оркестар за џез музика Archives - Република

Најдено е решение и соодветен простор каде ќе биде сместен новоформираниот џез оркестар

Nena — Tue, 06 Jun 2023 08:41:36 +0000

Изминатиов период јавноста сведочи за протести на вработените во Македонската филхармонија поради одлуката во зградата на Филхармонија времено да биде сместена Националната установа Оркестар за џез музика. Прес конференции одржаа и вработените во Филхармонија и членовите на НУ Оркестар за џез и музика и Министерството за култура, секој елаборирајќи ги своите ставови. За оваа состојба разговаравме со Вера Атанасовска, претседател на СКРМ. Атанасовска е археолог, советник- конзерватор вработена во НУ Конзерваторски центар Скопје и Претседателка на СКРМ од 2021 година. Таа ни открива дека веќе е најдено решение и е најден соодветен простор каде ќе биде сместен новоформираниот џез оркестар. Каков е Вашиот став во врска со одлуката на Министерство за култура за сместување на новоформираниот Национален џез оркестар во зградата на Македонска филхармонија и дали сметате дека протестите на филхармоничарите се оправдани?

Како претседателка на СКРМ ги застапувам одлуките на Советот на синдикатот и како што веќе претходно информиравме СКРМ застанува со поддршка на сите уметници. Сметаме дека целата ситуација околу сместувањето на џез оркестарот во зградата на Националната филхармонија е наметната од страна на Министерството за култура со носењето на еднострана одлука без сериозна анализа, дијалог и јавна дебата.

Дали според Вас требаше да дојде до овој спор меѓу Филхармонија и новата национална установа Оркестар за џез музика и каков би бил вашиот предлог за решавање на проблемот?

Секако дека до ова не требаше да дојде. И вработените во Националната филхармонија и џез музичарите заслужуваат достојни услови за работа, соодветна анализа на нивните потреби и потребите на функционирање на нивните институции. Непланското и нетранспарентното носење на одлуки од страна на министерството доведе до ситуација на спор меѓу колеги.

Колку што сум информирана од страна на министерката за култура веќе е најдено решение и е најден соодветен простор каде ќе биде сместен новоформираниот џез оркестар. Се надевам дека отткако ќе заврши процедурата истото ќе биде јавно соопштено од страна на Министерството за култура.

Какви се претходните искуства со „вдомување“ на повеќе национални установи во еден објект, како што беше примерот со сместувањето на Албанскиот и Турскиот театар во објектот на Театар Комедија или Националната установа „Гостиварски театар“ во Центарот за култура во Гостивар?

Во пракса постојот повеќе институции сместени во еден објект и искуството покажало дека кога условите за работа ќе се влошат до степен на нефункционалност, тогаш решавањето на наметнатиот проблем паѓа на грбот на културните работници, кои секогаш биле оставени сами да се снаоѓаат. Знаеме дека нови објекти се градат со години како што е случајот со Турскиот театар а и Националната филхармонија доби своја зграда после 70 години.

Како и во минатото така и сега приоритетите секогаш биле проблем во културата. Ние како синдикат секогаш стоиме на располагање и ја нудиме нашата искрена и професионална соработка за сите проблеми и теми што ја засегаат културата. Се надеваме дека во иднина Министерството ќе ја искористи можноста за соработка и одлуките што ги засегаат културните работници ќе ги носи со взаемна соработка и во согласност со професионалните стандарди.

Дали сметате дека е оправдана одлуката Оркестарот за џез музика да добие статус на Национална установа?

Како синдикат кој ги застапува најголемиот број на културни работници во институциите од културата не навлегуваме во оправданоста на одлуката на Министерството за култура за формирање на нова национална институција. Колку и да е оправдана оваа одлука истата помина нетранспарентно, без јавна дебата и е донесена во момент кога вработените во културата се соочуваат со кризни мерки наметнати од министерството за финансии и во момент кога се бара од нас да прифатиме децентрализација на институциите од културата. Во моментов нема нови вработувања каде што е најпотребно и каде што има испразнети работни места, нема унапредувања и нема признавање на стручните звања во заштитата. Но и покрај тоа сметаме дека сите новоформирани институции, од кои реално има потреба, може да придонесат позитивно и стимулативно во културните процеси во државата и се надеваме дека Министерството за култура раздорот што го направи меѓу нашите колеги ќе го реши со сериозен и партнерски пристап.

The post Најдено е решение и соодветен простор каде ќе биде сместен новоформираниот џез оркестар appeared first on Република.

Едно биро не е доволно за да функционира национална установа

Nena — Wed, 19 Apr 2023 10:58:14 +0000

По одлуката на Владата за основање нова национална установа „Оркестар за џез музика“ и планот за нејзино времено сместување во Македонската филхармонија, не стивнуваат реакциите и спротивставените мислења на двете засегнати страни, во врска со вдомувањето на „Џез оркестарот“ во објектот на Филхармонијата.

