлуки за младите без младите. Оваа битка е и нивна битка, ваша битка, што можете да ја водите само тука, во својата татковина.

Оваа битка мора да започне уште денес и ние мора да ги вложиме сите наши лични и институционални капацитети.

Вистинскиот патриотизам се докажува не со празни зборови, не со гола реторика, туку со работа, со труд.

Јас веќе се вклучив во оваа битка. Ќе ги искористам моите уставни и законски ингеренции за доброто на граѓаните и за иднината на републиката. Наместо да се прашуваме дали сме го допреле дното и дали може да биде полошо, мора да се прашуваме како да биде подобро, како да се издигнеме и да постигнеме нови успеси и победи.

Почитувани,

На овој план, соработката со нашите стратешки партнери и европски пријатели е врвен приоритет. Нашата република беше зачната од европските идеали за слобода од тиранијата, еднаквост пред законот, братство меѓу луѓето и народите. Тоа нѐ прави еднакви наследници на врвните европски придобивки. И затоа, освен географски, ние и вредносно, политички и економски припаѓаме кон големото европско семејство. На нашиот пат кон полноправно членство во Европската Унија, сѐ уште се соочуваме со непринципиелни услови што постојано се менуваат. Но, знаеме дека меѓу земјите членки имаме многу пријатели коишто се застапуваат за нас и ја будат европската совест кон случајот со нашето маратонско интегрирање. Ние мора да им помогнеме со тоа што нема да отстапиме од зацртаниот европски пат. Тоа е и нашиот пат. Македонските институции се подготвени за европските реформи. Но, од нашите европски и стратешки партнери очекуваме разбирање и праведно деблокирање на процесот на преговорите. Нашето место беше и е во Европа, но со заштитен македонски идентитет, јазик, култура и историско паметење, меморија.

Ниту илинденците, ниту асномците не беа имитатори, туку креативни интерпретатори на историјата на Француската револуција. Како автентични борци за македонската кауза, тие свесно ги избегнале недостатоците и ги критикувале недоследностите, а ги презеле придобивките на таа демократска револуционерна традиција. И ние денес треба да го следиме нивниот пример. Да им помогнеме на нашите денешни млади генерации да не бидат имитатори, туку креативни интерпретатори на европските вредности и придобивки. На свој, автентичен начин, да се борат за просперитетна сегашност и иднина.

Така ќе ја направиме нашата република пристојно место за живеење, што ќе им дава еднакви шанси за напредок на сите нејзини граѓани, независно од етничката, верската, јазичната, политичката или која било друга припадност. Така ќе ја исполниме нашата генерациска должност и ќе го обновиме духот на нашата македонска република.

Драги сограѓани,

Ќе завршам како што почнав. Истата 1939-та, кога 150-годишнината од Француската револуција се одбележуваше во сенката на Втората светска војна, од печат излезе уште една мала, но многу важна книга, којашто исто така беше цензурирана и забранувана. Но, пред да биде запленета и уништена, и оваа книга беше поделена меѓу напредната македонска младина. Во фашистичкиот мрак којшто во тој период веќе се спушти над Европа, авторот на оваа книга ги навести белите мугри на македонската слобода.

Во последната строфа, од последната песна, нашиот поет Кочо Рацин запиша:

„Се к'ти ноќта црна!

Се рути карпа – мрак!

И петли в село пеат

и зората се зори −

над карпа в крв се мие

и темнината пие

cилнo

светнал

ден!“

И навистина. Пет години подоцна, на Илинден, силно светна денот за нашата слобода.

Почитувани присутни, млади,

Нека ни е за многу години Илинден!

Да ни е вековита македонската република!

The post Републиката постои заради вас граѓаните, за да ви овозможи да ја достигнете среќата, да создавате вредности, да напредувате appeared first on Република.

