Со изложбата „Француските уметници од колекцијата на Остен музејот“ денеска ќе биде затворена прославата на 50 годишнината на Францускиот институт во Скопје.

Изложбата ќе ја отворат Кристоф Ле Риголер, амбасадор на Франција во државава и Маја Неделкоска-Брзанова, директорка на Националната галерија.

Остен музејот има значителна колекција со повеќе од 15000 уметнички дела од 3000 уметници од над 80 земји (слики, цртежи, графики, скулптури, предмети, како и керамики). Делата во Остен музејот се поделени во национални колекции, од кои француската колекција е меѓу најзначајните и најбројните со близу 200 француски уметници меѓу кои освен големите мајстори како Анри Матис, се и уметници од модерната и современата уметност како Пјер Сулаж – добитник на ГРАН ПРИ за животно остварување на ОСТЕН БИЕНАЛЕ Скопје 2018, како и уметници од разни делови на Европа и светот кои поголемиот дел од живот и кариерата ги изградиле во Франција како Пабло Пикасо или Виктор Вазарели, се вели во соопштението од Францускиот институт во Скопје.

The post Вечерва се затвора одбележувањето на 50-годишнината на Францускиот инстутут во Скопје со изложба на познати француски уметници appeared first on Република.

Во Тетово денеска беше одбележана 80-годишнината од настаните во 1944 година кога загинале и се убиени 19 тетовски партизани. Седумнаесет од нив се убиени во злосторството во мавровското село Беличица, а двајца партизани Андреа Христоски – Шварц и Младен Симоски – Требош, кои биле заробени два дена подоцна, на 21 септември, се стрелани во дворот од црквата „Свети Никола“ во Тетово.

Одбележувањето денеска се одржа во дворот од црквата „Свети Никола“ во Тетово каде се наоѓа и нивното спомен-обележје, пред кое секоја година се оддава почит на жртвите дадени за ослободување од фашистичката окупација. Денес беше извршена и панихида.

Еве и денеска, на овој ден на Мала Богородица, 21 септември 2024, се собравме како другите минати години, да се потсетиме и да им одададеме почит на Младен Симоски-Требош и Андреа Христовски- Шварц, борци на Третиот Тетовски партизаиски одред, кои на овој датум беа стрелани од страна на балистите на ова место. Сретен Тофилоски, кој имаше девет прострелни рани добиени во село Беличица, беше ослободен од тогашниот командант на балистите со зборовите: „Овој ѓаур куршум не го тепа. Да се однесе на лечење, па да се докрајчи после, посочи во пригодното обраќање и историски час, Јовица Тофиловски.

Тој потсети и на случувањата од 19 септември 1944 година во село Беличица, Гостиварско.

Борците на Третиот тетовски партизански одред, направија се што беше во нивна моќ за да го одбранат селото од фашистичко-балистичкото насилство. И повеќе од тоа. Се жртвуваа себе си. Ги дадоа своите млади животи спротиставувајќи му се на далеку помногубројниот и подобро вооружен непријател повеќе од шестчасовна борба. И покрај тоа тие им нанеле големи загуби. На бојното поле останаа и животите кои ги положија храбрите момчиња. Тројца партизани беа ранети, а четворица заробени. На боиштето еден покрај друг лежеа работник, земјоделец ученик, Македонец, Албанец, Србин, двајца браќа, нивната сестра, неразделни другари од детството и соученици од тетовските училишта, посочи во пригодното обраќање Јовица Тофиловски.

Организаторите од Сојузот на борци на Народноослободителната и антифашистичка војна на Македонија и граѓаните продолжувачи од Тетово со порака, граѓаните повеќе да ги почитуваат жртвите дадени од македонскиот народ во Втората светска војна.

Иако се бореа и ги дадоа својот живот за слободата на нашата држава, мислам дека во целост не ја исполнивме нивната цел, нивната оставнина да си ја чуваме нашата држава со сите наши нишани што ги имавме. Поготово, во Тетово во нашиот град, немаме никаква соработка со Општината Тетово. За ниедно чествување, за ниеден празник не ни се излезени во пресрет и остава една горчина за сите нас кои сме следбеници на залогот што го оставија починатите. Би сакала младите, учениците, настојуваме како Општинска организација на Сојуз на борци сите празници кои ни се оставени во аманет да ги испочитуваме и сограѓаните наши да бидат присустни во што е можно поголем број, истакна Лилјана Симовска, претседател на тетовската општинска организација на Сојузот на борците.

Во 1944 година животите ги загубија народните херои Тодор Циповски-Мерџан и Ѓоце Сгојчевски-Амбарче, како и Христо Антевски, Александар Здравковски, Трпе Јовановски-Мишка, Александар Јовановски-Журчин, Борче Кочовски, Љубомир Момировски, Пано Симоски, Саво Тасевски, Благоја Тоскоски-Тоска, сите од Тетово. Загинат е и Мурат Бафтијари од Вејце, двајцата браќа и сестра Драгомир, Љубомир и Љубица Стефановиќ, Боро Вулиќ, Владимир Јањиќ, Михаило Рајчевиќ и Андреа Стојановиќ сите од Брвеница. Во Беличица се убиени и 17 жителите, меѓу кои жени и деца.

The post Одбележани 80 години од загинувањето на 17 тетовски партизани во мавровското село Беличица и стрелањето на двајца во Тетово appeared first on Република.

Да го следиме примерот на Гонџа која го менуваше светот. Само така ќе обезбедиме иднина за сите, рече денеска Премиерот Христијан Мицкоски во обраќањето на манифестацијата „Светлината на Гонџа“ кадешто се одбележуваше роденденот на Гонџа Бојаџиу - Мајка Тереза.

Денес Мајка Тереза му припаѓа на светот. Нејзиниот живот не познаваше граници, ниту разлики и таа обединуваше различни култури, различни луѓе и народи. Таа е и најдобриот мост на поврзување денес и во местото од каде потекнува Скопје. Таа е нишката која ги поврзува Македонците, Албанците и сите кои живееле на овие простори, но и пример кога срце полно со љубов е спремно за големи подвизи и победа над сите предрасуди и препреки.Да извлечеме поуки од оваа голема Скопјанка и хуманиска, да се почитуваме едни со други, да споделуваме грижа, да ги помагаме обесправените, угнетените и сиромашните, кажа Мицкоски во своето обраќање.

