Во Музеј на македонска борба вечер од 20 часот ќе биде одржан концерт на Весна Ѓиновска Илкова – сопран и Кристина Светива – пијано.

На програма се дела од Т. Прокопиев, Р. Аврамовски, С. Стојков, Т. Зографски, Т. Скаловски, С. Голабовски, Ј. Андреевска, Б. Светиев, А. Џамбазов.

Весна Ѓиновска Илкова е водечки драмски сопран во Македонија, позната по својата софистицирана вокална техника, музикалност и сценска присутност. Илкова има богата домашна и меѓународна кариера, со настапи во Данска, Хрватска, Словенија, Бугарија, толкувајќи главни улоги во опери како „Аида“, „Отело“, „Турандот“, „Мадам Батерфлај“, „Симон Боканегра“, „Атила“, „Моќта на судбината“, „Бал под маски“ и „Лидија од Македонија“.

Кристина Светиева е една од најталентираните македонски пијанистки, со богата концертна активност. Успешно настапува на сцените низ Македонија („Охридско Лето“, „Скопско Лето“, „Денови на Македонска Музика“) и на меѓународни сцени во Турција, Италија, Франција, Бугарија, Шведска, Холандија, Хрватска, Чешка и САД. Таа е добитник на бројни државни и меѓународни награди. Работи како вонреден професор по пијано на Факултетот за музичка уметност во Скопје.

The post Концерт на Весна Ѓиновска Илкова и Кристина Светиева во Музеј на македонска борба appeared first on Република.

Во Музејот на македонската борба денеска ќе биде отворена изложба по повод 140 години од раѓањето и 100 години од убиството на Арсениј Јовков.

Како што е најавено, на настанот во Музејот, под наслов „Арсениј Јовков за Македонија со пушка, перо и објектив” ќе се обрати претставник од Институтот за национална историја, а ќе се промовира поштенска марка издадена од АД Македонска пошта со ликот на Арсениј Јовков. Исто така, ученици матуранти од СУГС „Арсениј Јовков“ од Скопје ќе читаат творби за патронот на учулиштето.

Настанот е организиран од Институтот за национална историја, со поддршка на членовите на семејството на Арсениј Јовков.

The post Одбележување на 140 години од раѓањето и 100 години од убиството на Арсениј Јовков appeared first on Република.

Изложбата „Анатомија на муралот – Илинден  1903, Борко Лазески“ ќе биде отворена денеска во 19:30 часот во Музејот на македонската борба за самостојност. Изложбата се отвора во чест на 121 година од Илинденското востание и 80 години од Првото заседание на АСНОМ – темелникот на македонската државност, а содржи селекција од 24 скици и цртежи, изработени од Лазески, кои послужиле како план за монументалната фреска „Илинден 1903“. Тие за првпат ќе бидат претставени пред македонската публика.

Авторка е Марија Коробар, а изложбата се организира во соработка со Асоцијацијата за култура ИКОН од Скопје.

Делото е создадено во 1950 година и изложено на Есенскиот салон на Друштвото на македонски ликовни уметници, а истата година е поставено во Домот на ЈНА. Зградата на домот беше разурната во земјотресот од 1963 година, а фреската ‘Илинден 1903’ уништена. По неколку обиди да се обнови, конечно во 1991 година, Лазески ја реизведува фреската ‘Илинден 1903’ според оригиналните шеми, во Хотелот ‘Монтана’ во Крушево каде се наоѓа и денес, велат од Музејот.

Лазески (1917-1993) е македонски ликовен уметник кој се смета за предвесник на првата повоена генерација на академски образувани уметници во Македонија. Во 1933/34 година Лазески се запишал  на Ликовната академија во Белград. Дополнително го продолжува школувањето во Бугарија, на Државната уметничка академија во Софија, каде ги завршува студиите во 1943. Како стипендист на француската влада во почетокот на 1945 година се запишува на париската Висока национална школа за ликовна уметност во одделот за фрескосликарство на Дикос де ла Ај. Тука ги проучува монументалните техники, што подоцна ќе станат негова уметничка определба.

Во почетокот на 1945 учествува во формирањето на уметничката школа во Скопје и е еден од основачите на Друштвото на ликовните уметници на Македонија (ДЛУМ). Лазески е прв в. д. директор на Уметничката галерија во Скопје, формирана во 1948.

Изложбата ќе биде отворена до 30 ноември.

The post Скици и цртежи од создавањето на фреската „Илинден 1903“ на Борко Лазески на изложба во Музејот на македонската борба appeared first on Република.

Донации на лични фондови на Анте Поповски и на Матеја Матевски синоќа беа промовирани
во НУ Музеј на македонската борба за самостојност.

Благодарение на соработката со семејствата Поповски и Матевски, музејот ги збогатува
фондовите со подарени материјали за еминентните претставници на втората генерација македонски книжевници чии дела оставија силен печат врз општествената и културната сцена во втората половина на 20. век, беше потенцирано синоќа на свеченоста.

На промоцијата се обратија Ана Китановиќ, в.д. директор и автор, м-р Данијела Трајкова Крстиќ, виш кустос и автор, како и Александар Поповски, син на Анте Поповски и Денко Матевски, син на Матеја Матевски.