По повод одбележувањето на 2 Август, Илинден – Денот на Републиката, под покровителство на претседатeлката Гордана Сиљановска Давкова, утре – 2 август 2024 година, петок, предвидени се следните активности:

Во Пелинце, со почеток во 10:00 часот, претседателката Сиљановска Давкова ќе положи свежо цвеќе пред Меморијалниот центар на АСНОМ, ќе има обраќање и ќе ја посети спомен собата во Меморијалниот центар. Во рамки на чествувањето ќе настапи ансамблот за народни игри и песни „Танец”.

Во манастирот „Св. Прохор Пчински“, со почеток во 12:00 часот, претседателката Гордана Сиљановска Давкова ќе положи свежо цвеќе пред спомен-плочата на АСНОМ.

Во манастирот „Прохор Пчински“, претседателката Сиљановска Давкова ќе биде пречекана од страна на претседателот на Република Србија, Александар Вучиќ. Двајцата претседатели ќе остварат билатерална средба.

Во состав на државно-црковната делегација која ја предводи претседателката Сиљановска Давкова на чествувањето во манастирот „Св. Прохор Пчински“ се потпретседателката на Собранието, Весна Бендевска, заменик претседателот на Владата и министер за односи меѓу заедниците Иван Стоилковиќ, македонскиот амбасадор во Република Србија, Никола Тупанчески, претставниците од Сојузот на борци, Наум Буревски и Снежана Несторовска и Митрополит Кумановско-осоговски Григориј.

Во Скопје, делегација од Кабинетот на претседателот, ќе положи свежо цвеќе пред споменикот на АСНОМ во паркот „Жена-борец“, пред споменикот на Никола Карев пред Собранието и пред споменикот на Методија Андонов - Ченто на плоштад „Македонија“.

Во Крушево, делегација од Кабинетот на претседателот ќе положи свежо цвеќе на гробот на Никола Карев, пред споменикот на хероите на месноста „Слива“ и на Мечкин Камен.

Во Смилево, делегација од Кабинетот на претседателот ќе положи свежо цвеќе на Могилата на Даме Груев, пред споменикот на смилевските илинденци и на спомен-плочата на партизанскиот одред „Даме Груев“.

The post Претседателката Гордана Сиљановска Давкова на Илинден во Меморијалниот центар на АСНОМ во Пелинце и во манастирот „Св. Прохор Пчински“ appeared first on Република.

По повод одбележувањето на 2 Август, Илинден – Денот на Републиката, под покровителство на претседателот Стево Пендаровски, утре – 2 август 2023 година, среда, предвидени се следните активности, соопштија од кабинетот на Пендаровски.

Во Пелинце, со почеток во 10:15 часот, претседателот Пендаровски ќе положи свежо цвеќе пред Меморијалниот центар на АСНОМ, ќе има обраќање и ќе ја посети спомен собата во Меморијалниот центар. Во рамки на чествувањето ќе настапи Воениот оркестар на Армијата на Република Македонија.

Манифестацијата во Пелинце ќе биде директно пренесувана на Јавниот сервис МРТ, на Facebook страницата и на YouTube каналот на Претседателот.

Акредитираните медиумски екипи е задолжително да бидат во Пелинце најдоцна до 08:30 часот.

Во манастирот „Св. Прохор Пчински“, со почеток во 12:00 часот, претседателот Стево Пендаровски ќе положи свежо цвеќе пред спомен-плочата на АСНОМ.

Во манастирот „Прохор Пчински“, претседателот Пендаровски ќе биде пречекан од страна на претседателот на Република Србија, Александар Вучиќ. Двајцата претседатели ќе остварат билатерална средба, по што се предвидени изјави за медиумите.

Во состав на државно-црковната делегација која ја предводи претседателот Пендаровски на чествувањето во манастирот „Св. Прохор Пчински“ се потпретседателот на Собранието Горан Мисовски, министерот за внатрешни работи, Оливер Спасовски, министерката за култура, Бисера Костадиновска Стојчевска, Викарен Епископ Хераклејски г. Климент и претставници од Сојузот на борците на НОБ.

