Користењето огревно дрво, минералната прашина која се создава при гардежни активности и сообраќајот се меѓу главните фактори на аерозагадувањето, покажуваат резултатите од истражувањето кое е дел од проектот за справување со аерозагадувањето во пет општини во внатрешноста на државата во кое беа вклучени општините Струмица, Струга, Кавадарци, Куманово и Гостивар.

Резултатите од истражувањето од т.н. студии на пропорционирање на изворите или идентификување на главните извори на аерозагадување според уделот на поедините извори на тоа вкупно аерозагадување, ги престваи проф. Дејан Мираковски, ректор на Универзитетот „Гоце Делчев“.

Идентификувавме шест фактори, главните шест фактори или групи на извори. Тоа е согорувањето на биомаси или согорувањето на дрва во лежиштата, потоа минералната прашина која што е поврзана со извори како што се градежништвото, ресуспензијата на прашина од улиците, емисиите од еолската ерозија со ветерот од сувите површини кои во неа се вегетирани, тоа е минералната прашина. Наредниот значаен фактор беше сообраќајот, тука се вклучени и емисиите од издувните елементи на возилата, но и емисиите од кочници, тркала итн. поради абењето на тие делови. Потоа имаме специфичен извор, тоа е оган на отворено и согорување на отпад којшто за жал го забележуваме насекаде во државата. Беше забележан во првата студија во Скопје, но продолжи во речиси сите градови коишто беа дел од ова истражување. И последното е согорување на нафта и мазут кои што најчесто се користат за загревање на јавните објекти, а дел од индустриските објекти ги користат за производство на топлина или за некои други технолошки процеси, вели ректорот Мираковски.

Тој наведува дека во различни сезони различни се изворите на загадување.

Убедливо најголемо учество ако зборуваме за сите пет града, посебно за Струмица, Кавадарци и Куманово има согорувањето на дрва со најголем дел, некаде околу 30-ина проценти, потоа доаѓаат минералната прашина и сообраќајот во спротивните периоди - согорувањето на дрва во текот на зимските месеци, а сообраќајот и минералната прашина во текот на летните месеци, бидејќи ова се градови во внатрешноста. На пример, Струга има специфично висок сообраќај што е нормално за туристичко место. Другите извори се значително помали. Значи, вкупно овие извори – согорувањето на дрва, согорувањето на отпад на отворено, сообраќајот и минералната прашина, се некаде околу 90 проценти од вкупното учество во загадувањето. И како што кажав, различни сезони, различни извори. Во текот на летото доминираат сообраќајот и минералната површина, во текот на зимските месеци согорувањето на биомаса, вели Мираковски.

Карактеристично, додава тој, е согорувањето на отпад и оган на отворено. Тука се вклучува согорувањето на отпад од земјоделските активности кои се јавуваат во текот на пролетните и во текот на есенските месеци, но се јавуваат емисии и во текот на зимата кога одредени отпадни материи се согоруваат во ложиштата пред се на некои неквалитетни ложишта.

Проблемите со аерозагадувањето лоцирани со ова истражување, Мираковски посочи дека ќе бидат искористени за изработка на планови за квалитет на воздухот. Препораката на научниците за справување со овој проблем е да се направи промена на енергенсите и за пример посочува дека во голем дел од урбаните средини во Европа не се дозволува согорување на какво било цврсто гориво.

За жал, ние имаме проблем со загадување на сите медиуми на животната средина и генерално водите, сега загадувањето на водите се различен проблем од загадување на воздухот, меѓутоа неопходно е и таму систематски да се тргне од управување со тие води, пречистување на отпадните води. Ние имаме многу мал број пречистителни станици, колку што сум јас информиран најголемите градови немаат воопшто пречистителни станици и тоа е еден од проблемите којшто мора да се решава паралелно со воздухот, вели Мираковски.

Првиот заменик претседател на Владата и министер за животна средина и просторно планирање, Изет Меџити потврдува дека состојбата не не е добра со аерозагадувањето, посочува дека се работи интензивно на овој план.

