Дванаесетгодишен ученик од ОУ „Блаже Конески“ од Велес заврши на Клиниката на неврохирургија во Скопје со тешки повреди на мозокот, откако друг основец го давел и му ја удирал главата.

Во Полициската станица Велес на 20.11. било пријавено дека во oпштинско основно училиште во Велес, малолетник физички нападнал друг малолетник, негов соученик. Нападнатиот малолетникот бил однесен во болницата во Велес, по што, поради сериозноста на повредата бил препратен во Комплексот клиники „Мајка Тереза'' во Скопје. За настанот известен бил јавен обвинител и Центар за социјални работи Велес, соопштија од МВР.

В.д. директорката на ООУ„Блаже Конески“ Маја Коруновска преку соопштение до медиумите информираше дека „немилиот инцидент“ се случил пред почетокот на вториот час за време на малиот одмор, помеѓу двајца ученици од предметна настава.

Од страна на предметните наставници, стручната служба и директорот веднаш е постапено со тоа што е повикана Итна медицинска помош и се известени родителите на повредениот ученик и тој во придружба со одделенскиот раководител и секретарот на училиштето е пренесен во Општата болница во Велес. Веднаш се извршени разговори за резрешување на случајот со сите ученици од одделенската заедница, индивидуално е разговарано со ученикот кој го предизвикал инцидентот и разговори со група на ученици од одделението. Известени се и повикани на разговор родителите на ученикот кој го предизвикал инцидентот и запознаени се со целиот случај и понатамошните постапки кои ќе ги преземе училиштето за случајот. Од страна на училиштето е постапено во согласност со Законот за основно образование и се известени СВР Велес и Центарот за социјални работи Велес, вели таа.

Појаснува дека во училиштето е направен увид од страна на службени лица од СВР Велес при што е објаснет целиот инцидент и дадени се индивидуални изјави од стана на неколку предметни наставници, лице од технички персонал и директорот, кои интервенирале веднаш по случувањето на инцидентот.

Директорката и стручната служба ќе продолжат да постапуваат согласно Законските и подзаконските акти, процедури и насоки за постапување при вакви постапки со цел во иднина да не се повторуваат. Училиштето, како и до сега е подготвено за соработка со сите надлежни институции за надминување на вакви ситуации. Ве замолуваме да се воздржите од ширење на дезинформации по овој случај со цел да се заштитат учениците вклучени во инцидентот, нивните семејства и другите ученици од одделенската заедница, а истовремено да се спречат несоодветни реакции од страна на потесната и пошироката јавност, апелира в.д директорката Коруновска

The post Дете давено и удирано во глава од соученик заврши на Неврохирургија во Скопје appeared first on Република.

Исклучен котел и млаки радијатори ги преќекуваат секој ден учениците и вработените во ООУ „Блаже Конески“ во Велес, реагира градоначалникот Марко Колев, алармирајќи и дека директорот Јованче Манасков е глув за овој проблем, а нема проблем да ги злоупотреба на децата за политичките цели.

Бројни реакции од загрижени родители за состојбата со греењето во ООУ „Блаже Конески“ пристигнаа до мене поради што утрово заедно со општинските и инспекциските служби бев таму и се уверив во она од кое се плашев - незаконски поставениот директор Манасков ги злоупотребува децата за свои лични и партиски цели. Додека во јавноста се пласираат информации за наводно кратење на средства од Општината за набавка на нафта реалноста е дека во резервоарот има доволно нафта, а радијаторите се млаки бидејќи работи само едниот котел а вториот е исклучен по наредба на директорот. Ваква наредба од него имало и за забрането уклучување на дополнителни грејни тела во училниците како што било пракса во изминатите години.
Наместо организирање на воспитно образовниот процес и раководење со училиштето директорот во континуитет делува единствено против интересите на децата и за свои цели директно им наштети на околу 1100 деца и нивните семејства. Имено, минатата 2023 година поради недомаќинско планирање на буџетот ова училиште врати речиси 10 милиони денари кон државата, средства кои можеше да ги пренамени за набавка на нафта или други потребни материјали и инвестиции. Оттука, крајно неодговорно и безобразно е префрлањето вина кон Општината за прикривање на сопствената неспособност. Апелирам до дел од наставниците да не потпаѓаат под овие манипулации и да шират паника кај родителите, туку да продолжат со професионално извршување на својата работа, соопшти денеска градоначалникот.

Воедно, го повикува министерот за образование Јетон Шаќири, кој откако ги одзеде ингеренциите од Општината за ова училиште и кој му го даде мандатот на директорот, да ги испрати своите служби итно да постапат и да не дозволат и понатаму партиските интереси да бидат над добросостојбата на децата.

Родители, ве уверувам дека овој проблем ќе биде надминат, како што се надминувале секогаш во минатото кога од другата страна имало волја за комуникација и соработка, а со задолжување од инспекциите веќе од утре децата ќе учат во затоплени простории, ветува Колев.

The post Учениците оставени да смрзнуваат, а директорот ги злоупотребува за политички поени: Скандал во ООУ „Блаже Конески“ appeared first on Република.

По успешната имплементација на енергетско-ефикасната фасада, ОУ „Блаже Конески“ во населбата Мичурин наскоро ќе добие современа доградба и проширување на капацитетите, при што ќе се одезбедат десетици нови училници, мала спортска сала и ред други содржини наменети за осовременување на образовниот процес, најави денеска градоначалникот на Општина Аеродром, Тимчо Муцунски кој заедно со директорот на ТИТАН Цементарница „Усје“, Борис Хрисафов извршија увид во комплетно завршената фасада на училишната зграда, која беше реконструирана со средства донирани од оваа општествено-одговорна компанија.

