Три филмови на македонски режисери ќе бидат прикажани на Меѓународниот филмски фестивал во Нанси (ФИФН), во рамки на програмата „Aye Aye Cinema Express“, што се одржува од 25 до 29 септември годинава.

Според програмата, ќе биде прикажан филмот „Џипси Меџик“ на режисерот Столе Попов, кој во 2016 година на барање на еден од главните актери на филмот Предраг – Мики Манојловиќ беше повторно преведен и титлуван на француски јазик и повторно и беше прикажан на француската публика, која и му ја додели наградата на публиката.

Во селекцијата на фестивалот се наоѓа и краткометражниот филм на Марко Ѓоковиќ „Еклер“, кој во 2017 година ја доби Големата награда на фестивалот за краткометражен филм.

Француската публика исто така ќе има можност повторно да го открие и краткометражниот експериментален филм на Милчо Манчевски „Kрајот на времето“.

Публиката на ФИФН е навикната да гледа македонски филмски продукции, кои се редовно застапени на големиот екран. Изминатата година тука беше претставен филмот „До Балчак“ и „Џипси Меџик“ со наградата на публиката на Столе Попов, а беа прикажувани и филмовите „Пред дождот“ и „Мајки“ на Милчо Манчевски, „Панкот не е мртов“, „Незаборавена пролет во заборавено село“ на Куштрим Бектеши, „Јас сум од Титов Велес“ на Теона Митевска, „Исцелител“ на Ѓорче Ставревски, кој ја доби наградата на публиката, „Годината на мајмунот“ на Владимир Блажевски, како и Големата награда на фестивалот за „Со љубов“ на Илија Цветковски во селекцијата на документарни филмови во 2018. „Медена земја“ на Љубомир Стефанов и Тамара Котевска првпат беше прикажан во Франција на фестивалот во Нанси, како и „До Балчак“ на Столе Попов, Игор Иванов Изи со филмот „Хомо“ беше и член на жирито на фестивалот и Вардан Тозија со филмот „Џган“.

Во 2024 година, Фестивалот организираше посебен фокус на филмската продукција на земјите од Балканот: Македонија, Грција, Албанија, Косово, Бугарија, Србија, Босна и Херцеговина и Хрватска. Во рамки на фестивалот беше помесетена и изложбата на „Фотографското творештво на браќата Манаки во контекст на Првата светска војна“ од авторот Роберт Јанкулоски.

Со овој филмски фестивал во Франција, волонтерски раководи Тони Гламчевски - новинар и дописник на повеќе македонски медиумски куќи во Франција, кој ја врши функцијата претседател и главен селекционер (уметнички директор) на фестивалот од 2013 година, заедно со неговата сопруга Бландин Брунхес - Гламчевски – директорка на фестивалот.

Филмскиот фестивал од Нанси веќе неколку години соработува со Центарот за култура - Битола во организирањето на филмскиот фестивал за млада публика „Малата школа на краткиот филм“, која годинава се очекува по четврти пат во Битола и Меѓународниот етнографски филмски фестивал – Илинденски денови од Битола. Целта на фестивалот од Нанси е надминување на границите и предрасудите.

The post Три македонски филмови на Меѓународниот филмски фестивал во Нанси appeared first on Република.

Во Берлин утре почнува 72. Меѓународен филмски фестивал (Берлинале). За главните награди ќе се борат 18 филмови.

Фестивалот ќе трае до 16 февруари, а ќе биде отворен со филмот „Питер фон Кант“ на режисерот Франсоа Озон, со Изабел Аџани во главната улога. Покрај него, во трката за награди се и филмовите „Со љубов и одлучност“ (Avec amour et acharnement) на Французинката Клер Дени, со Жилиет Бинош во главната улога и „Сѐ ќе биде во ред“ на француско-камбоџанскиот режисер Рити Пан.

Жирито на третиот најголем европски филмски фестивал по Кан и Венеција, ќе го предводи американскиот режисер М. Најт Шајамалан. Фестивалот годинава ќе се одржува главно со физичко присуство на гостите (минатогодишното издание беше „онлајн“ поради пандемијата на коронавирусот).

Француската глумица Изабел Ипер ќе ја добие почесната „Златна мечка“ за животно дело.

„Златната мечка“ лани ја освои филмот „Трнлив хаос и евтино порно“ (Babardeala cu bucluc sau porno balamuc) на романскиот режисер Раду Жуде.

Берлинскиот меѓународен филмски фестивал е основан 1951 година, а од 1978. редовно се организира секоја година во февруари. Фестивалот доделува „Златна мечка“ за најдобар филм, „Гран-при“ на жирито, како и „Сребрени мечки“ за најдобар режисер, глуумец, глумица, сценарио и филмска музика. Од 1992 година, фестивалот ја доделува и наградата „Теди“ за филм кој се занимава со ЛГБТ-популацијата.

Во 2020 година, организаторите ја укинаа наградата „Алфред Бауер“ за режисери кои отвараат нови гледишта во кинематографијата, именувана по поранешниот директор на фестивалот, откако се откри дека тој бил поврзан со нацизмот.

The post Во Берлин почнува 72. Меѓународен филмски фестивал – Берлинале appeared first on Република.