За волја на вистината иако состојбата е лоша секоја година има подобрување во оваа насока, но тоа не е доволно бидејќи тоа е штетно за граѓаните и ризично, така што работиме интензивно на овој план. Како Министерство ќе има посебен сектор за декарбонизација и за климатските промени за чист воздух, работиме и со надворешни организации со добри примери и добри пракси. Мислам дека според сите анализи главниот фактор на загадувањето во Скопје и во урбаните средини во Македонија е тоа што домаќинствата користат се и сешто за греење, така што ќе се трудиме во наредниот период гасификација на Македонија да биде еден од топ приоритетите што ќе нуди и поевтин извор на граѓаните, но воедно ќе придонесе за почист воздух во нашата држава. Тоа е само круцијално, а сигурно дека ќе има и други мерки со коишто ќе излеземе, вели Меџити.

Според него, потребна е целосна гасификација на земјата.

Не, зборев само за една идеја која што може да придонесе драстично да се подобри ситуацијата, но има и лепеза на мерки коишто сите по малку ќе придонесат во таа насока како во здравствениот сектор, во училиштата и во ред други, да се заменат мислам кај што се греат на мазут или на друго да се употребувата помалку штетни како што се еколошките автобуси што треба да ги донираме на Град Скопје. Имаме план да ги поддржиме, има да доставиме и предлог до Влада да се подржат и стимулираат електричните автомобили и сето тоа. Но, воедно треба да се работи и за подигање на свеста сите да работиме и како граѓани и како држава во оваа насока бидејќи само така можеме да постигнеме, вели вицепремиерот и министер за животна средина Меџити прашан кога би можела да почне и колку ќе чини гасификацијата.

Постојаниот претставник на Програмата за развој на Обединетите нации, Армен Григорјан, истакна дека ова е исклучително значаен проект, кој се фокусира на еден од најсериозните предизвици со кои се соочуваме денес – загадувањето на воздухот.

Овој проект служи како пример за тоа како можеме да преминеме од идентификување на изворите на загадување до преземање конкретни чекори за нивно решавање. Се надоврзуваме на успехот на претходниот проект поддржан од УНДП во скопската населба Лисиче, каде ефективно беа финансирани и спроведени конкретни мерки за намалување на аеро-загадувањето. Уверен сум дека овој нов проект ќе го спроведеме со исто ниво на посветеност, обезбедувајќи конкретни акции кои ќе им помогнат на жителите од овие општини да дишат почист воздух, вели Григорјан.

Лабораторијата АМБИКОН при Универзитетот Гоце Делчев, Штип (АМБИКОН, УГД) ја изготви студијата за пропорционирање на изворите на загадување на воздухот урбаните средини во Куманово, Гостивар, Струмица, Кавадарци и Струга. Овој вид студии се една од основните алатки за развивање и спроведување на стратегии и мерки за ублажување на аерозагадувањето, односно имплементација на директивите за квалитет на амбиентен воздух (Директива 2008/50/EC и Директива 2004/107/EC), бидејќи овозможуваат прецизна идентификација на поедините извори на аерозагадување, како и дефинирање на нивниот придонес во вкупното загадување.

Во резултатите добиени врз основа на едногодишен мониторинг и анализа на повеќе од 1000 примероци во сите пет општини, со својот интензитет како најголем извор се издвојува согорувањето на биомаса (дрва) за греење, следено од сообраќајот и минералната прашина, кои имаат значително поголем удел во текот на летните месеци. Во повеќето општини, палењето на стрништата и други отпадни материјали на отворено или во импровизирани котли, имаат исто така значително учество во вкупното загадување. Сепак, согорувањето на дрва, но и отпадни материи во релативно неефикасните и стари печки/котли во текот на зимските месеци, е веројатно главниот извор кој може да се поврзе со појавата на епизодите на екстремно загадување, се наведува во истражувањето.

