Хрватската поп-ѕвезда Миа Димшиќ го објави спотот за темата „Општествени правила“ (Društvena pravila) - песна создадена во соработка со македонскиот виртуоз на гитарата, Влатко Стефановски.

Видеото е снимено во Скопје и зрачи со урбана естетика, којашто заедно со стиховите на Миа, поттикнува на размислување за општествените норми. Режијата е на Ива Чаиса од „Кроација рекордс“ (Croatia Records), а зад камерата се најде и нашиот Александар Ристовски. Дамир Бачиќ е извршен продуцент на видеоспотот.

„Друштвена правила“ носи звук од три студија - „Вајт стоун продакшнс“ во Риека, „Кроација рекордс“ во Загреб и студиото на Влатко Стефановски во Скопје.

Снимањето на спотот во Скопје беше прилика добро да го запознаам градот, но пред сѐ - одлично се забавував. Со Ива Чаиса како режисерка и Александар Ристовски пред камерата, го изодев градот долж и попреку, а го посетив и студиото на Влатко Стефановски, кој се појавува на крајот од видеото. Македонците се прекрасни луѓе и се надевам дека во иднина ќе има повеќе можности за посета на Македонија. Горда сум на песната „Друштвена правила“ и се надевам дека овој спот ќе ѝ даде дополнителна димензија, изјави Миа.

Преку текстот и изведбата, пејачката, вели, храбро ги истражува површните непишани правила и предизвикот на конфронтирачките конвенции. Новиот сингл ѝ ја открива бунтовничката страна, истакнувајќи ги притисоците и цензурата со коишто многумина се соочуваат.

https://www.youtube.com/watch?v=-iGxdC2Ut2c&embeds_referring_euri=https%3A%2F%2Fkanal5.com.mk%2F&source_ve_path=Mjg2NjIsMjg2NjY

The post Хрватската поп-ѕвезда Миа Димшиќ го објави спотот за „Општествени правила“ (Društvena pravila) – песна создадена со македонскиот виртуоз на гитарата, Влатко Стефановски appeared first on Република.

Македонската информативна агенција – МИА во текот на синоќешните и утринските часови била цел на хакерски напади што довело до повремени кратки прекини во објавите, информираа од Агенцијата.

Ангажираните ИТ експерти лоцираа дека нападите доаѓаат од Индија и Кина.

The post МИА била цел на хакерски напади од Индија и Кина appeared first on Република.

Синдикатот на Медиумски Информативни Агенции (СМИА) го потсетува премиерот Димитар Ковачевски на ветувањето дадено во неодамнешното интервју за Медиумската информативна агенција (МИА) дека барањето за зголемување на платите на вработените ќе биде ставено на дневен ред на владина седница.

Во интервјуто дадено на 6 август, премиерот нагласува дека исклучително ја цени улогата и значењето на државната МИА и дека очекува прашањето за усогласувањето на платите на вработените да се реши брзо, на некоја од наредните владини седници. Од тие причини, бараме на следната седница, Владата да ја разгледа и и да ја усвои точката за зголемување на бодот и дополнително да се усогласи со покачувањето според Општиот колективен договор (ОКД), наведува во соопштение СМИА.

Барањето на менаџментот на МИА е покачувањето на бодот да биде 16,7 проценти, а синдикатот бара зголемување за 30 проценти како што тоа е направено во Министерството за финансии, Управата за јавни приходи, Царината.... Ваквото барање, посочува синдикатот, се темели на фактот што поради потпросечните плати, Агенцијата се соочува со одлив на кадар.

Синдикатот потсетува дека за барањето не се потребни дополнителни финансиски средства од Буџетот на државата бидејќи средствата се обезбедени во Буџетот на МИА.

Како Агенција која еден дел од средствата ги обезбедува од Буџетот, а согласно потпишаниот Општ колективен договор за јавен сектор, Би сакале да потсетиме и на одредбите од ОКД дека за вработените во јавниот сектор во септември ќе има зголемување на платите за 10 проценти, посочуваат од СМИА.

The post Барањето за зголемување на платите на вработените во МИА да биде ставено на владина седница, бара СМИА appeared first on Република.