Голема благодарност до семејствата за укажаната доверба во Музејот на македонската борба, донирајќи материјали што претставуваат значајно дополнување на музејскиот фонд, рекоа од Музејот на македонската борба.

Анте Поповски (1931, Лазарополе – 2003, Скопје) е македонски книжевник, поет и есеист,
публицист, сценарист, продуцент, преведувач, општественик и академик. Како член на МАНУ и
Светската академија на поезијата на Организацијата за образование, наука и култура на Обединетите нации (УНЕСКО), се профилира како еден од афирматорите на македонска книжевна и културна сцена на национално, но и на меѓународно ниво.

Ако изборот на предметите ја искажува душата на еден човек, ако според изгледот на неговата соба може да се суди за неговата душа, тогаш ние како семејство сме среќни што неговата душа од денес ќе живее во колективната душа на македонскиот народ, на најсветлите негови синови. Неговите предмети не се веќе само наши, туку на Македонија, за која живееше. Затоа, Анте, татко наш, имај вечен живот под покривот на небесна Македонија, истакна, меѓу другото, Александар, синот на Анте Поповски, по повод отворањето на постојаната поставка во Музејот на македонската борба за самостојност посветена на Анте Поповски.

По овој повод на настанот беше прочитана пораката од писателот Венко Андоновски.

Се сеќаваш ли Анте, кога првпат летав со авион со тебе во Варшава, на писателски конгрес, како младо момче штотуку зачекорено во книжевноста, на кое ти му пружаше книжевна поддршка и му го држеше стравот во авионот, водејќи упорно разговор за да престанам да мислам на летот? Тогаш од Варшава ми купи еден мал часовник и една стара мапа на Македонија, што ја пронајдовме во една антикварница. Е па, драг Анте, бидејќи имаше опсесија од собирање часовници и стари мапи на Македонија, се радувам што твоето време од денес ќе се мери со исконското време од старите мапи од наша Македонија, и тоа во Музејот на македонската борба, единственото место достојно да го собере твоето време, твојата љубов кон отечеството и твојата светска, а македонска поезија, химна на светлината на човештвото. И особено се радувам што ова твое селење во вечноста на македонската светлина се случува токму на денот кога она момче што го држеше за рака во авионот за Варшава, денес полни 60 лета. Со љубов, Твој Венко.

Матеја Матевски (1929, Истанбул, Турција – 2018, Скопје) е значајна личност во македонската современа литература и култура, поет на европската лирика, есеист, новинар, преведувач, литературен и театарски критичар. Истакнат општественик и член на МАНУ од 1970 година со значаен придонес во областа на книжевноста и културата на Македонија.

Денко Матевски се заблагодари на сите присутни и рече дека не е убеден дека го бидува за обраќање пред публика како неговиот татко, но дека ќе се обиде.

Иницијативата почната со претходната директорка на Музејот на македонската борба, Даниела Николова во целост се реализираше со професионалниот тим на Музејот и актуелната директорка Ана Китановиќ. Ние како семејство во иднина сме подготвени да ја надградиме и прошириме оваа донација на Матеја Матевски. На музејот му посакувам да истрае со овој проект и да отвори повеќе простор за други наши значајни творци кои со своите дела имаат придонес во борбата за афирмација на македонскиот јазик и култура во светот, рече Матевски.

The post Лични предмети на Анте Поповски и Матеја Матевски од денеска пред посетителите на Музејот на македонската борба за самостојност appeared first on Република.

Панел-дискусија за процесот на зборообразување во македонскиот јазик ќе се одржи денеска, на 2 април во 18 часот, во Музејот на македонска борба и самостојност. Настанот е организиран од група негови ентузијастични љубители, „современи зборци, понесени од љубовта кон нашиот јазик, неговата недокажана приказна, секојдневно соочени со потребата за негов развој“.

Говорници во дискусијата ќе бидат проф. д-р Славица Велева, професорка по предметот Зборообразување на Филолошкиот факултет при УКИМ, Фросина Пармаковска, авторка, проф. д-р Илина Јакимовска од Институтот за етнологија и антропологија, кои ќе ги споделат своите истражувања, искуства и размислувања за значењето и влијанието на зборообразувањето како алатка за развој на македонскиот јазик. Настанот ќе биде модериран од новинарот Васко Попетревски.

„Ќе отвориме дискусија“, велат организаторите на Фејсбук, „ќе се запознаеме со теоретскиот и практичниот дел од процесот на создавање нови зборови и ќе го поставиме прашањето дали сме доволно продуктивни во негувањето и развојот на нашиот јазик.“

– Преку дискусијата, ќе се осврнеме на потребата од повторна кодификација на македонскиот јазик, разгледувајќи дали постојат аспекти што бараат освежување или модернизација во согласност со современите теченија. Дискусијата се надеваме ќе нѐ наведе кон размислување за зборовите што се сметаат за дел од македонската јазична средина, а сепак не се официјално признаени во речниците, истражувајќи ги нивните корени и значење.

Покрај тоа, ќе разгледаме од каде произлегува потребата за нови зборови и зошто оваа потреба е клучна за еволуцијата на јазикот.

