Музејот на Народната банка се приклучува кон манифестацијата за одбележување на Денот на европското културно наследство во организација на Советот на Европа и Министерството за култура и денеска од 10 до 16 часот ќе биде отворен за јавноста.

За време на отворениот ден во Музејот на Народната банка ќе се одржи и работилница насловена „Уметноста создава уметност“ на која стрип-цртачите од Здружението за промовирање на стрип-културата „Макстрипови“ ќе креираат дела инспирирани од збирката монети изложени во Музејот.

The post Денот на европското културно наследство ќе се одбележи во Музејот на Народната банка appeared first on Република.

Златната маска од Горна порта и златните обетки со гулабици од Охридско, мермерното торзо на божицата Изида, тетовската Менада, монетите на Јустин II и многу други артефакти и нивни прикази, од денес и во следните шест месеци, ќе ја раскажуваат приказната за македонските банкноти во новоотворената, времена музејска поставка во Музејот на Народната банка.

На свеченото отворање на изложбата, гувернерката на Народната банка, Анита Ангеловска-Бежоска посочи дека нашата државотворна приказна не ќе беше целосна без монетарното осамостојување.

Парите не се само симбол на нашиот монетарен суверенитет, тие не говорат само за номиналната вредност којашто е испишана на нив, тие говорат за вредностите создавани во минатото, за нашата историја и култура. Уметничкото око и чувството на припадност и гордост на сите кои беа вклучени во процесот на изработка придонесоа нашите банкноти да ги носат на себе убавините од македонската почва. На основната вредност на парите ѝ е додадена зачуваната вредност на културното богатство, значењето на поднебјето и придонесот на нашите предци. Прославувајќи го овогодишниот јубилеј – 30 години од монетарното осамостојување, Народната банка имаше обврска да потсети на овие големи вредности од македонската почва, вредности од минатото коишто ни се пренесени и оставени нам и на идните генерации на чување и негување, посочи гувернерката Ангеловска-Бежоска.

Министерката за култура, Бисера Костадиновска-Стојчевска, во своето излагање посочи дека книжните пари, коишто денеска се во употреба од 96-тата година, покрај високиот квалитет и бројните заштитни елементи, ги красат симболи од нашето непроценливо културно наследство.

Од мермерното торзо на божицата Изида, паунот од крстилницата во Стоби, Ангелот од Курбиново, монета од времето на Јустинијан Втори, златната погребна маска од Требеништа, иконата Богородица Епискепсис, дел од фасадата на уникатната Света Софија во Охрид, фасадата на прекрасната Шарена џамија во Тетово и мермерниот под на Исак-беговата џамија во Битола, непроценливите винички теракотни икони, македонската невестинска носија од Прилепско како дел од нашето етнолошко богатство до цветот на македонскиот афион. Ќе сведочат еден ден за нас како што денеска во Народната банка се чуваат монетите од пајонските владетели, македонските кралски династии, до монетите на Отоманската Империја. Зашто парите се исто така сведоштво на историските епохи, но и на уметноста на цивилизациите. Затоа со сето срце го посакувам денот кога македонското културно богатство ќе биде испечатено на еврото, посочува министерката Костадиновска-Стојчевска.

Академик Абдулменаф Беџети во своето обраќање посочи дека монетарното осамостојување претставува втор највисок и најважен чин на една самостојна држава, како и дека монетарниот систем како најважен економски потсистем е многу специфичен, комплексен и сензитивен не само од аспект на макроекономската стабилност.