Гонџа Агнес Бојаџиу е родена на денешен ден 1910 година, на тогашната улица „Поп Кочина” број 14, што се наоѓала на сегашниот плоштад Македонија.

Мајка Тереза често велеше „Сепак, не јас, туку Христос живее во мене“. Таа претставува синоним за сето добро, благородно, чесно за тоа како од срце искрено се помага на оние на кои помошта им е најмногу потребна. Таа беше често именувана како светица на сиромаштијата и сиот свој живот им го посветила на невините жртви на насилството, на оние кои умираа низ улиците, на болните од лепра и од сида. Таа живееше едноставно, како за време на животот, така и по нејзината смрт – остана синоним за доброто во светот. За Мајка Тереза стана добитник на бројни признанија и награди за исклучително хумано ангажирање во згрижувањето на најсиромашните од сиромашните, поради што ја доби и Нобеловата награда за мир.

Таа почина на 5 септември 1997 година, во Куќата на милосрдието што таа ја основа во Калкута. Крајот на животниот пат на еден од најголемите алтруисти на столетието ги трогна сите, најмногу оние кои ги почувствувале хуманоста и бенефициите од нејзините активности – гладните, бездомниците и болните. Таа беше скопјанка која поголемиот дел од животот го помина во Индија, во земјата која е втора по бројот на жители во светот и седма по географска големина чиј главен град е Њу Делхи. Како дом на прастарата цивилизација на индиската долина и област на историските трговски патишта и пространите империи, индискиот потконтинент бил идентификуван со своите комерцијални и културни богатства во поголемиот дел од својата долга историја.

The post Мицкоски: Да го следиме примерот на Гонџа која го менуваше светот, само така ќе обезбедиме иднина за сите appeared first on Република.

Во Центарот за обука на вода во Охрид, денеска со почеток во 10.00 часот, во присуство на највисокиот воен и државен врв ќе се одржи централната свеченост по повод 18 Август – Денот на Армијата и 32 години од нејзиното формирање.

На присутните ќе им се обратат претседателката Гордана Сиљановска Давкова и министерот за одбрана Владо Мисајловски.

На свеченоста ќе се изврши и церемонија на примопредавање на должност началник на генералштабот на Армијата како и обраќања на досегашниот началник на генералштабот, генерал-потполковник Васко Ѓурчиновски и новопоставениот началник на генералштабот, генерал-мајор Сашко Лафчиски, соопштија од Министерството за одбрана.

На свеченоста се поканети премиерот Христијан Мицкоски, министри во Владата, пратеници во Собранието, поранешни министри за одбрана и началници на генералштабот, пензионирани генерали, високи гости од повеќе институции во Републиката, командантот на националната гарда на Вермонт, генерал-мајор Грегори Најт, дипломатскиот кор во Република Македонија...

Одбележување на 18 август - Денот на македонската Армија почна во петокот (16 август) со традиционален свечен собир на вработените во Генералштабот и Министерството на платото пред Министерството за одбрана и Генералштабот, а со воени церемонии празникот се одбележа и во командите и единиците на Армијата во сите касарни во Републиката.

По повод Денот на Армијата синоќа во скопската касарна „Илинден“ беше извршена почесна артилериска стрелба со истрелување на 10 плотуни од артилериски орудија од состав на артилерискиот баталјон на Армијата.

За роденден на Армијата е избран 18 август, денот кога во 1943 година на Славеј Планина бил формиран баталјонот „Мирче Ацев", кој се смета за првата организирана воена формација на НОВ на Македонија. Процесот за формирање на современата македонска Армија, пак, започна во 1992 година, кога тогашниот претседател Киро Глигоров, со раководството на ЈНА го потпиша договорот за дислокација на федералната армија од територијата на Република Македонија.

Македонската Армија денес е составен дел од најголемиот колективен безбедносен систем откако Република  Македонија во март 2020 година стана 30 полноправна членка на НАТО.

Македонија во државниот Буџет за 2024 година за потребите на одбраната има предвидено 263 милиони долари, што претставува 2,22 отсто од БДП на земјата, се посочува во најновиот извештај на НАТО за одбранбените трошоци на земјите членки.

Согласно дефинициите на НАТО, како трошоци за одбраната се сметаат исплатите направени од страна на националните влади за потребите на своите вооружени сили, на сојузниците или на Алијансата. Во расходите за одбрана, меѓу останатите, се вклучени и трошоците за други сили финансирани преку буџетите на други министерства, покрај оние од Министерството за одбрана, како и средствата директно исплатени од државата за пензии на воените лица и цивилите што биле вработени во воените структури, за мировни и хуманитарни операции, за уништување на оружје, опрема и муниција и за истражување и развој.

Од вкупните трошоци на Македонија за одбраната најголем процент или 43,9 отсто се наменети за плати на воениот персонал, по што следуваат 29,3 проценти за набавка на опрема, истражување и развој, 23 отсто за операции и одржување и други расходи и 3,8 проценти за инфраструктура. Сличен сооднос на распределбата на средствата има кај повеќето членки на НАТО, со исклучок на Португалија, Бугарија, Хрватска и Белгија, каде над 50 проценти од трошоците се наменети за воениот персонал, Полска, Унгарија, Финска и Луксембург каде над 40 отсто се за опрема, истражување и развој и Шведска, САД и Данска кои над 40 отсто од средствата ги предвиделе за операции и одржување.

Во периодот 2014-2024 година, земјава бележи раст на трошоците за одбрана за 148,87 отсто од 106 милиони долари во 2014 на 263 милиони долари годинава. Во 2014 година трошоците за одбрана изнесувале 1,09 отсто од БДП, за сега да достигнат до 2,22 проценти.