Положување цвеќе од страна на делегации од Кабинетот на претседателот

-         Во Скопје, генералниот секретар на Кабинетот на претседателот, Миле Бошњаковски, ќе положи цвеќе на споменикот на АСНОМ во паркот „Жена-борец“, на споменикот на Никола Карев пред Собранието на Република Македонија, на споменикот на Методија Андонов - Ченто на плоштад „Македонија“ и на споменикот „Сила, Слава и Победа“ на тврдината Кале.

-         Во Крушево, претставник од Кабинетот на претседателот ќе положи цвеќе на гробот на Никола Карев, на споменикот на хероите на месноста „Слива“ и на Мечкин Камен.

-         Во Смилево, претставник од Кабинетот на претседателот ќе положи свежо цвеќе на Могилата на Даме Груев, на споменикот на смилевските илинденци и на спомен-плочата на партизанскиот одред „Даме Груев“.

The post Пендаровски на 2 Август во Пелинце appeared first on Република.

Претседателот Стево Пендаровски ќе присуствува на чествувањето на државниот празник 2 Август – Ден на Републиката во Меморијалниот центар на АСНОМ во Пелинце.

Како што информираат од неговиот Кабинет, тој ќе предводи државно-црковна делегација во посета на манастирот „Св. Прохор Пчински“.

Во манастирот „Св. Прохор Пчински“ претседателот Пендаровски ќе биде пречекан од страна на претседателот на Република Србија, Александар Вучиќ, по што двајцата претседатели ќе остварат билатерална средба.

The post Пендаровски за Илинден во Пелинце, средба и со Вучиќ кој ќе го пречека во „Св. Прохор Пчински“ appeared first on Република.

На граничните премини Табановце и Пелинце за влез и излез од државата се чека околу два часа, додека на граничниот премин Богородица за излез од државата се чека околу половина час. На останатите гранични премини од македонска страна, како што информираат од АМСМ, нема подолги задржувања за влез и излез од државата.

Сообраќајот на државните патишта се одвива непречено, по претежно влажни коловози. Интензитетот на сообраќај на патните правци надвор од градските средини е зголемен.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево. дма/сст/

The post На Табановце и Пелинце за влез и излез од државата се чека околу два часа appeared first on Република.

Интензитетот на сообраќај на патните правци надвор од градските средини попладнево е зголемен. На ГП „Табановце“ времето на чекање за излез од државата е околу 90 минути. На „Пелинце“ за излез се чека од 45 до 60 минути. На останатите гранични премини, од македонска страна, нема подолги задржувања за влез и излез од државата.

Сообраќајот на државните патишта се одвива непречено, по претежно суви коловози.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

The post Гужви на границата кон Србија: На „Табановце“ се чека час и половина, на „Пелинце“ еден час appeared first on Република.

Делегација на ВМРО-ДПМНЕ предводена од потпретседателката Гордана Димитриеска Кочоска, а во состав на пратеникот Бране Петрушевски и претседателот на УМС Сергеј Попов, а по повод државниот празник Илинден, положи свежо цвеќе во меморијалниот центар Пелинце, каде се одбележуваат 78 години од Првото заседание на АСНОМ.

The post Делегација на ВМРО-ДПМНЕ, предводена од Димитриеска Кочоска положи свежо цвеќе во меморијалниот центар Пелинце appeared first on Република.

Имаме една заедничка држава и сите сме одговорни да ја чуваме и развиваме, за нас и за идните поколенија. Тоа е наш долг кон сите оние кои се бореа за таква граѓанска држава, општество на сите граѓани во кое ќе растат нашите деца, внуци и идни генерации кои заслужуваат да живеат, растат, се образуваат и творат во европска Република Cеверна Македонија, современа и просперитетна држава на европски граѓани, истакна претседателот на Собранието Талат Џафери во денешното обраќање во Меморијалниот центар АСНОМ во Пелинце по повод националниот празник Илинден.

