Крајно време е за соочување со грдата реалност на војни, природни катастрофи, енормна сиромаштија, нееднаквост и нерамноправност, кршење на меѓународното право, па дури и на JUS GOGENS, практикување на правото на мажите, наместо владеење на правото, жртвување на правдата, етиката и моралот заради профит и моќ, истакна денеска претседателката Гордана Сиљановска Давкова во обраќањето на Самитот на иднината во Обединетите Нации во Њујорк.

Како што јави известувачот на МИА од Њујорк, Сиљановска Давкова се залага за длабоки реформи на ООН кои, како што вели, мора да се бараат со осмислена решителна акција.

- Храбрите потфати се неможни без длабоки реформи во ООН, зајакнат мултилатерализам во одлучувањето, развиен механизам на спреги и кочници во односите меѓу генералниот секретар, Советот за безбедност и генералното Собрание, поголема инклузивност и транспаретностна процесот на одлучување, како и решителност и ефикасност во справувањето со енормните закани за мирот, одржливиот развој и човековите права, рече претседателката Сиљановска Давкова.

Според неа, потребни се структурни, функционални, меритократски, демократски реформи, а треба да се зајакне и улогата на Генералното собрание, како претставничко тело на нациите.

-Меѓународиот суд на правдата мора да добие посилна улога, а неговите пресуди, да станат задолжителни за сите. Мора да се воспостави поинтензивна соработка и партнерство со граѓанското општество, да се зголеми транспаретноста на работата на сите органи и тела. Не мислам дека проширувањето на Советот за безбедност со неколку нови постојани членови, со ексклузивно право на вето, само по себе ќе значи поголема гаранција за мирот, за безбедноста иако ми е јасно дека односот на силите на глобалната сцена, денес не е оној од 1945 година. Како претставничка на мала држава, верувам дека во овој орган треба да се зголеми учеството на помалите држави за да се заштитат од реалната опасност од поголемите. За таа цел, Советот за безбедност го замислувам како своевидна светска коалициона влада, рече претседателката Сиљановска Давкова.

Повелбата на ООН останува темелен акт, устав на нациите со највисока правна сила, но и своевидна универзална повелба, односно општествен, меѓудржавен и меѓунационален договор.

https://republika.mk/vesti/svet/zemjite-chlenki-na-on-go-usvoija-paktot-za-idninata/

Претседателката побара да се стави крај, како што нагласи, на непочитувањето, заобиколувањето и селективната примена на повелбата, како во македонскиот случај.

-Запоадниот Балкан од каде што доаѓам е климатски ранлив регион, што бара регионална стратегија и одговор, но и активна соработка со ЕУ и агенциите на ООН во потрага по обновливи извори на енергија, рече Сиљановска Давкова, информирајќи ги учесниците на самитот дека Агендата 2023 е интегрирана во македонската национална стратегија за развој, како и дека новоформираното Министерство за дигитална трансформација е соодветен институционален одговор на современите дигитални предизвици и претставува хармонизација со глобалниот дигитален договор.

Претседателката рече дека се залага посебно внимание да им се посвети на лицата со посебни потреби, лицата од сите ранливи категории, како најизложени на дискриминација.

- Како потписници на Истанбулската декларација, врз основа на која го усвоивме Законот за превенција од заштита од дискриминација и Законот за превенција и заштита од семејно насилство и насилство врз жените, високо се позициониравме во нивната заштита, рече таа истакнувајќи дека се залага за повеќе жени на највисоки функции и ги реализира тие заложби.

Најави дека соочени со егзодутот на младите ќе формира совет за млади и совет за дијаспора.

-Верувам дека Пактот за иднината, Глобалниот дигитален договир и Декларацијата за иднината се солидна и инасоиративна рамка за трасирање и градење иднина во која мирот, просперитетот и правдата нема да бидат „wishful thinking“ туку реална основа за акција, рече Сиљановска Давкова нагласувајќи дека глобалните предизвици бараат глобален усогласен договор и одговор.

Самитот на иднината официјално започна утринава по американско време. И покрај руските напори да го попречи договорот, меѓународната заедница усвои план за реформи на ОН.

Претседателот на Генералното собрание на ОН, Филемон Јанг, го прогласи Пактот за иднината на Обединетите нации за формално усвоен - против волјата на Москва и на неколку други држави.

