Бизнисменот од ДУИ и поранешен член на Советот на Охрид, Нефи Усеини доби второ обвинение за градење на диво. Во овој случај тој и уште едно лице почнале бесправна надградба на куќа на нивно земјиште во центарот на Охрид, која тргнале да ја прошируваат и да ѝ доградуваат катови.

-По спроведена истражна постапка, Основното јавно обвинителство Охрид поднесе обвинителен акт против две лица за кривично дело бесправно градење, согласно член 244-а став 1 од Кривичниот законик. Осомничените Н.У и С.Ш на возраст од 49 и 48 години, како соизвршители, на 27.7.2023 година почнале да градат објект на нивно земјиште, без одобрение за градба издадено од надлежен орган. На постоечкиот објект во центарот на Охрид изградиле доградби од северната страна, во сутеренот, приземјето и на катот, проширувајќи ги со армирани бетонски плочи и столбови, по што продолжиле да го надградуваат објектот со две армирано бетонски плочи со кои ја зголемиле неговата катност, соопшти Јавното обвинителство.

Против првиот обвинет во овој предмет, се додава во соопштението, се води судска постапка за уште едно бесправно градење во центарот на Охрид, односно за дивоизградената пицерија на Усеини изградена на државно земјиште кај охридскиот чинар во строгиот центар на градот, за која ЈО во 2022 година подигна обвинение.

The post Уште едно обвинение против Нефи Усеини appeared first on Република.

По спроведена истражна постапка, Основното јавно обвинителство Охрид поднесе Обвинителен акт против две лица од кои едното лице е Нефи Усеини за кривично дело – Бесправно градење.

Осомничените, како соизвршители, на 27.07.2023 година почнале да градат објект на нивно земјиште, без одобрение за градба издадено од надлежен орган.

На постоечкиот објект во центарот на Охрид изградиле доградби од северната страна, во сутеренот, приземјето и на катот, проширувајќи ги со армирани бетонски плочи и столбови, по што продолжиле да го надградуваат објектот со две армирано бетонски плочи со кои ја зголемиле неговата катност.

Против првиот обвинет во овој предмет се води судска постапка за уште едно бесправно градење во центарот на Охрид.

The post Поднесено обвинение против Нефи Усеини и уште едно лице за дивоградба во Охрид appeared first on Република.

Советот на Општина Охрид на денешната седница ја прифати оставката на советникот Нефи Усеини, кој беше избран на последните локални избори од редовите на ДУИ.

Претседателот на Советот Сашо Донев во изјава за МИА посочи дека Усеини поднел неотповиклива оставка од лични причини.

Денеска на седница на Совет беше констатирана неотповикливата оставка на советникот Усеини, истакна Донев.

Советот чека официјален допис од Општинската изборна комисија кој ќе дојде на местото на Усеини.

Охридскиот бизнисмен и досегашен советник Нефи Усеини е претседател на огранокот на ДУИ во Охрид.

The post Бизнисменот Нефи Усеини, кој тепаше и градеше дивоградби, поднесе оставка од советничката функција во Охрид appeared first on Република.

Охридскиот бизнисмен Нефи Усеини со погрдни зборови им се обраќа на новинари кои го прашуваат дали смета дека има судир на интереси околу тендерите кои ги добива фирмата во негова сопственост, а тој е е советник од ДУИ во општинскиот Совет на Охрид.

Фирмата Нефи ИК, каде Нефи Усеини е сопственик, а неговата сопруга, управител, од последните избори до денес има добиено три тендери со охридските јавни претпијатија, објави „Телма“.

„Не е фирмата на мое име, нема судир на интереси со тендерите, јас не ги гласам тие тендери. Е.. си мајката, п… ти м….. Немој повеќе да ми звониш, што ти треба да си барате во Општина. Ова да ти е последно што ѕвониш“ – изјави Усеини во телефонскиот разговор за Телма.

Во ноември лани, неговата градежна механизација беше ангажирана во ЈП Нискоградба Охрид за 1 милион и 350 илјади денари.

Во јануари пак, има склучен догвор со Охридски Комуналец за набавка на градежен материјал во вредност од 1 милион денари, а во март добил тендер со Градски гробишта Охрид, тежок 9,5 милиони денари.

Усеини е познат по своите физички пресметки со охриѓани, а Судот неодамна го ослободи од обвинение за напад на едно лице насреде Охрид, со образложение дека не може да се докаже вината.

Охридското обвинителство води постапка и за две дивоградби на бизнисменот Усеини.