Честитајќи го празникот кога ги одбележуваме двата илиндена и годишнини, 119 годишнина (1903) од Крушевската Република и 78 – годишнина (1944) од Заседанието на АСНОМ, којшто годинава се одвива под мотото „Илинден – нашата сила за иднината“, Џафери истакна дека Илинден навистина е единствениот концепт кој што ја опишува вредноста и основата од која сите поаѓаме и во која наоѓаме сила за продолжување понатака во градењето на иднината на нашата заедничка држава, за нас, за нашите идни поколенија, идни граѓани на европското и светското семејство на народи, славејќи ги и празнувајќи ги вредностите кои не обединуваат и поврзуваат, вредности кои не прават горди и сплотени граѓани на нашата заедничка држава.

-Постулатите со кои се јасно дефинирани општите и посебни човекови права и слободи, со кои јасно се дефинира мултиетничкиот, мултикултурниот и мултиконфесионалниот карактер на нашата држава се најцврстата основа врз која ќе продолжиме да чекориме како и досега. Настаните во минатото не уверија дека само сплотувањето кон заеднички дом за сите, со јасна визија, мудрост и разум е единствената, природна и остварлива крајна цел. Ако се однесуваме одговорно и разумно кон државата и граѓаните, со взаемна почит и соработка, прифаќајќи го изразувањето на особеностите и карактеристиките на секоја етничка заедница, на културата, јазикот, идентитетските обележја како природно право, тогаш патот по кој треба да чекориме е одамна детерминиран, уште од првите илинденци. Тие биле свесни дека само со надминување на тесната и себична рамка, со отворање на умот и силно прегрнување на благодатите кои ги нуди нашата земја, ќе бидеме пример за нова и додадена вредност во регионот и пошироко, рече Џафери.

Претседателот на Собранието посочи дека предизвиците на нашиот пат никако не престануваат и не се намалува тежината на одлуките што треба да се донесат., а секоја нова тешкотија, нова пречка е тест за државата, за институциите и за граѓаните, и, се разбира дека, како што вели, тоа фрустрира.

-Гледано објективно и со искрена намера за кажување на работите онака како што се, ќе го кажам тоа што на сите ни е познато, а тоа е дека ниту една земја не наиде на поголеми препреки од Република Cеверна Македонија на нејзиниот пат кон членство во НАТО и Европската унија. Во тој процес, за жал, се разјадуваше нашето општество, се групираше во табори, во предавници и патриоти, во европејци и русофили, во албанофоби и бугарофили, во комуњари и вмровци, А тоа никако не беше во полза на државата. Тоа никако не одеше во прилог на обединувањето кон крајната цел, рече Џафери.

Сепак, посочи претседателот на Собранието, и во тие лоши времиња на делби, имаше и се уште има луѓе со јасна визија и искрена намера да не се дозволи да се изгуби тоа што е одамна стекнато, и тоа не на лесен начин и предадено во аманет, луѓе кои и во најцрните сценарија гледаа светла точка и подотворена врата на можности за зачувување и зацврстување на темелите на државата, на нејзиниот територијален интегритет и суверенитет.

-Верувам дека откажувањето од се и тврдоглаво држење за една флоскула која на крајот на краиштата е само празна флоскула која не нуди никакво алтернативно и можно решение туку само ан блок ги одбива можностите, никогаш не било и нема да биде опција за тие што вистински ја сакаат Република Cеверна Македонија. Тврдењето дека само така се сака државата, губејќи се при тоа себеси, државата и се разбира идентитетот, секако дека не е прифатлива опција. Затоа што, идентитетот не е нешто што се дава и одзема, идентитетот е тоа што сме и што го носиме во нас. Тоа што сме го слушале и учеле од нашите предци, тоа што ќе им го кажуваме и предадеме на нашите идни поколенија, рече Џафери во Пелинце.