Вработените во Македонската филхармонија сметаат дека сместувањето на двата музички ансамбли како две национални установи во еден дом, под еден покрив е неприфатливо од причина што ќе создаде низа непријатности во административното работење и ќе се одрази врз конструктивноста, креативноста и продуктивноста и на двете национални установи. Тие не го поддржуваат вдомувањето на новоформираната национална установа во објектот на Филхармонија, бидејќи на тој начин се создаваат услови за едни, на сметка на нарушени услови на други.

„Зградата на Филхармонија е проектирана и замислена како објект за работа на еден симфониски оркестар. Секоја просторија е предвидена и осмислена со цел вработените да можат да ги исполнат своите работни обврски. Реално не е возможно да функционираат две национални установи, два оркестра со годишна програма. Здружението на џез музичари на Македонија (ЗЏМ) досега реализираше по два-три концерти годишно, што е сосема различно од бројот на концерти кои ќе треба да ги реализираат како Национална установа. Покрај тоа, не е вистина дека ЗЏМ настапувале и твореле во зградата на Филхармонија седум години, бидејќи самата концертна сала функционира пет и пол години“, велат од Филхармонија.

Од досегашното стекнато искуство на Филхармонија и нејзиното работење во Домот на АРМ, утврдено е дека за правилно функционирање на една културна установа која не е сместена во простор наменски за нејзините потреби, потребен е минимум персонал, кој ќе ги врши работите од административна природа. Тука спаѓаат двајца правници, од кои еден ќе биде одговорен за спроведување на јавни набавки, а другиот во делот на човечките ресури и подготовка на систематизација. Под „работа во делот на јавните набавки“ спаѓа: изработка на годишен план за јавни набавки; подготовка на документација за секоја постапка; спроведување на евалуација; подготовка на договор; пополнување на евиденција на електронскиот систем; советуавање на комисијата за јавни набавки; подготовка на одговор на жалба во случај на жалбена постапка.

За една национална институција каква што ќе биде новоформираната да фунционира како таква од правен аспект потребен е и архивар (одговорен за водење на архива, архивирање на материјали; изготвување на план на архивски знаци, годишен извештај до Државен архив; поништување на документи), двајца економисти (изготвување на плата; задршки на плата; пресметка и исплата на хонорари; исплата и уплата на средства; водење на благајна; изготвување на фактури; книжење; изработка на годишна сметка и сл.), најмалку три лица задолжени за продукција и маркетинг, нототекар, продавач на билети и најмалку двајца хигиеничари. Тоа се вкупно 12 вработени, кои ќе треба да добијат соодветен простор за работа во зградата и да бидат сместени во канцеларии. Овие лица ќе се грижат за потребите на оркестарот, преку кој установата ќе ја остварува својата основна дејност, а тоа е концертната. Покрај тоа, потребни ќе бидат и пултеви, столчиња, држачи за инструменти, диригентски пулт, инструменти, инвентар (мебел, компјутерска опрема), опрема за снимање, сценска техника, што е многу повеќе од „едно биро“ како што велат од Здружението на џез музичари за да функционира новоформираниот орекстар во зградата на Филхармонија.

Од Филхармонија велат дека Владата ја донела одлуката за сместување на Џез оркестарот во истиот објект без да ги консултира, а веста ја дознале од социјалните мрежи. Според нив, со ова се прави невиден преседан, бидејќи никаде во светот под еден покрив не функционираат два некомпатибилни оркестри и засебни национални установи и дека многу посоодветен простор за сместување на Оркестарот за џез музика би биле студијата на Македонската радио и телевизија. Во Филхармонија работат уметници кои ќе бидат дел од Џез оркестарот, па во новонастанатата ситуација нарушени се и меѓучовечките односи, поради што проблемот треба да се решава институционално. Филхармоничарите нагласуваат дека оваа сала е проектирана и изградена според сите светски и естетски стандарди во архитектурата и градежништвото и според потребите на музичкиот ансамбл, административниот и техничкиот персонал на Македонската филхармонија.

The post Едно биро не е доволно за да функционира национална установа appeared first on Република.

Сместувањето на новоформираниот „Оркестар за џез музика“ во објектот на Филхармонија е несоодветно и ќе направи повеќе штета, отколку полза, реагираат вработените

Сани — Fri, 31 Mar 2023 07:02:40 +0000

Сместувањето на новоформираната национална установа „Оркестар за џез музика“ во објектот на Филхармонија е несоодветно и ќе направи повеќе штета, отколку полза, реагираат вработените во писмо испратено до медиумите. Тие велат дека не се против колегите и постоењето на овој оркестар, дури и сметаат дека треба да ги поддржат во нивните напори да го добијат заслуженото место, но не можат да ја прифатат одлуката оваа ново формирана институција да биде сместена и да функционира во нивниот објект.

Вкупно 108 вработени во Филхармонија потпишале петиција која освен до меидумите, ја испратиле и до министерката за култура Бисера Костадиновска Стојчевска и Претседателот на Владата со цел промена на одлуката за вдомување на Џез оркестарот во просториите на Филхармонија.

