Се размислува дали модуларната болница лоцирана кај Инфективната клиника во Скопје да ја преземе Министерството за одбрана или пак таа да се пренесе во Затворот Идризово, изјави министерот за здравство Арбен Таравари кој беше во посета на Болницата во Штип.

Таравари, денеска во одговор на новинарско прашање, посочи дека има одлука од Владата за преземање на модуларната болница од страна на МО, но оти треба амбуланта и во Затворот Идризово.

За модуларната болница на Инфективна клиника веќе има одлука на Влада со која таа болница треба да ја преземе Министерството за одбрана. Има и друга идеја бидејќи треба болница во затворот во Идризово. Сега сме во дилема дали таа модуларна болница да ја пренесеме таму за да служи како амбуланта во Затворот Идризово – изјави Таравари, при посетата на Клиничката болница Штип.

Во однос на модуларната болница во Штип, што е во функција од март 2021 година, Таравари рече дека треба да се размисли рационално како да се искористи каде што има потреба.

Во тек на ковид пандемијата, со одлука на Министерството за здравство, беа изградени модуларни болници во 16 градови низ државава.

The post Таравари: Се размислува дали модуларната болница кај Инфективната да ја преземе Министерството за одбрана или пак да се пренесе во Затворот Идризово appeared first on Република.

Претставници на семејствата на 14 луѓе кои го загубија животот во пожарот во модуларната болница во Тетово на 8 септември 2021 година преку јавни протести ќе бараат да има ново обвинение.

Тие денеска во СВР Тетово пријавија дека во петок 8 септември на двегодишнината од пожарот ќе организирааат марш и јавен протест со барање да има ново обвинение.

-Очекуваме ново обвинение. Ние од почетокот бараме правда и очекуваме правда, но во оваа држава се гледа дека нема правда. Но излегува вистината кој е крив. Јас спомнав неколку пати дека не се овие тројца, имаат нешто вина ама има и поголем синџир. Тие од ИРЛ новинарите ја извадија вистината кој е виновен, а кој не е виновен, изјави Мумин Исмаили, кој во пожарот ги загубил братот и мајката.

Во петок најавија дека собирот ќе почне кај модуларната болница.

-Ние како фамилии на починатите во пожарот организираме протести и порачуваме на сите граѓани да се приклучат во петок во 14 часот, ќе бидеме пред модуларната болница и ќе одиме преку центар до судот. Порачуваме сите граѓани на Тетово ова да не биде партиски, ние фамилиите сме организатори и да нема инцидент, истакна Исмаили.

The post Семејствата на луѓето кои изгореа во модуларната болница во Тетово најавија протест – бараат ново обвинение appeared first on Република.

Група граѓани се собраа денеска пред зградата на Обвинителството и Основен суд во Тетово со цел да реагираат на судскиот процес за трагедијата од 8 септември 2021 кога во пожар во модуларната болница животот го загубија 14 луѓе. Организаторите од иницијативата „Подобро за Тетово“ побараа политичка одговорност за тоа што никој не добил соодветни казни за трагедијата во Тетово и другите случаи каде граѓани ги загубиле животите.

– За пет години имаме четири трагедии, 97 жртви и нула дена затвор. Затоа довербата во правосудниот систем на оваа држава е нула. Животите на граѓаните станаа заложници на пазарења и тендери без критериуми. Се виде дека корупцијата убива. Од целиот процес се докажа дека Обвинителството и Судот се дел и бранители на злосторничко здружување која ја држи државата во заложништво, истакна Елмедина Абдулахи.

Од иницијативата побараа Владата да реагира.

-Бараме Владата веднаш да го разреши јавниот обвинител Љубомир Јовески и тој заедно со другите обвинители инволвирани во оваа монструозно дело да одговараат кривично. Бараме да се судат и казнат вистинските виновници, вклучително и политичарите кои спротивно на законот го доделија тендерот за изградба на фирмата „Брако“. Нема правда, нема мир, посочи Елмедина Абдулахи во барањата.

Граѓаните носеа натписи со различни пароли, преку кои се бараше да има соодветна правда.

– Без да се среди судството во својата содржина држава нема да има во Македонија. Секој ден може да протестираме, но ова нека биде почеток цела Македонија да реагира. Се случило во Тетово, може да се случи секаде. На никого не го интересира што се случува со народот. А народот ги вработува тие горе. Апел до сите да се отрезнат и сè тоа тоа треба од почетокот. Оваа држава треба да се среди или ќе ја нема. Не ќе ја нема од нас, туку од тие што ја водат, изјави граѓанин учесник на собирот.

Присутните на протестот ги оставија натписите и паролите залепени или закачени на зградата од судот.