Претседателката Гордана Силјановска Давкова ја предводи македонската делегација на 79. Генерално собрание на ОН. Во составот на нашата делегација се и вицепремиерот и министер за животна средина Изет Меџити и министерот за надворешни работи и надворешна трговија Тимчо Муцунски.

The post Силјановска-Давкова од Самитот на иднината во ООХ: Храбрите потфати се неможни без длабоки реформи во ООН appeared first on Република.

Денес, недела, 22 септември, земјите-членки на ОН го усвоија „Пактот за иднината“, и покрај противењето на неколку земји, меѓу кои и Русија.

Генералниот секретар на ОН Антонио Гутереш ја лансираше идејата за „иден самит“ уште во 2021 година, кога го претстави како „уникатна можност“ да се промени текот на човечката историја.

Во рамки на воведот на годишниот собир на членовите на Генералното собрание на ОН, кој започнува во вторник, недела и понеделник, се очекува на овој самит да присуствуваат десетици шефови на влади. По тешки преговори до последен момент, Русија во неделата го изрази јавното противење на текстот, но не го спречи неговото усвојување со консензус, пренесува Хина.

„Ова не може да се смета за мултилатералност“, бидејќи „никој не е задоволен од овој текст“, изјави рускиот заменик-министер за надворешни работи Сергеј Вершинин.

Русија, со поддршка на Белорусија, Иран, Северна Кореја, Никарагва и Сирија, сакаше да претстави амандман со кој се потврдува дека ОН „не може да интервенира“ во „внатрешните“ работи на државите, но огромното мнозинство од членовите на Собранието одбија да го разгледа тој предлог.

Пред почетокот на самитот, Антонио Гутереш изрази одредена фрустрација од содржината на текстот, повикувајќи ги земјите-членки да покажат „визија“ и „храброст“ и можеби „максимална амбиција“ со цел да се зајакнат „застарените“ меѓународни институции „кои се повеќе не може ефективно да одговори на сегашните закани“.

Во Договорот, лидерите се обврзуваат да го зајакнат мултилатералниот систем „да се држи чекор со светот што се менува“, да ги „заштити потребите и интересите на сегашните и идните генерации“ на кои им се закануваат „постојани кризи“. „Ние веруваме дека постои начин за подобра иднина за целото човештво“.

Пактот на повеќе од 20 страници претставува 56 „акции“ во различни области, од важноста на мултилатерализмот до почитувањето на повелбата на ОН и одржувањето на мирот и реформите на меѓународните финансиски институции до онаа на Советот за безбедност на ОН или борбата против климатските промени, разоружувањето. и развојот на вештачката интелигенција.

Дури и ако има некои „добри идеи, ова не е тип на револуционерен документ што целосно го реформира мултилатерализмот на кој повикува Антонио Гутереш“, изјави за АФП Ричард Гован од Меѓународната кризна група пред усвојувањето.

Мислењата се доста поделени меѓу дипломатите, а многумина превртеа со очите кога беа прашани за изгледите и аспирациите на текстот и неговото влијание.

„Тоа е како млака вода“, или „најмал заеднички именител“, „разочарувачки“ …, беа нивните одговори.

„Во идеални околности, би можеле да се надеваме на нови идеи. Но, кога имате речиси 200 земји кои треба да се согласат, тоа веќе изгледа малку како новогодишна елка“, коментира еден дипломат.

The post Земјите-членки на ОН го усвоија „Пактот за иднината“ appeared first on Република.

Претседателот на Европскиот совет, Шарл Мишел, денес на Самитот за иднина во Њујорк изјави дека заедничка мисија на сите членки на ОН е да го најдат најдобриот начин за соочување со заедничките предизвици.

Мишел изјави дека самитот е „уникатен момент за зголемување на нашите амбиции и дека ЕУ е целосно посветена на тоа“.

Според Мишел, Пактот за иднината е моќен катализатор за забрзување на целите, напредок во областа на човековите права и итна реформа на „меѓународната финансиска структура“, беше објавено на веб-страницата на ОН.

The post Мишел: Европската унија е целосно посветена на Пактот за иднината appeared first on Република.

Љубомир Фрчкоски очекува оставката да биде усвоена и да биде разрешен од Функцијата со Указ на Претседателката, како што и е назначен.