Вработените во Медиумската Информативна Агенција – МИА, организирани од репрезентативниот синдикат на Агенцијата СМИА и ССНМ очекуваат премиерот Димитар Ковачевски да го одржи ветувањето кое го даде во интервјуто за МИА дека на наредна седница на Влада ќе го усвои предлогот за зголемување на платите на вработените во државната новинска Агенција. До тогаш протестот се става во мирување.

Доколку не биде исполнето ветувањето на премиерот до наредната седница, вработените преку синдикатот ќе ја отпочнат постапката за штрајк, а тоа значи блокада на работата, односно МИА нема да продуцира вести. Штрајкот ќе се одржува пред Владата според однапред предвидена динамика.

На состанок со вработените, менаџментот на МИА информираше дека точката за зголемување на платите на седницата на Влада на 1 август 2023 година е тргната од дневен ред со образложение дека МИА треба да го усогласи финансискиот план со Министерството за финансии и да достави нова одлука со барање за покачување на бодот. Ова според менаџментот веќе било направено.

Потсетуваме дека МИА бара одобрување за покачување на платите за кои има сопствени средства од предвидениот буџет и од остварена добивка која секоја година е се поголема од претходната. Поради фактот дека новинарите во МИА не ги опфати ниту едно покачување во минатите години, нема да го прифатиме процентот на веќе понуденото зголемување на платите како во јавниот сектор.

The post Протестот на вработените во МИА ставен во мирување во очекување на исполнување на ветувањето на премиерот Ковачевски appeared first on Република.

Вработените во Медиумска информативна агенција денеска одново во време на паузата излегоа за да го изразат незадоволството од непостапување по нивните барања.

Тие излегоа на шести предупредувачки протест поради тоа што нивното барање за зголемување на платите не се најде на дневен ред на владината седница одржана на 1 август годинава. Тие покрај зголемувањето на платите, бараат и порамнување на трошоците за живот.

Новинарите и медиумските работници во МИА повторија дека се разгледуваат сите опции за радикализација на протестот доколку не се реализираат нивните барања. Тие рекоа дека за тоа ќе се разговара на следниот собир на вработените закажан за понеделник.

The post Вработените во МИА повторно на предупредувачки протест appeared first on Република.

Вработените во МИА денеска повторно излегоа на предупредувачки протест во траење од половина час пред просториите на Агенцијата откако зголемувањето на платите не се најде на дневен ред на владината седница одржана на 1 август 2023 година.

Самостојниот синдикат на новинари и медиумска работници од почеток ги поддржува колегите во МИА, бидејќи оценува дека нивните барање се сосема реални и предупредува дека Агенцијата има исклучително важна улога во целокупното медиумско информирање во земјава.

Вработените во Медиумската информативна агенција на новиот протест ги повторија барањата за зголемување на платите и порамнување на трошоците за живот. Исто така вработените во МИА најавија дека по неповолниот развој на настаните одново ќе ги разгледаат другите форми на реакција односно преминување на протестот во нова фаза што би можело да претпоставува и прекин на определен период на дистрибуција на вести.

Новинарите и медиумските работници во МИА очекуваат дека за брзо време ќе се изнајде решение во полза на двете страни, а со тоа и не би имало дополнителни импликации на целиот медиумски простор во Македонија.

The post Вработените во МИА продолжија со протестот appeared first on Република.

Без одговор од Владата за зголемување на нивните потпросечни плати, вработените во Медиумската информативна агенција трет ден по ред одржаа предупредувачки протест за време на получасовната пауза.

Тие имаат повеќе бањата до Владата , но како што велат од Синдикалната организација, најитно е зголемувањето на платите за 30% и порамнување со трошоците за живот.

Имаат и финансиски план за годинава кој предвидува пораст на платите, без екстра трошоци од буџетот, но за дозвола чекаат од Владата, со надеж дека набрзо ќе има позитивна разрешница.

Поддршка на протестите добија од Самостојниот синдикат на новинари и медиумски работници , кој оцени дека барањата на вработените во МИА се легитимни, бидејќи како што велат, слободата на медиумите и на говорот, па и борбата против лажните вести се невозможни, ако новинарите и медиумските работници земаат потпросечни плати.