Претставничка на САД во Алијансата, Џулијан Смит во интервју за МИА изрази благодарност на Македонија за одвојувањето на два проценти од БДП за одбраната

Навистина да ѝ се заблагодарам на  Македонија. Ова е земја што донесе навистина тешки одлуки за да го достигне прагот од два проценти од БДП за одбраната. Македонија е сега над прагот, над два процента и ги поздравуваме тие напори и сите земји што го направија тоа, нагласи Смит.

Таа најави дека веројатно следната седмица НАТО ќе објави нов извештај за споделување на товарот, кој ќе покаже дека околу две третини од членките на Алијансата сега трошат над два проценти од БДП за одбрана, што според неа, е важно бидејќи значи дека сојузниците можат да ги исполнат своите обврски.

The post Армијата одбележува 32 години постоење appeared first on Република.

Со низа свечености и манифестации под слоганот „Борбата трае“ денеска ќе биде одбележана 121 година од Илинденското востание и Крушевската Република и 80 години од Првото заседание на АСНОМ. Централната манифестација за одбележување на Илинден - Денот на Републиката ќе се одржи во Крушево на Гумење и на месноста Мечкин Камен, каде ќе има обраќање премиерот Христијан Мицкоски, кој претходно ќе положи цвеќе на гробот на Никола Карев, на споменикот Слива и на Мечкин Камен.

Претседателката Гордана Сиљановска Давкова ќе има свое обраќање на манифестацијата во Пелинце, каде ќе положи цвеќе пред Меморијалниот центар на АСНОМ и ќе ја посети спомен собата во Меморијалниот центар. Во рамки на чествувањето ќе настапи ансамблот за народни игри и песни „Танец”. Потоа заедно со српскиот колега Александар Вучиќ, Сиљановска Давкова ќе го посети манастирот „Свети Прохор Пчињски“ каде се одржало Првото заседание на АСНОМ. Двајцата претседатели на пладне заеднички ќе имаат обиколка на црквата во манастирскиот комлекс, по што ќе одржат состанок, а потоа ќе имаат обраќање пред медиумите и присутните гости.

Во состав на државно-црковната делегација на чествувањето во манастирот „Св. Прохор Пчински“ се и потпретседателката на Собранието Весна Бендевска, вицепремиерот и министер за односи меѓу заедниците Иван Стоилковиќ, македонскиот амбасадор во Белград Никола Тупанчески, претставниците од Сојузот на борци, Наум Буревски и Снежана Несторовска и Митрополит Кумановско-осоговски Григориј.

Претседателот на Собранието Африм Гаши, пак, ќе положи цвеќе пред споменикот на претседателот на президиумот на АСНОМ, Методија Андонов Ченто на плоштадот „Македонија“ во Скопје и ќе има свое обраќање на манифестацијата по овој повод која ќе се одржи пред зградата на Собранието. На истите локации цвеќе ќе положи и партиска делегација на СДСМ предводена од претседателот Венко Филипче.

Цвеќе пред спомен обележјата во Крушево, Пелинце и Скопје ќе положат и собраниски делегации и делегации од Кабинетот на претседателот.

Чествувањето на 121 година од Илинденското востание и Крушевската Република со низа свечености почна вчера во Крушево кога делегации ја посетија Спомен куќата на Смилевскиот конгрес и споменикот на Дамјан Груев, а попладнето во центарот на Крушево, пред црквата „Свети Никола“ беа пречекани коњаниците од цела Македонија. Воедно беше отворена манифестацијата „10 дена Крушевска Република“ со читање на Крушевскиот манифест и подигање на бајракот на Крушевската Република.

The post (ВО ЖИВО ОД КРУШЕВО): Борбата трае: Одбележување на Илинден во Крушево, Пелинце и Скопје appeared first on Република.

Македонските писатели и поети Стефан Марковски, Санде Стојчевски и Марина Мијаковска ќе учествуваат во првото во рамките на македонската литература одбележување на Денот на европските автори на 25 март, кое годинава ќе се случи во 40 земји кои се дел од програмата „Креативна Европа“.

Денот на европските автори го организира најголемата европска писателска федерација – Европскиот писателски совет.

Во склоп на одбележувањето се предвидени литературни читања, предавања и книжевни разговори во средните училишта ширум Европа.

Марковски, Стојчевски и Мијаковска ќе го одбележат Денот на европските автори во средните училишта СОУ „Јосиф Јосифовски“ во Гевгелија и СУГС Гимназија „Раде Јовчевски-Корчагин“ во Скопје, во присуство на ученици и нивни професори по македонски јазик и литература.

Во рамки на одбележувањето македонските писатели ќе читаат извадоци од своите дела „Светлината во нашите вени“ (Марковски), „Нè чека пат“ (Стојчевски), како и „Коскена“, „Постела на тишината“ и „Тиркиз во лето“ (Мијаковска).

Друштвото на писателите на Македонија е член на Европскиот писателски совет од минатата година.

The post Прво одбележување на Денот на европските автори со Стефан Марковски, Санде Стојчевски и Марина Мијаковска appeared first on Република.

Да не се заборави за никогаш да не се повтори. Македонија им оддава почит на 7.144 Евреи кои на денешен ден во 1943 година од тогашниот бугарски окупатор биле собирани за да се транспортираат на пат кон концентрациониот логор на смртта Треблинка од каде никогаш не се вратиле.

За извршување на ова масовно злосторство тајните агенти и полицијата неколку дена вршеле обемни подготовки. Недвижните имоти на Евреите бил конфискувани, а покуќнината ограбена.

Откако сите Евреи, од Скопје, Битола, Велес, Штип и од други места, биле собрани во Монополот во Скопје, на 22 март биле транспортирани во германскиот фашистички логор „Треблинка“ на територијата на Полска.

Еврејската заедница во Македонија и фондот на холокаустот на евреите од Македонија денеска одбележуваат 81 година од холокаустот.

Централната комеморативна активност ќе се одржи со оддавање почит пред Споменикот на 7144 депортирани Евреи од земјава во скопскиот Монопол. Како што е најавено, цвеќе ќе положат и ќе се обратат претседателот Стево Пендаровски, техничкиот премиер Талат Џафери, претседателот на ЕЗРМ Пепо Леви и амбасадорката на Израел во нашата држава Симона Франкел.