The post Разрешување на Јовески и правда за жртвите во трагедијата во модуларната болница, побараа граѓаните на протестот во Тетово appeared first on Република.

По втор пат се одложи рочиште за завршни зборови во судскиот процес за неколку кривични дела поврзани со пожарот во модуларната болница во Тетово во септември 2021 година кога животите ги загубија 14 луѓе.  Поради отсуство на адвокатот на еден од обвинетите, поранешниот директор Артан Етеми, судијата Јордан Велковски го презакажа судењето за 29 мај во 10 часот.

Претходно на 25 април завршните зборови беа одложени за денеска поради отсуство на еден од обвинетите, поранешниот директор на болницата Флорим Бесими. Доказната постапка во судскиот процес заврши со последните сведоци кои беа сослушани на 6 април.

И денеска повторно група граѓани се собраа пред судот во Тетово на мирен собир за да искажат поддршка за обвинетиот д-р Бобан Вучевски.

-На правдина го теретат докторот. Треба да одговара тој што ја градел болница, а не доктор кој ги лечел луѓето, што спасувал животи. Бил добар доктор. Наместо во болница го малтретираат тука, истакнаа граѓаните.

Поранешните директори, Флорин Бесими и Артан Етеми се теретат за кривично дело „тешки дела против општата сигурност“, додека докторот Бобан Вучевски за „непостапување според здравствени прописи за време на епидемија“. Клиничката болница како правно лице се терети за две кривични дела, прво за „предизвикување општа опасност“ и за „непостапување според здравствени прописи за време на епидемија“.

Обвинетите на почетокот на судењето истакнаа дека го разбираат обвинението но дека не чувствуваат вина. Судењето започна во декември 2022 година

The post Пак се одложи рочиштето за модуларната болница во Тетово appeared first on Република.

Општина Бутел мора да добие нова модерна Поликлиника, Владата не смее да биде пречка, порача денеска градоначалникот на Бутел, Дарко Костовски.

Беким Сали изјави: Модуларната амбуланта во Бутел е изградена на сомнителен начин.
Истата е изградена од Владата и Министерството за здравство.
Министер за здравство Беким Сали, ќе ве потсетам на една наша средба од неодамна. Ви понудив опција веднаш да се отстрани модуларната амбуланта во Бутел. Ви укажав дека јас како градоначалник на општина Бутел сум спремен да изградиме нова модерна Поликлиника, впрочем како што доликува на една урбана општина. Кога веќе Владата и министерството како надлежни не можат, јас како градоначалник сум подготвен на овој голем чекор.
Вие ми посочивте дека немате против изградба на нова поликлиника, но дека за ваков чин ќе треба да поразговарате на повисоко ниво во Владата. Одговор од вас не добивме сѐ уште, иако од средбата помина повеќе од половина година.
Кога веќе сте констатирале неправилности во изградбата на овие крајно небезбедни и недолични објекти, Ве охрабрувам да ги истражите деталите сѐ до финална завршница. Но, она што ми е поважно, овој пат јавно, повторно да Ве охрабрам, да ја отстраните модуларната амбуланта од Бутел. Јасна цел е ние како општина да изградиме нова модерна поликлиника каква што заслужуваат граѓаните.
Да Ве потсетам дека доколку тоа не го направите Вие и оваа Влада, за многу скоро ќе го направи следната Влада која ќе ја предводи ВМРО-ДПМНЕ. Но, не гледам зошто заради политички калкулации тоа да не го направите веднаш, нема потреба граѓаните да бидат оштетени и да губат време дополнително.
Искрено се надевам на разумно решение, затоа што политиката не смее да биде пречка во остварување вакви важни проекти за граѓаните, порача тој.

The post Владата контра владата? Сомнителна била модуларната амбуланта во Бутел, изградена од владата appeared first on Република.

За денеска во Основниот суд во Тетово е закажан четвртиот обид да почне судењето за пожарот во тетовската модуларна болница што се случи на 8 септември 2021 година во која 14 луѓе ги загубија животите, а имаше и десетина повредени лица.

Судијата Јордан Велковски на 8 ноември судењето го одложи за 7 декември во 10 часот затоа што еден од обвинетите немаше адвокат бранител. Судијата информираше дека доколку не обезбеди адвокат за нареден пат ќе мора да почне главната расправа и без присуство на бранител на обвинетиот.

По десетмесечната истрага почетокот на судењето беше закажано за 6 септември 2022 па се одложи за 14 октомври поради отсуство на двајца од обвинетите. На 14 октомври беше одложено 8 ноември поради тоа што двајца од обвинетите немаа адвокати.