Проектот „Справување со загадувањето на воздухот“, којшто го спроведува УНДП во партнерство со Министерство за животна средина и просторно планирање, како и општините Куманово, Гостивар, Струмица, Кавадарци и Струга. Проектот е дел од Рамковната програма на УНДП, којашто е финансирана од Шведска, а го вклучува и проектот „Јакнење на општинските капацитети за имплементација на проекти“.

The post Огревното дрво, минералната прашина и сообраќајот, главни извори на загадување во внатрешноста appeared first on Република.

Македонците од општина Пустец годинава не можат да обезбедат огревно дрво. Порано ги обезбедуваше општината во договор со Националната агенција за заштитени подрачја, но сега тоа истата не го дозволува, јави весникот „Македониум“.

Револтот тие го искажале на протест пред општина Пустец, на денот кога се очекувала посетата на директорката на Националната агенција за заштитени подрачја, но таа ја откажала посетата, а жителите биле примени од градоначалникот Пали Колефски.

Ги поддржувам жителите во нивното барање за снабдување со огревно дрва бидејќи тоа е елементарно право. Ние сме планинска област и огревното дрво е незаменливо. Општината од мај направи список на жители за тоа колку огревно дрво ќе им треба за зимата. Барањето го доставивме до Агенцијата за заштитени подрачја. Сметавме дека ќе се реши како и претходните години, изјавил Колефски.

Според него, во изминатите години ова прашање го решавале во договор со Агенција, која прави маркирање на дрвата што може да се сечат, бидејќи станува збор за заштитено подрачје.

Сакаме да одиме да ги купиме дрвата како и досега, но ништо, изјавил Цветко Китани, претседател на месната заедница на село Леска.

Станува збор за околу 800 семејства за кои се потребни до осум илјади кубни метри огревно дрво. Општината чека дозвола од Националната агенција за заштитени подрачја за спроведување на договорот, бидејќи целата територија на општината има статус на национален парк „Преспа”.

The post Македонците од Пустец на протест, бараат огревно дрво appeared first on Република.

Полициски службеници од СВР Битола-ОВР Ресен вчера го лишиле од слобода Б.Н.(75) од село Шурлинци, ресенско. Кај него, во дворното место во село Шурлинци е пронајдена поголема количина огревно дабово дрво, без жиг и испратница.

-Дрвната маса е одземена и предадена на Национални шуми Подружница Ресен, а против лицето ќе биде поднесена соодветна пријава, соопшти МВР

The post Во Ресенско пронајдени бесправно исечени огревни дрва, приведено едно лице appeared first on Република.

Во време на енергетска криза, проследена со инфлација, кога граѓаните бараат алтернатива за затоплување на домовите за претстојниот зимски период, цената на дрвото за огрев кај приватниците достигна до над 5.000 денари за кубен метар. Немајќи механизам во државава за сразмерно покачување на цената, како и за речиси сите други производи, приватниците кои работат со сеча на дрва, ја „искористија“ ситуацијата и вештачки ги „напумпаа“ цените на дрвото за огрев. Владата алармирана за проблемот, презема мерки, но се поставува прашањето дали се соодветни.

Од една страна има апели од Влада за штедење на електрична енергија, од друга страна апели од Министерството за животна средина и просторно планирање „да не се гори што било“ за да не се загадува воздухот, од трета страна нереални цени на дрвото за огрев. Како и во секоја сфера, така и за оваа, на крајот на денот повторно страдаат граѓаните.

Толкава разлика во цената, меѓу понудата од ЈП „Национални шуми“ и онаа на приватниците, не е забележната во текот на изминатите години. Според информациите од граѓаните кои претходните години набавувале дрва од приватници, разликата во цената кај ЈП „Национални шуми“ и приватниците била најмногу 500 денари по кубен метар, што е поприфатливо, но за жал оваа сезона, што е преставена како „најтешката зима, по Втората светска војна“, тоа не е случај.