Дали технолошкиот напредок, социокултурните промени или нешто трето е тоа што го принудува јазикот како жива материја да расте и да се развива? Но битно е и да ги поставиме и личните прашања – колкава е нашата улога во активното обликување на јазикот и дали сме мрзливи во употребата и развојот на македонскиот јазик или пак нашата креативност цвета на друг јазичен терен? На настанот ќе разговараме за овие прашања и ќе бараме начини како активно да придонесеме кон збогатувањето на нашиот јазик.

Овој настан е место каде што љубителите на македонскиот јазик, историја и култура, ќе можат да разменат идеи и да најдат сопствен начин за збогатување на нашето јазично наследство. Придружете ни се и бидете дел од разговорот за иднината на македонскиот јазик. Влезот е бесплатен – велат организаторите Игор Антов и Виктор Бучковски.

Се надеваме дека тие со оваа и со други акции ќе успеат да му го вбризгаат насушно потребниот идеализам и оптимизам на македонскиот прекрасен, но напатен и запуштен јазик.

The post Трибина за зборообразувањето и иднината на македонскиот јазик во Музејот на македонската борба appeared first on Република.

Изложбата „Една од нас – Мајка Тереза“ е поставена во Музејот на македонската борба за самостојност во чест на 8 Март, Меѓународниот ден на жената.

Циклусот од 24 документарни паноа го портретира животниот пат на Мајка Тереза од нејзиното раѓање во Скопје, почетоците на мисијата во Ирска, мисионерската работа во Индија, па сѐ до нејзината канонизација, соопшти Музејот на македонската борба за самостојност.

Реализацијата на изложбата е резултат на соработката меѓу Музејот и Спомен куќата на Мајка Тереза од Скопје.

Изложбата е претставена во повеќе градови во земјата и во странство, а посетителите ќе можат да ја посетат од 8 до 31 март 2024.

The post Изложба „Една од нас – Мајка Тереза“ во Музејот на македонската борба appeared first on Република.

Гостувачката изложба „Светите новомаченици од Јасеновац во светлината на воскресението“ на Музејот на жртвите на геноцидот од Белград, Република Србија, ќе биде отворена на 16 ноември, четврток, со почеток во 13 часот, во НУ Музеј на македонската борба за самостојност.

Изложбата се состои од дела на монахињата Марија (Антиќ), член на сестринството на манастирот Раѓање на свети Јован Крстител (Јасеновац, Хрватска), дел од Српската православна епархија Пакрац-Славонија, кои се инспирирани од вистинските и трагични настани што се случиле во Јасеновац за време на Втората светска војна. Изложените дела на авторката, која е калуѓерка, а не обучен визуелен уметник, се базирани на иконографските традиции и измешани со наивното, но содржат и суптилна врска со реалистичкото сакрално сликарство на

Христијанската православна црква и најдобрите традиции на школата за иконопис.
Изложбата се организира како резултат на потпишаниот Протокол за соработка меѓу Музејот на жртвите на геноцидот од Белград, Република Србија и Музејот на македонската борба за самостојност.

Македонската публика ќе има можност да ја погледне изложбата од 16 ноември до 15 декември 2023.

The post Изложбата „Светите новомаченици од Јасеновац во светлината на воскресението“ гостува во Музејот на македонската борба appeared first on Република.

Во чест на големиот јубилеј "120 години од Илинденското востание", НУ Музеј на македонската борба за самостојност се вклучува во одбележувањето со серија настани коишто ќе бидат организирани во текот на оваа јубилејна година.

Започнуваме со презентирање на изложба во просторот на музејот поставена на 26 врамени паноа со фотографии и документи претставувајќи ги историските премрежија на патот до независноста на Македонија во 1991 година, каде се вткаени 120 години борба за државност и самостојност, информирааат оттаму.

The post 26 врамени паноа со фотографии и документи во чест на 120 години од Илинденското востание во Музеј на македонската борба appeared first on Република.

Влезот во Музеј на македонската борба за самостојност утре ќе биде слободен во чест на Меѓународниот ден на музеите, 18 Мај. Музејот ги поканува сите заинтересирани да ја посетат постојаната поставка во редовното работно од 10 до 18 часот.

Оваа година, Меѓународниот совет на музеите ИКОМ го одбележува денот на музеите 18 мај со темата „Музеи, одржливост и благосостојба“.

Тие имаат свој придонес во општеството за постигнување на целите за одржлив развој: од поддршка на климатските активности и поттикнување на инклузивноста, до справување со социјалната изолација и подобрување на менталното здравје, стои во соопштението од НУ Музеј на македонската борба за самостојност.

The post Утре бесплатен влез во Музејот на македонската борба appeared first on Република.

Во Музејот на македонската борба утре (среда, 15 март) со почеток во 19 часот ќе се одржи концертот под наслов „Слободна среда“ концерт бр.2.