Секоја епоха има свои херои кои оставаат белег и создаваат историја. Во оваа прилика, би сакал да го истакнам и големиот придонес на тогашните носители на високи функции на најрелевантните институции поврзани со чинот на подготовка и реализација на монетарното осамостојување, почнувајќи од премиерот на експертската влада, академик Кљусев, министерот за финансии, Методија Тошевски, гувернерот на НБРМ, Борко Станоевски и особено академик Ксенте Богоев, кој покрај одличните теоретски знаења од областа на монетарните политики и проблеми имаше и одлично искуство како поранешен гувернер на Народната банка на Југославија во периодот од 1977 до 1981 година, како и многу други личности од академската заедница во тоа време (на пример, проф. Трпевски и др.). Денешната изложба, во документарна и архивска граѓа на артефакти во неколку микроцелини посветени на банкнотите, преставува културно-историско наследство со мултикултурна нарација, којашто прилично му одговара на нашето општество, посочи академик Беџети.

Изложбата ќе биде достапна за посетителите следните шест месеци, секој работен ден од 9 до 15 часот. Влезот е бесплатен.

https://youtu.be/OiNk7Ka9NgY

The post Отворена времена изложба за чудесната приказна за македонските банкноти во Музејот на Народна банка appeared first on Република.

Во Музејот на Народната банка од петок за јавноста ќе биде отворена нова времена музејска изложба, посветена на денарот и неговите обележја, поточно, на изворното културно наследство кое послужило како основа за дизајнирање на предните и задните страни на тековното издание македонски банкноти.

Изложбата се организира во знак на одбележување на 30 години од издавањето на македонскиот денар, а Музејот на Народна банка одбележува 20 години од отворањето на постојната поставка.

Раководителката на Музејот на Народната банка, Катерина Христовска, во објава на Фејсбук страната на централната банка, вели дека една од поспецифичните карактеристики на дизајнот на македонските пари, кај сите изданија, е застапеноста на дела од културното наследство на државата наспроти отсуството на историски личности на предната или задната страна, специфика која ја имаат многу малку европски држави.

Постои една општа констатација кај истражувачите на овој вид на специфичен дизајн дека нашите пари со својот колорит, со својата динамичност се можеби едни од најубавите банкноти испечатени на европската територија, вели Христовска.

Борче Тодороски, кој ги дизајнираше првите македонски пари во сеќавање како го изработил дизајнот за првите македонски денари, вели дека својата работа ја извршувал во тајност, но со голема посветеност и пасија.

Се работеше рачно, немаше помошни средства како сега, компјутери. Работев со перца на кои менував тушеви во боја. Многу непроспиени ноќи и многу работа, вели Тодороски.

Од Народната банка најавија дека по свеченото отворање во четврток, поставката ќе биде достапна за јавноста од следниот ден, секој работен ден од 9 до 15 часот, во следните шест месеци.

The post Нова поставка во Музејот на Народната банка посветена на приказната за македонскиот денар appeared first on Република.

Музејот на Народната банка доби признание од Македонскиот национален комитет на Меѓународниот совет на музеите (МНК ИКОМ) за залагањата за зачувување и пoпуларизација на нашето културно наследство – непроценливата нумизматичка збирка на Народната банка.

Музејот е добитник на пофалница „18 Мај – Меѓународен ден на музеите за 2021“ за Mузејски проект на годината за проектот Видеобелешки на Музејот на Народната банка.

Овој проект поседува повеќе значења и цели насочени кон унапредувањето на едукацијата на учениците за културно-историското наследство како модерна алатка за воспоставување кохезивни врски внатре во општеството. Со проектот всушност се врши мултимедијална презентација на различни парични средства коишто биле ковани на македонска почва од крајот на 6 век пр. н.е. па сè до 17 век. Исто така, проектот има за цел и да ги едуцира помладите генерации, односно учениците од трето до деветто одделение, и за парите, нивните функции и карактеристики во минатото, но и денес, како и за начините за нивно професионалното чување и заштита на монетите, наведуваат од НБ во објава на Фејсбук.

Од Народната банка посочуваат дека за нив и за Музејот, ова признание од страна на Меѓународниот совет на музеите е од големо значење, и претставува инспирација за реализација на нови проекти кои би имале за цел идно презентирање на македонското културно богатство, дома и пред светот.

The post Музејот на НБ доби признание за зачувување и популаризација на културното наследство appeared first on Република.