The post На денешен ден Бугарскиот окупатор почнал со собирање на 7.144 Евреи од Македонија, кои биле однесени во логорот на смртта appeared first on Република.

По традиција, во духот на македонските обичаи и традиција, Македонците во Албанија, посебно во Мала Преспа, го одбележуваат празникот Свети Василиј Велики, со кој се означува почетокот на Новата година, според јулијанскиот календар.

Заедно со Македонците во Леска беше и Васил Стерјовски, лидер на единствената македонска партија, Македонска алијанса за европска интеграција, МАЕИ.

Ја продолжуваме традицијата наследена од дедовци и прадедовци, како во Мала Преспа, така и во Голо Брдо, Врбник, каде синоќа се палеа василичарски огнови, се пиеше вино и топла ракија, се пееја песни и се виеше македонско оро. Од свое и од име на партијата честита православна Нова година, со најдобри желби за здравје и живот, мир и љубов, среќа, радост и благосостојба, порача Стерјовски, кој како и другите верници, во селската црква денеска запали свеќа за здравје.

Тој за МИА, објасни дека во секое македонско семејство ширум Албанија, домаќинките денеска подготвуваат пита или како што ја нарекуваат мазник со паричка и оти се верува дека на оној кому ќе му се падне, во текот на годината ќе му се случуваат убави нешта.

Честитка по повод православна Нова година до сите Македонци во Албанија, во матичната земја и дијаспората, со желби за здравје, среќа, благосостојба и продолжување на традициите за овој и сите други божји празници, упати и македонското друштво „Илинден“-Тирана и огранокот за Голо Брдо.

Според Панди Јани, македонски активист од Пустец, поголема група Македонци од Пустец вчера биле на одбележувањето во Дебрца, на покана на ВМРО-ДПМНЕ.

Овој настан и средба се во знак на единство и просперитет. ВМРО-ДПМНЕ продолжува да гради и ја поддржува нашата заедница со почит кон традициите и нашите вредности. Соединети ги прославуваме сите наши празници со радост и единство, рече Панди Јани за МИА.

Тој до сите Македонци, каде и да се во светот, упати честитки и за празниците што претстојат, со желби за здравје и благосостојба.

The post Македонците во Албанија ја одбележуваат православна Нова година, дел од нив беа и во Дебрца appeared first on Република.

Во Македонија денеска се одбележува 23 Октомври, Денот на македонската револуционерна борба. На овој ден во 1893 година во Солун била основана Внатрешната Македонско-Одринска Револуционерна Организација (ВМОРО), со цел извојување автономија на Македонија преку револуционерна борба.

Врвна точка на дејноста на ВМОРО е организирањето на Илинденското востание во 1903 година во Македонија и на Преображенското востание во Одринска Тракија.

Основите на Организацијата се поставени на 5 ноември 1893 година (23 октомври – според стариот календар) во куќата на книжарот Иван Хаџи Николов во Солун. На основачкиот состанок присуствуваат: Д-р Христо Татарчев – лекар, родум од Ресен, Даме Груев – учител, родум од с. Смилево – Битолско, Петар Поп Арсов – учител, родум од с. Богомила – Велешко, Иван Хаџи Николов – книжар во Солун, родум од Кукуш, Антон Димитров – учител, родум од с. Ајватово – Солунско и Христо Батанџиев – учител, родум од с. Гуменџа, Ениџе Вардарско.

Основачите почнуваат да ги шират овие револуционерни идеи меѓу прогресивната младина во Солунската бугарска машка гимназија.

Набргу учениците во гимназијата создаваат кружоци, конспиративни групи и др. По завршувањето одат по своите родни места и таму почнуваат да агитираат.

Младите студенти и нивните професори стануваат стожерот, односно движечката сила на македонската револуција. Емисарите вршат обиколки по селата во Македонија и Одринска Тракија и формираат месни комитети.

Откако на овој начин се формирала структурата на организацијата, се започнало со процесот на создавање вооружени чети и почнале набавки на оружје по илегални канали од Бугарија и Грција.

По повод Денот на македонската револуционерна борба, во Собранието на Република Македонија ќе биде доделена државната награда „23 октомври“. Наградата се доделува за долгогодишни остварувања во областа на науката, културата, образованието, заштитата на државните интереси и промоција на државните приоритети, вредности и културно-историското наследство од јавен интерес на Република Македонија.

Собраниска делегација, во состав Дарко Каевски и Велика Стојкова-Серафимовска, ќе положи венец свежо цвеќе на Споменикот на Гоце Делчев во Градскиот парк во Скопје.

Ввладина делегација составена од Роберт Алаѓозоски, национален координатор за интеркултурализам, едно општество, развој на културата и меѓуресорска соработка и Драган Василевски, советник за одбрана на претседателот на Владата ќе положи цвеќе на споменикот на Гоце Делчев во Градскиот парк во Скопје.

Во организација на Патриотскиот институт „Гоце Делчев" на ВМРО-ДПМНЕ по повод 23 Октомври - Денот на Македонската револуционерна борба и 130 години ВМРО, ќе се одржи настан „Традиција која обврзува за иднина која доаѓа“. Најавени се обраќања на претседателот на ВМРО-ДПМНЕ, Христијан Мицкоски, како и на претседателот на Патриотскиот институт, Александар Пандов.

The post Македонија го слави Денот на македонската револуционерна борба appeared first on Република.

Младите да се вклучат во различни активности наменети за нив, креативно да се изразуваат и делуваат и да учествуваат во процесите на донесување одлуки. Ова беше во фокусот на вчерашниот настан по повод Меѓународниот ден на младите, (11 август), што се одржа во градскиот парк – Школка. Настанот беше организиран од, Канцеларијата на Фондот за население на Обединетите нации  (УНФПА) и (МОФ) во партнерство со Агенцијата за млади и спорт (АМС), Програмата за развој на Обединети нации (УНДП), Мисијата на ОБСЕ во Скопје и Активноста на УСАИД за млади кои активно создаваат можности.