1. В. А. Моцарт - „Дует во огледало“ (G-dur)
исполнуваат: Јулијана Огњанова - виолина и Ива Бабуновска - виолина (VII и VI одд.)
ООМУ ''Стефан Гајдов'' Велес
класа: проф. Елена Ѓоргиевска

2. Ф. Крајслер - „Љубовни маки“
исполнуваат: Јана Јовиќ - виолина и Давид Павиќ - пијано (III год.)
ДМБУЦ „Илија Николовски - Луј“
класа: проф. Милена Тодоровска-Мургоски; проф. Елена Костовска

3. Ј. С. Бах - Суита за виолончело бр.1
- Прелудиум
- Менует I, II
исполнува: Александар Ицковски - виолончело (I год.)
ДМБУЦ „Илија Николовски - Луј“
класа: проф. Александра Јаневска

4. М. де Фаја - Jota from Spanish Folk Song Suite
исполнува: Илија Јовчев - виолина (II год.)
ДМБУЦ „Илија Николовски - Луј“
класа: проф. Јелена Туфекчиевска
пијано: проф. Весна Ангелова-Христов

5. Ш. Бериот - Концерт за виолина и оркестар бр.7 (G-dur), I став
Ф. Крајслер - La Gitana
исполнува: Божана Гошева - виолина (II год.)
ДМБУЦ „Илија Николовски - Луј“
класа: проф. Јелена Туфекчиевска
пијано: проф. Весна Ангелова - Христов

6. Г. Касадо - Requiebros
исполнува: Mагдалена Дрмач - виолончело (III год.)
ДМБУЦ „Илија Николовски - Луј“
класа: проф. Александра Јаневска
пијано: проф. Благовесна Булоска

7. Т. Витали - Чакона
исполнува: Бојана Митковска - виолина (II год.)
Факултет за музичка уметност - Скопје
класа: проф. Олег Кондратенко
пијано: Тамара Коминовска

8. Д. Шостакович - 5 пиеси за две виолини и пијано (аранжман за виолина, виола и пијано)
исполнуваат: Јаков Ангелов - виолина
Леона Кондратенко - виола
Горјан Стојановски - пијано

9. Ж. Мартини - Plaisir d'amour
Л. Монтаг - „Екстреми“
исполнува: Ивона Давидовска - контрабас (III год.)
Факултет за музичка уметност - Скопје
класа: проф. Александар Поп-Христов
пијано: проф. Јасна Аврамовска

10. Х. Виењавски - Концертна полонеза оп.4, бр.1 (D-dur)
исполнува: Јаков Ангелов - виолина (I год.)
Факултет за музичка уметност - Скопје
класа: проф. Олег Кондратенко
пијано: проф. Иван Трајковски

Четвртото издание на циклусот концерти „Слободна среда“ започнува на 1 март во Музејот на македонската борба.

Со почеток во 19 часот, а во организација на Музичка младина на Македонија (МММ), серијата концерти ќе продолжат и на 15, 22 и 29 март, како и на 5 и 12 април.  Сите концерти ќе започнуваат во 19 часот, а влезот е бесплатен за сите посетители.

Според програмата од оваа година се планирани шест концерти на кои ќе се претстават повеќе од 50 музичари, на возраст од 10 до 30 години, од повеќе градови во земјава.

Платформата „Слободна среда“ претставува циклус концерти на кои настапуваат повеќе музичари или состави од музичари – инструментални и вокално- инструментални – кои се претставуваат со едно до две дела. Концертите им овозможуваат на младите учесници постепено да градат искуство на сцена и пред публика. Нѐ радува тоа што секоја следна година заинтересираноста кај младите е сѐ поголема, а среда веќе станува резервиран термин и кај публиката“, истакна Александар Герасимовски од МММ.

The post „Слободна среда“ концерт бр. 2 во Музејот на македонската борба appeared first on Република.

Во Музејот на македонската борба за самостојност вечерва е отворена изложбата „Спомен куќа на Тоше - чувар на спомените, животот и делото на најголемата македонска поп икона“ на која се прикажани 15 форекси и 15 фотографии на платно заедно со два дела од облеката на Тоше, како и неговиот омилен музички инструмент, гитарата.

Директорката на Музеј на македонската борба за самостојност, Даниела Николова, кажа дека преку изложбата на 15 форекси и 15 фотографии на кванс платно, посетителите ќе имаат можност да го проследат животниот пат на Тоше Проески.

Времето поминува, но спомените остануваат вечни. Да се сеќаваме на ликот и делото на Тоше и понатаму и секогаш да ја пренесуваме неговата порака за љубов, несебичност и хуманост, бидејќи само така ќе го задржиме споменот за него, истакна Николова.

Директорката на НУ Спомен куќа на Тодор Проески, Лефкија Гажоска, ја објасни причината зошто проектот е насловен „Спомен куќата на Тоше - чувар на спомените“.

Спомен куќата има посебно место во животите на сите фанови на Тоше и на едно место ќе можат да видат се што е поврзано со него, појасни Гажоска.

Изложбата на која се претставени животот и делото на Тоше почнувајќи од неговото детство до последните постхумни награди и албуми, ќе биде отворена за јавноста до 23 ноември, а проектот е реализиран со поддршка на Министерството за култура.

The post Изложба во чест на Тоше во Музејот на македонската борба за самостојност appeared first on Република.

Изложбата „Од семејно кон институционално културно наследство - семејство Шабан“, ќе биде отворена на 17 ноември (четврток) со почеток во 19 часот во Музејот на македонската борба
за самостојност.

Изложбeната експозиција ја презентира пред јавноста богатата донација на музејот од семејството Шабан, која содржи лични предмети во временски интервал подолг од 200 години, подарени од Џангул Шабан.

Музејските предмети класифицирани во категориите лични, домашни покуќнински и метални предмети, нѐ носат низ спомените на три генерации, претставници на семејството Шабан. Нивната семејна историја се простира низ четири државни системи на една иста територија и го прикажува придонесот на носителите на презимето Шабан кон професионалниот политички и социјален живот на овие простори.