ЈП „Национални шуми“ нема капацитет да ја задоволи побарувачката за дрва за огрев, а приватниците кои работат со сеча на дрва, дополнително ја „искористија“ ситуацијата, создавајќи вештачка паника за недостиг на дрва и граѓаните ја платија цената.

Штетата за оваа сезона е направена бидејќи речиси 80 проценти од домаќинствата кои користат дрва за огрев, имаат набавено, но она што е важно, со оглед на проекциите за наредната година, кога се очекува продолжување на енергетската криза и инфлација, треба да има навремена реакција за да не се повтори овој случај.

Владата, на седницата што се одржа во средата, на предлог на Министерството за економија, донесе Одлука за определување највисоки цени на огревно дрво од даб и од бука, како и на пелети за огрев.

Највисоките цени на огревното дрво од даб и бука се утврдени во висина до 4.500 денари за просторен метар, односно до 6.429 денари за кубен метар, што претставува уште повисока цена од онаа што ја нудеа приватниците.

Владата донесе Одлука и за престанување на важноста на одлуката за посебни услови во трговијата на мало, со која беше замрзната маржата на огревно дрво од даб и од бука и пелети за огрев за сите трговци во висина најмногу до 10 отсто.

За ситуацијата, од МИА разговарале со директорот на ЈП „Национални шуми“, Валентин Груевски, кој истакнува дека Претпријатието не е во можност да ја задоволи побарувачката за дрва за огрев и оти се соочуваат со недостиг на кадар, што веројатно во текот на следните години и ќе се зголеми.

Тој информира дека од крајот на август во ЈП „Национали шуми“ е зголемена цената на дрвата, на огревното дрво и на техничкото дрво за 20 проценти од она што беше претходно. Истакна дека цената на огревното дрво не била покачена 13 години, од 2009 година.

Моментално на нашите складови цената на просторен метар е 3000 денари плус ДДВ. Тоа е цена утврдена со одлука на управниот одбор и дозволена од Влада. Она што приватниците го купуваат од кај нас, најчесто го купуваат од склад или го купуваат од шумско-камионски пат кадешто цената е поевтина, бидејќи се работи за дрва кои ги купуваат од шума. Тоа е нормално бидејќи треба да однесат луѓе кои треба да товарат, се работи за големи растојанија, голем пат, и да го донесат до крајните потрошувачи. Цената приватнците ја формираат сами плус она што го донесе Владата – 10 отсто маржа во однос на нивните трошоци, наведува Груевски, за МИА.

Тој посочува дека, според информациите кои ги има, цената на дрвата за огрев во Скопје достигнала до 5.000 денари за кубен метар, а во помалите градови до 4.500 денари. Рече дека како ЈП им излегле во пресрет на здруженијата на пензионери кои оваа година ќе се снабдат со дрва по стара цена.

Директорот на ЈП „Национални шуми“ смета повисоката цена на огревното дрво во Скопје се должи на транспортот.

Скопје е голем град, има голема побарувачка, а соодветна шума за задоволување, блиску нема. Во помалите градови како Демир Хисар, како Радовиш, еве и Битола, Ресен се работи за пониски цени бидејќи е помал транспортот и помала е далечината, вели Груевски.

Тој оценува дека е направена непотребна паника дека ќе има недостиг на дрва.

Мислам дека се направи непотребна паника и непотребна нервоза дека дрва ќе нема. Вкупно можам да ви кажам дека оваа година ние ќе имаме повеќе количина на дрва отколку што сме имале минатата година. Тие потреби се тука негде кои во моментов и како Национални шуми заедно со приватицните или операторите кои работат од кај нас можеме да ги произведеме или да ги исечеме. Значи тоа е количеството на дрва и малку се направи непотребна паника дека ќе нема дрва, иако ние континуирано работевме и количината на дрва, според податоците кои ги имаме и во јули и во јуни и во мај по производство е иста количина на дрва, дури и оваа година имаме околу 20.000 кубни мтри поголемо производство на огревно дрво според она што досега го имаме како официјални податоци, потенцира Груевски.