Зборувајќи за глобалните кризни и безбедносни предизвици, тој кажа дека сме „премногу мали за сами да ги биеме битките пред кои се исправаме секојдневно“ и оти е значајно да бидеме обединети и единствени за тоа што го сакаме, заслужуваме и можеме како земја и како граѓани на Република Cеверна Македонија. Но сега, вели Џафери, не сме сами бидејќи пред две години станавме 30-тата полноправна членка на НАТО, а донесовме „тешки, државнички одлуки кои го деблокираа нашиот пат кон евроатланската интеграција и на тој пат политички созреавме и ние како политичари и нашите граѓани“.

-Бевме и се уште сме посветени на воспоставувањето и градењето на добрососедските односи, и на тој пат ја имаме сета поддршка на нашите меѓународни партнери и пријатели. Со нивна силна поддршка го направивме и долгоочекуваниот чекор кон европското семејство. Ја одржавме првата меѓувладина конференција со Европската унија – што практички претставува знак дека веќе сме внатре во игра со големото европско семејство, после цели седумнаесет години статус на земја кандидат за членство. Дали ќе биде лесно? Се разбира дека нема да биде лесно, па играта само што започна, истакна претседателот на Собранието.

Според него, сега започнува вистинската битка за реформирање на институциите, за консолидирање на редовите, за спроведување во пракса на усогласените закони со европското законодавство и за тоа ни треба единство, искрен и несебичен придонес на секој еден поединец во државата.

-И, основното што сакам да го порачам оттука и кое сакам да го сфатат еднаш засекогаш сите е дека, никој нема помалку или повеќе право да ја сака, брани, да се гордее или пак да се фрустрира за успесите, неуспесите, победите или поразите на Република Cеверна Македонија, на нејзините културни, спортски, уметнички претставници во и надвор од земјава, никој нема повеќе или помалку право да ја чувствува оваа земја своја! Република Cеверна Македонија е наш, заеднички дом и сите имаме една иста цел, потенцираше Џафери.

Негова порака е исто така да градиме држава без дискриминација, со почитување на правата и слободите на сите граѓани подеднакво, без оглед на етничката, верската, политичката припадност, без оглед на пол, социјален и економски статус.

-Има една константа, а тоа е дека, ниту доброто, ниту лошото не бира по име, не бира по нација, не бира по вера, по пол, по социјален или економски статус, ниту пак бира по политичка припадност, едноставно, се случува и во еден миг, сите подеднакво сме исправени пред новиот момент а ние секогаш сме знаеле заедно да ги споделуваме и убавите, и не толку убави моменти кои ги носи животот. Така ќе продолжиме и во иднина, истакна претседателот на Собранието Џафери.

Претходно во Меморијалниот центар АСНОМ во Пелинце цвеќе положија делегации од Владата, Собранието, Кабинетот на Претседателот и од други државни институции, како и политички партии. Чествувањето продолжи со културно-уметничка програма и настап „Танец“ и Ансамблот на албански народни ора и песни во РСМ

The post Џафери: Имаме една заедничка држава и сите сме одговорни да ја чуваме и развиваме appeared first on Република.

По повод утрешниот државен празник 2-ри Август – Илинден, претседателот на ВМРО-ДПМНЕ Христијан Мицкоски ќе го посети с. Ташмаруништа (Струга).

Од партијата најавуваат дека Мицкоски ќе присуствува на настан по повод државниот празник Илинден, а ќе одржи и говор.

Делегација на ВМРО-ДПМНЕ предводена од потпретседателот Александар Николоски, во состав од членот на ИК Драган Ковачки и пратеничката Ане Лашкоска, со почеток во 12 часот ќе положи свежо цвеќе на Мечкин Камен, Крушево.

Делегација на ВМРО-ДПМНЕ предводена од потпретседателката Гордана Димитриеска Кочоска, а во состав од пратеникот Бране Петрушевски и претседателот на УМС Сергеј Попов, со почеток во 10 часот ќе положи свежо цвеќе на меморијалниот центар Пелинце.