The post Вработените во МИА трет ден на предупредувачки протест за повисоки плати appeared first on Република.

Го поддржуваме предупредувачкиот протест на Македонската информативна агенција која денес својот револт кон владата го изрази на овој начин, велат од ВМРО-ДПМНЕ.

Овој чин се случува за прв пат после 25 години и го покажува начинот на кој Владата ги третира медиумските работници. Власта на СДС и ДУИ во континуитет ги лаже сите граѓани и купува специјален мир со секакви ветувања кои на крајот не се реализираат. Иако ветуваа дека покачувањето на платите на вработените во МИА е предвидено во финансискиот план за 2023 година, повторно ова остана уште едно празно ветување на власта.

Како политичка партија која ги почитува и вреднува медиумските работници и се залага за подобрување на нивните економски состојби кои ќе резултираат со достоинствена, професионална и слободна средина за работа секогаш ќе се залагаме за задоволување на барањата на медиумските работници.

Власта на СДС и ДУИ уште еднаш докажа дека не ја почитуваат медиумската слобода, потполната независност и овозможување на раст на платите во новинарството, велат од партијата.

Вработените во МИА денеска излегоа на предупредувачки протест со барање за зголемување на платите.

Првпат во 25-годишното постоење на МИА вработените се принудени преку протест да бараат остварувања на нивните права. Денешниот предупредувачки протест е поради игнорантскиот однос на Владата кон барањата за зголемување на платите согласно Колективниот договор и усогласување со трошоците за живот, изјави Марина Илиевска, вработена во МИА и член на ИО на Самостојниот синдикат на новинари и медиумски работници (ССНМ).

Таа информираше дека МИА повеќе месеци чека барањето за зголемување на платите да биде ставено на дневен ред на седница на Влада.

Зголемувањето на платите во МИА е предвидено во планираните расходи за плати утврдени во Финансискиот план за 2023 година односно за тоа не се потребни дополнителни финансиски средства од Буџетот, дополни таа.

Илиевска посочи дека поради потпросечните плати и неодобрувањето на нови вработувања, МИА веќе се соочува со одлив и недостаток на кадар.

The post Власта на СДСМ и ДУИ докажа дека не ја почитува медиумската слобода, поддршка за предупредувачкиот протест на МИА appeared first on Република.

Вработените во Мeдиумската информативна агенција (МИА) утре излегуваат на предупредувачки протест со барање за зголемување на платите.

Предупредувачкиот протест ќе се одржи пред просториите на АД МИА со почеток во 11 часот, во траење од половина час, за време на паузата.

Протестот се организира со поддршка на Самостојниот синдикат на новинари и медиумски работници (ССНМ) и Синдикатот на медиумски информативни агенции (СМИА).

Новинарите и медиумските работници од МИА веќе подолго време бараат покачување на нивните плати, согласно Колективниот договор и усогласување со трошоците за живот, но Владата досега не најде за сходно да одобри зголемување на платите во овој државен медиум.

Предупредувачките протести ќе продолжат и во наредните денови, а во случај тие да не резултираат со разбирање и прифаќање на барањата на вработените, ќе бидат преземени и порадикални чекори.

ССНМ ги повикува сите вработени во АД МИА да се приклучат кон протестот.

The post Вработените во државната МИА на предупредувачки протест, бараат повисоки плати appeared first on Република.

Значителното намалувањето на буџетот на Медиумската информативна агенција (МИА), како и укинувањето на нејзините дописништвата од Вашингтон, Брисел и Атина, ја загрозуваат основната функција на оваа медиумска куќа – реагираа денеска Здружението на новинарите на Македонија (ЗНМ) и Самостојниот синдикат на новинари и медиумски работници (ССНМ) на заедничка прес-конференција.

Потребно е Владата да даде итна поддршка во напорите да се изнајде решение за непречено функционирање на странските дописништва на МИА и наместо затворање на постоечките дописништва потребно е уште посилна мрежа на дописници кои ќе работат во интерес на јавноста и во придонес на медиумскиот плурализам за прашања од јавен интерес за граѓаните, посочија претставници на новинарсите здруженија.