Тој оценува дека за во иднина единствена мерка која што би можела да се преземе е да се регулира маржата или дрвото да се стави на регулиран пазар.

Единствената регулатива што можеби би постоела е тоа да се ограничи маржата или, пак, дрвото би дошло на некаков регулиран пазар, како енергенс, и би добивало цена како нафтата и другите енергенси, како струјата. Се додека е вака и кога сте го ставиле на слободен пазар мислам дека цената ќе зависи од понудата и побарувачката, вели директорот на ЈП „Национални шуми“.

Груевски нагласува дек вештачката паника којашто беше создадена и кај населението и кај дел од медиумите, дека ќе нема дрва, си го направила своето и цената порасна многу високо.

Се создаде непотребна паника, еве доаѓа крајот на годината се сведуваат бројките. Нашето производство ќе биде поголемо отколку минатата година. Ќе имаме 20.000 кубни метри плус огревно дрво. Дрво ќе има доволно, меѓутоа цехот го платија најмногу граѓаните, со зголемената цена, истакнува тој.

Директорот на ЈП „Национални шуми“ нагласува дека мора да се имаат предвид и зголемените трошоци, за транспорт и за работна сила, што го оптоварува процесот за добивање дрва.

Осврнувајќи се на работата на ЈП „Национални шуми“, Груевски истакнува дека граѓаните мора да разберат дека претпријатието нема можности да ги снабди сите кои имаат потреба за дрва.

Тоа би било најдобро да е така, меѓутоа во моментов ние таква можност немаме, не би навлегувал во причините зошто се довело во таа состојба, меѓутоа во моментов е така, вели директорот.

Тој информира дека оние кои се снабдуваат со дрва преку ЈП „Национални шуми“ уште во февруари или март плаќаат за да им стигнат дрвата пред зимската сезона.

Мора да се разбере дека кога ќе платите дрва во февруари, во март не можете да добиете дрва веднаш затоа што е невозможно тогаш да се сече и со текот на времето ги добиваат дрвата. Она што е најголемиот проблем и можеби ќе ни се јавува како проблем во наредните години е недостиг на работа сила. Се помалку има луѓе кои сакаат да работат во шума, кои знаат да сечат шума, кои знаат да вршат дотур и да ги носат. Тоа е еден од поголемите проблеми и според она што ние го гледаме можеби во текот на годините се повеќе би се продлабочувало, бидејќи има се помалку таква работа сега. Истиот проблем го имаат и приватниците и кај нив се јавува голем проблем. Ние имаме цели реони каде што сме ја дале шумата на тендер за сечење, меѓутоа и самите приватници не можат да најдат доволно луѓе и соодветно брзо да ја исечат шумата и да ја донесат онаму каде што им е обврска, дали се работи за техничко дрво, дали се работи за огревно дрво. Значи проблемот со работна сила не е само во „Национални шуми“, туку е на ниво на цела држава, потенцира Груевски.

Пандемијата со корона вирусот, војната во Украина, енергатската криза, предизвикаа огромни последици по економијата, како во другите европски земји, така и кај нас. Јавноста постојано реагира дека со цените на речиси сите производи се врши класично „воено профитерство“, така што она што се очекува се итни, навремени и соодветни мерки од страна на државата со цел што поскоро да се ублажи ситуацијата.

The post Граѓаните изманипулирани, за кубен матар огревно дрво платија по над 5.000 денари appeared first on Република.

Цената на огревното дрво во Србија почна да паѓа. Побарувачката малку се смири, луѓето веќе се подготвија за зимата што ни претстои, па цените на овој вид огревно дрво престанаа да дивеат.

Така, метар топола сега се продава за четири илјади динари односно 2000 денари.

За разлика од Србија, кубик дрво во Македонија чини околу 5400 денари.

The post Кубик дрва во Србија 2000 денари, кај нас 5.400 appeared first on Република.

Европската енергетска криза, предизвикана со намалената испорака на природен гас од Русија за време на војната со Украина, принуди жители на некои европски земји да се свртат кон поевтини извори на греење, како што е огревното дрво, пишуваат дел од светските медиуми.