The post Изложба „Од семејно кон институционално културно наследство – семејство Шабан“ во Музејот на македонската борба appeared first on Република.

На Фестивалот на музичките уметници на Македонија, „Златна лира“ во понеделник, 24 октомври, во Музеј на македонската борба, во 20 часот ќе се одржи концерт на Нинослав Димов - саксофон и Маја Поповиќ Караиванова - пијано.

На програмта се дела од Благој Цанев, Пјер Санкан, Роберт Шуман, Пиет Свертц и Астор Пјацола.

Нинослав Димов дипломира во класата на проф. Стојан Димов на Факултетот за музичка уметност во Скопје 2004 год., а магистрира 2006 год. По дипломирањето, продолжува со своите студии во Берлин, Германија на Universität der Kunste, во класата на проф. Детлеф Бенсман. Во 2006 год. успешно ги завршува додипломските студии по саксофон и продолжува со специјализација "Konzertexamen". Добитник е на повеќе награди на републички и интернационални натпревари, и редовен учесник на престижни семинари по саксофон во Словенија, Хрватска, Грција, Франција, Германија.

Нинослав покрај многубројните рецитали, бележи и повеќе солистички настапи со Македонската филхармонија, Косовската Филхармонија, берлинскиот "Lietzeorchester". Уште од почетокот на неговите студии тој е водач на Саксофон квартетот „Димов" со кој настапувал во Дубровник, Сараево, Белград, во рамки на фестивалите „Скопско Лето", „Охридско Лето" и други. Во 2006 год. свири неколку концерти со светски реномираниот ансамбл Berliner Saxophon Quartett. Од 2007 год. тој е член и ко-основач на „Bensmann Saxophon Quartett", со кој бележи повеќе настапи во Европа, САД и Кина. Од 2017, по долгогодишно лично ангажирање и како идеен творец, го организира веќе традиционалниот Меѓународен фестивал по кларинет и саксофон "SaxClar" во Скопје и е негов уметнички директор.

Во моментот Нинослав Димов е редовен професор по саксофон и камерна музика на ФМУ во Скопје, член на Биг Бенд оркестарот при МРТ, ЗЏМ Биг Бенд, Баги Биг Бенд и саксофонист по потреба на Филхармонија на Република Македонија.

Маја Поповиќ е родена во Скопје, каде и го завршува основното и средното музичко образование (класи на Снежана Чадиковска и Марија Писинова). Дипломира во 2003 год. со највисоки оцени на одделот за пијано на ФМУ во Скопје (класа на Евушка Елезовиќ), каде ги завршува и магистерските студии во 2011 година. Во текот на школувањето активно учествува на мастер класите кај реномирани пијанисти и педагози: Борис Романов, Јокут Михајловиќ, Арбо Валдма, Жени Захариева, М. Молова. Носител е на повеќе награди на државни и меѓународни натпревари по музика.

Како солист и камерен музичар настапувала и реализирала концерти во низ целата држава, во рамки на фестивалите и манифестациите „Скопско лето“, „Прилеп, град на културата“, „Прилепско лето“, „Гевгелиско лето“, и на меѓународната сцена во Ниш, Белград, Софија.

Денес работи како професор по пијано и камерна музика во ДМБУЦ „Илија Николовски – Луј“ во Скопје.

Влезот е слободен.

The post Концерт на Нинослав Димов и Маја Поповиќ Караиванова во Музејот на македонската борба appeared first on Република.

Музејот на македонската борба за одбележување на празникот 11 Октомври ќе организира изложба со наслов „Жената борец за слобода и македонска држава”. Изложба за македонските хероини, истакнати жени за време на Народноослободителната борба.

Вера Циривири Трена, Вера Јоциќ, Ибе Паликуќа, Естреја Хаум Овадија, Елида Караманди, Невена Георгиева Дуња се само дел од многуте жени кои се вклучиле во револуционерната борба за слободна Македонија.
Овие наши хероини со различна вера и народност преку борбата за слобода се бореа и за афирмација, слободно делување , одлучување и целосна еманципација.
Женските приказни се дел од континуираниот музејски опус во чиј фокус е родовата еднаквост и кој говори за истакнати жени од областа на науката, уметноста, спортот, бизнис секторот, човековите права, медиумите, велат од Музејот.

Проектот „Неколку нијанси женски приказни” ги величи и отсликува жените и нивни успеси во Македонија од 19 и 20 век, па сè до денес.

Жени кои пионерски делувале и продреле во македонското општество дури и во оние моменти кога нивниот живот зависел од нивните одлуки, а нивните одлуки значеле Живот! и го запечатиле нивниот.
Овој проект визуелизира жени кои биле дел од создавањето на нашата историја и создале приказни, додаваат од Музејот.

Од кратките видеа посветени на жените во минатото, го издвојуваме видеото посветено на хероината Оливера Вера Јоциќ

https://youtu.be/2PctewDl65s

The post Изложба „Жената борец за слобода и македонската држава“ во Музејот на македонската борба во чест на 11 Октомври appeared first on Република.