Истовремено, беше истакнато дека МИА треба да биде изземена од мерките за штедење, односно да се изнајде начин да не дојде до намалување на буџетот за следната година бидејќи тоа ќе предизвика негитвни последици како за вработените новинари и медиумски работници, така и за квалитетот на содржините и информациите кои произлегуваат од овој медиум.

Со намалување дописничката мрежа директно се влијае и на нарушување на професионалните стандарди на новинарите, со што се губи објективноста при информирањето, се појавува ризик од непроверени, а со тоа и неточни информации. На крајот, жртви ќе бидат граѓаните и јавниот интерес, зошто единствен канал за информирање од овие земји ќе бидат странските канали. Затоа е нужно владата да има разбирање за овој проблем и итно да реагира со цел да се превенира штета, затоа бараме веднаш враќање на парите потребни за нормално функционирање на МИА – изјави претседателот на ЗНМ Младен Чадиковски.

МИА како генератор на вести и информативен сервис на граѓаните, треба да биде првиот филтер на информации за широката јавност и клучна алатка за борба против дезинформациите кои претставуваат се поголем проблем посебно во ерата на дигиталните медиуми.

За жал и оваа година, пред Нова година наместо да зборуваме за повисоки плати, нови перспективи за медиумските работници, како синдикат и медиумски партнерски здруженија ви се обраќаме јавно со реакција за прекин на работни договори и губење на егзистенцијата. Денес проблемите се во МИА, кои се предизвикани од наметнатите мерки за штедење на владата. Владата наместо да остави позитивен пример во време на криза и да ја зачува егзистенцијата и сигурноста на работните места, токму спротивно, удри врз единствениот медиум за кој е одговорна и го намали буџетот со кој се нарушува тековното работење. Со овој негативен пример владата прикажа негативна пракса која сега непречено може да се применува во приватниот сектор, токму онаму каде што медиумските работници се најранливи – рече претседателот на ССНМ Павле Беловски.

На прес-конференцијата присуствуваше и Драган Антоновски, актуелниот директор на МИА.

Ние го анализиравме овој процес веќе подолго време. Цела година предупредуваме дека тие буџети кои нам ни се одредуваат се апсолутно несоодветни. Ние зборуваме за одржливост, наместо за инвестирање и развој. Владата постојано ни вели дека ќе го има тоа предвид, закажани се и средби за разговор. Нас ни е јасна поентата на тоа што и претседателот на ЗНМ го истакна, ние покренавме иницијатива, разговаравме со ОБСЕ, да се отвори дебата за измена на закон за медиуми, бидејќи досегашниот концепт за финансирање не е добар. Според нашите анализи, единствено можно решение за финансиска одржливост е закон за МИА, каде што меѓународните организации се понудија да помогнат во тој контекст, ставено е во програмата на ОБСЕ и ЗНМ. Тоа за нас значи некаква стабилност која ќе придонесе на континуитет, наместо да се случи на половина година измена односно повлекување на парите – рече Антоновски.

На прес-конференција беше истакнато и дека согласно со правните анализи кои ги има објавено ЗНМ пред речиси две години најсоодветен начин на организација на МИА е по примерот на МРТВ, чиј основач и надлежна институција пред која полага одговорност, е Собранието. Во таа насока, потребни се законски измени со кои ќе се гарантира дека Владата нема да има влијание во изборот на менаџментот во МИА, а истовремено ќе се обезбеди модел со кој ќе се гарантира финансиската независност во работата на оваа агенција, која според актуевлниот закон е владина, а треба да биде државна агенција.

The post ЗНМ и ССНМ за кратењето на парите на МИА: Штетно е за јавноста, Агенцијата останува и без дописништвата во странство appeared first on Република.

Самостојниот синдикат на новинари и медиумски работници (ССНМ) испрати допис со барање до Владата на РС Македонија да не се намалуваат платите на новинарите и медиумските работници во Медиумската информативна агенција. ССНМ се спротивставува на планот за намалување на платите и другите додатоци во Медиумската информативна агенција, како дел од владиниот план за фискална одржливост бидејќи планираното намалување негативно ќе влијае врз работата на новинската агенција.