Бидејќи се зголемува бројот на луѓе кои складираат, цените нагло пораснаа, пријавени се недостиг и кражби и постои страв од влијанието на зголеменото загадување на воздухот и сечата на дрва врз животната средина.

Лидерите на Молдавија се загрижени дека зимата што доаѓа може да биде особено тешка за многумина граѓани поради високите цени на струјата и греењето, затоа што европските цени на природен гас тројно се зголемија во споредба со почетокот на 2021 година и покрај падот од рекордните вредности забележани во август.

Побарувачката за огревно дрво не е ограничена само на посиромашни земји како Молдавија, туку се зголеми и во богатите региони на Европа, наведуваат дел од медиумите.

Државните шуми на Германија, Полска и Чешка имаат многу поголема побарувачка за ограничени количини огревно дрво, што го продаваат во рамки на нивното одржливо стопанисување со шумите.

Германската агенција за статистика објави дека цените за огревно дрво и пелети направени од струготини, што може да се користат за централно греење, се зголемени за над 85 отсто во август во однос на година дена претходно.

Растат цените на огревното дрво и во Велика Британија.

Чешките државни шуми, што продаваат дрва само за домашна потрошувачка, мораа да ја ограничат количината на огревно дрво што се продава на поединци, со цел да спречат шпекулативни набавки.

Побарувачката за ситно огревно дрво од државните шуми во Полска порасна за 46 проценти, а за големо огревно дрво за 42 отсто до крајот на август во однос на годината претходно.

The post Зголемени цените на огревно дрво поради енергетската криза во Европа appeared first on Република.

Неизвесноста и стравот од можни рестрикции на струја поради енергетската криза ги натера граѓаните спас да бараат во огревното дрво. Но, поради лошото менаџирање и неспособноста на владата на СДС, огревно дрво нема ни за лек.

ЈП Македонски шуми оваа година нема ниту 20 проценти реализација на исечено огревно дрво потребно за задоволување на домашната потрошувачка. Во услови на енергетската криза кога се повеќе домаќинства кои што се грееле на струја, се ориентираат кон греење на дрва, Македонски шуми немаат доволни количини со овој енергенс.

Граѓаните наместо да бидат услужени во подружниците на ЈП Македонски шуми се препраќаат кај приватните стоваришта. Дека станува збор за смислено сценарио, односно за префрлање на големи профити кај приватни лица, наместо во ЈП Македонски шуми говори фактот што во време на ВМРО-ДПМНЕ реализацијата на годишната сеча се движела до 90 проценти, а само околу 10 проценти од потребите биле задоволувани од страна на приватните стоваришта. За разлика од сега, кога реализацијата е само над 20тина проценти.

The post Трипуновски: Огревното дрво е скапо поради слабата реализација на ЈП Македонски шуми, дали власта свесно го полни џебот на приватните стоваришта appeared first on Република.

За да се запре драстичното зголемување на цените на огревното дрво и пелетите, Грција планира да воведе плафон на профитната маржа, како што е веќе пракса и за други производи, јави дописничката на МИА од Атина.

Министерот за развој и инвестиции на Грција Адонис Георгиадис, говорејќи за грчката телевизија „Скај“ рече дека постои зголемување на цените на дрвото и пелетите во споредба со лани и „логично е да постои поради војната во Украина и енергетската криза, но не е логично да има толку големи зголемувања“.

За да го спречиме ова, ќе спроведеме плафон на профитната маржа како што правиме за храната и разни други производи. Со службите на Министерството разговараме кој референтен месец ќе го одредиме, рече Георгиадис.

Портпаролот на грчката Влада Јанис Иконому на денешниот редовен брифинг со новинарите рече дека воведувањето плафон на цените за огревното дрво и пелетите е дел од нивниот план и нивната стратегија, а конкретните детали ќе ги соопшти надлежното Министерство за развој.