Обвинети се директорите Фљорин Бесими и Артан Етеми, како и докторот Бобан Вучески и Клиничка болница Тетово како правно лице.

Тетовското Обвинителсво ги обвини двајцата директори Фљорин Бесими и Артан Етеми за кривично дело тешки дела против општата сигурност и докторот Бобан Вучевски за кривично дело непостапување според здравствени прописи за време на епидемија додека правното лице ЈЗУ Клиничка Болница Тетово за кривични дела предизвикување на општа опасност и непостапување според здравствени прописи за време на епидемија.

До судење дојде откако на 27 јули Обвинителството поднесе обвинителен предмет од Основен суд Тетово. Обвинителството десет месеци водеше истрага во која стручни анализи и вештачења беа направени од МВР, Технолошкиот факултет, електроинженер и експерти-истражители од сојузната криминалистичка полиција на Германија.

Во октомври 2021 по вештачењето на МВР, Обвинителството информираше дека пожарот во модуларната настанал како последица на запален продолжен кабел, на кој бил приклучен дефибрилатор-апарат за реанимација, полнач за мобилен телефон и уште еден уред, информираше обвинителството.

Тогашните двајца директори на тетовската болница поднесоа оставки, но останаа на функциите се до преструктуирањето во Владата.

Пред два дена започна и отстранување на остатоците од изгорената модуларна болница.

The post Четврти обид да почне судењето за пожарот во тетовската модуларна болница appeared first on Република.

Докторот кој е обвинет за кривично дело непостапување според здравствени прописи за време на епидемија од тетовската модуларна болница, во која живи изгореа 14 луѓе, доктор Бобан Вучески добива поддршка од тетовци.

Во фејсбук статус Јовица Ефкоски Ефко, кој дента бил во прва смена во модуларната болница, зборува за натчовечките напори на д-р Боби за време на пандемијата. Неговиот статус го пренесуваме во целост.

Ја нема да постирам текст што би го презел од некој медиум или другар на фб, ќе напишем неколку реченице за Др. Боби - попознат како Скопски.
Е тој Бобани, доктори кривецот за несреќниот пожар што се деси у модуларната болница у која бев и ја на работа дневна смена и цела ковид криза у неговата екипа у која не имаше многу колеги/шки кои без страв и многу енергија му се спротиставивмо на невидливиот снажен противник-ковид.
Е сега за кривецот, кој прв се пријави како млад доктор пред свите поискусни и постари со стаж доктори у болница да напрае екипе и да крене на Шапка со првите пациенти да работи, за да кризата се продлабочи и префрли кај нас у болница. Е тој Др.Боби е стварно крив што го жртвуеше животот и здравјето за цело Тетово и околија, за секој пациент без разлика на боја, вера, нација, партија, потекло, богат, сиромав и сл.
Тој Др.Боби го запостави семејството, децата, служејќи му на народот, присутен по 24 часа у болница со безброј визите од глава на глава на пациентите, анализе на крв, сатурације, кислороди и не знам што све друго. Одговарајќи на секого на телефон со смиреност и посветеност за и околу лечењето на било кој пациент.
Е тој кривец беше ангажиран да ние персоналот бидемо безбедни и покриени со материјали, храна и вода од страна на самоволни донатори што ни ја носеа, а све што нему му даваја како благодарност тој го оставаше на маса за другарите/кете. Немаше он величина дека е Доктор што свите бараја помош од него, скромен и ведар со многу енергија. У неколку муабети за време одмор му викав брат одмори малу, до когај вака! А он Ефче брате морамо да се справимо. У неколку случаеви смо го испраќале капнат дома у 3 сабајле, у 7.00 братот на визита пред свите. Мие свите имавмо смене и паузе,
само Др.Бобани немаше време за тоа.
Колку само работа и тешки моменти смо имале и виделе, а нарочито Боби за кој ми требе цел ден да пишуем.
На Др. Бобан Вучески му е потребна наша поддршка, поддршка од градот.
На Боби требаше да му се додели плакета за храброст и пожртвованост,
а не да му се суди за било што.
Тоа беше трагедија за сите нас, никој не сака да се деси такво нешто.
Гордоста на Тетово е Др. Бобан, другар и доктор кој сеуште му е потребен на градот и здравството во Тетово❗
Градот е со тебе Скопски ✊

Една година по трагедијата, во тетовскиот суд започна судскиот процес за пожарот во модуларната болница во Тетово. Обвинети се поранешниот директор на Тетовска болница Флорин Бесими, финансовиот директор Артан Етеми и докторот Бобан Вучески. Рочиштето беше одложено за 14 октомври, бидејќи второ и третообвинетиот не дојдоа во судница.

