Шефот на украинската државна енергетска компанија „Енергоатом“, Петро Котин, навестува дека постојат индикации оти руските сили се подготвуваат да се повлечат од нуклеарната централа Запорожје.

Високиот украински претставник додаде дека таквата одлука ќе биде донесена затоа што Русија нема да може да ја задржи контролата над нуклеарната централа по притисокот од украинските сили.

Во изминатите недели ние ефективно добивме информации дека постојат индикации дека тие можеби се подготвуваат да го напуштат (објектот). Се добива впечаток дека ги пакуваат куферите и носат се што можат, изјави Котин на украинска телевизија.

Котин не прецизираше кои знаци укажуваат на можното повлекување на Русите од фабриката.

Руските сили ја зазедоа електраната Запорожје, лоцирана во близина на градот Енергодар во југоисточниот регион Запорожје, во првите месеци од руско-украинската војна. Објектот, наводно, е под контрола на рускиот нуклеарен енергетски гигант Росатом од март.

Во изминатиот период, Русија и Украина разменуваа обвинувања за гранатирање на нуклеарната централа, што ги зголеми стравувањата кај набљудувачите дека продолжувањето на борбите околу објектот може да доведат до нуклеарна катастрофа.

Генералниот директор на Меѓународната агенција за атомска енергија (МААЕ), Рафаел Гроси, повика на формирање „заштитна зона“ околу централата. Гроси, кој претходно се пожали дека напредокот во разговорите за воспоставување безбедносна зона е „бавен“, минатата недела во Истанбул се состана со извршниот директор на Росатом, Алексеј Лихачев.

Тој, по средбата со Гроси, ги истакна условите на Русија за формирање тампон зона.

Уште еднаш сакам да го истакнам принципот дека ниту еден куршум, ниту една артилериска граната, ниту една ракета, ниту една група саботери не треба да се дозволи да се приближи до просториите на електраната. За возврат, Русија ќе се согласи да не чува офанзивно оружје или ударни сили (во централата), туку ќе користи само средства за физичка заштита и безбедност на централата. Подготвени сме за ова сценарио. Се надеваме дека раководството на МААЕ ќе не слушне, изјави Лихачев.

Досега официјален Кремљ не покажа никакви индикации дека има намера да се откаже од контролата врз фабриката. Проруските власти во Енергодар ги негираа тврдењата на Киев за можно повлекување на Русија, инсистирајќи дека „оваа информација не соодветствува со реалноста“ и дека нуклеарната централа Запорожје „останува под руска контрола“, наведува Си-Ен-Ен.

The post Официјален Киев тврди дека Русите се подготвуваат за ново значајно повлекување appeared first on Република.