Поставката во првото одделение на Музејот на македонската борба е збогатена со предмети во категоријата ладно оружје од 18. и 19. век, како дел од презентацијата на музејските раритети, информираат од Музејот на македонската борба - Скопје.

Предметите се обработени и евидентирани.

Нагласуваме дека предмети: Хелебарда, Бојна секира,Бојна Вила и Копје се ставени во категоријата на ладно оружје од XVIII и XIX век, како дел од презентацијата на музејските раритети во поставката.

Уметничката обработка на металот при изработка на различни видови оружје, особено се развива во XVII век кога се забележува сложена сублимација на западни и источни стилови и влијанија, а и примена на веќе затекнатите орнаменти во изработка на оружјето.Примената на определени техники и орнаменти, претставуваат препознатлив симбол на македонските оружарски работилници особено од Западниот дел на Македонија.Во македонските оружарски работилници за производство на студеното, но и на огненото оружје, работеле и туфекџии и кујунџии кои раскошно го украсувале оружјето и вложувале голем труд околу нивната изработка.
Токму богатото и раскошно украсување на оружарските производи, со месингани орнаменти, ги направило оружарските производи од Македонија исклучително популарни и препознатливи во пошироки рамки, велат од Музејот на македонската борба.

Од Музејот на македонската борба упатуваат голема благодарност до Благоја Механџиски-Зегин за донација на овие предмети кои се од исклучително значење.

The post Збогатена поставката на Музејот на македонската борба appeared first on Република.

Во Музејот на македонска борба вечерва во 20 часот рецитал ќе одржат бас-баритонот Иван Наумовски и пијанистката Елена Атанасовска. Под наслов „Песни од патувања“, тие ќе изведат уметнички песни на неколку јазици. На програмата се дела од дела од Р. Шуман, Ј. Хајдн, Ј. Брамс, Ж. Ибер, Р. В. Вилијамс, но и дела од македонските автори Томислав Зографски, Горан Начевски и Дарија Андовска. Влезот на концертот е слободен.

Композиторот Начевски на Наумовски му го посветил своето видување на македонската народна песна „Параходот“, а композицијата „Марика мома убава“ од Зографски е веќе култно дело во македонската музичка историја. Со македонската премиера на композицијата „Со маки сум се родил јас“, Иван Наумовски го заокружува циклусот „Песни од татковината“ од композиторката Андовска, чија изведба ја започна на целовечерниот концерт на маестро Симон Трпчески.

Наумовски дипломирал во Скопје соло пеење, магистрирал во Виена на државниот универзитет. Добитник на наградата „Виртуози“ за најдобар млад музички уметник во Македонија.

The post Рецитал на Иван Наумовски и Елена Атанасовска вечерва во Музејот на македонската борба appeared first on Република.

Музејот на македонската борба за самостојност го одбележува Меѓународниот ден на музеите со слободен влез за сите посетители на 18 мај во редовното работно време од 10 до 18 часот.

Како дел од постојаната музејска поставка посетителите, меѓу другото, ќе можат да ги погледнат и ексклузивните амбиентални претстави на етно куќа и берберницата на Гемиџиите, музејските раритети со исклучителни париња оружје и покуќнина, специјалната тактилна изложба ФОКУС, уметнички портрети на истакнати македонски историски ликови и останати презентации на македонското историско и културно наследство.

Дел од програмата на музејот е и ретроспективната изложба „Хартии" на познатиот македонски уметник Сергеј Андреевски која е поставена во холот на Музејот на македонската борба.

Годинашната тема на Меѓународниот ден на музеите е „Моќта на музеите“.

Меѓународниот ден на музеите, 18 Мај, е востановен од Меѓународниот совет на музеите (ИКОМ) во 1977, со цел да се насочи вниманието на јавноста за важноста на улогата на музеите во современите општества.

The post Слободен влез во Музејот на македонската борба по повод Меѓународниот ден на музеите appeared first on Република.

По повод 8 мај, Денот на сеќавање и помирување денеска во Музејот на македонската борба беше отворена изложба на фотографии насловена „XXI век. Европа. Непростливо злосторство” во чест на жртвите од Втората светска војна (1939-1945) и Руската војна против Украина од 2022 година.

Изложбата, која е реализирана од страна на Украинската амбасада, Украинците и Музејот на македонската борба, тематски е составена од три композиции „Деца на војната”, „Непростливи злосорства на 2022 година” и „Две војни, исти злосторства”.

На свечениот настан за отворање на изложбата, се обрати украинската амбасадорка во земјава Наталија Задорожњук која нагласи дека Украинците се херојски и храбар народ.

Во време на неволја ние сме обединети, ние сме една целина. Ние имаме прекрасна, моќна Армија. Ние сме на наша земја и никому нема да ја дадеме. И заедно, со нашите сојузници, како што беше за време на Втората светска војна, со земјите од антихитлеровата коалиција, а сега со земјите од антипутинската коалицијата, ќе победиме и сега, затоа што вистината и правдата се на наша страна, потенцира Задорожњук.

Осми мај, како што истакна таа, во Украина и во светот е ден на сеќавање и помирување, односно спомен за загинатите во Втората светска војна, во која загинаа од 8 до 10 милиони Украинци.

