Нашиот пијанист од светски глас Симон Трпчески ја заокружи мини-турнејата што опфати настапи со една од најголемите музички ѕвезди, легендарниот виолинист Максим Венгеров на најпрестижните светски музички сцени.

По исклучителните концерти во лондонската сала „Барбикан“ и њујоршката „Карнеги хол“, синоќа двајцата уметници ја одушевија и француската публика на концертот во салата на Париската филхармонија, изведувајќи дела од Моцарт, Прокофјев, Франк и Равел. И овој пат на долготрајните аплаузи и стоечките овации, тандемот Венгеров-Трпчески возврати со три изведби на бис, соопштија од КултурОп.

Во изјавите за МРТ, прославениот виолинист Максим Венгеров, добитник и на наградата „Греми“, ја истакна извонредната соработка со македонскииот пијанист Симон Трпчески.

Одамна се знаеме со Симон и сме прекрасни пријатели од почеток. Со некои луѓе веднаш се воспоставува хемија и ова е таков случај. Долго време се надевавме дека ќе работиме заедно и еве се случија минатогодишниот настап во Белгија и оваа прекрасна мини тура концерти во Лондон, Њујорк и Париз. Ми беше позната комплетната работа на Симон и во него препознав многу сензитивен партнер. Навистина се надевам дека ќе свириме и во иднина, дека можеби ќе успееме нешто заеднички да снимиме , а и повторно би сакал да дојдам во неговата родна Македонија, рече Венгеров.

Трпчески пак возврати на честа и задоволството да ја дели сцената со еден од најдобрите виолинисти на сите времиња.

Оваа година навистина не можеше да почне поубаво. Ова е доказ дека соништата се остваруваат: на најпрестижните сцени настапив со Максим Венгеров. Чест е да се настапи со него. Освен 40-годишната кариера, тука се и неговата едноставност и големо срце што исто се чувствува на сцена во неговата исклучителна интерпретација на музиката. Се радувам што нашата искреност и фантастичното поврзување на сцената толку убаво беа препознати и од публиката, изјави Трпчески, кого наредниот месец го очекуваат гостувања во Германија и Ерменија.

фото: КултурОп

The post Мини-турнејата на Трпчески и Венгеров со извонредна завршница во Париз appeared first on Република.

Тандемот Максим Венгеров – Симон Трпчески на 20 јануари го одржаа вториот концерт од мини-турнејата на најпрестижните светски сцени, овојпат во „Карнеги хол“ во Њујорк. По исполнувањето на програмата за концертот во преполна сала и со стоечки овации, двајцата врвни уметници ја израдувале публиката со дури три изведби на бис.

По Лондон и Њујорк, македонскиот пијанист од светски глас Симон Трпчески и легендарниот виолинист Максим Венгеров, веќе в четврток, на 27 јануари, ќе настапат во Париз.

По минатогодишниот прв заеднички настап на фестивалот „Музика Мунди“ крај Брисел во Белгија, македонскиот пијанист Симон Трпчески месецов настапува на три од најпрестижните светски концертни сцени заедно со легендарниот Максим Венгеров, кој се смета за еден од најголемите виолинисти на сите времиња, известија од „КултурОп“.

The post Стоечки овации и три биса за Симон Трпчески и Максим Венгеров во „Карнеги хол“ во Њујорк appeared first on Република.

По минатогодишниот прв заеднички настап на фестивалот „Музика Мунди“ крај Брисел во Белгија, македонскиот пијанист од светски глас Симон Трпчески месецов настапува три од најпрестижните светски концертни сцени заедно со легендарниот Максим Венгеров, кој се смета за еден од најголемите виолинисти на сите времиња.

Синоќа (10 јануари), серијата камерни концерти стартуваше на сцената на лондонската сала Барбикан. Двајцата врвни уметници настапија со дела од Моцарт, Прокофјев, Франк и Равел.

Нашето пријателство датира веќе неколку години. Уште пред 20 години нашиот заеднички продуцент од ЕМИ Класикс, Џон Фрејзер, ни зборуваше на двајцата посебно дека еден ден треба да се споиме на сцена, аналогно на нашите музички темпераменти и менталитети. По толку долго време, на наша лична иницијатива спонтано доаѓа до оваа соработка, која за мене претставува огромна чест и некаков врв во нашата професија, бидејќи се работи за човек што има создадено историја на многу млади години и остава длабока неизбришлива трага во историјата на интерпретативната уметност. Многу се радувам! - вели Трпчески по повод стартот на оваа извонредна концертна комбинација.

Таа очигледна радост на двајцата безвременски уметници резултираше со стоечки овации и дури 3 изведби на бис за пребирливата лондонска публика.

Тандемот Венгеров-Трпчески веќе на 20 јануари ќе настапи во Карнеги Хол во Њујорк, а на 27-ми овој месец и на големата сцена на Париската филхармонија.

The post Стоечки овации за Трпчески и Венгеров во Лондон appeared first on Република.