„Младите ја олицетворуваат суштината на иновацијата, бестрашно уриваат бариери за редифинирање на иднината. Вашиот незадржлив жар ве омоќува да ги предизвикате нормите, да ја насочите социјалната промена и технолошки напредок кој го одредуваат патот кон одржлив развој на човекото општество. Сите ние имаме обврска да создадеме простор и можност за младите да ги остварат своите потреби, соништа и амбиции“, истакна Моника Сандри, Привремен вршител на работата Постојан координатор на Обединетите нации, која се обрати веднаш по краткиот музички вовед со звуците од хармоника на младиот Алдин Мурати.

„Денот на младите нека биде потсетник дека 364 денови работиме за младите, им даваме шанса на млади и ве охрабруваме да бидете гласни, да ние институциите го слушнеме вашиот глас, да сте слободни во тоа што го правите и преку креативниот порив заедно да изградиме прогресивно општество по ваша мерка“, посочи директорот на Агенцијата за млади и спорт, Наумче Мојскоски.

Околу 100тина  млади лицна присутни во Градскиот парк имаа можност да се запознаат и со процесот на изработка на Националната стратегија за млади 2023-2027, преку кратка презентација од страна на Гордана Цекова од Агенцијата за млади и спорт. Цекова истакна дека се работи на акциски план кој моментно е во Владина процедура, а се очекува да биде усвоен во септември.

На настанот се додели и Наградата за младинско учество која препознава иницијативи на млади, неформални групи на млади и младински организации, организации за млади и чадор младински организации кои покажуваат во три категории: јасна визија за подобрување на заедницата кои се системски и одржливи во решавањето на приоритетните општествени прашања; исклучителна креативност, иновативност и лидерство во дефинирањето и решавањето на општествени прашања; и носат мерливи резултати во подобрувањето на заедницата или благосостојбата на општеството преку активностите на номинираниот.

Во индивидуалната категорија за млади, добитник на наградата е Гоше Николов, младински активист и креактор зад содржината на Инстаграм платформата „Студентарија“, кој истакна дека ако со едно меме можеме да предизвикаме реакција, тогаш замислете што може да се случи со сите средства што стојат на располагање за младите.

Во категоријата на неформални групи на млади, добитниците на наградата се Училишниот спортски клуб ДСУ за рехабилитација и образование „Св. Наум Охридски“, кои истакнаа дека ќе продолжат со нивната цел, а тоа е вклучување на повеќе ученици со посебни потреби во спортот и спортските активности.

Во категоријата на младински организации, организации за млади и чадор организации, добитници се Здружениe на граѓани Младите можат, кои истакнаа дека ваквото признание навистина ни укажуваат на тоа дека не треба да губиме поттик и мотив и мотицација да не се откажеме никогаш.

По доделувањето на наградите, присутните имаа можност да ги посетат промотивните штандови на младински организации и институции што спроведуваат активности за млади и одблиску да се запознаат со нивната работа.

Вечерта продолжи со музичкиот дел на настанот со прогресивните рок звуци на Рома рок скул и Димиш од колективот Гола Планина како и вкусна закуска подготвена од млади луѓе што поминаа обука за кулинари под менторство на искусни шефови од  FJ Culinary Consultants.

The post Одбележан Меѓународниот ден на младите appeared first on Република.

Единствената македонска партија во Албанија, Македонска алијанса за европска интеграција, МАЕИ, во соработка со Општина Пустец, утре на 2 август, организира прослава по повод Илинден.

Според лидерот на партијата Васил Стерјовски, во Пустец, седиштето на истоимената општина, по повод 120 години од Илинденското востание на македонскиот народ во 18.00 часот ќе се одржи свечена академија.

Академијата „120 години од Илинденско востание“ ќе се одржи во просториите на нашата партија во Пустец, во 18.00 часот, на која очекуваме големо присуство на жители од цела Мала Преспа, рече Стерјовски.

Општонароден собир ќе биде одржан на плоштадот „Гоце Делчев“ во Пустец, во 19 часот, со македонски ора и песни, со настап на група од Преспа и детскиот младински фолклорен ансамбал „Срма“ од Куманово.

The post МАЕИ во Пустец организира свечено одбележување на Илинден appeared first on Република.

Под слоганот „120 години Илинден - Огниште на татковината“, годинава, се одбележува 2-ри Август- Денот на Републиката - Илинден. Во таа чест, делегации на Владата на Република Македонија, на Собранието на Република Македонија и на Претседателот на Република Македонија ќе го чествуваат празникот преку голем број свечености.

И оваа година, граѓаните на Република Македонија го слават националниот празник почитувајќи ги заедничките, интеркултурни вредности, меѓусебно почитувајќи се, празнувајќи гордо, достоинствено и обединето.

По повод чествувањето на денот, кога славиме 120 години од започнувањето на Илинденското востание, прогласувањето на Крушевската Република и Денот кога пред 79 години е одржано Првото заседание на АСНОМ и воспоставувањето на нашата државност, ќе се одржат низа свечености во организација, но и со учество на државниот врв.

На 1-ви август во 20:30 часот во Крушево, традиционално, во организација на НКС „Десет дена Крушевска Република“ се отвора истоимената манифестација која ги претставува културата, традицијата и историјата на Крушево, пред нашите граѓани. На отворањето на НКС „Десет дена Крушевска Република“ ќе присуствува и ќе се обрати и претседателот на Владата, Димитар Ковачевски.

Делегации на Владата на Република Македонија учествуваат на сите настани опфатени со државната програма за одбележување на државниот празник 2 Август - Денот на Републиката - Илинден.

Одбележувањето на Денот на Републиката, Илинден на 2- Август ќе започне со настаните во Скопје, каде на свечена манифестација на Тврдината Кале во Скопје ќе се обрати претседателот на Владата на Република Македонија, Димитар Ковачевски, а високи владини делегации ќе положат цвеќе на повеќе локации во градот.

Во 8:30 часот владина делегација во чиј состав се министерот за надворешни работи Бујар Османи, министерот за транспорт и врски Благој Бочварски  и заменик министерката за правда, Викторија Аврамовска Мадиќ ќе положат свежо цвеќе на споменикот на АСНОМ во паркот „Жена Борец“ во Скопје, на споменикот на Никола Карев пред Собранието, како и на спомен-обележјето на Методија Андонов-Ченто на Градскиот плоштад.