За да ги надомести овие демографски загуби на Украина и беа потребни околу 25 години. Историјата на украинската Втора светска војна е исто така историја на окупација. Ние Украинците се сеќаваме каква страшна трагедија беше за нас Втората светска војна. За разлика од Русите, за нас 8-9 мај не е триумф, не е празник, туку спомен, оддавање почит на жртвите од војната, потсетување на страшните злосторства. За нас ова не е култ на победата, туку ценење на мирот и животот, рече амбасадорката Задорожњук.

Војната на Русија против Украина, додаде таа, е страшна војна, без почитување на законите за војна од страна на руските окупатори.

Тие војуваат не толку против војниците колку против цивилното население, вршат воени злосторства, насилни убиства на цивили, силување на жени и деца. Ова се се одвива во Европа во 21 век, посочи Задорожњук.

На настанот се обрати и директорката на Музејот Даниела Николова, која појасни дека изложбата е претставена на 22 паноа и оти преку фотографии е прикажан процесот на зачувување на сеќавањето и помнење на настаните кои оставаат лузна и на идните генерации.

Претседателот на Здружението на Украинците „Лесја Украинка” Олександр Урбанович кој се обрати пред присутните, истакна дека војната во Украина е војна за уништување на украинската нација.

Се трудиме да допреме до светската заедница за повеќето луѓе конечно да разберат дека оваа војна не е војна само за територија, туку за уништување на украинската нација, рече Урбанович.

На отворањето на изложбата, меѓу присутните беа и министерката за одбрана Славјанка Петровска, американската, британската, германската и шведската амбасадорка во земјава Кејт Мари Брнз, Рејчел Галовеј, Анке Холштајн и Кристин Форшгрен Бенгтсон, како и евроамбасадорот Дејвид Гир.

The post Отворена изложбата на украинската амбасада „XXI век. Европа. Непростливо злосторство” во Музејот на македонската борба appeared first on Република.

Во Музејот на македонската борба, вечерва со почеток во 20 часот, во рамките на манифестацијата „Денови на македонска музика“ ќе се одржи концерт на гудачкиот квартет „АТАКА“: Ева Богоевска - виолина, Марија Трајковска - виолина, Илза Бафтиари - виола, Маја Михајловска - виолончело.

ПРОГРАМА:
Гоце Коларовски
РАСПЕВИ на тема од Јован Кукузел (1992)

Јана Андреевска
СОКОЛ ЛИ СУМ, БУРА ИЛИ БЕСКРАЈНА ПЕСНА? (2006/2015)

Горан Начевски
ТРИО (1996)

Ангел Спироски
THE TRIUNE HYPOTHESIS (2022)
- R. complex
- Pm. complex
- Nm. complex

Драган Шуплевски
КАПРИЧО (1982)

ЕВА БОГОЕВСКА (1999) започнува да учи виолина на седумгодишна возраст (класа на Анна Кондратенко). Уште на самите почетоци нејзиниот талент доаѓа до израз со победата на Меѓународниот фестивал за класична музика „Охридски бисери“ после која добива покана да одржи два концерта во Братислава, Словачка. На 16 годишна возраст, како најмлад студент во Македонија, се запишува на ФМУ во Скопје (клас на Олег Кондратенко) каде дипломира во 2020 година. Добитничка е на бројни државни и меѓународни награди и признанија на реномирани фестивали и манифестации: Сан Ремо Јуниор во Италија (2012), Лауреат од прв степен на Меѓународниот фестивал за класична музика во Санкт Петербург, Русија (2014), Grand Prix на Меѓународниот фестивал за класична уметности и култура во Ерусалим, Израел (2016 година), Прва награда на Интернационалниот натпревар за класична музика во Њујорк, САД, по кој како првонаградена добива можност да реализира концерт во Карнеги Хол (2017). Настапувала повеќепати како солист со Филхармонија и Националниот оркестар на операта и балетот на Хо Ши Мин, Виетнам, а како солист остварила настапи во Словачка, Малезија, Виетнам, Италија, Русија, Австрија, Чешка, Унгарија, САД, Израел, Франција, Португалија и се разбира на најзначајните фестивали кај нас (Скопско лето, Охридско лето, Денови на македонска музика, Златна лира). Во 2019 година со свој труд, како претставник на Музичката младина на Македонија учествува на Првата конференција за новите начини во изведбата на класичните дела, организирана од Интернационалната музичка младина во Берлин, Германија. Од 2017 година е членка на оркестарот F.A.M.E.S, а од 2020 година е и вработен во Оркестарот на Филхармонија. Од 2021 година е студентка на магистерски студии на Интернационалниот универзитет Еуропа Прима под менторство на проф. Сергеј Островски, редовен професор по виолина на Музичкиот универзитет во Женева, Швајцарија.

МАРИЈА ТРАЈКОВСКА (1992) своето образование го стекнува во ДМБУЦ „Илија Николовски – Луј“ (класи на Олег Кондратенко и Љубиша Кировски). Продолжува на ФМУ во Скопје (класа проф. Михајло Куфојанакис), а во 2013 година добива стипендија за додипломски студии на Конзерваторимот при Лин Универзитетот во Јужна Флорида (класа на Гијермо Фигероа). Во текот на своите студии во САД, Марија учествува на бројни мастеркласи, концерти, натпревари и фестивали. Во текот на студиите на Конзерваториумот за музика е дел од симфонискиот и камерниот оркестар, со кој настапува на повеќе концерти заедно со светски познати солисти, меѓу кои и со реномираниот Џошуа Бел. Дипломира со почести CUM LAUDE во 2017 година. Од 2019 година е вработена во секцијата втори виолини во Филхармонија. Од неодамна е дел од тимот на Трала апликацијата од Чикаго, наменета за онлајн изучување на виолина, а има и своја класа на ученици од целиот свет. Во своето слободно време создава креативна и едукативна содржина за социјалните мрежи Instagram, YouTube и вебстрана под името Violynning. Марија моментално работи со реномираниот виолинист и професор Роберт Степаниан.