The post Грција ќе воведе плафон на профитната маржа за огревното дрво и пелетите appeared first on Република.

Управниот одбор на ЈП „Национални шуми“ го објави новиот ценовник за купување на огревно дрво, откако Владата го прифати на минатонеделната седница. Според истиот, цените се зголемени за 20 отсто во однос на претходните кои не се променети од 2009, пренесува Фактор.

Најскапото и најквалитетното дрво - она од даб, се зголемува од 2.900 денари на 3.564 денари по кубен метар.

Во Ценовникот поскапени се и другите огревни дрва - буката е 3.444 денари, јаворот е 3.204, тополата е 3.084 денари по кубик, итн.

Одлуката следува откако месецов Владата се реши за определување највисоката трговска маржа на 10 отсто како посебен услов во трговијата за: огревно дрво од даб; огревно дрво од бука и пелети за огрев. Истовремено забранет е и извозот на овие производи.

Поскапувањето следува иако во годишниот финансиски извештај на јавното претпријатие за 2021 е евидентирана добивка од 100 милиони денари.

The post По 13 години за 20 проценти поскапе огревното дрво на „Национални шуми“ appeared first on Република.

На предлог на Министерството за економија Владата на денешната седница донесе две одлуки за ограничување на извозот на одредени производи и одлука за укинување на царината за увоз на сончогледово масло за јадење.

Овие одлуки се донесени со цел со цел се избегнат шпекулативни дејствија на трговците и производителите и за заштита на домашното производство, домашниот пазар и граѓаните и да се одржува снабдувањето на домашниот пазар од растот на цените, објави министерот за економија Крешник Бектеши.

За да се спречат сериозни пореметувања на пазарот во земјата,  кои може да настанат со извоз на пченица и брашно од земјата, Владата донесе одлука до крајот на годината, односно до 31.12.2022 година да се ограничи извозот на пченица и наполица и брашно од пченица и наполица.

Во  услови на економската криза предизвикана од воените случувања во Украина и пореметувањата на светскиот пазар на пченица на кој се јавува сериозен недостиг на пченица, потребно е да се превенираат евентуалните дополнителни нарушувања на пазарот во земјата кај овие основни прехранбени производи, неопходни за исхрана на населението.

Исто така на предлог на Министерството за економија на денешната владина седница беше донесена одлука за ограничување на извозот на огревно дрво и пелети до крајот на годината, односно до 31.12.2022 година.

Оваа одлука за привремено ограничување на  извозот на огревно и необработено дрво и пелети е донесена  со цел да се спречат и избегнат последиците предизвикани од зголемената побарувачка на населението за огревно дрво предизвикана од енергетската криза на светскиот пазар.

Одлука за привремена забрана на извозот на одредени дрвни сортименти неодамна имаат донесено владите Србија, Босна и Херцеговина и Црна Гора.

Исто така на предлог на Министерството за економија, со консултација на Министерството за земјоделство, шумарство и водостопанство, Владата повторно донесе одлука за укинување на увозната давачка - царинската стапка за увоз на масло од сончоглед за јадење поради потребата да се одржува снабдувањето на домашниот пазар од растот на цените.

Оваа одлука ќе важи до 31.12.2022 година. Ваква одлука се применуваше до 31 мај 2022 година. Имено, редовната царинска стапка на маслото од сончоглед за јадење е маx 29%, така да со оваа мерка се дава можност на увоз од други земји за кои нема преференцијален третман во трговијата или се предмет на мала безцаринска квота во рамки на договорите за слободна трговија.

The post Забранет извозот на огревно дрво, пелети и пченица и брашно, укината царината за увоз на масло за јадење appeared first on Република.

Македонија е на прагот на нов бран поскапувања и севкупно осиромашување на населението. Огревното дрво пред почетокот на следната грејна сезона ќе поскапи за 20 отсто, а пелетите веќе се продаваат по речиси 50 отсто повисока цена, реагираат од Левица.

Во продолжение ја пренесуваме реакцијата:

Цената на еден кубен метар дабово дрво во приватните складови достигнува и до 5000 денари.