На прашањето дали тоа и како ке се одрази на работата на Мисијата на РСМ во Њујорк Фрчкоски одговори:

“Не мислам дека на било каков начин тоа ке се одрази на функционирање во техничка смисла на Мисијата која и до сега работела само бирократско-технички. Но има, за жал, шанса да се направи голема штета и срам за државата во една конкретна смисла и по повод еден конкретен случај.

Имено, Македонија предложи проект во ООН кој беше прифатен прв пат во својата историја на членство кој се вика “Промоција на дијалог и медијација со цел превенција на геноцид и сличните злосторства (воени злосторства и злосторства против човештвото)“.

Проектот по наша иницијатива е прифатен и му е одреден буџет (што е многу ретко во ситуација на финансиска криза во ООН ) во одделот кој го води Г-ѓа Алис Ндериту, Под-Секретар и Специјална советничка на Генералниот Секретар на ООН за Превенција од Геноцид (The United Nation Office on Genocide Prevention and the Responsibility to Protect – OSAPG)

Цел на проектот е да се создаде:

Прво, Прирачник (Policy Paper) кој во наша чест како иницијатори на Проектот би се нарекол Скопје (Охрид) Policy Paper (во зависност каде би се одржала Првата Конференција за негово донесување). Прирачникот ќе содржи: методологија и начин на работа и начин на составување групи во рамките на ООН за медијација при идентитетски конфликти низ светот кој можат да доведат до вакви злосторства при што медијацијата треба да помогне да се избегнат трагичните исходи.

Второ, по донесувањето на Прирачникот (Policy Paper) треба да се создаде листа од експерти – медијатори како и листа на точки и жаришта на вакви тензии каде ќе се понуди помош и посредување од страна на ООН.

Проектот беше прифатен од страна на ООН, затоа што е тоа една од основните негови задачи, посредување при вакви тензии и е жестоко критикуван за својата пасивност и неуспеси при ваквите посредувања во минатото.

На основа на одобрениот буџет во април и мај 2024 се одржаа две on-line средби со експерти медијатори од цел свет на кои се дефинираше рамката за носење на Policy Paper и План за Акција кој би се нарекол според Скопје или Охрид Policy Paper со што на некој начин “создаваме историја” имајќи во предвид дека Македонија има искуство и знаење за решавање на вакви идентитетски конфликти во минатото и е препознаена како позитивен чинител во таа насока.

Финален чин на оваа фаза на проектот е Конференција на која би се дискутирал и усвоил Policy Paper и Планот за Акција, а која би се одржала во Скопје или Охрид. Предлогот на Специјалниот Советник Ндериту е периодот од 16- 27 Октомври 2024 година.

Министерот за надворешни нема поим за оваа супер важна инцијатива на Македонија за која има патем куп известувања пратени од Мисијата, но за која воопшто не се интересира и не комуницира. Тој има поважна работа во надворешната политика – да се занимава со сметките на амбасадите и амбасадорите .

Ако оваа иницијатива пропадне поради изгубеност, незаинтересираност или лоша волја на Министерот и министерството (наводно рекол “Фрчко си прави себе-промоција”) тоа ќе биде испуштање на историска шанса за здрава промоција на земјата на клучните прашања во ООН и воедно срам за земјата која без континуитет и проценка на основа на ресентименти ја води својата надворешна политика и ја дезавуира својата политичка позиција на сериозен партнер .

Но тоа е што е, не може со сила некому да му се даде памет и доблест- одговори професорот Фрчкоски .

The post Фрчкоски: Оставката треба да биде усвоена, но постои ризик од срам за Македонија ако пропадне клучен проект во ООН appeared first on Република.

Грција, секогаш посветена на меѓународното право, на принципиелната надворешна политика ѝ стои на располагање на Организацијата на Обединетите нации, тоа е нешто што генералниот секретар го цени и секогаш очекува соработка со нас, истакна министерот за надворешни работи на Грција Јоргос Герапетритис по средбата во Њујорк со генералниот секретар на ОН Антонио Гутереш, јави дописничката на МИА од Атина.

Герапетритис рече дека на средбата размениле идеи за сите актуелни прашања и големите кризи во светот.

-Во моментов, за жал, се наоѓаме во состојба на стагнација на Блискиот Исток, Украина, Хаити, Супсахарска Африка. Обединетите нации имаат многу важна улога. Веројатно би требало да го видиме процесот со кој се носат одлуките, кои треба да бидат брзи, ефикасни. Да го даваат неопходното убедување за интегритет, но и за одговорност за оние кои запаѓаат во прекршоци поврзани со меѓународното право, истакна шефот на грчката дипломатија.