Сметаме дека со најавениот План за фискална одржливост не може да бидат опфатени сите институции што се буџетски корисници поради нивната различна дејност. МИА е акционерско друштво во државна сопственост поради што е опфатена со владиниот план во кој е предвидено намалување на расходите, но предупредуваме дека дејноста која ја извршуваат новинарите и медиумските работници е од јавен интерес и како што е познато во услови на криза дополнително им се зголемува обемот на работа, но и одговорноста за нејзино професионално и објективно извршување.
Укажуваме и дека со намалување на средствата за буџетските корисници се опфатени и новите вработувања, со што исто така ќе се наруши процесот на работа на МИА.
Истовремено, остро се противиме и на делот од планот да се ревидираат колективните договори и сметаме дека на среден и долг рок тоа негативно ќе се одрази врз правата на новинарите и медиумските работници, но и на сите работници во државата.

ССНМ предлага во подготовката на Планот за намалување на расходите да се изнајде модус со кој нема да биде предвидено намалување на платите кои и онака се просечни, а менаџментот на МИА да се спротивстави на укинувањето или намалување на додатоците на плата.

The post ССНМ: Платите во МИА не смеат да бидат намалени appeared first on Република.

Претседателот Стево Пендаровски ја посети Медиумската информативна агенција - МИА по повод 24 -от роденден на агенцијата, што вчера беше одбележан со прием и изложба на фотографии.

Првата вест МИА ја емитуваше на 30 септември 1998 година, со што почна редовната продукција на информации за медиумите и граѓаните на земјава, во прво време со фотографии и текст, а денес и со видеопреноси во живо, целосен мултимедиумски израз и присутност на социјалните медиуми.

МИА е јавен информативен сервис, основан од Собранието на Република Македонија во февруари 1992 година, кој активно почна со работа пред 24 години. Својата работа државната агенција ја почна со дваесетина новинари, а денес има околу сто ангажирани лица – новинари, дописници од земјата и странство, сниматели, фоторепортери, стручни служби и логистика.

МИА има дневна продукција од околу 400 вести и други медиумски продукти на македонски, англиски и на албански јазик. Во изминатите пет години новина е видеосервисот, како и преносите во живо, кои дадоа сериозен придонес, како за изворно информирање на граѓаните кои сакаа во живо да ги следат настаните, така и на новинарските екипи од мас-медиумите, кои поради пандемијата на Ковид-19 и здравствените протоколи беа спречени да бидат на местото на настанот. И по завршувањето на пандемијата, преносите во живо останаа препознатлив печат на Агенцијата.

Произведува дневни информации, авторски текстови – интервјуа, стории, анализи, теми, специјални тематски потсервиси, клипинг за меѓународни институции, дневни и неделни пакет-информации, флеш вести, како и видео и фотосервис. Има соработка со над 50 регионални и светски агенции, дневна дистрибуција на медиумски продукти на МИА-сервиси до домашни, европски и светски институции.

Претплатници на МИА се сите релеванти и влијателни ТВ-куќи, електронските и печатените медиуми во земјава, македонските амбасади во странство, странски дипломатски и други претставништва и мисии во Македонија, како и медиуми на наши иселеници во странство.

МИА има потпишано договори за размена на вести и медиумски продукти со сите државни агенции во регионот, како и со повеќе приватни агенции од соседството. Исто така е и дел на информативните пулови на: Дојче веле (Германија), Слободна Европа, Гласот на Америка, АНСА (Италија), СТА (Словенија), ХИНА (Хрватска), БТА (Бугарија), АНА-МПА (Грција), АТА (Албанија), АНАДОЛИЈА (Турција), АПА (Австрија), ЕФЕ (Шпанија), МИНА (Црна Гора), ФЕНА и СРНА (БиХ), АГЕРПРЕС (Романија), ТАНЈУГ (Србија), ФОНЕТ (Србија), БГНЕС (Бугарија), УКРИНФОРМ (Украина), соработува и со големите новински агенции – Европската фотоагенција ЕПА, германската ДПА, британскиот јавен сервис Би-би-си, кинеската XСИНХУА…

The post Пендаровски гостин на 24. роденден на МИА appeared first on Република.