Свечената манифестација во Скопје, продолжува на Тврдината Кале во Скопје, во 9:30 часот, каде по положувањето на свежо цвеќе пред споменикот на Слободата „Сила, слава и победа", ќе се обрати претседателот на Владата на Република Македонија, Димитар Ковачевски.

По обраќањето на премиерот на свеченоста, следува културно уметничка програма.

Премиерот Ковачевски, ја предводи владината делегација во чиј состав се првиот вицепремиер и министер за политички систем и односи меѓу заедниците, Артан Груби, вицепремиерот за економски прашања и координација на економските ресори Фатмир Битиќи, министерката за одбрана Славјанка Петровска.

Претседателот на Собранието на Република Македонија, Талат Џафери, предводејќи висока државна делегација со државни почести и чествувања ќе го одбележи големиот национален празник Илинден во Крушево.

Во состав на владината делегација на чествувањето на државниот празник 2 Август - Денот на Републиката - Илинден во Крушево се, министерот за земјоделство, шумарство и водостопанство Љупчо Николовски, министерката за труд и социјална политика Јованка Тренчевска, како и министерот за образование и наука, Јетон Шаќири.

Владината делегација ќе се поклони и ќе оддаде почит положувајќи свежо цвеќе  на вечното почивалиште на првиот претседател на Крушевската Република, Никола Карев во споменикот „Македониум“ на Гумење и на споменикот на паднатите борци на Слива, кои се симбол на жртвата на востаниците за одбрана на Крушевската Република, со почеток во 9:00 часот.

Од 10:00 часот, со присуство на панихидата за загинатите Илинденци во црквата „Св. Никола“, на Владината делегација и со положување цвеќе на споменикот на Мечкин Камен продолжува церемонијата во чест на националниот празник, по што на Мечкин Kамен во 11:30 часот, започнува манифестацијата на која свечено ќе се обрати претседателот на Собранието, Џафери.

Во рамки на централниот дел од државната програма за чествување на 2 Август во Крушево ќе биде одржана празнична културно-уметничка програма.

Претседателот на државата Стево Пендаровски во 10:15 часот, по повод одбележувањето на 2 Август, Илинден – Денот на Републиката, на 2 август 2023 година, ќе се обрати пред Меморијалниот центар АСНОМ, во Пелинце.

Во чест на Првото заседание на Антифашистичкото Собрание на Народното ослободување на Македонија – АСНОМ, пред споменикот на АСНОМ, ќе биде положено свежо цвеќе, по што претседателот Пендаровски, ќе се обрати и следува организирана културно-уметничка програма.

На споменикот на АСНОМ во Меморијалниот центар Пелинце, по повод националниот празник Илинден, владината делегација ја сочинуваат министерот за внатрешни работи, Оливер Спасовски, министерката за животна средина и просторно планирање, Каја Шукова, министерот за информатичко општество и администрација, Азир Алиу.

Свечената програма за одбележување на Денот на Републиката и оваа година го опфаќа традиционалното чествување на Илинден во Смилево во организација на Општината Демир Хисар, каде се чествува со положување цвеќе и фолклорна манифестација.

Од 09:00 часот, Владината делегација, во состав на заменик министерот за финансии Филип Николовски и националниот координатор за интеркултурализам, едно општество, развој на културата и меѓуресорска соработка Роберт Алаѓозовски, ќе оддадат почит на могилата Даме Груев, споменикот на смилевските Илинденци и  спомен плочата на Смилевскиот партизански одред, по што следува посета на Меморијалниот музеј, положување цвеќе на споменикот на Даме Груев, по што во спомен паркот „Даме Груев“ започнува традиционалната прослава.

Нека е вечен и честит празникот Илинден- Денот на Републиката!

The post Илинден годинава се одбележува под слоганот „120 години Илинден – Огниште на татковината“ appeared first on Република.

Достоинството на медицинските сестри е нарушено, меѓутоа, ова се начините на коишто ние ги славиме хуманоста и успесите, а ќе ги кажеме и нашите стратегии. Незадоволството ќе го потенцираме и денеска, не сме задоволни од последните покачувања на платите, ќе продолжиме со барањата за покачување на платите, изјави Гордана Бешлиовска, претседателка на Здружението на медицински сестри, техничари, акушерки и стоматолошки сестри „За нас“, пред свечената академија, по повод Меѓународниот ден на сестринството.

Бешлиовска порача оти посакува современо сестринство, а на пациентите им посакува јавно здравство со можности, до кое секогаш ќе имаат пристап до правилни здравствени услуги во безбедносни услови.

Да ја спречиме миграцијата, да бидеме доволно во болниците. Суштината на нашето постоење се пациентите. А нашата професија е влог во здрава нација, затоа сметам дека заслужуваме стратешки национални програми. Нашето мото е „Ова е наше време, за да дојдат подобри времиња, нашите сестри, нашата иднина". Мислам дека и така и не чувствувате и доживувате, медицинските сестри се богатство во државата, нагласи Бешлиовска.

Запрашана да го коментира малото покачување на платите во здравството, наспроти големото, кај функционерите, таа одговори дека е многу недостоинствено да се дискутира ова, со оглед на тоа што, како што нагласи, никаде во регионот нема такво доближување на личните доходи на медицинските сестри до републичкиот минимум. Таа рече дека очекува поддршка од сегашната гарнитура во Министерството за здравство и министерот.

Да продолжат административните процедури, законот да се најде во собраниска процедура, да се регулира професијата, да дојдеме до сопствени лиценци, да се преброиме, да имаме Централен регистар, да знаеме колку сме. Никогаш да не бидеме броени по национална основа и по политичка реторика, посочи таа, додавајќи дека од членството зависи дали од синдикатите ќе се побараат порадикални мерки.

Џевад Салија, претседател на Здружението на медицински сестри Албанки од Гостивар, кое е дел од Унијата, на Денот на сестринството во свое име и од името на членството, им честита на сите медицински сестри. Тој нагласи дека станува збор за една голема застапеност во здравството.