Станува збор за едно од најстарите основни училишта во Аеродром, кое по неколку децении ќе добие целосно нов лик. Покрај обновената фасада на училишната зграда, стариот дел од ова основно училиште, каде што условите се супстандардни, ќе биде целосно срушен и на негово место ќе се изгради комплетно нов и модерен објект.

Во првата фаза од проектот е планирано да се срушат централниот и источниот блок со вкупно 6 училници и топлата врска со салата и на нивно место да се изградат 12 училниици, мала спортска сала, како и топли врски за големата и малата спортска сала. Во втората фаза ќе се урне северниот блок со вкупно 4 училници и на нивно место според планираното решение ќе се добијат 14 училници.

Дополнителни содржини што се предвидени со проектот се: Наставнички кабинети – 13 дупли кабинети за двајца наставници и три кабинети за еден наставник; нова библиотека; кујна со трпезарија за 60 деца; мултинаменска просторија со бина; лифт; два тоалета за лица со посебни потреби и посебни санитарии за ученици и персонал; неколку хигиеничарски остави; повеќе административни канцеларии; како и три училници за дневен престој.

The post ОУ „Блаже Конески“ во Аеродром ќе доби нови училници и мала спортска сала appeared first on Република.

Денеска сме пред ООУ „Блаже Конески“ на територија на општина Аеродром, едно од најстарите основни училишта во нашата општина. За прв пат откога е изградено училиштето се инвестира во нова фасада, енергетска ефикасна фасада, вредноста на проектот е над 100.000 евра и се смета како една значајна инвестиција во училиштето. Би дополнил и неколку други работи. На кровот на училиштето веќе се поставени фотоволтации, што значи и тука внимаваме на енергетската ефикасност каде што училиштето за свои потреби ќе произведува електрична енергија, истакна денес градоначалникот на Аеродром, Тимчо Муцунски.

-Исто така во моментот се врши проектирање за доградба на основното училиште. Ова е едно од тие основни училишта на територија на општина Аеродром, заради катастрофалното урбанистичко планирање во минатото кое што е под ризик, не за втора смена, туку за трета смена, што значи веднаш по проектирањето ќе почнеме со изведба, ќе го прошириме капацитетот на училиштето, што сметаме дека во одреден период ќе воспостави сериозна стабилност од гледна точка на потребата на училници. На оваа локација исто тука во близина можете да видите дека има угостителски објекти, што за мене како градоначалник е недозволиво, во дворот на основно училиште да има угостителски објекти. Проблем кој што го има во оваа општина повеќе од десетина години. Успеавме да се договориме со лицето кое што го има под закуп, потпишуваме спогодба, многу скоро веќе нема да има угостителски објект во дворот на основното училиште и во моментот се врши промена на деталниот урбанистички план, за да на локацијата каде што сега имаме угостителски објект кој што наскоро веќе нема да биде тука, да се изгради нова детска градинка. Бидејќи свесни и во последниот период дека имаше сериозни реакции во јавноста, многу оправдани реакции од родителите бидејќи нема доволно места во градинките во скоро сите скопски општини, Аеродром никако не е исклучок од тоа. Така да една од нашите приоритетни градинки кои што ги ветивме во кампањата ќе биде токму тука во Мичурин, вели тој.

„Работиме посветено, многу голем дел од инвестициите кои што ги правиме, капитални инвестиции кои што веќе ги отпочнавме, а ќе ги реализираме дополнително во следниот период се во делот на инфраструктурата поврзано со образование, основните училишта и поврзано со градинките бидејќи сметаме дека на ваква урбана општина која што расте во своето население, тоа мора да биде еден од приоритетите“ – посочи Муцунски.

The post Муцунски: ОУ „Блаже Конески“ добива енергетска фасада, се проектира и доградба, а во дворот на училиштето наместо сегашниот угостителски објекти ќе се изгради градинка appeared first on Република.

Основното училиште „Блаже Конески“ во населбата Мичурин наскоро ќе добие целосно нова фасада, со што ќе почне реализацијата на едно од главните ветувања на градоначалникот Тимчо Муцунски за обнова на сите основни училишта на територијата на Општина Аеродром.
Фасадата на зградата на ова основно училиште ќе биде реконструирана со средства донирани од компанијата ТИТАН Цементарница „Усје“ АД Скопје која за таа цел ќе обезбеди 4.446.548 денари или околу 72 илјади евра. Ваквиот проект произлегува од конструктивната соработка на Општината и раководниот тим на оваа општествено-одговорна компанија.
Со обновувањето на фасадата на училишната зграда, ќе се добие целосно нова енергетско-ефикасна фасада, со што училиштето, покрај тоа што ќе добие нов лик, во голема мера и ќе заштеди на електрична и топлинска енергија.
Општина Аеродром интензивно работи на тоа секое основно училиште во наредниот период да биде реновирано, за да се врати сјајот на училиштата и да се обезбедат сите современи услови за квалитетно образование на учениците и за нивен правилен раст и развој. Во наредниот период училиштата комплетно ќе бидат опремени со смарт-табли и таблети за одвивање на училишниот процес.

The post ОУ „Блаже Конески“ прво добива нова фасада appeared first on Република.