На средбата со Гутереш станало збор и за кипарското прашање, посочувајќи дека е важна можноста за разговори меѓу Кипар и заедницата на кипарските Турци.

Додаде дека остануваат цврсто посветени на резолуциите на Советот за безбедност за би-зоналната би-комунална федерација.

-Можноста што се дава треба страните да ја искористат, да седнат на маса за дијалог. Грција ќе ја исцрпи секоја можност, за да можеме да имаме позитивна разврска во кипарското прашање, истакна министерот за надворешни работи на Грција.

The post Герапетритис: Грција ѝ стои на располагање на ООН за соработка appeared first on Република.

Светот се движи кон „климатска катастрофа”, предупреди ООН во денеска објавениот извештај, кој покажа колку всушност се далеку земјите од нивните поставени и „недоволни” климатски планови.

Во извештајот на Програмата за животна средина на ОН (УНЕП) се предупредува на голем јаз помеѓу активностите потребни за ограничување на порастот на глобалните температури за да се избегнат најлошите ефекти од климатските промени и она што го прават земјите и што ветија дека ќе направат.

Актуелните климатски политики доведуваат до затоплување од 2,8 степени Целзиусови, а плановите на земјите за следната деценија би довеле до зголемување на температурата од 2,4 до 2,6 Целзиусови степени.

Времето за постепена промена заврши и „само фундаментална трансформација на нашите економии и општества може да нè спаси од забрзана климатска катастрофа”, предупреди извршната директорка на УНЕП, Ингер Андерсен.

Во согласност со Парискиот климатски договор од 2015 година, здржавите ветија дека ќе преземат активности за намалување на емисиите на стакленички гасови за да се ограничи глобалното затоплување значително под нивото од 2, односно 1,5 степени Целзиусови.

Светот веќе е соочен со почести поплави, бури, топлотни бранови и шумски пожари, а доколку се надмине границата на затоплување од 1,5 степени Целзиусови, се очекуваат уште поразорни екстремни временски настани.

Плановите за климата, познати како Национално определени придонеси (NDC), се проценува дека ќе ги намалат глобалните емисии за меѓу пет и 10 проценти до 2030 година, или три до шест милијарди тони, во споредба со тековните политики.

Но, потребно е да се намалат штетните гасови за уште 20 до 23 милијарди тони до 2030 година за да се постигне целта температурата да се ограничи на 1,5 степени Целзиусови, односно 12 до 15 милијарди тони за да остане во границата од 2 Целзиусови степени.

Земјите, исто така, „скршнаа од патот” и во однос на остварувањето на своите глобално „грубо недоволни” климатски планови, се предупредува во извештајот објавен пред најновите меѓународни разговори за климата во Шарм Ел-Шеик, Египет.

Шефот на ОН, Антонио Гутереш ги повика развиените земји да бидат предводници на поамбициозните климатски планови, да ја прекинат зависноста од фосилните горива и да го зголемат ангажманот на Светска банка во борбата против климатските промени.

„Мораме да го затвориме јазот во емисиите пред сите да бидеме погодени од климатска катастрофа”, додаде Гутереш.

The post ООН: Светот се движи кон климатска катастрофа appeared first on Република.

Се наоѓаме пред голем предизвик, не очекува најтешката зима по втората светска војна, а тоа е да се обезбеди достапност до храна и енергија за нашите граѓани. Ова се заеднички проблеми, затоа заеднички треба да се дејствува, односно решенијата да се заеднички. Ова е дел од обраќањето на премиерот Димитар Ковачевски во рамките на 77-генерално Собрание на Обединетите нации. Како што вели тој, ова е предизвикано од руската агресија врз Украина, која ја крши повелбата на Обединетите нации и меѓународното право. Ковачевски вели дека историјата потврдува дека ниту еден проблем не може да се реши по насилен пат, туку на маса, преку дипломатијата и дијалогот. Ковачевски во говорот порача дека нашата земја е вистински пример за Европа во мало, односно на функционалност на мултиетничноста. Ги спомна двата договори, со Грција и Бугарија како примери за решавање на спорови, а Отворен Балкан со Албанија и Србија како пример за добрососедска соработа.