The post Не сме задоволни од покачувањето на платите, кажаа медицинските сестри на одбележувањето на Меѓународниот ден на сестринството appeared first on Република.

Осумдесет години од депортацијата на македонските Евреи во Треблинка е настан, којшто не смее да се заборави, порача Пепо Леви, претседател на Еврејската заедница на денешната комеморативна програма во Штип.

Во својата 80-годишна историја овој ден никогаш не е заборавен, секогаш им оддаваме почит на нашите 7.144 Евреи од Македонија и 543 Евреи од Штип. Нека Евреите починати во Треблинка бидат залог на посветла иднина, на поголем просперитет на Македонија и за побрзо влегување во ЕУ каде што ќе бидеме рамноправни членови со сите останати европски земји, рече Леви.

Прашан за коментар што бугарската власт не презема одговорност во депортацијата на евреите, Леви со одговор дека секој носи лична одговорност за своите постапки.

Дали некој се чувствува виновен или не се чувствува виновен тоа е во неговиот генетски код или во неговата култура. Историјата таква е каква е, никој не може да ја промени, никој не може да ја избрише. Денеска сите народи на Балканот треба да живеат во мир и во слога и мислам дека е голема, голема грешка неовозможување, ставање вета и слични работи за влез на Македонија во ЕУ, додаде Леви.

Посочи дека денеска во Штип има гости од Израел, меѓу кои и жива Еврејка која била во логорот во „Монопол“ и која успеала да излезе од „Монопол“ со нејзината сестра.

Преживеала голгота, но успеала да се одржи и да оформи свое семејство, преселена е во Израел и сега има семејство од преку 20 души. Ние сме горди на неа и ја сакаме нашата Шела, рече Леви.

Осумдесет и осумгодишната Шела кога ги депортирале од Штип имала само осум години.

Дојде мајка ми да ме разбуди, јас не сакав да станам и викав нејќам, нејќам сè уште е рано да станам, вели Шела.

Министерката за култура, Бисера Костадиновска-Стојчевска истакна дека одбележување на 80 години од депортацијата на македонските Евреи е настан којшто има за цел да ни помогне да не ги заборавиме злосторствата коишто се случија пред 80 години.

Ми претставува навистина големо задоволство што имав можност да помогнам на некаков начин во организација на овој настан денес, организацијата на настанот којшто беше вчера во општина Битола и во организацијата на централниот настан – Одбележување 80 години од депортацијата на македонските Евреи. Овој настан треба да ни послужи сите на една лекција да се издигнеме, односно издигнување на сите наши определби да помогнеме вакви настани никогаш повеќе во историјата да не се повторат, вели Костадиновска-Стојчевска.

Градоначалникот на Општина Штип, Иван Јорданов рече дека и по 80 години сè уште се чувствува тагата меѓу штипјани.

Треба да испратиме една порака дека не треба да се заборави и не треба да се повтори. Нашата желба денес со „Маршот на живите“ е да порачаме да има мир во светот и никогаш да не се повтори, вели Јорданов.

По повод 80 години од депортирањето на македонските Евреи беше промовирана книгата „Евреите во Штип“ од Мишо Китаноски, делегациите положија цвеќе на споменикот на Евреите во Штип, а беа посетени и Еврејските гробишта.

Во Штип присуствуваа амбасадорот на Германија во Република Македонија, претставници на ОБСЕ, високи дипломатски претставници во земјата, потоа гости од Израел, пратеници во Собранието на Република Македонија и претставници на државни и локални институции.

The post Во Штип одбележани 80 години од депортацијата на македонските Евреи appeared first on Република.

Во светот денеска се одбележува Меѓународниот ден на мајчиниот јазик , прогласен од УНЕСКО на 30-тата сесија на Генералната конференција во 1999 година, а наредната 2000 година 21 февруари е промовиран како Ден на лингвистичка и културна разновидност и мултилингвизам.

Во Декларацијата на УНЕСКО за културна разновидност, меѓу другото, е наведено правото на секоја личност да се изразува и да создава на јазик што ќе го избере, а особено на мајчин јазик.

На половината од околу шест илјади јазици што се зборуваат во светот им се заканува исчезнување, а во околу 200 земји се зборува за мали јазици кои се соочуваат со предизвик да бидат зачувани. Во последните три века изумираат или драматично се намалува бројот на јазици.

Институтот за македонски јазик „Крсте Мисирков“ и оваа година ќе го одбележи Меѓународниот ден на мајчиниот јазик.  Најавени се поздравни обраќања на министерката за култура Бисера Костадиновска-Стојчевска, ректорот на Универзитетот „Св. Кирил и Методиј“,  Никола Јанкуловски, директорката на Институтот, Елена Јованова-Грујовска, и Лидија Тантуровска, научен советник во Институтот.

The post Институтот за македонски јазик „Крсте Мисирков“ и оваа година ќе го одбележи Меѓународниот ден на мајчиниот јазик appeared first on Република.

Хаосот со прославата на раѓањето на Гоце Делчев покажува дека државата е во распаѓање и системска неспособност која се гледа во секоја од областите. Срамно е тоа што поделбите и омразата се толку големи што одбележувањето на раѓањето на херојот помина во знакот на стотици ангажирани полицајци, хеликоптери, борни коли, обвинуваат од ВМРО ДПМНЕ.

Ова ли е заедничкото пријателство со Бугарија за кое СДС и ДУИ говорат. Постојани навреди, закани, омаловажувања кои доаѓаат од источниот сосед, додека Владата нема никаков одговор. Историска комисија чии позиции се сомнителни и без јасни ставови. Никој од јавноста не знае за што се преговара и кои се македонските позиции.

Како што се неспособни од власта на Ковачевски и Ахмети во економијата, енергетиката, стопанството, тие се неспособни и во менаџирањето на односите и во секој еден од сегментите водењето на држава.

Сликата на стотици полицајци како ги чуваат моштите на Гоце Делчев од живите наследници покажува дека државата е на погрешна патека.

На погрешна патека сме и поради фактот што премиерот на државата Ковачевски и вицепремиерот Артан Груби со останатата свита како криминалци се прикрадоа на гробот на Делчев далеку од народот кој остана зад барикадите. Тоа е поради фактот што не сакаат соочување со народот. Тоа соочување мора да дојде, и ќе се случи на изборите кои се решение на тоа да престане пропаста на државата, велат од ВМРО ДПМНЕ.