Десет месеци обвинителството собираше докази за да докаже дека Бесими и Етеми сториле „тешки дела против општата сигурност“, лекарот Вучески „не постапувал“ според здравствените прописи за време на епидемија“, додека правното лице ЈЗУ Клиничка болница Тетово е виновно за кривичните дела „предизвикување општа опасност“ и „непостапување според здравствени прописи за време на епидемија“.

Во извештајот на МВР беше наведено дека пожарот настанал како последица од електрична куса врска преку висок преоден отпор во приклучниот кабел на дефибрилатор со кој се вршела реанимација на пациент во една од болничките соби.

Пожарот во модуларната ковид болница се случи на 8 септември минатата година. Во огнената стихија која за неколку минути го зафати целиот објект, животот го загубија 14 лица, од кои 12 пациенти и 2 посетители.

The post Поддршка од тетовци за „доктор Бобани“: Градот е со тебе, Скопски! appeared first on Република.

На интернет страница на Основен суд Тетово во календарот на судења е поставена информација дека судењето за предметот К бр 450/22, односно за модуларната болница е закажано за 6 септември 2022 година во 10 часот кај судијата Јордан Велковски.

Судењето е закажано откако на 16 август предметот за модуларната болница согласно Информациски систем за автоматско управување со судски предмети (АКМИС) беше распределен кај судија. По разгледување на обвинителниот предлог судијата сега го започнува судењето.

–Со предметот поврзан со модуларната болница во Тетово по поднесен обвинителен предлог од страна на ОЈО Тетово со бр. КО 531/22 со кој се обвинети Ф.Б, и А.Е за кривично дело тешки дела против општата сигурност и Б.В. за кривично дело непостапување според здравствени прописи за време на епидемија додека правно лице ЈЗУ Клиничка Болница Тетово за кривични дела предизвикување на општа опасност и непостапување според здравствени прописи за време на епидемија е распределен кај судија од Кривичниот оддел со предмет К бр. 450/22, соопштија од Судот на 16 август.

Пожарот во модуларната болница се случи на 8 септември 2021 кога 14 лица ги загубија животите. По повеќемесечна истрага Основното јавно обвинителство Тетово на 27 јули 2022 до надлежниот суд поднесе Обвинителен предлог против три физички и едно правно лице.

The post На 6 септември почнува судењето за пожарот во модуларната болница во Тетово во која изгореа 14 лица appeared first on Република.

Основниот суд во Тетово денеска соопшти дека предметот за модуларната болница е распределен кај судија, кој во наредниот период по разгледување на обвинителниот предлог треба да ја закаже главната расправа. Предметот е распределен согласно Информациски систем за автоматско управување со судски предмети (АКМИС).

-Предметот поврзан со модуларната болница во Тетово по поднесен обвинителен предлог од страна на ОЈО Тетово со бр. КО 531/22 со кој се обвинети Ф.Б и А.Е за кривично дело  тешки дела против општата сигурност и Б. В. за кривично дело непостапување според здравствени прописи за време на епидемија додека правно лице ЈЗУ Клиничка Болница Тетово за кривични дела предизвикување на општа опасност и непостапување според здравствени прописи за време на епидемија е распределен кај судија од кривичниот оддел со предмет К бр. 450/22. По прием и разгледување на обвинителниот предлог ќе биде закажана главната расправа, соопштија денес од Основен суд Тетово.

Пожарот во модуларната болница се случи на 8 септември 2021 кога 14 лица ги загубија животите. По повеќемесечна истрага Основното јавно обвинителство Тетово на 27 јули 2022 до надлежниот суд поднесе Обвинителен предлог против три физички и едно правно лице. 

The post Основен суд Тетово соопшти дека предметот за модуларната болница е распределен кај судија appeared first on Република.

Најавениот обвинителен акт за трагедијата со модуларната болница е нецелосен и не ги опфаќа вистинските виновници, туку лица кои се далеку подолу на прирамидата на одговорноста. Тоа само покажува дека и случајот со модуларната болница, исто како и со трагедијата со „Дурмо турс“ и „Беса травел“ се водат без да се најде вистинскиот системски причинител, поради кои десетици животи беа предвреме згаснати, велат во партиското соопштение од ВМРО-ДПМНЕ.

Обвинителниот акт, потенцираат од партијата, не ги дава одговорите која е улогата на Министерството за здравство во изградбата на овие објекти, како од надлежните инспекции тие добиле дозвола да работат, која е одговорноста за материјалите од кои беше изграден објектот и редица на други фактори кои доведоа до трагедијата.