The post Нефи Усеини пцуе новинари appeared first on Република.

Вчерашната ослободителна пресуда за функционерот на ДУИ, Нефи Усеини, повторно демонстрира дека 20 години ниту еден функционер од редовите на партијата нема одговарано за криминал и корупција, иако истата е дел од секоја криминална коалиција, коментираат од Левица.

Нефи Усеини, освен како сопственик на најголем број дивоградби во Охрид, познат е и како советник во Советот на Општина Охрид и тоа со два мандата.

За време на првиот мандат, советникот на ДУИ, во просториите на Општина Охрид, физички го нападна советникот на Беса, Џемаил Мена, а потоа, заедно со неговиот брат, го нападнаа Топалоски, по што со лекарски преглед утврдено е дека му се нанесени телесни повреди. Поради овој инцидент на двајцата браќа им беше одредена мерка притвор од 8 дена, по што беа пуштени да се бранат од слобода, за на крај да добијат ослободителна пресуда.

После оваа одлука на охридскиот суд, станува јасно дека владеењето на правото и демократијата се само празни флоскули под кои таканаречените проевропски партии ги спроведуваат своето насилие и криминал.

Последниот физички напад кој го изврши контроверзниот бизнисмен и советник на ДУИ, Нефи Усеини, се случи пред неколку дена, кога во просториите на Општина Охрид истепа 56 годишен сограѓанин, кој учествувал во наддавањето за тезгите на кејот на Охрид, само поради тоа што се осмелил да учествува во наддавањето.

Дали немоќта на институциите кои треба да се справат со овој насилник доаѓа од фактот што ДУИ веќе 20 години, не само што е власт, туку е и газда во Република Македонија, или пак Нефи Усеини со своите валкани пари, заработени од неговите сомнителни бизниси, успешно ја купил својата неказнивост, прашуваат од Левица.

The post Ослободителната пресуда за Нефи Усеини, пример за неказнивоста на ДУИ appeared first on Република.

Нефи Усеини и брат му Ибро Усеини добија ослободителна пресуда за насилството сторено над нивниот сограѓанин Спиро Топалоски - Топал. Судијката Билјана Белевска - Пројковска утврдила дека Топалоски бил натепан од браќата Усеини, но не утврдила дека е оштетен, бидејќи така Топалоски се произнел пред судот.

Ваквиот исказ на Топалоски даден во судот, кој е контрадикторен на исказот даден во Обвинителство, им донесе слобода на браќата Усеини. Во пресудата напишана на петнаесет страници се наведува дека од снимките јасно се гледа како Топалоски е тепан, а тие му биле покажани и нему, но тој останал на исказот дека повредите не му се од Усеини, туку од непознато лице кое го удрило од зад грб.

Пет сведоци на настанот, пред судот кажале дека ништо не виделе, иако на снимките од видео надзорот, според охридскиот суд, се гледало како дел од нив панично бегале кога почнало тепањето на Топалоски.

„А1он“ дојде до ослободителната пресуда за Усеини. Во неа, меѓу другото се опишуваат повредите со кои се здобил Топалоски.

За овој суд неспорно е дека во конкретниот кривично правен настан оштетениот Топалоски бил телесно повреден, од страна на сега обвинетите. Ваквата констатација произлегува од изведените докази снимки од виео надзор поставен во Хотелот Ј.во О., на кои јасно се гледа какви дејствија превземаат обвинетите при физичкиот напад врз оштетениот… - посочува судијката.

Во пресудата се опишани сите детали кои се гледале од видео надзорот.

Топалоски почнал расправија со Нефи Усеини, по што дошол и брат му Ибро, па го нападнале. Топалоски почнал со трчање да бега низ паркингот, а браќата Усеини го бркале. Од панталоните, на Нефи му паднал предмет во облик на пиштол, кој го зел брат му Ибро, па на влезот од хотелот го стигнале Топалоски. Ибро го удирал Топалоски со боксови каде ќе стигнел. Во тепањето се приклучил и Нефи. Ибро бил тој, кој според цитираните снимки, со предметот во облик на пиштол продолжил да го удира Топаловски.

Судијката Белевска - Пројковска, која ги ослободи браќаат Усеини, во пресудата го објаснува и однесувањето на Топалоски во текот на целата постапка. Таа посочува дека Топалоски се однесувал како да сака да им помогне на Усеини да не одговараат пред законот.