The post Мицкоски за Илинден во струшко Ташмаруништа, а делегации на партијата ќе положат цвеќе на Мечкин Камен и во Пелинце appeared first on Република.

Собраниска делегација, предводена од претседателот Талат Џафери, во состав: Лидија Тасевска и Мирослав Јовановиќ, свечено ќе ја одбележи 78-годишнината од Првото заседание на АСНОМ, во Меморијалниот центар АСНОМ во Пелинце.

ПРОГРАМА:

10:00 часот Положување свежо цвеќе
10:20 часот Интонирање на химната на Република Македонија
10:25 часот Обраќање на Талат Џафери, претседател на Собранието на Република Македонија

Културно-уметничка програма:

10:35 часот

-  Национална установа  „Танец“

– Национална установа Ансамбл на албански народни ора и песни во Република Македонија – Скопјe

Собраниска делегација, предводена од потпретседателот Горан Мисовски, во состав: Миле Талевски и Бети Рабаџиевска-Наумовска, ќе положи венец свежо цвеќе во Крушево:

– 09:30 часот – Споменикот на Слива „На хероите на Слива“;

– 11:40 часот – „Мечкин Камен“

Собраниски делегации ќе положат венец свежо цвеќе во Скопје, и тоа:

Собраниска делегација, во состав: Фаница Николоска и Драгољуб Филипоски:

– 08:00 часот – Споменик на паднатите борци од НОБ, Градски гробишта Бутел

 Собраниска делегација, во состав: Марија Георгиевска и Бојан Василевски:

– 08:30 часот – Споменик на АСНОМ, Парк „Жена борец“;

– 08:45 часот – Споменик на Никола Карев, пред Собранието на Република Македонија:

– 08:50 часот – Споменик на Методија Андонов-Ченто, Плоштад „Македонија“

The post Талат Џафери во Пелинце за Илинден, ќе настапат „Танец“ и албанскиот Ансамбл на албански народни ора и песни appeared first on Република.

По осумнаесет години, претседателот Стево Пендаровски, по повод одбележувањето на 2 Август, Илинден – Денот на Републиката, на 2 август 2022 година, вторник, ќе предводи државнo-црковна делегација во посета на манастирот „Св. Прохор Пчински“, каде е одржано првото заседание на Антифашистичкото собрание на народното ослободување на Македонија (АСНОМ), на 2 август 1944 година.

По тој повод, претседателот Пендаровски оствари телефонски разговори со претседателот на Република Србија, Александар Вучиќ и со поглаварот на Српската православна црква, патријархот г. г. Порфириј.

Двајцата претседатели во разговорот се согласија дека релациите меѓу двете држави бележат одличен развој во повеќе области. Посетата на манастирот „Св. Прохор Пчински“, која се случува по речиси две децении е позитивен импулс за отворање на нови поглавја во меѓусебните релации.

Во разговорот со г.г. Порфириј, претседателот Пендаровски се заблагодари на патријархот за одлуката да биде овозможена посетата на манастирот која следува со прифаќањето на автокефалноста на МПЦ – ОА од страна на СПЦ.

Во состав на делегацијата што ќе ја предводи претседателот Пендаровски ќе бидат членови на Собранието и на Владата на Република Македонија и претставници на Македонската православна црква – Охридска Архиепископија.

Првично, според ротацијата, претседателот Сптево Пендаровски беше предвидено да присуствува на прославата во Скопје. Но, наместо да се поклони пред Асномците во Жена-парк и пред првиот претседател на Презедиумот на АСНОМ Методија Андонов Ченто на плоштадот „Македонија“, Пендаровски одлучи да остане во вилата „Водно“, што беше силно осудено до јавноста.

https://republika.mk/vesti/makedonija/pretsedatel-pomal-i-od-makovo-zrno-za-ilinden-pendarovski-nema-da-se-simne-od-vilata-vodno-megju-narodot/

The post Пендаровски ќе слезе меѓу народот на Илинден, но отаде македонско-српската граница appeared first on Република.