Семејствата на настраданите во вакви случај, со вакво судство и обвинителство нема да ги добијат вистинските одговори, како и поради што настрадаа нивните најблиски. Нивната болка нема утеха, но уште поболно е што во Македонија се создава систем на неказнивост во која наместо по коњот се удира по самарот. Затоа за жал системот на неказнивост создава нови и нови трагедии. Тоа мора да престане. Вистинските виновници мора да одговараат и во случајот со тетовската модуларна болница и во секој друг случај, затоа што само така може да се изгради владеење на правото и правна држава, се вели во соопштението на партијата.

The post Обвинителниот акт за модуларната во Тетово не ги опфаќа вистинските виновници, наместо по коњот се удира по самарот appeared first on Република.

Основното обвинителство во Тетово ќе поднесе пријави против четири лица, едно правно и три физички за пожарот во модуларната болница, открива „Алсат“.

Во текот на следните денови се очекува предметот да биде доставен до Судот во Тетово, а по завршување на истрагата ќе бидат поднесени четири пријави.

Во текот на предистражната постапка над 30 доктори и медицински сестри биле повикани да дадат изјава, а биле собрани и сведоштва од очевидци и членови на семејствата.

Во истрагата учествуваа и германски експерти, кои го доставија извештајот пред три месеци за пожарот кој се случи на 8 септември минатата година, а притоа загинаа 14 лица.

The post За пожарот во модуларната болница во Тетово ќе бидат поднесени четири тужби appeared first on Република.

Во тетовското Обвинителство пристигна преводот на извештајот на германските експерти за пожарот во модуларната болница во Тетово на 8 септември минатата година. Како што дознава Алсат од свои извори во обвинителството, во извештајот на германските експерти се наведува дека причина за ширењето на пожарот во тетовската монтажна болница можеби е продолжениот кабел на кој бил приклучен медицински апарат за лекување на пациенти.

Извештајот, според обвинителството, е доставен на анализа на пет обвинители вклучени во истрагата за случајот, кој, откако ќе го анализираат, ќе утврдат дали од овој извештај ќе произлезе правно мислење, за отворање нови истраги, или ќе продолжи со истите истраги што домашните обвинители ги водеа досега. Состанокот на обвинителите се очекува да се одржи во рок од една недела, по што ќе бидат донесени заклучоците.

Од тетовското обвинителство не соопштуваат повеќе детали за содржината на преведениот извештај, со образложение дека е дел од истрагата за случајот, додека од обвинителството велат дека извештајот на германските експерти е исклучително важен бидејќи, од овој извештај ќе може да се отвори нова истрага.

The post И за Германците виновен е кабелот што изгореа 14 луѓе во тетовската модуларна болница?! appeared first on Република.

Ова е во моментов влезот во модуларната болница во Битола! Од три бараки, работи само една!, објави Доц. д-р Викторија Трајков на својот фејсбук профил.

Од исти влез за преглед, терапија и контрола!

Па дали е ова нормално?

The post Дали е ова нормално: Во Битола од три бараки во модуларната болница работи само една appeared first on Република.

Извештајот за пожарот во модуларната болница во Тетово на експертскиот тим од Германија, По цели четири месеци конечно е во рацете на тетовските обвинители.

Деталите од вештачењето ќе се знаат откако ќе се изврши превод, затоа што е на германски јазик, по што ќе се анализира и ќе се донесе одлука, велат од Основното јавно обвинителство.

Извештајот од германските истражители до основното јавно обвинителство - Тетово пристигна во петок. Денеска е издадена наредба да се преведе од германски на македонски јазик, на судски преведувач со лиценца. Обемот на вештачењето е околу седум страни, при што е побарано внимателно да се преведе, затоа што има форензичка терминологија. Потоа тимот од петмина обвинители треба да донесе одлука - соопштуваат од тетовското јавно обвинителство.

За потребите на истрагата беа сослушани сведоците на настанот, како и одговорните лица во болницата.

На почетокот на октомври минатата година беше објавено дека според вештачењето на МВР пожарот во модуларната настанал како последица на запален продолжен кабел, на кој бил приклучен дефибрилатор, односно апарат за реанимација, полнач за мобилен телефон и уште еден уред, а беа направени и вештачења на Технолошкиот факултет и од електроинженер.

Пожарот, во кој живи изгореа 14 луѓе се случи вечерта на 8 септември 2021 година. На видеото од безбедносните камери се гледа како пациенти се спасуваат преку прозори, а објектот е цел во пламен, за само три минути.

The post Стигнал во саботата, а дури денеска е даден на превод: Германскиот извештај за модуларната болница во Тетово е напишан на седум страници appeared first on Република.