Овој сведок, кој иако има својство на оштетен, нема интерес за кривично гонење на обвинетите, не истакнува оштетно побарување, па судот ја прифати неговата слободна диспозиција, заради што практично во оваа постапка од формално процесен аспект нема оштетен субјект. Но, и покрај јасните снимки од видео надзор кои му беа предочувани при испитувањето, сведокот-оштетен остана на исказот дека не бил физички нападнат од обвинетите, дека повредите кои го здобил му ги нанело друго лице, не знаел кое, но дека тоа не биле обвнетите - се вели во пресудата.

Судијката не му верува на Топалоски, бидејќи тоа што тој го кажувал пред судот е спротивно на тоа што се гледа на снимките од видео надзорот. На нив, неспорно се гледа дека браќата Усеини го натепале, а тој се обидува да избега. Судијката во писмената пресуда е децидна и дека сведоците со исказите имале тенденција да им помогнат на обвинетите да ја избегнат кривичната одговорност.

За овој суд неспорно е и дека таквите повреди на оштетениот му ги нанесле сега обвинетите Н.У. (Нефи Усеини) и И.У. (Ибро Усеини). Но, со ваквите дејствија тие го сториле кривичното дело „Телесна повреда“ за кое кривично дело пак, постапката се води по приватна кривична тужба од
оштетениот - се заклучува во пресудата.

Топалоски кој пред судот го промени исказот дека бил натепан од Усеини, за медиумите изјави дека Нефи е негов пријател и дека никогаш не бил нападнат од него и брат му.

Повеќе на „А1Он“.

The post Нефи Усеини и брат му ослободени за претепувањето на Спире Топал, кој пред Судот од истепан стана пријател со нив appeared first on Република.

Советникот Нефи Усеини од ДУИ одново натепа сограѓанин во Охрид, додека ја чека пресудата за тепањето на сограѓанинот Спиро Топаловски. Во изминативе три години, ова е негова четврта физичка пресметка.

Според информациите кои ги објави „А1он“, инцидентот се случил во просториите на Општина Охрид. Таму, советникот Усеини се пресретнал со 56-годишниот натепан охриѓанец. Откако ги земале бројчињата за во системот за наддавање за тезгите поставени на кејот, дошло до вербална
расправија, а потоа и боксови. Дека Усеини го натепал 56-годишниот сограѓанин, се потврдува и од охридската полиција.

„На 21.06.2022 година околу 15.30 часот на улицата ‚Димитар Влахов’ во Охрид нарушен е јавниот ред и мир со физички напад извршен од Н.У. врз Т.В.(56), двајцата од Охрид. Против напаѓачот, ќе биде поднесена соодветна пријава“, велат од охридската полиција.

Новиот инцидент каде Усеини физички се пресметува доаѓа во исто време додека тој чека пресуда од охридскиот суд за насилство. Предметот за претепувањето на нивниот сограѓанин Спиро Топалоски, поради кое се гонат за насилство е во судска завршница.

The post Повторно Нефи Усеини со боксови натепа сограѓанин, четврти по ред за три години appeared first on Република.

Тиквеш и Скопје ќе играат и во следната сезона во Првата македонска фудбалска лига (ПМФЛ), откако попладнево триумфираа во бараж пресметките против Воска и Беласица.

Фудбалерите на Тиквеш го задржаа прволигашкиот статус со триумф над Воска од 4-1 на стадионот „Младост“ во Струмица.Овој клуб е финансиран од контроверзниот охридски бизнизмен Нефи Усеини.

Скопје беше поуспешен во баражот од Беласица со 2-1 на Градскиот стадион во Штип.

Пласман во ПМФЛ претходно обезбедија Силекс и Победа како првопласирани во западната и источната второлигашка конференција, додека од ПМФЛ испаднаа Борец и Пелистер.

Новиот првак Шкупи ќе игра во квалификациите за пласман во Лигата на шампиони, додека Шкендија, Академија Пандев и освојувачот на купот Македонија ЃП ќе настапат во квалификациите за Конференциската лига

The post Воска спорт на Нефи Усеини не влезе во Првата лига appeared first on Република.

Министерот за економија Крешник Бектеши за домаќин во Охрид го избра Нефи Усеини, контроверзен бизнисмен за кого има обвинение за напад со пиштол и истраги за две дивоградби.

Нефи Усеини го прошета министерот по градот, а Бектеши беше гостин и во неговата пицерија за која пред повеќе години беше отворена постапка за дивоградба на терасата на објектот.