Медиумската информативна агенција - МИА денеска го отвори својот прес-центар во Софија, на чие отворањето присустуваа и премиерите на Македонија и Бугарија, Димитар Ковачевски и Кирил Петков. Претходно такво нешто во Скопје направи и бугарската новинска агенција БТА

Ковачевски и Петков го оценија отворањето на прес-центарот на МИА во Софија како мошне важен чекор во насока на унапредување на севкупната соработка меѓу двете земји.

Премиерот Ковачевски во обраќањето на отворањето нагласи дека е задоволство кога нешто се работи и кога тоа дава резултати, потенцирајќи дека пред само една недела во Скопје беше отворен прес-центарот на Бугарската телеграфска агенција (БТА), а сега, по само неколку дена, се отвора прес-центарот на МИА во Софија.

Не е значајно само тоа што имаме прес-центри на двете главни државни новински агенции, туку уште позначајно е што ќе има агенции што ќе споделуваат информации, кои се веродостојни и кои ќе ги одразуваат добрите односи меѓу двете држави - изјави Ковачевски.

Според него, оваа размена на информации е значајна во време кога меѓу двете држави започна процес на враќање на довербата и зајакнување на соработката меѓу институциите и деловните заедници, од што, како што рече, ќе има за што да се информира.

Ќе има да се информира за позитивни работи и тоа ќе претставува пополнување на медиумскиот простор со тоа што го правиме во знак на пријателство меѓу двете држави, во духот на европските вредности и исто така ќе претставува контратежа на сите оние лажни вести, на онаа пропаганда, којашто ги носи односите меѓу двете држави на многу ниско ниво - потенцира Ковачевски.

Тој нагласи дека со неговиот колега Петков ќе работат на економско и трговско зближување на двете земји, а МИА и БТА ќе имаат задача да ги информираат граѓаните за сработеното и за бенефитите од тоа зближување.

Бугарскиот премиер Петков во обраќањето потенцира дека се радувам што со Ковачевски ја одржуваат само втората средба, а веќе почнаа да доаѓаат резултати од новиот приод во соработката.

Од сега натаму ќе биде вака. Секоја недела очекуваме реални, конструктивни резултати - нагласи Петков, додавајќи дека и МИА и БТА ќе треба да дадат свој придонес кон зајакнување на таа соработка.

Тој потенцира дека очекува конкретни резултати од утрешната заедничка седница на владите на двете земји и потпишување на повеќе договори, за што, како што потенцира, ќе информираат и двете агенции.

На отворањето присустуваа директорите на МИА и БТА, Драган Антоновски и Кирил Влчев, јави известувачот на МИА од Софија.

Во обраќањето на отворањето, Антоновски истакна дека МИА објавува информации на три јазици – на македонски, албански и англиски и има одлична соработка со сите регионални агенции, а дополнително со БТА склучи и договор за размена на информации, кои се објавуваат во исто време во изворна форма, како проверена, брза и точна информација и како „наш придонес за справување со лажните вести“.

Тој потсети дека МИА веќе една година има дописник од Софија , а со отворањето на прес-центарот, што се наоѓа во Културно-информативниот центар на Република Македонија во Софија, Агенцијата, како што нагласи, ќе придонесе повеќе во информативниот дел на КИЦ.

Се надевам дека овој момент на отворањето на прес-центрот уште повеќе ќе придонесе за побрзи и поточни информации за се она што се случува и во Република Бугарија и во Република Македонија - потенцира Антоновски.

За време на посетатa на Петков во Скопје, свој прес-центар, отвори и бугарската новинаска агеција – БТА, а сето тоа е согласно соработката меѓу двете агенции, која се интензивираше со потпишувањето на Договорот за размена на информации и професионална соработка.

Договорот беше потпишан во мај минатата година во делегацијата на Европската Унија во Рим од страна на директорите на двете агенции, а во присуство на претседателите на Македонија и Бугарија, Стево Пендаровски и Румен Радев.

The post МИА отвори Прес-центар во Софија appeared first on Република.