Пред една недела веста дека Владата донела одлука за формирање на нова НУ Оркестар за џез музика нè затече сите нас. Иако ја поздравуваме одлуката бидејќи сметаме дека истата ќе придонесе за развој на културниот живот во државата, решението оваа новоформирана институција да биде сместена во објектот на Филхармонијата е целосно несоодветно и истото ќе направи повеќе штета отколку полза.

Како вработени во Филхармонија би сакале да ја изразиме нашата загриженост за функционирањето на институцијата и да укажеме на тоа дека во објектот на филхармонијата (која што е нашиот втор дом), не е возможно паралелно да работат две институции, односно два различни субјекти, велат вработените во Филхармонија.

Објаснуваат дека концертната сала и целиот објект е замислен, конципиран и изграден исклучиво наменски и според потребите на севкупното функционирање на НУ Македонска филхармонија. Ова се однесува пред се на оркестарот на Македонска филхармонија чии членови/вработени ги извршуваат своите работни задачи така што одржуваат редовни проби и концерти во двете сали (големата и малата сцена) кои се наоѓаат во објектот. Исто така, музичарите вработени во филхармонијата голем дел од работните часови ги поминуваат и во индивидуална и групна работа во одделните соби во објектот наменети за оваа цел.

Во објектот има точен број на соби за вежбање, кои се направени со прецизни акустички мерења за секоја група на инструменти одделно. (На пр. во собата за контрабаси, волуменот, квадратурата и акустиката е соодветна исклучиво за оваа група, не би можеле и не е соодветно оваа група на инструменти да ја сместите во собата за флејти, која што пак е направена специфично за оваа група, според потребата на групата, бројот на членови, и изработена со различна квадратура, акустика и волумен) и така за секоја група поединечно. Покрај собите за вежбање, имаат и 4 гардероби (2 женски и 2 машки) чиј просторен капацитет е целосно исполнет согласно бројот на вработени во оркестарот.

Вработените во Филхармонија велат дека капацитетот на просториите во кои се сместени администрацијата и техничката служба, е целосно исполнет. Во објектот има и нототека, која тековно се пополнува со нотна литература и веќе кубури со простор, како и студио за снимање, за чии потреби беше пренаменета една од просториите за вежбање. Постои и кафетерија која што е дадена на користење, а која според проектот треба да се користи за цели на вработените и гостите на институцијата, а сегашната намена воопшто не соодветствува со првичната намена на истата. Тука се големата и камерната сала на филхармонијата, кои што се користат за она што се наменети, односно за симфониски и камерни концерти.

Со сето ова погоре напишано сакаме да ја искажеме нашата загриженост од информацијата дека ние, институција која 70 години се бореше да добие сопствен простор, кој е проектиран исклучиво да ги задоволи потребите на еден модерен симфониски оркестар, треба да отстапиме простор на уште една институција, која што исто така треба да има простор за индивидуална работа, заедничка работа, административна служба, техничка служба, нототека, студио и сите други нешта кои се придружни на еден објект. Крајно сме загрижени дека буквалното „втурнување“ на уште еден оркестар, за кој сме среќни што постои и секогаш сме ја поддржувале нивната работа, сепак, ќе значи загрозување на интегритетот на македонската филхармонија од аспект на секојдневно функционирање на двата субјекти. Би сакале да нагласиме уште еднаш дека ние не сме против нашите колеги и постоењето на овој оркестар, дури и сметаме дека треба да ги поддржиме во нивните напори да си го добијат заслуженото место, но не би можеле да ја прифатиме одлуката оваа ново формирана институција да биде сместена и да функционира во нашиот објект, велат потпишаните во петицијата.

Вработените во Филхармонија потсетуваат на некогашниот џез оркестар во Македонската Телевизија кој за жал беше укинат. Тие велат дека во истата куќа сè уште постојат студијата кои се најсоодветни за еден ваков оркестар, кој ќе може да работи непречено и да си ги подготвува своите проекти. Веројатно би било и убаво да се возобнови традицијата на џез односно ревискиот оркестар кој постоеше и работеше во рамките на МТВ, повторно да се врати сјајот на студиото каде што некогаш твореа Шпато, Џамбазов, Пејовски...и многу други, додаваат во петицијата вработените во Филхамонија.

Постојат уште многу причини кои би можеле да ги наведеме зошто ние, вработените во Филхармонија, не се согласуваме со наметнатото решение за буквално присилно вселување на уште еден ансамбл во рамките на објектот. Сакаме јавноста да биде правилно информирана за она што во моментов се наметнува на Филхармонија и за нашиот обид да си го одбраниме интегритетот на институцијата. Тажно е што надлежните институции сакајќи да решат еден проблем произведуваат друг проблем од невидени размери кој може да остави долготрајни несакани последици, се вели во петицијата потпишана од 108 вработени во Филхармонија.

The post Сместувањето на новоформираниот „Оркестар за џез музика“ во објектот на Филхармонија е несоодветно и ќе направи повеќе штета, отколку полза, реагираат вработените appeared first on Република.