The post ВМРО-ДПМНЕ: Хаосот со прославата на Делчев, покажува системска неспособност и дека со Ковачевски и Ахмети државата се распаѓа appeared first on Република.

Вицепремиерот за јавен ред и безбедност и министер за внатрешни работи Иван Демерџиев положи венец со цвеќе на гробот на Гоце Делчев во црквата Св. Спас“. Тој пред новинарите го коментираше задржувањето на Бугарите на граница, но и тоа што европратеникот Ангел Џамбаски не дојде во Македонија.

Демерџиев реагираше што Бугарите чекале на граница и од пред Свети Спас кажа дека ќе подареле три генератори за струја, за да системот повеќе не биде во прекин.

Демерџиев пред новинарите кај црквата Свети Спас за доаѓањето на Џамбаски и Костадинов посочи: Јас зборев со нив и кажав да останат во Бугарија. Ме послушаа. Тие не дојдоа до граница. Тоа за мене е најправилниот пат, не треба провокации“.

Бугарскиот вицепремиер посочи дека очекува Македонија реципрочно да одговори и да ги пушти Бугарите да го слават Гоце Делчев, исто како што Бугарија ги пушти Македонците претходно.

Очекувам секој бугарски државјанин да стигне без било какви интервенции - кажа тој.

Прашан дали е пријателство односот на поединечни политичари од Бугарија кои Македонија ја нарекуваат бугарска држава, Демерџиев рече: За нас е јасно е дека Македонија е суверена независна држава.

The post Бугарите положија цвеќе кај Делчев: Ќе ви подариме агрегатори, за да не ви паѓа граничниот систем appeared first on Република.

Добар ден на сите, чуден ден денеска. Две чувства се развиваат кај мене. Првото чувство е нормално чувството на почит кон Македонецот, кон великанот Гоце Делчев за тоа што го сторил за Македонија, за тоа што го направил за македонскиот народ во својата би рекол бурна животна приказна. Ние сме горди што имаме еден таков човек да ги славиме и е дел од нашата историја и нашиот македонски ген и тоа е чувство на задоволство и среќа кај секој еден чесен и честит Македонец без разлика каде се наоѓа дали е денеска овде во Македонија или насекаде во светот - изјави денеска лидерот на ВМРО ДПМНЕ, Христијан Мицкоски.

И второто е чувството на разочараност, чувство кое кај мене се создаде денеска чекорејќи од онаа прва барикада преку втората барикада до овде до оваа црква и наместо да се зближуваме, наместо да се зголемува нашето пријателство ние денеска за жал сме подалечни од кога и да било во нашата историја.

Пред 68 месеци ветуваа живот, пред 68 месеци ветуваа дека Македонија ќе ја однесат во Европа. Денеска ние сме, според нивото на корупција, како држава рамо до рамо со Тунис, Сутинам, Индија а, во сите останати параметри сме последни на Балканот. И за жал, никогаш подалечни со нашите соседи од тоа што сме денеска.

Денеска имате вие, безбедносни мерки од прв степен, хеликоптери надлетуваат како во воените времиња. Навистина жалам што сум сведок на сето ова и навистина жалам што ќе останат уште ден повеќе онаму каде што се, оваа влада на ДУИ поддржана од СДСМ - рече Мицкоски.

The post Мицкоски: Владата на ДУИ поддржана од СДСМ ветуваше живот, ветуваше дека Македонија ќе ја однесат во Европа, за жал денеска сме никогаш подалечни со нашите соседи appeared first on Република.

Под засилена полициска безбедност, во организација на локалната самоуправа, денеска во Делчево беа одбележани 151 година од раѓањето на великанот на македонската револуционерна борба и патрон на градот Гоце Делчев. Официјалниот дел од настанот започна со читање реферат за неговите живот и дело од страна на КУД ,,Гоце Делчев", по што на неговиот споменик свежо цвеќе положија повеќе делегации на локалната самоуправа, политички партии и здруженија на граѓани.

Градоначалникот на Делчево, Горан Трајковски во својата изјава истакна дека Делчев е лик од кој треба да учиме како да се сака и гради општината и државата и е револуционер кој обединува, а не разединува.

Денеска го чествуваме денот на раѓањето на апостолот на македонската револуционерна борба и патронот на Делчево. Во таа чест се поклонуваме пред Делчев и достоинствено оддаваме почит на неговиот лик и дело. Како следбеници на ликот и делото на Делчев ги промовираме неговите заложби и работиме да го изградиме нашиот град достоен носител на неговото име. Учејќи од него, продолжуваме по патот на прогресот, градејќи достоинствена македонска држава - рече Трајковски.

Околу улогата на Делчев за македонската револуционерна борба, Трајковски цитираше дел од неговата позната максима.

„Јас не сакам востание со луѓе кои ќе ме напуштат при првиот неуспех, јас сакам револуција со граѓани кадарни, да ги понесат сите искушенија, на една долготрајна борба, каква поради жестоките политички услови, ќе биде и нашата“ - ова е порака на Делчев запишана од пред скоро два века, која и денеска во 21 век е актуелна за Македонија и е мотивирачка за нас, неговите следбеници кои имаме обврска да ја градиме нашата држава и бескомпромисно да се вложуваме во зацртаниот пат на развој и просперитет, во патот за влез на нашата држава во европското семејство - додаде Трајковски.

На настанот немаше присуство на гости од други држави, а половина час пред официјалниот настан свежо цвеќе пред споменикот на македонскиот великан положија претставници на Општинскиот комитет на ВМРО-ДПМНЕ.

The post Во Делчево одбележани 151 година од раѓањето на патронот на градот Гоце Делчев appeared first on Република.

Следете го во живо одбележувањето на 11-ти Октомври - Ден на народното востание, пред Спомен Костурницата во Куманово

The post ВО ЖИВО: Одбележување на 11-ти Октомври – Ден на народното востание, пред Спомен Костурницата во Куманово appeared first on Република.