Фотографиите на Бектеши со Нефи Усеини ги објави самиот министер на својот службен ФБ профил.Усеини на последните локални избори беше избран за советник во Охрид како кадар од ДУИ.

The post Нефи Усеини го прошета Крешник Бектеши низ Охрид, седнаа и во неговата пицерија дивоградба appeared first on Република.

Во дербито на Втората лига Запад, Охрид Лихнидос вторпат загуби од Воска Спорт, клубот во сопственопст на Нефи Уасеини, и тоа вторпат со пенал во завршницата. Во првиот меч пенал за Воска имаше во 95. минута, додека сега најстрога казна за Охрид имаше во 87. минута, по што вистинска бура се крена во македонската фудбалска јавност.

За судиската помош што ја доби Воска спорт реагираше директниот ривал Вардар, неговите навивачи, ама реагираат и охриѓани, кои зимава добија ново раководство предводено ов поранешниот репрезентативен голман Данчо Целески. Охридскиот клуб се бори да опстане во Втората лига, поради што реагираат на катастрофалното судење.

Охриѓани и Целески порачуваат дека во фудбалот нема место за криминалци, а реагираат дека нивниот голман Дамјан Серафимов по мечот бил физички нападнат од тројца луѓе на градскиот ривал Воска Спорт - директорот, претседателот и голмнаот на овој клуб.

Реакцијата на Целески ја пренесуваме во целост.

Со големо разочарување може да констатираме дека квалитетно судење во Македонија не постои. Специфично нема професионално судење кога се игра против екипата на Воска Спорт. Доколку играме десет натпревари со вакво судење нема да победиме на ниту еден натпревар.

 

Последните два натпревари во кои судеа прволигашки судии кои досудија непостоечки ситуации што влиаеја на конечниот резултат, ни е одземена можноста за играње на фудбал и спортско радување. Имено, со нашата работа успеавме да создадеме фудбалска величенствена атмосфера!

 

На последните натпревари против екипите на Вардар, Велешта, Воска има огромен број на публика од 2.000 до 5.000 гледачи. Поради неспортски однос од тие што ја делат правдата публиката си оди разочарана после натпреварот.

 

Денес многу беа значајни коментарите во публиката: „Да си одиме дома бидејќи судијата ќе досуди пенал во 100-тата минута“. Исто така во првото полувреме не ни беше досуден пенал каде што имаше играње со рака. Се беше пресликано како во претходниот натпревар со Воска.

 

По завршувањето на натпреварот во подтрибинскот простор физички беше нападнат нашиот голман Дамјан Серафимов од страна на директорот, претседателот и голманот на Воска Спорт. За овој случај е доставен дополнителен записник до ФФМ.

 

Доколку ГФК Охрид Лихнидос е приморан да настапува во криминалната лига, луѓето кој што го водат клубот поранешни репрезентативци докажани спортисти, нема да го дозволат тоа. Фудбалот е место за спортисти, а не за криминалци.

 

ГФК ОХРИД ЛИХНИДОС

 

„Секогаш кога сум играл фудбал сум сакал да се натпреварувам, сум примал голови, победувал, губел.

 

Секоја победа или пораз е небитен во конечниот збир, меѓутоа многу боли кога ќе изгубите на фудбалски криминален начин , како во последните два натпревари со Воска спорт“ - се вели во рекцијата на Целески.

The post Голманот на Охрид нападнат од раководството на клубот чиј газда е Нефи Усеини: Во фудбалот нема место за криминалци appeared first on Република.

Бизнисменот и поранешен советник од ДУИ во општина Охрид, Нефи Усеини, за кого имаше обвинение за насилство, но, познат и по својата дивоградба кај Чинарот, денеска застана рамо до рамо со владините претставници и останатите гости кои присуствуваа на почетокот на изградба на новиот далновод во Битола.

Со камионот за малтер на фирмата „НЕФИ ИК“ сопственост на Усеини, се удри камен темелникот, а премиерот Ковачевски го стисна копчето од каде потече бетон. Фирмата на Усеини е подизведувач на сараевската компанија „Енергоинвест“ која ќе го гради 400 киловолтниот далновод од Битола до македонско-албанската граница, со кој ќе се поврзат електро-преносните системи на Македонија и Албанија, а е клучна алка во транзитот на електричната енергија од Бугарија, преку Македонија, низ Албанија, до Италија.

The post Не се живее од пицерија и од администрација: Нефи Усеини подизведувач на далноводот од Битола appeared first on Република.