-Водејќи се од политики на мостови, функционална дипломатија, дијалог и разбирање, постигнавме оствартување на стратешка цел, полноправно членство на НАТО и денес сме достоинствена членка на Алијанса и по 17 години од добиениот кандидатски статус ги почнавме преговорите со ЕУ….Граѓаните на Македонија заслужуваат најголем кредит, бидејќи предолго го чекаа овој момент и јас разбирам зошто можеби се чувствуваат фрустрирано и уморно одејќи по тој пат кон Европа. Но ние немаме друга алтернатива кој ќе ни овозможи подобар стантадр, а и никој не рече дека сето ова ќе биде лесно, порача Ковачевски во дел од своето обраќање во Обединетите нации.

The post Ковачевски ја повика Русија да се повлече од Украина appeared first on Република.

Претседателот на Владата Димитар Ковачевски синоќа се сретна со истакнати личности од Македонија, кои работат и живеат во САД.

На приемот кој се одржа во Македонскиот културен центар во Њујорк, присутни беа лица кои работат во Организацијата на Обединети Нации, како и наши истакнати професори уметници и претставници од бизнис заедницата.

Премиерот Ковачевски во поздравното обраќање истакна дека е огромна честа и задоволството да се биде заедно со наши луѓе во Њујорк.

После подолго време затвореност на светот сега имаме повторно можност да се дружиме и поразговараме за повеќе актуелни теми.

Драго ми е што на едно место сме присутни различни луѓе од различни културни средини, сите со различни искуства и животни приказни. Тоа е она што е специфично за нас и дома и низ светот, различностите секогаш биле нашата јака страна и нешто што треба да го негуваме и развиваме.

Бидете горди на вашето потекло, Македонија е земја која има многу да понуди. Заедно со САД каде што вие работите и живеете и ЕУ, кои се наши стратешки партнери, стоиме обединети на вистинската страна, рече Ковачевски.

Овој настан беше организиран во рамките на посетата на премиерот Ковачевски на САД и неговото учество на 77-то Генерално Собрание на ООН.

The post Ковачевски во Њујорк се дружеше со истакнати Македонци кои работат и живеат во САД appeared first on Република.

Генералниот секретар на ОН Антонио Гутереш в четврток во Украина ќе се сретне со украинскиот претседател Володимир Зеленски и неговиот турски колега Реџеп Тајип Ердоган, соопшти портпаролот на Светската организација Стефан Дужарик.

Тројната средба ќе се одржи во градот Лавов, западна Украина, на покана на Зеленски. Гутереш в петок ќе ја посети Одеса.

На враќање кон Њујорк, генералниот секретар на ОН ќе престојува во посета на Турција. Поконкретно, тој в сабота ќе го посети заедничкиот координативен центар во Истанбул за следење на извозот на житарици преку Црното Море.

Одеса е едно од пристаништата вклучени во договорот за извоз на украински житарици и други прехранбени производи преку Црното Море.

The post Утре средба Зеленски-Гутереш-Ердоган appeared first on Република.

Албанија ќе претседава со Советот за безбедност на Обединетите нации од 1-ви јуни до крајот на тој месец, според распоредот на веб-страницата на светската организација.

Албанија е избрана за непостојана членка на највисокото тело на ОН на 11 јуни 2021 година, а нејзиниот мандат истекува на 31 декември 2023 година. Членовите ги менуваат позициите во позицијата претседавач со Советот за безбедност на ОН по азбучен ред.

Бразил оваа позиција ќе ја преземе од Албанија на 1 јули, а потоа до крајот на годината ќе бидат Кина, Франција, Габон, Гана и Индија, пренесуваат медиумите.

The post Албанија ќе го предводи Советот за безбедност на ОН до крајот на јуни appeared first on Република.

Обединети нации денеска им забранија на своите вработени да ги употребуваат зборовите „војна“ и „инвазија“ за ситуацијата во Украина.

ОН предлагаат да се користат зборовите „судир“ и „воена офанзива“.

На вработените во ОН исто така им се забранува приватно и службено да го употребуваат украинското знаме на социјалните мрежи.

Според ОН причина за забраната е тоа што организацијата сака да ја задржи неутралноста.

Ова е важен потсетник дека ние, како меѓународни претставници, имаме обврска да останеме неутрални“, се наведува во електронската порака испратена до вработените на ОН.

The post ОН им забрани на вработените да ги користат на зборовите „војна“ и „инвазија“ за ситуацијата во Украина appeared first on Република.