 

Најупотребуваниот енергенс во Македонија што го ползуваат околу 71% од граѓаните станува се потешко достапен, особено за најсиромашните слоеви.

 

Големата побарувачка за овој вид енергенс на светскиот пазар, како и зголемениот постојан и неплански извоз придонесе цената на огревното дрво и пелетите континуирано да расте, а голем дел од складовите за огревни дрва во Македонија да зјаат празни.

 

Министерството за земјоделие како директно надлежна установа за стопанисување со дрвната маса се уште е без стратегија, и покрај тешките околности.

 

Во надлежност на Mинистерството е и издавањето Одобренија за извоз на трупци, огревно дрво и други производи од дрво, но на нивната веб страница нема официјални податоци за вкупниот број извезени трупци од Македонија.

 

Во услови кога Балканските земји со конкретни мерки се подговуваат за претстојната грејна сезона, министерот Љупчо Николовски се однесува како англиска кралица.

 

Атер не крши, работа не врши, а дрва за огрев се помалку.

 

Додека Србија и Босна и Херцеговина во мај и јуни воведоа забрана за извоз на пелети и огревно дрво за наредните шест месеци, македонските шуми се пустошат со легални сечи, a еден дел од оваа дрвна маса се извезува во соседните земји.

 

Фирмите извозници и Државата тријат раце од профитот, додека на граѓаните им претстои скапа и крајно неизвесна грејна сезона.

 

Инаку, сите правни лица кои се регистрирани со општа клаузула за бизнис согласно законските нормативи може да извезуваат техничко, огревно дрво и целулозно дрво.

 

Политичката партија „Левица„ ИТНО бара од Министерот Николовски воведување:

 

- ВРЕМЕНА ЗАБРАНА за извоз на огревно дрво со цел да се намали недостатокот на дрвна маса што директно се одрази и на производителите на пелети.

 

Најголем дел од нив веќе најавија и второ зимско покачување на цената на овој вид енергенс поради увозната зависност.

 

- Енергетско преструктурирање на друг вид енергенси, а не само на огревното дрво, a со тоа ќе се намали и самата побарувачка, како и екстремното загадување на воздухот во текот на зимскиот период.

 

- Информирање на јавноста за тоа колку тони дрвна маса месечно се извезува во други земји.

 

Ваквите мерки се единствено решение за ублажување на кризата што и се заканува на Република Македонија, а огревот, храната и обувките спаѓаат во основните добра за живот.

 

Да напоменеме дека Државата најголем дел од дрвната маса пред забраната ja увезуваше од Србија и Босна и Херцеговина.

The post Левица бара итна забрана на извозот на огревно дрво appeared first on Република.

Полицијата лишила од слобода четворица жители на радовишкото село Калаузлија затоа што агресивно се однесувале кон полицајците и ги спречувале да им одземат бесправно исечени огревни дрва. Како што соопштија од СВР Струмица, вчера во 23:30 часот полициски службеници од Одделението за внатрешни работи Радовиш ги лишиле од слобода А.М.(61), С.М.(29), Ј.С.(30) и Џ.Ј.(40), сите од село Калаузлија, откако во дворно место на Ш.М. во селото биле пронајдени огревните дрва.

Покрај приведените уште неколку други лица учествувале во настанот и тие физички ги нападнале полициските службеници, се додава во информацијата од овој сектор на МВР.

Одделението за внатрешни работи Радовиш презема мерки за утврдување на идентитетот на сите учесници во настанот, по што против лицата ќе бидат поднесени соодветни пријави по членови од Кривичниот закон.

Пред неколку дена сличен инцидент имаше и во Струмица:

https://republika.mk/vesti/crna-hronika/haos-vo-strumica-policijata-zapleni-roba-a-prodavachite-im-ja-grabaat-od-voziloto/

The post Нов напад врз полицајци кои се обиделе да конфискуваат бесправно стекната роба, овојпат за дрва appeared first on Република.