ИЛЗА БАФТИАРИ се школува во ДМУБЦ „Илија Николовски – Луј“ (класа на Јован Бицевски), а студиите ги завршува на ФМУ во Скопје во класата на проф. Фросина Балова. Одржала бројни концерти и рецитали со својот брат, пијанистот Шкељзен Бафтиари. Настапувала во повеќе камерни состави и како солист со Македонската филхармонија, со Камерниот оркестар на ДМУБЦ на турнеја во Италија, како и со Камерниот оркестар „Солисти на ФМУ“. Била членка на неколку меѓународни оркестри (CEI Orchestra, Jugest Sinfonie Orchester) со кои реализирала концерти во Италија, Словенија, Австрија и Швајцарија, а веќе трета година е дел од германскиот оркестар Manheimer Philharmoniker со кого настапила во престижни концертни сали како ElbPhilharmony во Хамбург, Queen Elizabeth Hall во Антверп заедно со врни солисти, меѓу кои и Марта Аргерич. Илза е вработена во Косовската филхармонија, а од 2020 година и во Филхармонија. Веќе пет години е активна членка на Камерниот оркестар на Музичка младина на Македонија, а редовно реализира и проекти со оркестарот на филмска музика F.A.M.E.S.

МАЈА МИХАЈЛОВСКА средното образование го завршува во ДМУБЦ „Илија Николовски – Луј“ (класа на Паскал Краповски), а дипломира CUM LAUDE на ФМУ во Скопје (класа на Живко Фирфов). Во 2012 година ја добива наградата „Франк Манинг“ од истоимената британска фондација за најдобар студент на генерацијата. Во 2015 година ги запишува магистерските студии на ФМУ во Скопје, работејќи под менторство на познатиот чешки виолончелист Микаил Канка. Во периодот 2025/06 година е дел од Yunge Orchester Akademie – YSO со кој реализира турнеи во Швајцаријаи на Балканот. Во сезоната 2006/07 и 2008/09 настапува со европскиот оркестар CEIYO на концертни турнеи во Италија, Австрија, Словенија и Романија. Во 2016 година членува во скандинавскиот оркестар Orkester Norden со којшто концертира во Данска, Шведка и Финска, под диригентската палка на Лоренс Фостер. Настапувала како солист со Филхармонија, оркестарот на ДМБУЦ и АРКО. Добитничка е на бројни награди и признанија. Редовно настапува со својата сестра-близначка Марија како дел од дуетот виолончела „Twins Cello“. Редовно учестува на мастерски курсеви и семинари работејќи со истакнати педагози и уметници (Астрит Селита, Имре Калман, Александар Књазев, Венцеслав Николов, Марк Купе, Детлеф Милке и Јоханес Мозер). Во 2012 година, на покана на тогашната селекторка на фестивалот „Охридско лето“, проф. Гордана Јосифовска – Неделковска, Маја настапи како гостин на концертот на познатиот виолончелист Енрико Диндо, на затворањето на фестивалот. Од 2015 година е дел од оркестарот на Филхармонија, а редовен учесник е и во проектите на филмскиот оркестар F.A.M.E.S. Маја еднакво комотно се чувствува во изведбата на класичен репертоар и други музички жанри. Таа е дел од бугарскиот кросовер квартет „Дестини“ со кој од 2019 година настапува во Бугарија и низ Европа.

Влезот на концертот е слободен.

The post ДММ 2022: Концерт на гудачкиот квартет „АТАКА“ appeared first on Република.

Семејството на познатата македонска поетеса Светлана Христова- Јоциќ подари обемен личен фонд на Музејот на македонската борба за самостојност.

Сергеј Андреевски, син на Христова - Јоциќ на Музејот му подари лични документи и предмети како дипломи, награди, признанија, реферати, лични ракописи и слично.

Музејот во текот на 2021 година започна со дополнување на музејскиот фонд преку дарови на лични предмети од семејства на познати историски личности, иницијатива која продолжува и оваа година.

По неколкуте работни средби со директорката Даниела Николова, познатиот ликовен уметник Сергеј Андреевски, син на Светлана Христова- Јоциќ, со задоволство ја прифати нашата иницијатива да биде дел од семејствата кои ќе донираат лични фондови на музејот, каде овој материјал соодветно ќе се чува и презентира. Фондот вклучува лични документи и предмети како дипломи, награди, признанија, реферати, лични ракописи и слично, велат од Музејот.

Светлана Христова–Јоциќ е македонска поетеса, есеист, писател и поранешен претседател и истакнат член на ДПМ.

The post Семејството на Светлана Христова-Јоциќ подари лични документи, предмети и лични ракописи на Музејот на македонската борба за самостојност appeared first on Република.